1, 2. a) ¿Diosta sirvij huarmicuna Jesusta pambashca jutcuman rijpica shuj angelca imatataj nirca? b) ¿Cai huarmicunamanca Jesusca imatataj mandarca?

HUATA 33, 16 de nisán punlla pacarijpimi Diosta sirvij huarmicunaca Jesusta maipi pambashcapi ricunaman rircacuna. Jesusca ñami casi ishqui punlla huañushca carca. Chaimi cai huarmicunaca dimastij llaquilla carcacuna. Paicunaca mishquijlla jambicunatami Jesuspaj cuerpopi tallina yuyaihuan rircacuna. Pero jutcuman chayashpa jutcu chushajlla cashcata ricushpami yallitaj sustarircacuna. Shuj ángel ricurishpaca: ‘Jesusca ñami huañushcacunapaj chaupimanta jatarishca. Cancunapaj ñaupa, Galileaman chayangapajmi paica ña rin. Chaipimi paitaca ricunguichij’ nircami (Mateo 28:1-7; Lucas 23:56; 24:10).

² Cai huarmicuna Galileaman ricujpimi Jesusca paicunapajman cꞌuchuyashpaca: “Ñuca huauquicuna Galileaman richun, richij huillagrichij. Chaipimi ñucataca ricungacuna” nircami (Mateo 28:10). Cai versopi ricuchishca shinaca Jesús causarishpaca paipaj catijcunahuanmi shuj tandanacuita rurarca. Chai tandanacuipica achca valishca yuyaicunatami yachachirca.

3, 4. Mateo 28:19, 20-pi mandashcaca ¿imamantataj mana once apostolcunapajlla cashcata yachanchij? Página 1-pi tiyaj fotota ricui.

³ (Mateo 28:16-20-ta liyipai). Chai tandanacuipica Jesusca paita catijcunataca: ‘Tucui cai pachata richij, ñuca yachacujcunata ruraichij. Ñuca tucui imalla mandashcacunata  paicunapish rurachun yachachichij’ nishpami mandarca. Cunan punllacunapish cai mandashcatami pajtachicunchij.

⁴ Jesusca cai mandashcataca mana paipaj once apostolcunallatachu nirca. Ashtahuanpish tucui paita catijcuna predicachunmi munan. ¿Imamantataj chashna ninchij? Galilea llajtapi Jesús ñuca yachacujcunata ruraichij nijpica mana once apostolcunallachu carca. Párrafo 1-pi ricushca shinaca shuj angelca huaquin huarmicunataca Galileapimi Jesustaca ricunguichij nircami. Chashna cashpaca Jesusta catij huarmicunapishmi chaipi cashcanga. Apóstol Pablopish: ‘Jesusca tandanacushca 500 yalli huauquicunamanmi shuj ricuripi ricurirca’ nircami (1 Corintios 15:6).

5. 1 Corintios 15:6-pica Galileapi tiyashca tandanacuimantami parlan, ¿chaitaca imamantataj crinchij?

⁵ 1 Corintios 15:6-pica apóstol Pabloca Galileapi tiyashca tandanacuimantami parlacurca. ¿Imamantataj chashna ninchij? Puntapica, Jesusta catijcunaca ashtahuantajca Galileamantami carca. Cai tucui discipulocunata tandachingapajca mana Jerusalenpi shuj huasillachu minishtirirca. Ashtahuanpish Galileapi saquirij shuj urcuman rinami minishtirirca. Shinallataj causarishca huashaca Jesusca Jerusalenpi tiyaj shuj huasipimi paipaj once apostolcunahuan ña tandanacushca carca. Once apostolcunalla predicachun, paita catijcunata rurachun mandasha nishpaca Jerusalén llajtallapitajmi chaitaca mandanman carca. Ashtahuanpish Jesusca once apostolcunata, paita catijcunata, huaquin huarmicunataca Galileapi paihuan tandanacuchunmi mandarca (Lucas 24:33, 36).

6. a) Mateo 28:20-pi nishca shinaca ¿cunan punllacunapipish imamantataj huillana canchij? b) ¿Cai versopi nishcacunaca ima shinataj cunan punllacunapi pajtaricun?

