1. ¿Desanimarishca cashpaca ima shinataj sintirinchij?

CADA punllami problemacunahuan chꞌimbapurangapaj esforzarinchij. Pero desanimarishca cashpaca cai problemacunata mishanaca sinchimi canga. Shinallataj imapaj mana valishca shina, mana cushilla sintirishunchu. Proverbios 24:10-pica: “Imata ruranapipish mana cꞌari cꞌari cajpica, imapish ashtahuan ashtahuan sinchimi ricuringa” ninmi.

2. a) ¿Imamantataj maipica desanimarinchij? b) ¿Cai yachaipica imatataj yachashun?

² Chꞌican chꞌican cosascunamantachari desanimari tucunchij. Por ejemplo, ñucanchij juchacunamanta, imapi pandarishcacunamantachari desanimarinchij. Shinallataj ungushca cashcamanta, congregacionpi ima responsabilidadta mana chasquishcamantami tal vez desanimari tucunchij. Mana cashpaca Yayitu Diosmanta gentecuna mana uyasha nijpichari desanimarinchij. Cai yachaipimi desanimarishca cashpapish ñaupajman catingapaj imata rurana cashcata yachashun.

3. ¿Pandarishpapish ama desanimaringapajca imatataj yuyarina canchij?

³ Ñucanchij pandarishcacunallapi yuyashpaca Yayitu Diosca paraíso Allpapi causachunca ñucata mana saquingachu nishpami yuyai callarishun. Chashna yuyashpaca ñucanchijllatajmi desanimarishun. Romanos 3:23-pica tucuicuna juchayujcuna cashcatami yachachin. Jesusllami mana juchayuj carca. Juchayujcuna cajpipish Jehová Diosca ñucanchij pandarishcacunallataca mana ricucunchu. Jucha illaj cachunpish mana shuyanchu. Paica cꞌuyaj, pacienciata charij Yayami can. Paica allita rurangapaj  esforzarishcataca allimi yachan. Chaimantami ayudangapajca listo can (Romanos 7:18, 19).

4, 5. 1 Juan 3:19, 20-pi nishca shinaca ¿ishqui panicuna ama desanimarishca sintiringapajca imatataj rurarcacuna?

⁴ Deborapaj, Mariapaj ejemplocunata ricushun. * Débora uchillaraj cajpica paipaj familiaca mana cꞌuyaita ricuchircachu. Allitami rurashcangui nishpapish mana nunca nijcunachu carca. Chashna tratashcamantami imapaj mana valishca shina sintirirca. Chaimantami imapi pandarishpaca mana imapaj valinichu, chaita allichinataca mana valishachu nishpa yuyaj carca. Mariapish casi chashnallatajmi sintirirca. Paipaj familiacunapish imapaj mana valishcata shinami ricujcuna carca. Paica bautizarishca qꞌuipapish testigo de Jehová canataca mana mericinichu nishpami yuyaj carca.

⁵ Cai panicunaca cashna laya llaquicunata charishpapish Jehová Diosta sirvinataca mana saquircacunachu. ¿Ama desanimarishca sintiringapajca imatataj rurarcacuna? Paicuna ima shina sintirishcataca Jehová Diosta tucui shunguhuan mañashpami paipaj maquipi saquircacuna (Salmo 55:22). Ñaupa causaita yuyarishpa ñucanchij desanimari tucushcataca Yaya Diosca allimi yachan. Ñucanchij mana alli cualidadcunata charishcapi yuyajpipish Yayitu Diosca ñucanchij alli cualidadcunatami ricun (1 Juan 3:19, 20-ta liyipai).

6. ¿Maijanca shuj viciota saquingapaj esforzarishpa, cutin chai viciopi urmashpaca ima shinataj sintirin?

⁶ Maijanca ima viciota saquingapaj esforzarishpapish cutin chai viciopi urmashpami desanimarishca sintirin. Tucuicunami ima juchata rurashpaca mana alli sintirinchij (2 Corintios 7:10). Pero imapaj mana valinichu, Jehová Diospish mana perdonangachu nishpaca mana yuyanachu canchij. Chashna yuyashpaca Jehová Diosmantami caruyashun. Proverbios 24:10-pica desanimarishca cashpaca fuerzasta mana charishunchu nishpami yachachin. Ama desanimaringapajca Jehová Diostami perdonachun mañana canchij (Isaías 1:18). Ñucanchij shungumanta arrepintirishcata ricushpaca paica perdonangami. Pushaj huauquicunamanpish huillashunchij. Paicunami pacienciahuan Diosta cutin alli sirvichun ayudangacuna (Santiago 5:14, 15).

