1, 2. a) ¿Diospaj espirituta charinamantaca Diosta sirvijcunaca imatataj nincuna? b) ¿Ima tapuicunamantataj yachagrinchij?

CANADÁ llajtapi causaj shuj panica: “Diospaj espirituta charishcamantami cushilla causani. Shinallataj llaquicuna ricurijpipish ahuantai tucushcani” ninmi. Cutin, Brasil llajtamanta shuj huauquica: “Ñami 23 huatacunata cazado cani. Diospaj espirituta charingapaj esforzarishcamantami ñuca huarmihuan cushilla causanchij” ninmi. Shinallataj Filipinas llajtapi causaj shuj huauquica: “Diospaj espirituta charishcamantami tranquilo sintirini. Tucui laya huauqui panicunahuanmi alli apanacuni” ninmi.

² Caipi ricushca shinaca Diospaj espirituta charishpaca achca bendicioncunatami charishun. ¿Diospaj espirituta charingapajca imatataj rurai tucunchij? Puntapica Diospaj espirituta charijcunamanta Biblia imata nishcatami yachanaraj canchij. Cai yachaipica quimsa tapuicunamantami yachagrinchij. 1) ¿Diospaj espirituta charijcunaca ima shinataj can? 2) ¿Diospaj espirituta charijcuna cangapajca picunamantataj  yachai tucunchij? 3) ¿Diospaj espirituta charingapajca imamantataj Jesús yuyashca shina yuyangapaj esforzarina canchij?

3. ¿1 Corintios 2:14-16-pi nishca shinaca Diospaj espirituta charij runapish, aicha munaillata ruraj runapish ima shinataj can?

³ Apóstol Pabloca Diospaj espirituta charij runamanta, aicha munaillata ruraj runamantapishmi parlarca (1 Corintios 2:14-16-ta leyipai). Pabloca, ‘espiritupajlla caj’ o Diospaj espirituta charijca alli cashcata mana alli cashcatapish tucuitami yachan, Cristopaj yuyaitami charin nircami. Cutin, ‘aicha munaillata rurajca’ Diospaj espiritupajtaca mana yachasha ninchu. Chaicunaca paipajca musparishca shina cajpimi, mana intindi tucun nircami. Chaimantami apóstol Pabloca Diospaj espirituta charijcuna cachun consejarca. Cunanca, Diospaj espirituta charij runamanta, aicha munaillata ruraj runamantapish ashtahuan yachashpa catishun.

4, 5. ¿Aicha munaillata ruraj runaca ima shinataj can?

⁴ Aicha munaillata ruraj runaca paillapimi yuyan. Aicha munaillata ruranamanta parlashpaca Pabloca: ‘Chai espiritumi mana cazujcunata millaita rurachicun’ nircami (Efesios 2:2). Chai mana alli espíritu pandachijpimi achcacunaca cai pachapi gentecuna rurashca shinallataj rurasha nincuna. Chaimantami Diospaj mandashcacunata mana cazuncuna, paicuna munashcallata rurancuna. Aicha munaillata rurajpajca cullquita charina, pailla alli canami ashtahuan importante can.

⁵ Diospaj espirituta mana charij runaca ‘aichapaj ruraicunallatami’ ruran (Gálatas 5:19-21). Paicunamanta parlashpami Judas 18, 19-pica: “Diospaj espiritutaca mana charincunachu” nin. Corintocunaman punta cartata quillcashpaca Pabloca aicha munaillata rurajcuna ima shina cashcatami ashtahuan huillarca. Chai gentecunaca shujtajcunapaj pꞌiñanacuipimi satirincuna, chꞌicanyachincuna, mana cazuncuna, paicuna purallatajmi juezcunapajman apancuna, autoridadcunatapish mana cazuncunachu, micuna, ubyanallapimi yuyancuna. Shinallataj ima tentacioncuna ricurijpipish mana jarcarincunachu (Proverbios 7:21, 22).

6. ¿Diospaj espirituta charij runaca ima shinataj can?

