1. ¿Jesús jambijpica shuj samaritano runaca imatataj rurarca?

CHUNGA cꞌaricunaca lepra ungüita charishcamantami imata ruranata mana yacharcacuna. Shinapish Jesucristo ungushcacunata jambij cashcatami uyarcacuna. Chaimi paicunatapish jambi pudishcata crircacuna. Shuj punllaca cai runacuna Jesusta ricushpaca: “¡Yachachij, Jesús ñucanchijta llaquihuayari!” nishpami caparircacuna. Chaita uyashpami Jesusca chai chunga runacunata jambirca. Tucuicunami paicunata jambishcamanta shungupica pagui nishca * cangacuna. Pero shuj runallami Jesusta pagui ningapaj tigramurca. Chai samaritano runaca Diostami alabarca (Lucas 17:12-19).

2-3. a) ¿Huaquinpica imamantataj mana pagui ninchij? b) ¿Cai yachaipica imatataj ricushun?

² Shujtajcuna ñucanchijpaj ima allita rurajpica samaritano runa shinami agradicisha ninchij. Shinapish huaquinpica ñucanchij rimaicunahuan o ruraicunahuan pagui ninatami cungarinchij.

³ Cai yachaipica imamanta pagui nina cashcatami ricushun. Shinallataj ñaupaca taucacunami pagui nijcuna cashcata ricuchircacuna. Cutin shujtajcunaca mana chaita rurarcacunachu. Paicunamantapishmi yachashun. Qꞌuipaca pagui nishcata ricuchingapaj imata rurana cashcatami yachashun.

4-5. ¿Imamantataj pagui nishcata ricuchina canchij?

⁴ Jehová Diosca pagui nij cashcata ricuchingapajca ¿imatataj ruran? Paita alli sirvijcunamanmi bendicioncunata cun (2 Samuel 22:21; Salmo 13:6; Mateo 10:40, 41). Chaimantami  Bibliapica: “Cꞌuyashca huahuacuna cashcamanta, Diosta ricushpa catijcuna caichij” nin (Efesios 5:1). Ñucanchijca Jehová Dios shinami casha ninchij. Chaimantami pagui nij cashcata ricuchina canchij.

⁵ Shujtajcuna pagui nijpica ñucanchijmi cushilla sintirinchij. Pero ñucanchij pagui nijpica paicunami cushilla sintirincuna. ¿Imamantataj cushilla sintirincuna? Ñucanchijman ima minishticushcata cushpa o imapi ayudashpami cushilla sintirincuna. Chashnami caishuj chaishujpura ashtahuan alli apanacunchij.

6. ¿Imamantataj pagui ninaca curi manzana shina can?

⁶ Shujtajcunata pagui ninaca achca valishcami can. Bibliapica: “Yachanaihuan cajpitaj cunashca alli shimicunaca curi manzanata, cullqui platopi cushca shinamari” ninmi (Proverbios 25:11). Curi manzanata, cullqui platopi cushcaca sumajmi ricurin. Shinallataj chai manzanaca achcami valin. ¿Shujtajcuna chashna regalota cujpica ima shinataj sintirinchijman? Ñucanchijpish shujtajcunata sumaj shimicunahuan pagui nijpica paicunapajca achca valishcami canga. Ashtahuancarin ima shinami shuj curi manzanaca unai unaicama valishca can. Chashnallatajmi shujtajcunaca ñucanchij pagui nishcata unai unaicama shungupi huaquichingacuna.

7. a) Salmo 26:6-8-pi nishca shinaca Diosta pagui ningapajca, ¿Davidca imatataj rurarca? b) Asafpaj huahua huahuacunapish Diosta pagui ningapajca ¿imatataj rurarcacuna?

⁷ Ñaupa tiempopica Diosta achca sirvijcunami pagui nishcata ricuchijcuna carca. Por ejemplo, Davidpajca Diosta sirvinaca achca valishcami carca. Chaimantami Diosta pagui ningapajca ruraicunahuan ricuchirca (Salmo 26:6-8-ta liyipai). Pero, ¿chaitaca ima shinataj yachanchij? Davidca Diospaj huasita shayachichunmi achca curita, achca  cullquitapish curca. Asafpaj huahua huahuacunapish Diosta pagui ningapajca ¿imatataj rurarcacuna? Diosta alabana cantocunatami rurarcacuna. Shuj cantopica ‘jatun mancharinacunata rurashcamantami’ Diosta pagui nircacuna (Salmo 75:1). Shinashpaca Davidpish, Asafpaj huahua huahuacunapish Jehová Dios paicunaman bendicioncunata cushcamantami agradicinata munarcacuna. Ñucanchijca paicuna shina cangapajca ¿imatashi rurana canchij?