⁶ Jesusca ñuca yachacujcunata ruraichij nishpaca mana ñaupa punllacunapi causajcunallamanchu mandarca. ¿Imamantataj chashna ninchij? Jesusca paita catijcunataca: “Cai shina causai tucuringacamami, tucui punllacuna ñucaca cancunahuan casha” nircami (Mateo 28:20, NM ). Jesús nishcacunaca cunan punllacunapimi muyundij Allpapi pajtaricun. Cada huatami casi 300 mil gentecunaca testigo de Jehová tucuncuna.

7. a) ¿Cai yachaipica imatataj yachashun? b) ¿Caita yachanaca imamantataj ministirishca can?

⁷ Bibliamanta yachashpami achcacunaca bautizarishca. Pero huaquincunaca Jesusta catinataca manaraj decidishcacunachu. Paicunaca yachanallatami munancuna. Shinapish bautizarinataca mana munancunachu. Ñucanchijcunaca Bibliamanta yachacujcuna Yaya Diospaj mandashcacunata pajtachichun, Jesusta catichunmi ayudasha ninchij. Cai yachaipimi Bibliata yachacujcuna Diosta shungumanta sirvichun, sinchi crijcuna tucuchun ima shina ayudanata yachashun. Chashnami Bibliamanta yachacujcunataca saquinata o mana saquinata yachashun.

8. ¿Bibliamanta yachacujcuna Jehová Diosta cꞌuyachunca imamantataj maipica sinchi can?

⁸ Jehová Diosca gentecuna paita cꞌuyaimanta sirvichunmi munan. Bibliamanta yachacujcunamanca Jehová Dios, yaya mama illajcunapaj yaya cashcata, viudacunata cuidaj cashcatami yachachina canchij  (Salmo 68:5). Bibliamanta yachacujcunaca Yaya Dios cꞌuyaj cashcata yachashpami paitaca cꞌuyaimanta sirvisha ningacuna. Shinapish huaquincunapajca paicunapaj yaya cꞌuyaita mana ricuchishcamantami Dios cꞌuyaj cashcata crinaca sinchi can (2 Timoteo 3:1, 3). Pero yachacujcunamanca Diosca cꞌuyaj, llaquij, humildemi can nishpa yachachishunchij. Shinallataj Jehová Diosca paicuna huiñai causaita charichun ayudangapaj listo cashcata intindichishunchij. ¿Imallatataj ashtahuan rurana canchij?

9, 10. a) ¿Yachacujcunamanca ima librocunahuantaj yachachina canchij? b) ¿Imamantataj cai librocunahuan yachachina canchij?

⁹ Bibliamanta yachacujcunamanca “Yaya Diosta cꞌuyashpa cati”, “Bibliamanta yachashunchij” nishca librocunahuan yachachishunchij. Cai librocunaca yachacujcuna Jehová Diosta cꞌuyachunmi ayudanga. Por ejemplo, Bibliamanta yachashunchij nishca libropi capítulo 1-pimi cai tapuicunata cutichin: ¿Diosca ñucanchijmanta sustarinchu? ¿Ñucanchij llaquicunamantaca Diosca ima shinataj sintiringa? ¿Diospaj amigo tucui pudinguichu?  Shinallataj Yaya Diosta cꞌuyashpa cati nishca libroca Bibliamanta yachacujcuna Diosta cazushpa alli causachun, Dioshuan alli apanacuchunmi ayudanga. Shujtajcunata cai librocunahuan ña yachachishca cashpapish cada yachacujcuna ima minishtishcata yuyashpami alli prepararina canchij.

¹⁰ Bibliamanta yachacujca shujtaj publicacionmantachari yachanata munanga. Chaipica paillataj chai publicacionta liyichunmi animana canchij. Shinapish Bibliamanta yachashunchij o Yaya Diosta cꞌuyashpa cati nishca librohuanmi yachachishpa catina canchij.

11. a) ¿Bibliamanta yachacujcunahuanca ima horataj Diosta mañashpa callarina canchij? b) ¿Yachacujcunamanca ima versohuantaj Diosta mañanataca yachachi tucunchij?

