1, 2. ¿Diosta sirvijcunaca imamantataj jahua pachapi causarinamantaca yachasha ninchij?

¿JAHUA pachapi causarinaca ima shinashi canga? Jahua pachapi causagrijcunaca chaipi causana esperanzata charishcamantami caimanta ashtahuan yachanata munancuna. Cutin cai Allpapi causana esperanzata charijcunapishmi jahua pachapi causagrijcunamanta ashtahuan yachanata munancuna. Paicuna jahua pachapi causarijpica cai Allpapi causajcunaca achca bendicioncunatami chasquingacuna.

² Diosca apostolcuna causashca punllacunapica Jesuspaj huaquin discipulocunamanmi jahua pachapi causarinamanta escribichun paipaj espíritu santota curca. Apóstol Juanca: “Ñami Diospaj huahuacuna canchij. Ñucanchij ima shina canataca manaraj ricuchishcachu. Ashtahuanpish pai ricurijpi, pai ima shina caj shinallataj tucuna cashcataca yachanchijmi” nircami (1 Juan 3:2). Cai versopi nishca shinaca jahua pachapi causarina esperanzata charijcunaca cielopi espíritu tucushpa causai ima shina canataca mana yachancunachu. Pero paicunaca caicunata mana alli yachashpapish jahua pachapi causarishpa Jehová Diosta ricunataca allimi yachancuna. Bibliapica jahua pachapi causarinamantaca huaquin yuyaicunallatami parlan. Apóstol Pabloca, Jesús mandajcunata, tucui poderyujcunata, huañuitapish chingachijpimi jahua pachapi causarijcunaca paihuan cangacuna nircami. Qꞌuipaca, Jesusca tucui ima tiyajta paipaj chaqui ucupi churashca huashaca paipish, jahua pachapi causarijcunapishmi Yaya Dios paicunata mandachun  saquingacuna (1 Corintios 15:24-28). Chashna pajtarijpica dimastij cushicunami canga. *

3. 1 Corintios 15:30 al 32-pi nishca shinaca ¿Pabloca causarinapi feta charishcamantaca imatataj chꞌimbapurarca?

³ Pabloca causarinapi feta charishcamantami tucui laya llaquicunatapish chꞌimbapurai tucurca (1 Corintios 15:30-32-ta liyipai). Pabloca corintocunamanca: ‘Punllantami pipish huañuchinalla puricuni. Éfeso pueblopipish pꞌiña animalcunahuanmi macanacurcani’ nircami. Pablo chashna nishpaca chai llajtapi tiyaj circopi huaquin animalcunahuan macanacushcatami nisha nicushcanga (2 Corintios 1:8; 4:10; 11:23). O tal vez judiocunapaj jarcaicunatami nisha nicushcanga. Mana cashpaca shujtajcuna pꞌiña animalcuna shina dimastij llaquichijcuna cashcatami nisha nicushcanga (Hechos 19:26-34; 1 Corintios 16:9). Pabloca cashna llaquicunahuan chꞌimbapurashpapish shamuj punllacunapi cushilla causaita charinata yachashpami ahuantarca (2 Corintios 4:16-18).

4. ¿Huañushcacuna causarinata yachashpaca ima shinataj Diosta sirvijcunataca ama manchachun ayudan? (Página 1-pi tiyaj fotota ricui).

⁴ Cunan punllacunapish sinchi llaquicunapimi causacunchij. Huaquin huauqui panicunatapishmi contracunaca llaquichishcacuna. Cutin shujtajcunaca paicuna causan llajtapi macanacuicuna tiyashcamantami mana seguros causancuna. Maijan lugarcunapicarin huauqui panicuna huillachunca mana saquincunachu. Chashna jarcajpipish paicunaca Diosta sirvishpami catincuna. Huaquincunaca carcelman rinata yachashpapish, huañunata yachashpapish Diosta sirvishpami catincuna. Paicunaca huañunataca mana manchancunachu. Shamuj punllapi Jehová Dios sumaj causaita cusha nishcapi yuyashpami sirvishpa catincuna. Chaimantami paicunaca ñucanchijpajca alli ejemplocuna can.

5. ¿Imacunapi yuyashpataj causarinapi crinata saquishun?

⁵ Pabloca huaquin huauqui panicuna: ‘Huañushcacunaca mana causaringachu. Chaimanta micushunchij, ubyashunchij cayaca huañushunmi’ nishpa yuyajpimi corregirca. Ñaupa punllacunapish huaquin gentecunaca chashnami yuyajcuna carca. Tal vez Pabloca Isaías 22:13-mantami parlacushcanga. Chaipica israelitacunaca Diospajman cꞌuchuyanapaj randica paicunapaj causaipi cushicunallata mashcashcatami ricuchin. Cunan punllapipish huaquin gentecunaca israelitacuna shinami: ‘Causaipi cushicushunchij. Causaica mana para siemprepajchu’ nincuna. Pero israelitacuna cashna yuyaicunata charishcamanta ima tucushcataca allimi yachanchij (2 Crónicas 36:15-20).