8-9. a) ¿Apóstol Pabloca huauqui panicunata cꞌuyashcataca ima shinataj ricuchirca? b) ¿Cartapi ima nishcata uyashpaca huauqui panicunaca ima shinataj sintirishca cangacuna?

⁸ Apóstol Pabloca paipaj shimicunahuanmi huauqui panicunata cꞌuyashcata ricuchirca. Por ejemplo, paicunamantami Diosta pagui nishpa mañaj carca. Shinallataj cartacunapica ‘cancunataca achcatami cꞌuyani, llaquini’ nishpami quillcashpa cachaj carca. Romanos 16:1-15-pica Pabloca 27 huauqui panicunapaj shuticunatami quillcarca. Shujcunaca Áquila, Priscilami carca. Paicunaca “ashallamantami Pablomanta mana huañushcacuna” carca. Shinallataj Febe shuti huarmipish Pablota, shujtajcunata ayudajmi carca. Chaita yuyarishpami Pabloca cushichij shimicunata cai huauqui panicunapaj quillcarca.

⁹ Pabloca huauqui panicuna pandarijllacuna cashcatami yacharca. Shinapish Roma llajtapi tiyaj congregacionman cachagrij cartapica paicunapaj alli ruraicunata yuyarishpami quillcashpa tucuchirca. Chai cartata congregacionpi liyijpica huauqui panicunaca ¿ima shinashi sintirishca cangacuna? Paicunamanta Pablo ima nishcata uyashpaca cushillami sintirishca cangacuna. Chaimantami paihuanca allimi apanacushca cangacuna. Ñucanchij congregacionpipish achca huauqui panicunami paicunapaj shimicunahuan, ruraicunahuan allita ruracuncuna. Paicunataca ¿Pablo shinachu pagui ninchij?

10. ¿Jesusmantaca imatataj yachacunchij?

¹⁰ Jesusca Asia Menor llajtapi caj huaquin congregacioncunamantami parlarca. Chai congregacioncunapi caj huauqui panicunaca Diosta alli sirvijcunami carca. Chaimantami Jesusca paicunata pagui nishcata ricuchirca. Por ejemplo Tiatira llajtapi caj congregacionmanta parlashpaca: “Ñucaca can imallata rurashcatapish, cꞌuyaj cashcatapish, crijtaj cashcatapish, allita ruraj cashcatapish, mana pꞌiñarij alli shungu cashcatapish yachanimi. Shinallataj can ruracushcacunaca callaritapish yalli ashtahuan alli cashcatapish yachanimi” nircami (Apocalipsis 2:19). Jesusca paicuna Diosta ashtahuan sirvicushcallataca mana parlarcachu. Ashtahuanpish cꞌuyaj, allita ruraj, sinchi crij cashcamantami felicitarca. Shinapish Tiatira llajtapi caj maijan huauqui panicunata cunana cajpica cunarcami. Chashna jahuapish sumaj shimicunahuanmi paicunata animarca (Apocalipsis 2:25-28). Jesusca congregacioncunata alli pushaj cashcamantami pagui ninata mana minishtin. Shinapish paipaj ruraicunahuanmi agradicishcata ricuchin. Ancianocunaca pai shinami rurana canguichij.

11. Hebreos 12:16-pi ricuchishca shinaca Esaú runaca Diosta mana cazuj cashcata ¿ima shinataj ricuchirca?

¹¹ Huaquin gentecunaca agradicishcata mana ricuchircacunachu. Esaú runapi yuyashun. Paipaj yaya mamacunaca Diosta cꞌuyaj, cazujmi carcacuna. Pero paica mana chaita rurarcachu (Hebreos 12:16-ta liyipai). Chaimantami Esaú runaca shuj plato micunata micuna raicu, punta churi canata paipaj qꞌuipa huauquiman cꞌaturca (Génesis  25:30-34). Pero qꞌuipaca punta churi chasquinata mana chasquishcamantami pꞌiñarishpa quejarirca. Ña cꞌatushca cashcamantaca mana pꞌiñarinachu carca.

