1, 2. a) ¿Huauqui panicunaca ima llaquicunatataj chꞌimbapuracuncuna? b) ¿Problemacunahuan cashpaca ima shinataj sintirishun?

CAI quimsa ejemplocunapi yuyashun. Shuj joven huauquitami shuj millai ungüi japishcata huillan. 50 yalli huatacunata charij huauquimi trabajo illaj saquirin. Paica shujtaj trabajota mashcashpapish mana japinchu. Cutin shuj mayorlla panica Diostaca ña mana tanto sirvi tucunichu nishpami yuyan.

² Cashna shina problemacunata charishpaca imapaj mana valishca shinami sintirishun. Chaimantachari shujtajcunahuan alli apanacunaca sinchi ricuringa.

3. ¿Diablopish millai gentecunapish ima shinataj gentecunata tratan?

³ Diabloca millai cashcamantami ñucanchijtaca imapaj mana valishcata shina tratashca. Chaimantami Evataca Diosta mana cazushpaca alli causaitami charingui nirca. Pero Diabloca allimi yacharca Diosta mana cazushpa huañuna cashcata. Shinallataj Diabloca jatun negociocunata, politicocunata, panda religioncunatami mandacun. Chaimantami jatun negociocunata charijcuna, politicocuna, religionta pushajcunapish paicunallapi yuyashpa gentecunataca llaquichishcacuna.

4. ¿Cai yachaipica imatataj yachashun?

⁴ Ashtahuanpish Jehová Diosca ñucanchij problemacunahuan cajpipish ama llaquilla sintirichunmi ayudan (Salmo  136:23; Romanos 12:3). Cai yachaipimi ungushca cajpi, trabajo illaj saquirijpi, mayorlla cajpipish Jehová ima shina ayudanata yachashun. Pero puntaca Yayitu Diospaj valishca cashcatarajmi ricushun.

5. ¿Jehová Diospajca imamantataj valishca canchij?

⁵ Ñucanchijca allpamanta rurashca cashpapish Diospajca valishcami canchij (Génesis 2:7). ¿Imamantataj chashna ninchij? Jehová Diosca ñucanchijtaca paiman rijchajtami rurashca (Génesis 1:27). Chashna rurashcamantami runacunaca cai Allpapi imalla tiyashcacunatapish yalli canchij. Chaimantami Diosca cai Allpata, animalcunatapish cuidachun churashca (Salmo 8:4-8).

6. ¿Jehová Diosca ñucanchij valishca cashcataca ima shinataj ricuchishca?

⁶ Adán juchapi urmashca cajpipish gentecunaca Jehová Diospajca valishcami canchij. Yayitu Diosca ñucanchijta achcata cꞌuyashcamantami paipaj Churita ñucanchij juchacunamanta huañuchun curca (1 Juan 4:9, 10). Jesús huañushcamantami cashcata rurajcunatapish mana cashcata rurajcunatapish Yayitu Diosca causachinga (Hechos 24:15). Bibliapica ungushcacunapish pobrellacunapish mayorllacunapish Diospajca valishca cashcatami ricuchin (Hechos 10:34, 35).

7. ¿Yaya Diospaj valishca cashcataca imamantataj yachanchij?

⁷ Ñucanchijca Diospaj valishca cashcatami yachanchij. Chaimantami Yaya Diosca paipajman cꞌuchuyachun ayudashca. Bibliamanta yachashpa ima cambiocunata rurachunpishmi ayudashca (Juan 6:44). Jehová Diospajman cꞌuchuyajpimi paipish ñucanchijpajman cꞌuchuyashca (Santiago 4:8). Paica ñucanchij ima shina cashcata, imata rurai tucushcataca allimi yachan. Chaimantami ñucanchijtaca pacienciahuan yachachin. Shinallataj cꞌuyaimantami corregin (Proverbios 3:11, 12).

8. Salmo 18:27 al 29-pi nishca shinaca ¿llaquicunahuan cajpica Diosca ima shinataj ayudanga?

⁸ Gentecunaca rey Davidtaca imapaj mana valishcata shinami ricurcacuna. Pero Davidca Jehová Dios cꞌuyaimanta ayudanatami yacharca (2 Samuel 16:5-7). Ñucanchijpish llaquicunahuan cashpaca imapaj mana valinichu nishpami yuyai tucunchij. Pero ama chashna yuyachunmi Jehová Diosca fuerzasta cushpa ayudan (Salmo 18:27-29-ta liyipai). Yaya Dios ayudajpica cushillami paita sirvishun (Romanos 8:31). Cunanca ungushca cajpi, trabajo illaj saquirijpi, mayorlla cajpipish Dios ima shina cꞌuyashcata, valorashcata ricushun.