6. ¿Causarinapi ñucanchij feta sinchiyachingapajca ima shina amigocunatataj agllana canchij?

⁶ Corinto llajtapi causaj huauqui panicunaca huañushcacuna causarinapi mana crijcunahuanca mana tandanacunachu carca. ¿Caimantaca imatataj yachanchij? Causaillapi cushicushpa causashunchij nishpa yuyaj gentecunahuan tandanacushpaca llaquipimi urmashun. Ñucanchij alli causacushcatami pandachingacuna. Shinallataj Dios mana munashcatapish rurachunmi pandachingacuna. Ñucanchijpish huañushcacuna causarinapi crishcamantami pihuan pasangapaj tiempota agllacushpaca, alli ricushpa agllana canchij. Pabloca: ‘Mana allicunahuan tandanacujpica alli yuyaihuan chapaichij, ama juchata ruraichijchu’ nishpami consejarca (1 Corintios 15:33, 34, NWT ).

7. 1 Corintios 15:35-38-pi nishca shinaca ¿huaquincunaca huañushcacuna causarinamantaca imatataj tapushcacuna?

⁷ (1 Corintios 15:35-38-ta liyipai). Huaquincunaca causarinapi ama crichunmi pandachisha nincuna. Paicunaca ‘¿huañushcacunaca ima shina cuerpohuantaj causaringacuna?’ nishpami tapurij tucuncuna. Achca gentecunaca huañushca qꞌuipa ima tucunamantaca chꞌican chꞌican yuyaicunatami charincuna. Chaimantami Pablo ima nishcata alli yachana canchij. ¿Causarinamantaca Bibliapica imatataj yachachin?

8. ¿Jehová Dios huañushcacunata shujtaj cuerpohuan causachi tucushcataca ima shinataj yachanchij?

⁸ Jehová Diosca jahua pachata, cai pachatami rurashca. Chaimanta pi huañushpa ismujpipish ¿maitataj Jehová Diosca mana mushuj cuerpohuan causachi tucunga? (Génesis 1:1; 2:7). Dios huañushcacunata mushuj cuerpohuan causachinata intindichingapajmi Pabloca shuj ejemplohuan yachachirca. Pabloca: ‘Shuj muyuta allpapi tarpujpica granoca shuj plantami tucun. Cai plantaca ña mana muyu shinachu can’ nircami. Chashnallatajmi Jehová Diosca huañushcacunataca pai munashca mushuj cuerpohuan causachinga.

9. 1 Corintios 15:39 al 41-pi nishca shinaca ¿ima laya cuerpocunallataj tiyan?

⁹ (1 Corintios 15:39-41-ta liyipai). Pabloca ‘Dios rurashca tucui cuerpocunaca mana chai shinallatajchu can’ nircami. Gentecunapaj, huagracunapaj, pajarocunapaj, pescadocunapaj cuerpocunaca chꞌican chꞌicanmi can. Shinallataj Pabloca: ‘Cai pachapi caj cuerpocunapish, shujtaj shina sumajmi. Intipish shuj shinami achijyachin, lunapish shujtaj shinami achijyachin’ nircami. Estrellacunata mana ricushpapish cientificocunaca chꞌican chꞌican estrellacunami tiyan nincunami. Por ejemplo, huaquin estrellacunaca jatuncuna, uchillacuna, pucacuna, yurajcuna, quillucunami can. Ñucanchij intica quillu estrellami can. Pablopish  ‘jahua pachapi caj cuerpocunapish, cai pachapi caj cuerpocunapish tiyanmi’ nircami. ¿Cashna nishpaca Pabloca imatataj nisha nicurca? Cai Allpapi causajcunaca tulluyuj, aichayuj cuerpotami charinchij. Pero jahua pachapi causajcunaca espíritu cuerpocunatami charincuna. Angelcunami chashna cuerpota charin.

10. ¿Jahua pachapi causarijcunaca ima laya cuerpohuantaj causaringacuna?

¹⁰ Pabloca ima shina cuerpohuan causarinamanta parlashpaca “huañushcacuna causarinapish chashnallatajmi. Ismujllata tarpujpica, mana ismujmi causaringa” nircami. Maijan huañujpica paipaj cuerpoca ismushpa allpami tucun (Génesis 3:19). Shinashpaca ¿pi huañushpaca ima shinataj mana ismuj causaringa? Pabloca Elías, Eliseo y Jesús cai Allpapi huañushcacunata causachishcamantaca mana parlacurcachu. Ashtahuanpish jahua pachapi causarijcunamantami parlacurca. Paicunaca espíritu cuerpohuanmi causarincuna (1 Corintios 15:42-44).

11, 12. a) ¿Jesusca jahua pachapica ima shinataj causarirca? b) ¿Jahua pachapi causarigrijcunapish ima shinataj causarincuna?

