1, 2. a) ¿Bibliapica Moisesmantaca imatataj nin? b) ¿Dios ayudajpica Moisesca imatataj rurarca? c) ¿Imamantataj manso shungu cana canchij?

BIBLIAPICA: “Moisesca tucui cai pachapi causaj cꞌaricunamantaca, paillami yalli alli shungu” o manso shungu carca ninmi (Números 12:3). Chashna nishpaca ¿imatapish manchaj, mana sinchi runa cashcatachu nicun? Huaquin gentecunaca manso shungucunaca chashnami can nincunami. Pero mana ciertochu can. Moisesca imatapish mana manchaj, sinchi runami carca. Dios ayudajpimi paica Egipto llajtata mandajpaj ñaupajpi shayarishpa parlai tucurca. Chai qꞌuipaca casi 3 millón gentecunatami shitashca pambata pusharca. Shinallataj Moisesca contracunata israelitacuna mishachunmi ayudarca.

² Moisés charishca problemacunataca mana charinchijchu. Shinapish tucui punllacunami imatapish ruracushpa, o pihuanpish cashpa manso shungu canaca sinchi ricurin. Pero ¿imamantataj manso shungu cana canchij? Jehová Diosca: “Alli shungucunami, Dios cusha nishca allpataca japingacuna” ninmi (Salmo 37:11). Chaimanta, ¿ñucaca manso shunguchu cani? ¿Shujtajcunaca ñuca manso shungu cashcatachu ricun? nishpa tapurishunchij. Cai tapuicunata cutichingapajca puntaca manso shungu cana ima nisha nishcata yachashunchij.

3, 4. a) ¿Manso shungu canataca imahuantaj chꞌimbapuran? b) ¿Manso shungu cashcata ricuchingapajca imatataj rurana canchij? c) ¿Imamantataj manso shungu cana canchij?

³ Manso shungu canataca shuj cuadrota pintanahuan chꞌimbapurashunchij. Shuj cuadrota pintangapajca achca alaja  colorcunatami minishtinchij. Chashna shinallatajmi manso shungu cashcata ricuchingapajca humilde, cazuj, mana manchaj cana canchij. Shinami Diosta cushichishun. *

⁴ Humilde gentecunallami Diosta cazushpa paipaj munaita rurancuna. Paipaj munaita rurangapajca alli shungucunami cana canchij (Mateo 5:5; Gálatas 5:23). Pero millai Diabloca Diospaj munaita rurajpica pꞌiñarinmi. Shinallataj alli shungu, humildes cajpipish Diosta mana sirvij gentecunaca ñucanchijta pꞌiñancunami (Juan 15:18, 19). Chaita yachashpaca mana manchanachu canchij.

5, 6. a) ¿Diabloca manso shungu gentecunataca imamantataj pꞌiñan? b) ¿Ima tapuicunamantataj yachashun?

⁵ Mana manso shungucunaca imamantapish colerajlla, jatun tucushca gentecunami can. Jehová Diostapish mana cazuncunachu. Diabloca chashna cashcamantami manso shungu gentecunataca pꞌiñan. ¿Imamanta? Manso shungu gentecunaca paicunapaj alli ruraicunahuanmi Satanás millai, llulla cashcata ricuchincuna. Ashtahuancarin Diablo imata nijpipish o imata rurajpipish Diosta sirvinata mana saquincunachu (Job 2:3-5).

⁶ ¿Imamantataj huaquinpica manso shungu canaca sinchi can? ¿Imamantataj manso shungu cashpa catina canchij? Cai tapuicunata cutichingapajca Moisesmanta, quimsa hebreo jovencunamanta, Jesusmantapish yachashunchij.

7, 8. ¿Moisesca paita mana respetajpica imatataj rurarca?

⁷ Congregacionta o familiata pushaj cashpa. Pushajcuna cajpipish ñucanchijta pi mana respetajpi o ima decidishcata rimajpica ¿imatataj rurashun? ¿Familiallataj chaita rurashca cajpica? Chai rato mana pꞌiñarinaca sinchichari ricuringa. Pero Moisés imata rurashcata ricushun.

⁸ Jehová Diosca Moisestaca israelcunata pushaj cachunmi agllarca. Shinallataj israelitacunaman leycunata cushcata quillcachunmi mandarca. Chashnami Diosca Moiseshuan cashcata ricuchirca. Chaita yachashpapish paipaj pani María (Míriam), paipaj huauqui Aaronca ‘Moisesca Cus llajtamanta  huarmihuanmi cazarashca’ nishpami rimarcacuna. Shujtaj gentecuna cashpaca Moisesca chai ratomi chashnallataj tigrachinman carca. Pero mana pꞌiñarircachu. Ashtahuanpish Mariata castiganata saquichunmi Jehová Diosta mañarca (Números 12:1-13). ¿Moisesca imamantataj mana pꞌiñarirca?