⁶ Diospaj espirituta charijca Dioshuan alli apanacungapaj, pai shina cꞌuyaj, llaquij cangapajmi esforzarin (Efesios 5:1). Diospaj espirituta charijpajca Diosca paipaj ladopi cashcata shinami can. Chaimantami Dios mandashcacunataca siempre cazun, pai yuyashca shina yuyangapaj esforzarin (Salmo 119:33; 143:10). Aicha munaillata ruranapaj randica Gálatas 5:22, 23-pi parlashca ‘espiritupaj granota’ ricuchingapajmi esforzarin. Yuyashun, pi musicallamanta parlajpica paitaca musicatami munan ninchijmi. Shinallataj Diospajllata ruranata munajpica Diospaj espiritutami charin ninchijmi.

7. ¿Bibliapi nishca shinaca imamantataj Diospaj espirituta charinaca alli can?

⁷ Jesusca Diospaj espirituta charijcuna cushilla causajcuna cashcatami yachachirca. Chaimantami paica: “Cushicuichij Diospajta mana yachashcamanta ashtahuan yachanata munajcuna. Jahua pacha Diosmi cancunataca mandacun” nirca (Mateo 5:3, QC, 1989). Shinallataj Romanos 8:6-pica ‘aichapaj munaita yuyanaca huañuimanmi  apan. Ashtahuanpish espiritupajta yuyanaca alli causai, sumaj causaimanmi apan’ ninmi. Cai versocunapi ricushca shinaca Diospaj espirituta charijcuna canami alli can. Diospajta rurangapaj esforzarishpaca Diospaj ñaupajpi allimi ricurishun, ñucanchij shungupipish allimi sintirishun. Shamuj punllacunapicarin huiñai causaitami charishun.

8. ¿Imamantataj Diospaj espirituta charijcuna cangapaj esforzarina canchij?

⁸ Achca gentecunaca Dios yuyashca shina mana yuyanchu. Chai gentecunapurapi causashcamantami ñucanchij yuyaita ama pandachichun achcata cuidarina canchij. Diospaj yuyaita charingapaj mana esforzarishpaca aicha munaillata rurajcuna shinami yuyai, rurai callarishun. ¿Chashna ama tucungapajca imatataj rurai tucunchij? ¿Ima shinataj Diospajllata ashtahuan rurajcuna cai tucunchij?

9. a) ¿Ima shinataj Diospajllata ashtahuan rurajcuna cai tucunchij? b) ¿Picunapaj ejemplotataj yachagrinchij?

⁹ Yuyashun, shuj huahuaca paipaj yaya mamamantami alli ejemplocunata yachanata minishtin. Chai huahua shinallatajmi Diospaj espirituta charijcuna cangapajca Diosta tucui shunguhuan sirvijcunamanta yachana canchij. Cutin, aicha munaillata rurajcuna shina mana ruranachu canchij (1 Corintios 3:1-4). Bibliapica Diospaj espirituta charijcunamanta, aicha munaillata rurajcunamantami parlan. Cai yachaipica Jacobpaj, Mariapaj, Jesuspaj alli ejemplotami yachashun. Paicunamanta yachashpami Diospajllata ashtahuan rurajcuna cashun.

10. ¿Jacobca ima shinataj Diospaj espirituta charij cashcata ricuchirca?

¹⁰ Maijan ñucanchijpaj causai shinallatajmi  Jacobpaj causaipish sinchi carca. ¿Imamantataj chaita ninchij? Paitaca paipaj huauqui Esaumi huañuchisha nirca. Esauca aicha munaillata rurajmi carca. Shinallataj Jacobtaca paipaj suegromi umashpa cutin cutin llaquichirca. Shinapish Abrahamman Dios cusha nishcacunapimi tucui shunguhuan crirca. Shinallataj Jacobca paipaj huahua huahuacunamanta Dios cusha nishcacuna pajtarinata yachashpami familiata alli cuidarca (Génesis 28:10-15). Aicha munaillata rurajcunapurapi causashpapish paica Dios cusha nishcataca mana cungarircachu. Por ejemplo, Esaú paita huañuchigrishcata yuyashpaca Diostaca: ‘Quiquinca ñucataca: Ñucami cambajca allicunata rurasha. Cambaj huahua huahuacunaca mama cucha uripi tiyaj tꞌiyu allpa shinami canga nircanguimari’ nishpami mañarca (Génesis 32:6-12). Jacobca paipaj rurashcahuan, rimashcahuanmi Diospi tucui shunguhuan crishcata ricuchirca.