¹¹ Jesús cai Allpapi cashpaca aichayuj, tulluyuj cuerpotami charirca. Pero Jesús causarishpaca jahua pachamanmi tigrarca. Chaipica causaita cuj espiritumi tucurca. Chashnallatajmi jahua pachapi causarijcunapish shuj espíritu shina causarincuna. Pabloca: ‘Ima shinami allpamanta rurashca runa shinallataj canchij, chashnallatajmi jahua pachamanta caj shinallataj cashun’ nircami (1 Corintios 15:45-49).

¹² Jesús causarishpaca mana aichayuj, tulluyuj cuerpohuan causarishcatami yuyarina canchij. Pabloca causarigrijcunamanta alli intindichingapajca cashna nishpami parlarca. Paica: “Aichapish, yahuarpish Dios mandanapica, ima japinata mana charingachu” nircami (1 Corintios 15:50). Apostolcunapish, jahua pachaman rigrij caishujcunapish aichayuj, tulluyujca mana causarinachu carca. Pero paicunaca ¿ima horataj causarina carca? Pablo  1 Corintiosta quillcacujpica huaquin discipulocunaca ñami huañushcacuna carca. Paicunamanta shujca Santiagomi carca. Pabloca ‘cai rato huañujcunaca manaraj causaringacunachu. Qꞌuipami causaringacuna’ nircami. Apostolcunapish jahua pachapi causarigrijcunapish qꞌuipami causarina carcacuna (1 Corintios 15:6; Hechos 12:1, 2).

13. ¿Jesús mandai callari horasmantaca imataj tucurca?

¹³ Jesuspish, apóstol Pablopish Jesús mandashpa callarina horasca ‘achca macanacuicuna, allpa chujchuicuna, ungüicuna, muyundij Allpapi achca llaquicunapishmi tiyanga’ nircami. Cai profeciacunaca 1914 huatamantami pajtaricushcata ricunchij. Jesusca cai valishca yuyaitapishmi nirca. Paica: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” nircami (Mateo 24:3, 7-14). Pabloca Jesús mandai callari horasmanta jahua pachapi causanaman rigrij huañushcacunaca, chai horasmantami jahua pachapi causaringacuna nircami (1 Tesalonicenses 4:14-16; 1 Corintios 15:23).

14. ¿Jesús mandai callaricun horasmanta jahua pachaman rigrijcuna huañushpaca paicunahuanca imataj tucun?

¹⁴ Cunan punllacunapish jahua pachaman rigrijcunaca huañushpaca chai ratomi jahua pachapi causarincuna. ¿Caitaca ima shinataj yachanchij? Pabloca 1 Corintios 15:51, 52-pica: “Mana tucuicuna huañushunchu, ashtahuanpish tucuicunami shujtajyachishca cashun. Tucuri trompeta uyarijpica, ñahui quimllai shinallapimi shujtajyachishca cashun” nircami. Cai shimicunaca cunan punllacunapimi pajtaricun. Jahua pachapi causarishpaca paicunaca cushillami Jesushuan para siempre cangacuna (1 Tesalonicenses 4:17).

15. ¿Ñahui quimllai shinallapi shujtajyachishcacunaca jahua pachapica imatataj rurangacuna?

 ¹⁵ Ñahui quimllai shinallapi jahua pachaman rigrijcunaca ¿imatataj chaipica rurangacuna? Jesusca: “Tucuita mishashpa ñuca munashcallata rurashpa tucuringacama catijtaca llajtacunata mandajtami ñucaca rurasha. Ñuca Yaya ñucata mandajta rurashca shinallatajmi, paicunaca llajtacunataca allpa mangata ñutuj shina fierro varahuan mandanga” nircami (Apocalipsis 2:26, 27). Paicunaca Jesustami catingacuna, fierro varahuanmi cai Allpapi causajcunataca mandangacuna (Apocalipsis 19:11-15).

16. ¿Diosta sirvijcunaca huañuitaca ima shinataj mishangacuna?

¹⁶ Jahua pachapi causarijcunaca huañuitami mishangacuna (1 Corintios 15:54-57). Paicunaca jahua pachapi causarishcamantami Armagedón macanacuipica cai Allpata tucui mana allicunamanta chuyayachishpa ayudangacuna. Cutin jatun llaquichicunmanta llujshijcunaca paraíso Allpapi causangapajmi quishpiringacuna (Apocalipsis 7:14). Paicunaca ñaupa tiempopi huañushcacuna causarijta ricushpami cushilla sintiringacuna (Hechos 24:15). Jehová Diosta tucuipi cazujcunaca Adanmanta chasquishca huañuitami mishangacuna. Shinallataj huiñaitami causangacuna.

17. 1 Corintios 15:58-pi nishca shinaca ¿imatataj rurana canchij?

¹⁷ Corintocunaman causarinamanta quillcashcata yachashpaca Diosta tucui sirvijcunami tucui shunguhuan agradicinchij. Pabloca: “Amitopajta ruranapi siempre ocupado caichij” nircami. Chaita pajtachingapajmi tucui pudishcata rurana canchij (1 Corintios 15:58-ta liyipai). * Diosta tucuipi cazushpa, paipaj obrapi ocuparishpaca maravilla, cushilla causaitami charishun. Chashnami Diosta sirvinaca mana yanga cashcata ricushun.