9, 10. a) ¿Jehová Diospaj ayudahuanca Moisesca imatataj intindishcanga? b) ¿Familiata pushajcuna, ancianocunaca Moisesmantaca imatataj yachacunguichij?

⁹ Moisesca Jehová Dios paiman yachachichun saquishcamantami imamantapish mana pꞌiñarij carca. Pero cuarenta huatacuna huashamanca jiriza runami carca. ¿Imamantataj shina ninchij? Moisesca Egipto llajtata mandajpaj familiapurapimi causaj carca. Shuj punllaca paica shuj runa mana allita ruracushcatami ricurca. Chaimi pꞌiñarishpa chai runata huañuchirca. Moisesca ñuca ruraicunata Diosca chasquingami nishpami yuyashca canga. Pero israelcunata pushangapajca mana manchai illaj canallachu minishtirirca. Ashtahuanpish manso shungu canami minishtirirca. Chaita intindichisha nishpami Jehová Diosca Moisestaca cuarenta huatacunata ayudarca. Shinallataj manso shunguta charingapajca humilde, cazujmi cana carca. Moisesca Dios nishcata uyashcamantami alli pushaj tucurca (Éxodo 2:11, 12; Hechos 7:21-30, 36).

¹⁰ ¿Familiata pushajcuna, ancianocunaca Moisesmantaca imatataj yachacunguichij? Shujtajcuna cancunata mana respetajpica ama utca pꞌiñaringuichijchu. Chaipaj randica cancunapish pandarijllacuna cashcata yuyarichij (Eclesiastés 7:9, 20). Ima problemacuna ricurijpipish Jehová mandashca shina ruraichij. Shinallataj sumajta cutichichij (Proverbios 15:1). Chashna cutichishpaca Jehová Diostami cushichinguichij. Cancunapurapish sumajtami causanguichij. Chaita ricushpaca ¿manachu shujtajcunapish cancuna shina manso shungu casha ningacuna?

11-13. ¿Quimsa hebreo jovencunamantaca imatataj yachacunchij?

¹¹ Llaquichisha nijpi. Gobiernocunaca achca huatacunatami Diosta sirvijcunata llaquichishcacuna. ¿Imamanta? Ñucanchij leyta mana cazuncunachu nishpami llaquichincuna. Pero mana chashnachu can. Runacunata cazunapaj randi, Taita Diosta cazushcamantami llaquichincuna (Hechos 5:29). ¿Ima shinataj llaquichincuna? Ñucanchijmanta burlarishpami asincuna, macancuna, hasta carcelpi churancuna. Pero chashna llaquichijpipish Jehová Dios ayudahuanca mana chashnallataj tigrachinchijchu. Ashtahuanpish tranquilomi sintirinchij.

¹² Cunanca quimsa hebreo jovencunapi yuyashunchij. Ananías, Misael y Azariastaca Babilonia llajtamanmi aparcacuna. Chai llajtata  mandajca orohuan rurashca diospaj ñaupajpi cungurichij nishpami tucuicunata mandarca. Chashna mandajpica cai quimsa jovencunaca imamanta mana adorasha nishcatami sumajta parlarca. Pero chai mandajca nina rupacuj hornomanmi paicunata shitasha nirca. Chashna rurasha nijpipish paicunaca: ‘Ñucanchij Mandaj Jehová Diosmi quishpichinga, mana chai rato quishpichijpipish paitami cazushun’ nircacunami. Qꞌuipaca Yaya Diosca chai jovencunataca quishpichircami (Daniel 3:1, 8-28). Shinaca cai jovencunaca manso shungu cashpapish mana manchaj cashcatami ricuchircacuna. Shinallataj maijan gobierno llaquichisha nijpipish Jehová Diosllata adoranata mana jarcai tucushcatami ricuchircacuna (Éxodo 20:4, 5). *

¹³ ¿Cai quimsa jovencunamantaca imatataj yachacunchij? Ñucanchijtapish Jehová Diosmanta caruyachisha nishpachari llaquichisha nincuna. Chaipica cai jovencuna shinami humildes cana canchij. Jehová Diosllataj cuidana cashcatapishmi crina canchij (Salmo 118:6, 7). Shujtajcuna ñucanchijta yangamanta juchachijpipish mana pꞌiñarishpami respetohuan cutichina canchij (1 Pedro 3:15, NM). Ashtahuancarin imapish Jehovamanta caruyachichunca manataj saquinachu canchij.