11. ¿Mariaca Diospaj espirituta charij huarmi cashcataca ima shinataj yachanchij?

¹¹ Cunanca Mariamanta yachashun. Paica Diospaj espirituta charij huarmimi carca. Chaimantami Jehová Diosca Jesuspaj mama tucuchun agllarca. ¿Ima shinataj Diospaj espirituta charij huarmi cashcata yachanchij? Mariaca Zacariasta paipaj huarmi Elisabettapishmi visitanaman rirca. Paicunaca Mariapaj familiami carca. María chayashpaca sumaj shimicunahuanmi Diosta alabarca (Lucas 1:46-55-ta leyipai). Mariapaj shimicunaca Diospaj yachaicunata shungupi charishcata, Hebreo quillcashcacunata alli rijsishcatami ricuchin (Génesis 30:13; 1 Samuel 2:1-10; Malaquías 3:12). Mariaca Josehuan cazarashpaca Jesús huacharingacamami mana chayarircacuna. Mana paicunapaj aicha munashcata rurarcacunachu. Ashtahuanpish Diospaj munaita pajtachingapajmi esforzarircacuna  (Mateo 1:25). Shinallataj Mariaca Mesiasmanta huillashca profeciacuna Jesuspi ima shina pajtarijtami yachanata munarca. Chaimantami paica Jesús imata rurajta, imata nijta alli ricurca. Mariaca “tucui imalla tucujta ricushpaca paipaj shungupimi huaquichishpa catirca” (Lucas 2:51). María shinami Diospaj munaita puntapi churangapaj imata ruranata yuyana canchij.

12. a) ¿Imamantataj Jesusca paipaj yaya layami can ninchij? b) ¿Ima shinataj Jesús laya cai tucunchij? (Página 16-pi tiyaj dibujocunata ricui).

¹² Cunanca Jesusmanta yachashun. Cai Allpapi gentecunaman huillacushpaca paipaj Yaya shina yuyashcata, ruraj cashcatami ricuchirca. Shinallataj Jehová mandashcacunata cazushpami Diospaj munaita pajtachirca. Caipi nishca shinaca tucuicunamantaca Jesusllami cai Allpapica Diospajllata rurashpa causarca (Juan 8:29; 14:9; 15:10). Por ejemplo, Isaías libropica Jehová Diosmanta parlashpaca paica llaquij cashcatami ricuchin. Cutin, Marcos libropica Jesusca paipaj yaya laya cashcatami ricuchin (Isaías 63:9 y Marcos 6:34-ta leyipai). Chaimanta: ¿Jesús shinachu shujtajcunata llaquishpa ayudangapaj listo cani? ¿Jesús shinachu Diospaj shimita gentecunaman yachachingapaj esforzarini? nishpa tapurishunchij (Lucas 4:43). Chashna rurashpaca Diospaj espirituta charijcuna cashcatami ricuchishun.

13, 14. a) ¿Cunan punllapi Diospaj espirituta charingapaj esforzarijcunaca ima shinataj can? b) ¿Rachel, Reylene panicunamantaca imatataj yachai tucunchij?

¹³ Cunan punllapish achcacunami Jesús shina yuyangapaj, rurangapaj esforzarishcacuna. Chaimantami paicunaca cushicushpa huillancuna, shujtajcunata alli chasquincuna, ashtahuan cꞌuyaj, llaquij cancuna. Juchayujcuna cajpipish Dios nishcata rurangapajmi achcata esforzarincuna. Brasil llajtapi causaj Rachel shuti panimanta parlashun. Paica: “Shujtaj gentecuna shinami ropata churarinata munaj carcani. Chaimantami ima pinganai ropatapish churajlla carcani. Pero Bibliamanta yachashpaca Diospaj espirituta charingapajmi esforzarircani. Ñaupa ruraicunata saquinaca sinchimi carca. Pero cunanca cushillami causani. Mana yangamanta causacushca shina sintirinichu” ninmi.