¹¹ Diosta mañashpa callarishunchij. Bibliamanta estudiai callarishca asha semana qꞌuipallami yachashpa callaringapajpish, yachashcata tucuchingapajpish Diosta mañana canchij. Chashnami Bibliamanta yachacujcunaca Jehová Dios paipaj espíritu santota cushpa ayudashcata intindingacuna. Maijan huauqui panicunaca yachacujcunamanca Santiago 1:5-ta liyishpami Diosta mañana cashcata yachachincuna. Chai versopica: “Cancunamanta maijan yachai illaj cashpaca, Diosta mañaichij” ninmi. Chai huashami paicunaca yachacujcunataca: ¿Yaya Dios yachaita cuchunca imatataj rurana canchij? nishpa tapuncuna. Chashna tapujpimi yachacujllataj Yaya Diostami mañana canchij nishpa cutichin.

12. ¿Salmo 139:2 al 4-ta liyishpaca yachacujcuna shungumanta Diosta mañachunca ima shinataj yachachina canchij?

¹² Yachacujcunamanca Jehová Diosta ima shina mañanata yachachishunchij. Bibliamanta yachacujcunamanca: “Jehová Diosca can mañashcatami uyasha nin. Paica can ima shina sintirishcata, can imata yuyashcata ñami tucuita yachan. Piman mana huillai tucushcatapish Diosman huillai” nishpa yachachishunchij (Salmo 139:2-4-ta liyipai). Shinallataj yachacujcunamanca mana alli yuyaicunata cambiachun, mana alli ruraicunata saquichunmi Diosta mañana cashcata yachachina canchij. Por ejemplo, Bibliamanta yachacujca shuj fiesta panda cashcata yachashpapish chaipi canatachari munan. Yachacujta ayudangapajca paitaca: “Can ima shina sintirishcata Jehovaman parlai. Shinallataj allita cꞌuyanata yachachichun paita mañai” nishpa animashunchij (Salmo 97:10).

13. a) ¿Bibliamanta yachacujcunataca imamantataj tandanacuicunaman richun invitana canchij? b) ¿Tandanacuicunaman rinata munachunca imatataj rurana canchij?

¹³ Bibliamanta yachacujcuna tandanacuicunaman richun invitashunchij. ¿Imamantataj paicunataca invitana canchij? Paicunaca tandanacuipi imallata ricushpa, imata uyashpaca Jehová Diostami sirvisha ningacuna. Chaimanta ¿Ñucanchij tandanacuicunapica imatataj ruranchij? nishca videota ricuchishunchij. Pudishpaca yachacujtaca tandanacuiman pushashunchij. Shinallataj yachacujman estudiota cungapajmi chꞌican chꞌican huauqui panicunata invitana canchij. Chashnami yachacujca congregacionpi shujtajcunahuan alli apanacunga, tandanacuicunaman rinatapish munanga.

14. ¿Yachacujcunaca imamantataj ayudanata munangacuna?

¹⁴ Yachacujcuna sinchi crij tucuchunmi ayudana canchij (Efesios 4:13). Yachacujcunaca  Bibliamanta yachai callarishpaca paicunallapi yuyashpami yachanata munancuna. Pero Jehová Diosta cꞌuyai callarishpaca paicunapish shujtajcunatami ayudai callaringacuna. Shinallataj huauqui panicunatapishmi ayudanata munangacuna (Mateo 22:37-39). Diospaj obrata apoyachunmi estudiantecunataca cullquihuan ayudai tucushcatapish yachachina canchij.

15. ¿Estudiantecuna problemacunata jahualla allichichunca ima shinataj ayudana canchij?

¹⁵ Yachacujcuna problemacunata allichichun ayudashunchij. Caipi yuyashun. Manaraj bautizarishca publicadorchari shuj huauquimi ñucataca llaquichin nishpa huillanga. ¿Chashna parlajpica imatataj rurana canchij? Ñucanchij yuyashca shina imatapish ninapaj randica Biblia ima yachachishcata ricuchishunchij. Paitaca cai huauquitami perdonana cangui, ima tucushcata mana cungari tucushpapish paihuan cutin alli tucungapajca cꞌuyaihuanmi parlana cangui nishpami animana canchij (Mateo 18:15-ta ricui). Shinallataj chai huauquihuan cutin alli apanacuchun ima shina alli parlanata yachachishunchij. Problemacunata allichinata yachachunca Guía de estudio para los testigos de Jehová nishcata españolpi ricuchun, shinallataj JW Library^®, jw.org^® paginaman yaicuchun ayudashunchij. Manaraj bautizarishpa problemacunata allichinata yachashpaca bautizarishpacarin tucuicunahuanmi alli apanacunga.