14, 15. a) ¿Yallitaj sustarishca cashpaca imatataj ruranchij? b) ¿Isaías 53:7, 10-pi nishca shinaca imamantataj Jesús shina mana pi tiyanchu ninchij?

¹⁴ Yallitaj sustarishca cashpa. Tucuicunami imamantapish sustarinchij. Por ejemplo, escuelapi shuj examenta cugrishpa o trabajopi shuj proyectota ruragricushpaca preocupadomi sintirinchij. Mana cashpaca doctor ñucanchijta operana tucujpi o shuj examenta rurana cajpimi sustarishca canchij. Chashna sustarishca cashpami imamantapish rato pꞌiñarishun. Shujtajcunatapish mana alli tratashun. Pero ama yallitaj sustaringapajca Jesustami yuyarina canchij.

¹⁵ Jesusta jatunta llaquichishpa huañuchinaca ashalla quillacunami illarca. Chaita yachashpami paica yallitaj sustarishpa: “¡Llaquihuan huañucunimari!” nirca (Juan 3:14, 15; Gálatas 3:13; Lucas 12:50). Ña ashalla punlla illajgrijpipish paica: “Ñuca almaca llaquihuan huañucunmari” nircami. Jesusca humilde, cazuj runapishmi carca. Chaimi Yaya Diostaca: ‘Yayitu, salvahuayari. Pero cai llaquita apangapajmari shamurcani. Yayitu, cambaj shutica alli nishca cachun ricuchiyari’ nishpa mañarca (Juan 12:27, 28, NM). Chai qꞌuipaca Jesusca mana manchashpami contracunapaj ñaupajpi ricurirca. Contracunaca manchanaita llaquichishpami huañuchircacuna. Shinaca, Jesusca chashna llaquita apashpapish, yallitaj sustarishca cashpapish Diospaj munaitami rurarca. Manso shungu cashcatapishmi ricuchirca. Chashna shina runaca mana pi tiyanchu (Isaías 53:7, 10-ta liyipai).

16, 17. a) ¿Tucuri pascuata micucushpaca apostolcunaca imatataj rurarcacuna? b) ¿Jesús shina cangapajca imatataj rurana canchij?

¹⁶ Pai huañungapaj ashalla horascuna illajpica Jesusca yallitajmi preocupado carca. ¿Imamanta? Paica huañungacama Diospaj munaita rurashpaca achca gentecunapaj causaitami quishpichina carca (Romanos 5:18, 19). Shinallataj Diospaj shutita allipimi saquichina carca (Job 2:4). Ashtahuancarin tucuri pascuata micucushpaca Jesusca manso shungu cashcatami ricuchirca. Por ejemplo, chai tutaca apostolcunaca: “¿Maijanshi tucuita yalli jatun nishcaca canchij?” nishpami caishuj chaishuj rimanacurcacuna. Paicuna ama chashna cachunmi Jesusca ña achca cutin aconsejashca carca. Chai chishillatajmi consejota cutin cushca carca. Chashna  jahuapish Jesusca mana paicunahuan colerarcachu. Ashtahuanpish humildecuna cachunmi sumajta parlashpa cutin ayudarca. Qꞌuipaca apostolcunataca paipaj lado tucushcamantami Jesusca felicitarca (Lucas 22:24-28; Juan 13:1-5, 12-15).

¹⁷ ¿Chashna shina problemacuna ricurijpica ñucanchijca imatashi ruraiman carcanchij? Imamanta yallitaj sustarishca cashpaca mana utca pꞌiñaringapajmi Jesús shina cana canchij. Ashtahuancarin Jehová mandashca shinami “caishuj chaishuj ahuantanacushpa” causana canchij (Colosenses 3:13). Tucuicunami mai ratoca shujtajcunata ñucanchij rimaicunahuan, ruraicunahuan llaquichinchij. Chaita yuyarishpaca Jehová mandashcatami pajtachishun (Proverbios 12:18; Santiago 3:2, 5). Shinallataj shujtajcuna llaquij, cꞌuyaj cajpica allitami ruracunguichij ninami canchij (Efesios 4:29).

18. a) Manso shungu gentecuna imatapish alli decidichunca Jehová Diosca ¿ima shinataj ayudan? b) ¿Dios ayudachunca manso shungu gentecunaca imatataj rurana can?