12-13. a) ¿Israelitacunaca Diosta mana agradicishcataca ima shinataj ricuchircacuna? b) ¿Israelitacuna Diosta mana agradicishcamantaca imataj tucurcacuna?

¹² Israelitacunaca tucuimantami Diosta agradicishcata ricuchina carcacuna. Por ejemplo, paicunaca Egipto llajtapimi llaquicunata apacurcacuna. Paicunata quishpichingapajmi Diosca Egipto llajtataca chunga cutin llaquichirca. Chai qꞌuipaca egipcio soldadocunata Puca Cuchapi huañuchishpami cutin israelitacunata quishpichirca. Chaimantami paicunaca Diosta agradicingapaj shuj cantota cantarcacuna. Pero qꞌuipamanca ¿imashi tucurca?

¹³ Llaquicuna cutin ricurijpica israelitacunaca Jehová Dios paicunamanta tucuita rurashcatami cungarirca. Chaimantami ña mana agradicishcata ricuchircacuna (Salmo 106:7). Bibliapica: “Chai shitashca pambapimi tandanacushca tucui israelcunaca Moisestapish, Aarontapish juchachishpa rimarcacuna” ninmi. Chashna rimashpaca Jehová Diosta juchachicushca layami carca (Éxodo 16:2, 8). Chaimantami Diosca ‘ñucata cungarijcunaca cai shitashca pambapimi huañungacuna. Josué, Calebllami mana huañungacuna’ nircami (Números 14:22-24; 26:65). Ñucanchijca Diosta cungarij gentecuna shinaca mana casha ninchijchu. Ashtahuanpish pagui nijcuna shinami casha ninchij. ¿Chaipajca imatashi rurana canchij?

14-15. a) ¿Cusa huarmica paicunapura pagui nijcuna cashcataca ima shinataj ricuchina can? b) Yaya mamacunaca huahuacuna pagui ninata yachachunca ¿imatataj rurana can?

¹⁴ Familiata pagui nishunchij. Familia ucupi tucuicuna pagui ninata yachajpica cushillami causangacuna. Cusa huarmicunapish paicunapura pagui nijcuna cajpica jahuallami perdonaringacuna. Shinallataj tandallami causangacuna. Alli cusaca huarmi ima allicunata rurashcallataca mana ricunchu. Ashtahuanpish ‘jatarishpami paita cushichin’ (Proverbios 31:10, 28). Yachaisapa huarmipish caipi chaipica allitami ruracungui nishpami cusata cushichin.

¹⁵ Yaya mamacunaca huahuacuna pagui ninata yachachunca ¿imatataj rurana canguichij? Huahuacunaca cancuna imata nishcata, imata rurashcatami catincuna. Chaimantami huahuacuna cancunapaj ima favorta  rurajpica pagui nina canguichij. Shinallataj shujtajcuna huahuacunapaj ima allita rurajpica pagui nichun yachachichij. Ashtahuancarin shungumanta agradicishpaca shujtajcunataca achcatami ayudanguichij nishpa yachachichij. Por ejemplo Clary shuti panica: “Ñuca mamaca 32 huatacunata charishpaca paillami quimsa huahuacunata huiñachina carca. Ñuca ña 32 huatacunata pajtachishpaca mamitapajca huahuacunata huiñachina sinchi cashcatami yuyarircani. Chaimantami alli huiñachingapaj tucuita rurashcamanta pagui nircani. Qꞌuipaca ñuca mamaca ‘can ima nishcataca shungu ucupimi huaquichircani. Chaimantami cushilla sintirini’ nircami” ninmi.

16. ¿Shujtajcunata pagui nijpica ima shinataj sintiringacuna? Shuj ejemplomanta parlai.