9. ¿Ungushca cashpaca ima shinataj sintirinchij?

⁹ Ungushca cashpaca imapaj mana valishca layami sintirinchij. Shinallataj shujtajcuna ñucanchij ungushca cashcata yachaj chayajpi, paicunapaj ayudata minishtishcata ricushpami pingarinchij. Mana cashpaca imatapish mana rurai tucushcamantami llaquilla sintirinchij. Chashna sintirijpipish Jehová Diosmi ñucanchijtaca animanga. ¿Ima shinataj animanga?

10. Proverbios 12:25-pi nishca shinaca ¿ungushca cashpaca imatataj minishtinchij?

¹⁰ Ungushca cashpaca cushichij shimihuan animachunmi minishtinchij (Proverbios 12:25-ta liyipai). Jehová Diosca  cushichij shimicunahuanmi ñucanchijtaca animan. Chaimantami Bibliapica ungushca cashpapish Diospajca valishcami canchij nin (Salmo 31:19; 41:3). Ungushca cashpapish animaj versocunata cutin cutin liyishpami tranquilo sintirishun.

11. ¿Jehová Diosca shuj huauquitaca ima shinataj ayudarca?

¹¹ Jorgetaca * shuj millai ungüimi japirca. Chai ungüihuanmi rato anchayashpa catirca. Chaimantami imapaj mana valishca shina sintirirca. Paica: “Cai ungüi japishcamantami mana alli sintirircani. Shinallataj gentecunapish imatashi ninga nishpami yuyarcani. Ashtahuan anchayashpaca ñuca causaica ña mana igualchu canga nishpami yuyarcani. Dimastaj llaquilla cashcamantami Jehová Diostaca ayudahuai nishpa mañarcani” ninmi ¿Diosca paitaca ima shinataj ayudarca? Jorgeca: “Preocupado cashcamantami Bibliataca mana achcata liyi tucurcani. Chaimi salmo libropi uchilla versocunata liyishpa Jehová Dios ñucamanta preocuparishcata intindircani. Cai versocunataca cutin cutin liyishpami tranquilo sintirircani. Tiempohuancarin shujtajcunaca ñuca cushilla sintirishcatami cuentata curcacuna. Paicunaca canca ñucanchijtami animangui nircacunami. Chashnami Yayitu Dios ñucata cꞌuyashpa ayudashcataca cuentata curcani. Chaimantami cushilla sintirircani” ninmi.

12. ¿Ungüihuan cashpaca Jehová Diospaj ayudata chasquingapajca imatataj rurana canchij?

¹² Ima ungüita charijpipish Jehová Diosca ima shina sintirijtaca allimi yachan. Chaimanta ama dimastij llaquilla sintiringapaj Yayitu Dios ayudachun mañashunchij.  Diosca Bibliapimi sumaj yuyaicunata ñucanchijta animangapaj churashca. Cai versocunata liyishpami Yayitu Dios ñucanchijhuan alli cashcata, mashnata valoraj cashcata yachanchij (Salmo 84:11).

13. ¿Familiata pushajcunaca trabajo illaj saquirishpaca ima shinataj sintirincuna?

¹³ Familiata pushajcunaca paicunapaj familia ucupi alli causachun, tucuita charichunmi munancuna. Por ejemplo, shuj huauquichari trabajo illaj saquirin. Trabajota cutin charingapajmi tucuita ruran. Pero ima trabajotaca mana japinchu. Chaimantachari imapaj mana valishca shina sintiringa. ¿Dios pajtachisha nishcacunaca ima shinataj paitaca ayudanga?

14. ¿Jehová Diosca pai nishcacunataca imamantataj pajtachin?

¹⁴ Jehová Diosca can imalla minishtishcacunatami cusha, ñucamantapish yachachishpami ayudasha ninmi (Salmo 31:1-3; Mateo 6:30-33; 24:45). Pero ¿pai nishcacunataca imamantataj pajtachin? Jehová Diosca pai cꞌuyaj cashcata tucuicuna rijsichunmi munan. Shinallataj shuj yaya shina ñucanchijta mana cuidajpi ñucanchij llaquilla sintirinataca paica allimi yachan. Chaimantami paipaj nishcacunataca pajtachintaj. Diosca ñucanchijta cuidangapajca tucuitami ruran (Josué 21:45; 23:14).