¹⁴ Cunanca Filipinas llajtamanta Reylene shuti panimanta parlashun. Paica testigo de Jehová cashpapish universidadpi estudiana, alli pagashca trabajota charinallapimi dedicarirca. Paica: “Asha ashami Diospajta ruranata saquishpa rircani. Pero trabajotapish yalli valishcata saquicushcatami cuenta tucurcani. Chaimantami Jehová Diosta ñuca causaipi puntapi churai callarircani” ninmi. Cai panica cunanca shuj alli ejemplomi can. Paica Mateo 6:33, 34-pi nishca shimicunapimi tucui shunguhuan crin. Reylene panica: “Jehová ñucata cuidanataca tucui shunguhuanmi crini” ninmi. Reylene pani shinallatajmi ñucanchij congregacionpica achca huauqui panicuna Jesuspaj ejemplota catingapaj esforzaricuncuna. ¿Manachu ñucanchijpish paicuna shina casha ninchij? (1 Corintios 11:1; 2 Tesalonicenses 3:7).

15, 16. a) ¿Jesús shina cangapajca imatataj rurai tucunchij? b) ¿Jesús yuyashcata intindingapajca imatataj rurana canchij?

¹⁵ ¿Ima shinataj Jesuspaj ejemplota cati tucunchij? 1 Corintios 2:16-pica “Cristopaj  yuyaitami” charina canchij ninmi. Shinallataj Bibliapica “Cristo Jesús yuyashca shinallataj yuyaichij” ninmi (Filipenses 2:5, QC, 1989). Jesús shina cangapajca pai ima shina yuyashcata, imata rurashcatami alli yachana canchij. Jesuspajca paipaj Yayahuan alli apanacunami ashtahuan importante carca. Jesús shina cashpaca Diospajmanmi ashtahuan cꞌuchuyashun. Chaimantami Jesús shina yuyangapaj esforzarina canchij.

¹⁶ ¿Jesús shina yuyangapajca imatataj rurana canchij? Jesusta catijcunaca milagrocunata rurajta, ima shina yachachijta, shujtajcunata ima shina tratajta, paipaj Yaya yuyashca shina imatapish rurajtami ricurcacuna. Chaimantami Jesusta catijcunaca “Jesús tucui imallata rurashcata huillajmi canchij” nircacuna (Hechos 10:39). Ñucanchijcunaca Jesustaca mana ricui tucunchijchu. Pero Jehová Diosca Mateo, Marcos, Lucas, Juan librocunatami quillcachishca. Chai librocunata leyishpa, cutin cutin yuyashpami Jesús ima shina cashcata, imata yuyashcatapish yachashun. Chashnami Juan 13:15-pi nishcata catishun. Chaipica: “Cancunapish ñuca rurashca shinallataj ruraichij” ninmi. Jesuspaj ejemplota catishpaca pai shinami yuyashun.

17. ¿Imamantataj Jesús yuyashca shina yuyana canchij?

¹⁷ Jesús yuyashca shina yuyanaca importantemi can. ¿Imamantataj chaita ninchij? Caita alli intindingapajca caita yuyashun. Alli micunata micushpaca sinchimi tucunchij. Chashnallatajmi Jesuspaj alli yuyaicunata ñucanchij umapi huaquichishpaca ashtahuan Diospajman cꞌuchuyanchij. Asha ashami Jesús rurashca shina imatapish rurai callarishun, alli decisioncunatapish japishun. Chashna rurashpaca shungupipish allimi sintirishun. Diospaj ñaupajpipish allimi ricurishun. Caipi ricushca shinaca “Jesucristota churarichij” nishca consejotami catina canchij (Romanos 13:14).

18. ¿Cai temapica imatataj yachashcanchij?

¹⁸ Cai yachaipica Diospaj espirituta charij ima shina cashcatami yachashcanchij. Shinallataj Diospaj espirituta charij shujtajcunapaj alli ejemplocunamantami yachashcanchij. Shinallataj ‘Cristopaj yuyaita’ charishpaca Diospajman ashtahuan cꞌuchuyai tucushcata, pai shina yuyai tucushcatapishmi yachashcanchij. Shinapish, ¿Dioshuan alli apanacushcataca ima shinataj yachai tucunchij? ¿Diospajman ashtahuan cꞌuchuyangapajca imatataj rurai tucunchij? ¿Dioshuan alli apanacushpaca ima shinataj causashun? Caishuj yachaipimi ashtahuan yachashun.