7. ¿Pandarishpapish imamantataj mana desanimarina canchij?

⁷ Francia llajtamanta Jean-Luc shuti pushaj huauquica juchapi ama urmangapaj esforzarijcunataca: “Imapi pandarishpapish arrepintirishpa, cutin chaipi ama urmangapaj esforzarishpaca Jehová Diospaj ñaupajpimi alli ricurishun” ninmi (Romanos 7:21-25). Chaimanta Diospaj ñaupajpica mana nunca alli  ricurishachu nishpaca mana yuyanachu canchij. Tucuicunami juchayuj cashcamantaca imapipish pandarinchij. Pero Jehová Dios paipaj Churita cushcamantami Diospaj ñaupajpipish alli ricuri tucunchij (Efesios 1:7; 1 Juan 4:10).

8. ¿Desanimarishca cashpaca picunapaj ayudatataj mashcana canchij?

⁸ Desanimarishca cashpaca huauqui panicunapaj ayudata mashcashunchij. Paicunaca ñucanchij ima shina sintirishcata uyangapaj, animangapajmi listos can (Proverbios 12:25; 1 Tesalonicenses 5:14). Nigeria llajtamanta pani Joy ama desanimarishca sintirichun paita ima shina ayudashcata ricushun. Paica: “Turi ñañacuna congregacionpi mana tiyajpica ima shinachari caiman. Ñuca mañashcata Jehová Dios turi ñañacunahuan cutichishcatami cuentata cuni. Paicunaca shujtajcuna desanimarishca cajpi ima shina ayudanatami yachachishcacuna” ninmi. Pero huauqui panicunaca ñucanchij animachun minishtishcataca mana siempre cuentata cungacunachu. Chaimantami desanimarishca cashpaca ñucanchijta animachun experienciata charij huauqui panicunapaj ayudata mashcana canchij.

9. ¿Salmo 41:3 y 94:19-pi nishca shimicunaca, ama desanimarishca sintiringapajca ima shinataj animan?

⁹ Jehovapaj ayudata mashcashunchij. Ancha ungüihuan cashpaca cushilla canaca sinchimi ricuringa. Chashna ancha ungushca cajpica Jehová Diosca shuj milagrota rurashpa ñucanchijtaca mana jambingachu. Pero ahuantachun, fuerzasta charichunmi animota cunga (Salmo 41:3; 94:19-ta liyipai). ¿Animangapajca Diosca imatataj ruran? Paica huauqui panicunamanca ungushcacunata ayudana munaitami cun. Chaimantami huaquin huauqui panicunaca ungushcacunapajca comprasta rurashpa, huasi ucupi ima ruraicunahuan ayudancuna. Shinallataj ungushcacunahuan Diosta mañashpami ayudancuna. Yayitu Diospish ungushcacuna animachij versocunata yuyarichunmi ayudan. Paraíso Allpapi ungüicuna, llaquicuna mana tiyanata yuyarishpa cushilla sintirichunmi animan (Romanos 15:4).

10. ¿Huauqui Isangca ama yallitaj llaquilla sintiringapajca imatataj rurarca?

¹⁰ Nigeria llajtapi causaj huauqui Isangca shuj jatun accidentetami charirca. Paitaca doctorca: “Mana nunca puri tucunguichu” nircami. Paica: “Shungu pꞌaquirishca, yallitaj desanimarishcami sintirircani” ninmi. ¿Ama yallitaj llaquilla sintiringapajca imatataj rurarca? Paica: “Ñuca huarmihuanca Yaya Diosta mañanata, Bibliata estudianataca mana nunca saquircanchijchu. Ashtahuanpish Yayitu Dios imallata cushcamanta, paraíso Allpapi causana esperanzata cushcamantapishmi agradicircanchij” ninmi.

11. ¿Cindyca ungushca cashpapish cushilla sintiringapajca imatataj rurarca?