¹⁸ Imatapish allimi decidishun. Manso shungu cajpica Jehová Diosca ñucanchij causaipi imatapish alli decidichunmi ayudan. ¿Ima shinataj ayudan? Paica manso shungu gentecunapaj o mana jatun tucushca gentecunapaj mañaicunatami uyan (Salmo 10:17). Pero mana chaillatachu ruran. Bibliapica Diosca: “Mana jatun tucushcacunataca, paipaj cashcata ruranapi purinatami yachachinga. Alli shungucunataca, paipaj callpanapi callpanatami yachachinga” ninmi (Salmo 25:9). Jehová Diosca “alli cazuj alli yuyaiyuj” sirvij huauquicunatami yachachichun mingashca (Mateo 24:45-47, QC, 1989). Paicunaca Bibliahuan, publicacioncunahuan, * videocunahuan, tandanacuicunahuanmi ñucanchijman yachachin. Ñucanchijpish humilde shunguhuanmi Dios ayudachun saquina canchij. Chaipajca pai imalla cushcatami yachana canchij. Ima yachashcatapish practicapimi churana canchij.

19-21. a) ¿Qadés nishca pambapica Moisesca imatataj rurarca? b) ¿Moisesmantaca imatataj yachacunchij?

¹⁹ Mana tanto pandarishunchu. Moisesta cutin yuyarishun. Paica achca huatacunatami manso shungu runa carca. Jehová Diosta tucuipi cazushpami causarca. Pero shitashca pambapi israelitacunahuan casi cuarenta  huatacunata puricushpaca mana manso cashcatami ricuchirca. Mariaca paipaj turi Moisesta Egiptopi ama huañuchichunmi ayudashca canga. Pero cunanca huañujpimi Qadés nishca pambapi Mariata pambarcacuna. Chai qꞌuipaca israelitacunaca yacuta mana charinchijchu nishpami Moisesta culpashpa cutin rimarcacuna. Paicunata cuidangapaj Jehová Dios tucui laya milagrocunata rurajpipish, achca huatacunata Moisés alli pushajpipish quejarishpami catircacuna (Números 20:1-5, 9-11).

²⁰ ¿Israelitacuna chashna quejarijpica Moisesca imatataj rurarca? Jehová Diosca Moisestaca yacuta llujshichichunca rumita rimachunmi mandarca. Pero paica rumita rimanapaj randica israelitacunahuan pꞌiñarishpami ñucami yacuta llujshichisha nirca. Qꞌuipaca paipaj caspihuan rumita ishqui cutin huajtajpimi yacuca llujshirca. Moisesca shuj ratolla jatun tucushpa pꞌiñarishcamantami pandarirca (Salmo 106:32, 33). Chaimantami Diosca paitaca ‘ñuca cushca llajtamanca mana yaicunguichu’ nirca (Números 20:12).

²¹ ¿Moisesmantaca imatataj yachacunchij? Manso shungu cashpa catingapajmi achca esfuerzota rurana canchij. Mana chaita rurashpaca ñapishmi jatun tucushun. Chaimi mana alli yuyarishcahuan imatapish rimashun, imatapish rurashun. Shinallataj imamanta yallitaj sustarishca cashpaca pihuanpish ratomi pꞌiñarinchijlla. Ama chashna cangapajmi jarcarinata yachana canchij.

22, 23. a) ¿Imamantataj manso shungu cana canchij? b) ¿Sofonías 2:3-pica imatataj nicun?

²² Diosca cuidangami. Ñallami Jehová Diosca tucui millai gentecunata tucuchinga. Cutin manso shungu gentecunataca quishpichingami. Qꞌuipaca chai manso gentecunaca paraíso Allpapimi cushilla, sumajta causangacuna (Salmo 37:10, 11). ¿Ñucanchijca manso gentecunapurapichu cashun? Sofonías 2:3-pi ima nishcata pajtachishpaca chai gentecunapurapimi cashun (Sofonías 2:3-ta liyipai).

²³ Sofonías 2:3-pica “Mandaj Dios jatunta pꞌiñarishpa llaquichicui punllaca huaquichingapishchari” ninmi. ¿Imamantataj “huaquichingapishchari” nin? Yaya Dios paita sirvijcunata mana cuidai pudishcataca mana nicunchu. Ashtahuanpish ñucanchij mana maqui cruzashca saquirina cashcatami nicun. Shinashpaca manso shungucuna cashcata ricuchishpa, Diosta tucuipi cazushpaca huiñai huiñaicamami causashun. Chashnami “Mandaj Dios jatunta pꞌiñarishpa llaquichicui punllaca” quishpirishun.