¹⁶ Huauqui panicunata pagui nishunchij. Pagui nijpica huauqui panicunaca animarincunami. 28 huatacunata charij Jorge shuti ancianopi yuyashun. Ancha ungüi japijpimi tandanacuicunamanca ña mana ri pudirca. Tandanacuiman ña ri pudishpapish conferenciacunataca manaraj cui tucurcachu. Paica: “Congregacionpi ima mingashcata ñaupa shina mana rurai pudishcamantami llaquirircani. Shinapish shuj punllaca shuj huauquica: ‘Canca allita rurashcamantami ñuca familiata achcata ayudashcangui. Cai tucui huatacunapica sumaj conferenciacunatami cushcangui. Chaimantami ñuca familiaca Diospi tucui shunguhuan crincuna. Achcatami pagui nini’ nircami. Chashna nijpica huiqui muyurishpami huacarcani. Chaita uyanatami minishticurcani” ninmi.

17. Colosenses 3:15-pi nishca shinaca ¿Diosta pagui ningapajca imatataj rurana canchij?

¹⁷ Mana mitsa Diosta pagui nishunchij. Jehová Diosca ñucanchijmanca tandanacuicunahuan, revistacunahuan, Internetpi tiyaj paginacunahuanmi yachachin. ¿Manachu shuj revistata liyicushpa o shuj conferenciata uyashpaca caitami uyanata minishticurcani nishcanchij? O ¿JW Broadcasting nishca canalpi shuj programata ricushpaca manachu chaillatataj nishcanchij? ¿Chaicunata cushcamanta Diosta pagui ningapajca imatataj rurana canchij? (Colosenses 3:15-ta liyipai). Tucui punllacunami Diosta mañacushpaca pagui nina canchij (Santiago 1:17).

18. Diosta agradicingapajca ¿Tandanacuna Huasicunata ima shinataj charina canchij?

¹⁸ Diosta agradicishcata ricuchingapajca ñucanchij Tandanacuna Huasicunatami limpio, ordenado charina canchij. Chaipajca  siempremi limpiana, allichina canchij. Shinallataj equipo de sonidopi cajcuna, videocunata churajcunaca paicuna utilizaj aparatocunatami cuidana can. Tucuita alli charijpimi Tandanacuna Huasicunataca ña mana tanto allichina tucunga. Ashtahuancarin muyundij Allpapi Tandanacuna Huasicunata rurangapaj, allichingapajmi cullquipish tiyanga.

19. Shuj superintendente, paipaj huarmipish ima tucushcata ricushpaca ¿imatataj yachanchij?

¹⁹ Sinchita trabajajcunata pagui nishunchij. Pagui nijpica shujtajcuna llaquita charishpapish allimi sintiringacuna. Shuj superintendente, paipaj huarmipish ima tucushcata ricushun. Paicunaca tamya punllacunapimi shuj sectorpi Diospaj Shimita huillacurcacuna. Huillashca qꞌuipaca huasimanmi shaicushca tigrarcacuna. Tutaca yallitaj chiri cajpimi huarmica chompata churarishpa dorminaman rirca. Cayandij punllaca paipaj cusamanca ‘congregacioncunata canhuan visitashpa purinataca ña mana pudishachu’ nircami. Shinapish chai punllallatajmi sucursalmanta shuj cartata huarmipajman cachashca carca. Chai cartapica huarmitaca: ‘Tucuita ahuantashpa cada semana shujtaj shujtaj lugarman rinaca sinchimi canga. Pero chaita ruracushcamantami cantaca pagui ninchij’ nishpami quillcashca carca. Cusaca: “Chai shimicunata liyishpami paica ñucata acompañashpa catirca. Huaquinpica ñucami chai trabajota saquinata munarcani. Pero ñuca huarmica chaita rurashpa catichunmi animarca” nircami. Shinaca cai cusa huarmica casi 40 huatacunatami superintendente shina sirvircacuna.

20. a) ¿Imatataj tucui punllacuna rurana canchij? b) ¿Imamantataj tucui punllacuna pagui nishcata ricuchina canchij?

²⁰ Tucui punllacuna ñucanchij rimashcacunahuan, rurashcacunahuan Jehová Diostapish shujtajcunatapish pagui nishunchij. Chaita rurajpica huauqui panicunaca animarishpami llaquicunata ahuantashpa catingacuna. Shinallataj pagui nijcuna cashpaca shujtajcunahuanca allimi apanacushun. Ashtahuancarin Yaya Dios shina pagui nijcuna cashcatami ricuchishun.