15. a) ¿Apostolcuna causashca punllacunapi Diosta sirvijcunaca ima llaquicunatataj chꞌimbapurarcacuna? b) Salmo 37:18, 19-pi nishca shinaca ¿imamantataj Dios ayudanata crinchij?

¹⁵ Jehová Diosca pai nishcacunata pajtachij cashcamantami ñucanchij cullqui illaj saquirijpipish ayudanga. Apostolcuna causashca punllacunapi Diosta  sirvijcunamanta yuyarishun. Jerusalenpi saquirij congregacionta catirashpa llaquichijpica achcacunami shujtaj llajtacunaman rircacuna. Pero “apostolcunallami mana maiman rircacuna” (Hechos 8:1). Shujtaj llajtaman rijcunaca huasicuna illaj, trabajocuna illajmi saquirishcangacuna. Pero Jehová Diosca paicunataca manataj cungarircachu. Chaimantami cushilla sintirircacuna (Hechos 8:4; Hebreos 13:5, 6; Santiago 1:2, 3). Yayitu Diosca paita alli sirvijcunataca tucuipimi ayudarca. Ñucanchijtapish paicunata shinallatajmi ayudanga (Salmo 37:18, 19-ta liyipai).

16. ¿Yuyajyashpaca imatataj yuyai callarishun?

¹⁶ Yuyajyashpaca Jehová Diostaca ñaupa shina mana sirvi tucushachu nishpachari yuyai callarishun. Rey Davidpish yuyajyashpaca chashnallatajmi sintirishcanga (Salmo 71:9). ¿Jehová Diosca ima shinataj ayudanga?

17. ¿Joanna panimantaca imatataj yachanchij?

¹⁷ Joanna panimanta yachashun. Paitaca tandanacuna huasicunata ima shina cuidana cursomanmi invitarcacuna. Pero paica chai cursoman rinata manchashpami: “Ñucaca viuda, yuyajmi cani. Tandanacuna huasicunata cuidangapajca mana imata yachanichu” nirca. Chai cursoman manaraj rishpami paica Jehová Diosta ayudachun mañarca. Cayandij punlla chai cursoman chayashca huashapish caita pajtachinataca mana valishachu nishpami yuyarca. Shinapish chai cursopi caj shuj huauquica “Jehová Diosta sirvingapajca pai yachachichunmi saquina canguichij. Shinallataj pai  imata rurachun nijpipish utcami pajtachina canguichij” nishpami yachachirca. Joannaca: “Chaita uyashpaca ñuca mañashcacunatami Diosca cutichishca nishpami huacai callarircani. Chaimi Yayitu Diosta sirvingapaj imata rurai tucushcata intindircani. Shinallataj Dios yachachinatami tucui shunguhuan crircani. Chai cursoman rishpaca imapajpish mana valishca shina, manchaihuan, yallitaj sustarishcami yaicurcani. Pero chai cursopi alajata yachashcamantami cushilla sintirircani” ninmi.

18. ¿Diosca yuyajlla huauqui panicunata valorashcataca ima shinataj ricuchin?

¹⁸ Jehová Diosca yuyajlla huauqui panicunamanca huaquin trabajocunata pajtachichunmi mingan (Salmo 92:12-15). Jesusca achcata rurashpapish o ashallata rurashpapish Diospajca tucuimi valishca can nircami (Lucas 21:2-4). Chaimanta imata rurai tucushcapi yuyashunchij. Por ejemplo, Jehová Diosmanta huillashunchij. Huauqui panicunamantapish Diosta mañashunchij. Shinallataj paicuna Diosta alli sirvichun animashunchij. Diosca cashna sirvijcunatami valoran (1 Corintios 3:5-9).

19. Romanos 8:38, 39-pi nishca shinaca ¿imatataj yuyarina canchij?

¹⁹ Jehová Diosca ñucanchijtaca paita sirvichunmi rurarca. Chaimantami Diosta sirvishpaca cushilla sintirinchij (Apocalipsis 4:11). Gentecunaca ñucanchijtaca imapaj mana valishcata shinami ricuncuna. Mana cashpaca ungüi japishcamanta, cullqui illaj saquirishcamanta, yuyajlla tucushcamantachari llaquilla causanchij. Pero ñucanchijca Jehová Diospajca valishcami canchij (Hebreos 11:16, 38). Yayitu Diospaj cꞌuyaimantaca pi mana caruyachingachu (Romanos 8:38, 39-ta liyipai).