¹¹ Mexicopi causaj pani Cindytaca doctorcunaca ancha ungüita charishcatami huillarcacuna. ¿Cai panica cashna sinchi llaquitaca ima shinataj chꞌimbapurarca? Paica tratamientota chasquicushpaca cada punlla huillangapajmi shuj metata churarca. Paica: “Operarinapi o nanaillapi yuyanapaj randica cada punlla huillangapajmi esforzarircani. Chashnami ñuca ima shina sintirishcallapica mana yuyarcani. Doctorcunahuan, enfermerocunahuan parlashpapish paicunapaj familiacunamantami tapuj carcani, “¿imamantataj cai sinchi trabajotaca agllarcanguichij?” nishpapishmi tapurcani. Chashnami paicuna imacunamanta yachasha nijta ricushpaca huaquin temacunata mashcarcani. Chaimi doctorcunapish, enfermerocunapish ‘shujtaj pacientecunaca mana ñucanchijmanta preocuparinchu, pagui  preocuparishcamanta’ nishpa agradicircacuna. Huaquincunacarin paicunapaj direccionta, número de telefonotapishmi curcacuna. Chashna llaquilla horascunapimi Jehová Diosca ñuca cushilla sintirichun ayudarca” ninmi (Proverbios 15:15).

12, 13. ¿Ungushca cashpapish, mayorlla cashpapish predicashpa catingapajca huaquin huauqui panicunaca imatataj rurancuna?

¹² Huaquin huauqui panicunaca ima ungüimanta, mayorlla cashcamantami paicuna munashca shinaca mana tanto huillai tucuncuna. Chaimantami paicunaca desanimarishca sintirincuna. Ungushca cashpapish, mayorlla cashpapish huillangapajmi tucui pudishcata rurancuna. Estados Unidosmanta pani Laurelca 37 huatacunatami pulmón de acero nishca máquina ucupi causarca. Shinallataj cáncer ungüitami charirca, operarinapishmi carca. Cuerpopipish chꞌican chꞌican ungüicunatami charirca. Cashna sinchi ungüicunata charishpapish huillanataca manataj saquircachu. Enfermerocunaman, paipaj huasipi ayudanaman rijcunamanpishmi predicaj carca. Paica casi 17 gentecunatami Jehová Diosta sirvichun ayudarca. *

¹³ Huaquin yuyajlla huauqui panicunaca huasimantami mana llujshi tucuncuna, o mayorllacunata cuidana huasipimi cancuna. Franciamanta pushaj huauqui Richardca cai mayorlla huauqui panicunamanmi cashna nishpa animan: “Publicacioncunataca gentecuna ricunalla pushtucunapimi churana can. Gentecuna publicación ladota pasashpa ima cashcata yachangapaj tapujpica mayorlla huauqui panicunaca jahuallami predicai tucuncuna. Chashnami huasin huasin mana predicai tucushpapish cushilla sintirincuna” ninmi. Huasimanta mana llujshi tucujcunapish cartata quillcashpa o telefonomantami cayashpa huillai tucuncuna.

14. ¿Davidmantaca imatataj yachanchij?

¹⁴ Congregacioncunapica Jehová Diosta ashtahuan sirvingapajmi huaquin responsabilidadcunata chasquinata yuyanchij. Pero ungushca cashcamanta, mayorlla cashcamanta o shujtaj cosascunamantami mana chasqui tucunchij. Cashna desanimarishca sintirijpica rey Davidpaj ejemplomi ayudai tucun. Davidca Diospaj huasitami shayachinata yuyarca. Pero Diosca chai huasita shayachichunca paitaca mana saquircachu. Shinapish chai huasita shayachichun Yayitu Dios agllashcatami apoyarca. Paica achca cullquihuan, orohuanmi ayudarca. Cai ejemplomi ñucanchijpajca alli can (2 Samuel 7:12, 13; 1 Crónicas 29:1, 3-5).

15. ¿Shuj huauquica ama desanimarishca cangapajca imatataj rurarca?

 ¹⁵ Francia llajtamanta Hugues shuti huauquica ungüimantami congregacionpi pushaj canata saquirca. Huasipipish imata mana rurai tucurcachu. Paica: “Callaripica imapajpish mana valinichu nishpami dimastij llaquilla sintirircani. Pero qꞌuipaca imata mana rurai tucushcapi yuyanapaj randica allita rurashcapimi yuyarcani. Diosta sirvinatapish manataj saquisha ninichu. Ñucaca Gedeón shina paihuan caj 300 runacuna shinami shaicushca cashpapish ñaupajman caticuni” ninmi (Jueces 8:4).

16. ¿Angelcunamantaca imatataj yachanchij?