16. ¿Estudiota cungapajca imamantataj shujtaj huauqui panicunata invitana canchij?

¹⁶ Yachacujcunaman estudiota cungapajca huauqui panicunatapish congregacionta visitaj superintendente huauquitapish invitashunchij. ¿Imamantataj paicunataca invitana canchij? Paicunaca ñucanchij yachacujcunamanca alajatami yachachi tucuncuna. Shinallataj paicunata invitajpica yachacujcunaca huauqui panicunatami rijsingacuna. Pero maipica achca experienciata charij huauquihuan o panihuan cashpaca Bibliamanta yachachinatami ashata manchashun. Chashna sintirishpaca paicuna estudiota cuchunmi mañana canchij. Chaimi yachacujcunaca sinchi crijcuna tucunga. Caipi yuyashun, Bibliamanta yachacujchari fumanata saquisha nin. Pero manachari saqui tucun. Chaita ricushpaca fumana viciota saquishca huauquita invitashunchij. Cai huauquimi pai ima shina chai viciota saquishcata parlashpa ayudanga.

17, 18. ¿Yachachishpa catinata o saquinata manaraj agllashpaca imatataj alli ricuna canchij?

¹⁷ Bibliamanta yachacuj paipaj causaipi cambiocunata mana rurajpica yachachishpa catinata o saquinatami ricuna canchij. Huaquincunaca paicunapaj causaipica mana utca cambiocunata rurancunachu. Chaimantami  paicuna ima rurai tucushcata alli ricuna canchij. Manaraj saquishpaca: “¿Yachacujca ima yachashcata pajtachingapajca tucui pudishcatachu ruracun?” nishpami tapurina canchij (Mateo 28:20). Yachacujca Jesusta catingapajca achca tiempotachari minishtin. Shina cajpipish asha ashami cambiocunata rurashpa catina can.

¹⁸ ¿Yachacuj Bibliamanta yachanata mana valichijpica imatataj rurana canchij? Por ejemplo, yachacujca Bibliamanta yachashunchij nishca librota tucuchishpami Diosta cꞌuyashpa cati nishca librota estudiai callarin. Shinapish tandanacuicunaman, Jesús huañushcata yuyarina tandanacuiman mana rishcachu. Caita chaita nishpami Bibliamanta cada semana yachanatapish saquin. Chaita ricushpaca yachacujhuanmi parlana canchij. *

19. a) ¿Yachacujcunahuan parlai callarishpaca imatataj tapuna canchij? b) ¿Paicuna parlajpica imatataj cuentata cushun?

¹⁹ Yachacujcunahuan parlai callarishpaca: “¿Ima jarcaicunamantataj mana testigo de Jehová tucungui?” nishpami tapuna canchij. Yachacujca Bibliatami estudianata munani, pero testigo de Jehová tucunataca mana munanichu ningachari. Chaita nijpica ña mana ashtahuan yachachinatachari cuentata cushun. Mana cashpaca, yachacujca pai imata yuyashcatachari punta cutin parlanga. Por ejemplo, paica huasin huasinca mana nunca huillai tucushachu ningachari. Chashna huillajpimi paita ima shina ayudanata yachashun.

20. Hechos 13:48-pi nishca shinaca ¿picunamantaj yachachishpa catina canchij?

²⁰ Huaquin yachacujcunaca Ezequiel causashca punllacunapi israelitacuna shinami can. Jehová Diosca Ezequielmanca: ‘Riqui, canca israelitacunapajca cꞌuyaimanta cantaj runa shinamari cangui. Cantaca sumaj cungata charishcamanta alli cantashcata uyanachij shina, can imalla nishcata uyashpapish, chaitaca mana pajtachingacunachu’ nircami (Ezequiel 33:32). Yachacujcunataca canman yachachinatami saquigrini ninaca sinchichari ricuringa. Pero tucuri punllacuna quichquiyamucushcamantami Diosta sirvisha nijcunataca mashcana canchij (1 Corintios 7:29; Hechos 13:48-ta liyipai).

21. a) ¿2020 huatapaj versoca maijantaj can? b) ¿Cai versoca imata rurachuntaj animanga?

²¹ 2020 huatapaj versoca Galilea urcupi paita catijcunata Jesús ima nishcatami yuyachinga. Cai versopica: ‘Richij, ñuca yachacujcunata ruraichij, bautizaichij’ ninmi (Mateo 28:19).