¹⁶ Diosta alli sirvij angelcunapish ñucanchijpajca alli ejemplomi can. Shuj cutinca Jehová Diosca huaquin angelcunatami rey Acabta ima shina pandachingapaj huaquin yuyaicunata paicunapish nichun mañarca. Cada unomi paicuna ima yuyashcata Diosman huillarcacuna. Pero Diosca shuj ángel ima nishcallatami chasquirca. Can ima nishcami tucui alli llujshinga nircami (1 Reyes 22:19-22). Caita yachashpaca ¿caishuj angelcunaca desanimarircacunachu? ¿Paicunaca ‘ñucanchij nishcacunataca mana chasquinchu, deganami nishcanchij’ nishpachu yuyarcacuna? Paicuna chashna nishcataca ni maipi mana huillanchu. Angelcunaca humildecuna cashcamantami Jehová Diostaca siempre jatunyachisha nincuna (Jueces 13:16-18; Apocalipsis 19:10).

17. ¿Ima responsabilidadta mana chasquishpa ama desanimaringapajca imatataj rurana canchij?

¹⁷ Testigo de Jehová cana, Diospaj Gobiernomanta huillana tucuimanta yalli valishca cashcata yuyarishunchij. Congregacionpi ima mingashcacunaca mana tucui vidapajchu can. Pero Jehová Diospaj, huauqui panicunapajca humilde canami ashtahuan importante can. Chaimanta Jehová Diosta cashna humilde canata amataj saquingapaj mañashunchij. Bibliapi Diosta sirvijcunamanta humilde canatapish yachashunchij. Huauqui panicunata ayudangapajpish tucui pudishcata rurashunchij (Salmo 138:6; 1 Pedro 5:5).

18, 19. ¿Gentecuna mana uyasha nijpipish cushilla huillashpa catingapajca imatataj rurana canchij?

¹⁸ Gentecunata huasipi mana tarishpa, paicuna mana uyasha nijpica huaquinpica desanimarinchijchari. Pero ama desanimarishpa huillangapajca “ Cushilla huillashpa catishunchij” nishca recuadrota ricui. ¿Cushilla predicashpa catinaca imamantataj valishca can?

 ¹⁹ Jehová Diospaj shutimanta, paipaj Gobiernomanta huillana importante cashcataca mana cungarinachu canchij. Jesusca: ‘Huiñai causaiman apaj ñanpica ashacunallami yaicunga’ nircami (Mateo 7:13, 14). Predicashpaca Jehová Dioshuan, Jesushuan, angelcunahuanmi trabajanchij (Mateo 28:19, 20; 1 Corintios 3:9; Apocalipsis 14:6, 7). Ashtahuancarin Jehová Diosmi paita sirvisha nij gentecunataca paipaj organizacionman pushamucun (Juan 6:44). Huaquin gentecunaca huillajpica manachari uyasha nincuna. Pero qꞌuipami tal vez paicunaca uyanata munangacuna.

20. Jeremías 20:8, 9-pi nishca shinaca ¿ama desanimaringapajca imatataj rurana canchij?

²⁰ Profeta Jeremiasmantapish achcatami yachai tucunchij. Paica gentecuna mana uyasha nij lugarcunapimi huillarca. Gentecunaca paitaca cꞌamishpa yangamanta burlarishpami tucui punllacuna pasaj carca (Jeremías 20:8, 9-ta liyipai). Paica desanimarishca sintirishcamantami casi huillanata saquirca. Pero huillanataca ¿imamantataj manataj saquirca? Paica: ‘Diospaj shimicunaca ñuca shungupica nina rupachicuj shinami tucurca’ nircami. Chaimantami Jeremiasca huillanataca mana saquirca. Ñucanchijpish tucui punllacunami Diospaj Shimita liyishpa ima yachachishcataca ñucanchij shungupi huaquichina canchij. Chashnami ñucanchijpish Jeremías shina huillanataca manataj saquishun. Shinallataj huillanapipish cushillami sintirishun. Tal vez gentecunapish ashtahuan yachanatami munangacuna (Jeremías 15:16).

21. ¿Ama desanimarishca sintirichunca Jehová Diosca ima shinataj ayudanga?

²¹ Párrafo 4-pi parlashca Deboraca: “Desanimarishca sintirinaca Diablopaj trampami can” nircami. Pero Jehová Diosllami tucuimanta yalli poderoso can. Chaimanta desanimarishca cashpaca Diosman ima shina sintirishcata tucuita huillashunchij, paipaj ayudatapish mañashunchij. Paimi ñucanchij pandarijpipish, ungushca cajpipish ayudanga. Congregacionpipish ima mingashcacunahuan humildes cachunmi ayudanga. Predicajpi gentecuna mana uyasha nijpipish cushilla huillashpa catichunmi ayudanga. Jehová Diospaj ayudahuanmi desanimarishca canata mishashun.