1. ¿Diosta sirvij huauqui panicunaca imata rurangapajtaj esforzarincuna?

BIBLIAPICA Diosta sirvijcuna, Jesús shina shungumanta Jehová Diosta sirvinatami huillarca (Salmo 110:3). Cai shimicunaca cunan punllacunami pajtaricun. Cada huatami Diosta sirvijcunaca achca horascunata mana cobrashpa predicancuna. Shinallataj paicunaca huauqui panicunata minishtirishca cosascunahuan ayudangapaj, animangapaj, paicunapaj feta sinchiyachingapajmi tiempota surcuncuna. Ashtahuancarin ancianocuna, siervo ministerialcunaca tandanacuicunapi conferenciata cungapajmi achca horasta allichincuna. Huauqui panicunata visitangapajpishmi tiempota surcuncuna. Paicunaca Jehová Diosta cꞌuyashcamanta, huauqui panicunata cꞌuyashcamantami chaita rurancuna (Mateo 22:37-39).

2. Romanos 15:1 al 3-pi nishca shinaca ¿Jesuspaj ejemplomantaca imatataj yachai tucunchij?

² Jesusca paillapi yuyanapaj randica shujtajcunatami ayudarca. Diosta sirvijcunapish paipaj ejemplotami catina canchij (Romanos 15:1-3-ta liyipai). Chaita rurashpaca beneficiarishunmi. Jesusca: “Imatapish cujmi, cushcata japijta yalli cushicun” nircami (Hechos 20:35).

3. ¿Cai yachaipica imatataj ricushun?

³ Cai yachaipica shujtajcunata ayudangapaj Jesús imallata rurashcata, ñucanchijpish paipaj ejemplomanta imata yachai tucushcatami ricushun. Shinallataj shujtajcunata ashtahuan ayudangapaj imallata rurai tucushcatami ricushun.

4. ¿Jesusca shaicushca cashpapish shujtajcunata ayudangapajca imatataj rurarca?

⁴Jesusca shaicushca cashpapish shujtajcunatami ayudarca. Jesús shuj urcupi cajpica achca gentecunami paita ricunaman rircacuna. Tal vez caica Capernaúm cꞌuchupi saquirij urcupimi cashcanga. Jesusca casin tucui tuta Jehová Diosta mañashcamantami tal vez shaicushca cashcanga. Pero chaipi pobrella cajcunata, ungushcacunata ricushpaca cꞌuyaimantami ayudarca. Jesusca gentecunata jambishpa, shuj animaj conferenciatapishmi curca (Lucas 6:12-20).

5. ¿Familiata pushajcunaca shaicushca cashpapish ima shinataj Jesuspaj ejemplota catincuna?

⁵¿Familiata pushajcunaca ima shinataj Jesuspaj ejemplota catincuna? Caipi yuyashun. Tal vez shuj yayaca sinchita trabajashcamantachari paipaj huasimanca shaicushca chayan. Paica chai tutaca familiahuan Diosmanta yachanatami charincuna. Pero shaicushca cashcamantachari paica shujtaj punllapaj saquisha nin. Shinapish ama chashna yuyangapajmi paica Diosta fuerzata cuchun mañan. Jehová Dios paiman fuerzasta cujpica familiahuanmi Bibliamanta yachancuna. Chai tutaca huahuacunaca yaya mamacunapaj Jehová Diosmanta yachana importante cashcatami yachancuna.

6. ¿Jesusca pailla canata munashpapish shujtajcunata ayudangapajca imatataj rurarca?

⁶Jesusca pailla pasanata munashpapish shujtajcunahuan pasangapajmi tiempota surcurca. Jesusca paipaj amigo Bautizaj Juanta huañuchishcatami yachaj chayarca. Chaimantami paica llaquilla sintirishcanga. Bibliapica: “Juan huañushcata yachashpami Jesusca, chai llajtamantaca shuj barcopi shitashca pambaman pailla rirca” ninmi (Mateo 14:10-13). Paica chashna llaquilla cashcamantami pailla canata munashcanga. Shinallatajmi huaquincunapish shuj familiata huañuipi chingachishpaca paicunalla canata munancuna. Pero Jesusca pailla canataca mana pudircachu. Pai shitashca pambaman manaraj chayajpimi ña achca gentecuna chaipi cashca carca. ¿Jesusca chaipi gentecunata ricushpaca imatataj rurarca? Jesusca chai gentecuna ayudata minishtishcata ricushpami,  Diosmanta achcata yachachishpa rato ayudarca (Marcos 6:31-34; Lucas 9:10, 11).

7, 8. ¿Ancianocunaca huauqui panicunata ayudangapajca ima shinataj Jesuspaj ejemplota catincuna?

⁷Congregacionta pushaj ancianocunaca Jesuspaj ejemplotami catincuna. Paicuna ñucanchijta ayudangapaj sinchita esforzarishcataca achcatami valoranchij. Shinapish paicuna tucui imallata rurashcataca mana yachanchijchu. Por ejemplo, Comités de Enlace con los Hospitalespi trabajaj pushaj ancianocunaca huauqui panicunataca achcatami ayudancuna. Maipica paicunaca chaupi tuta ayudana cajpica chai horasmi ayudancuna. Paicunapish, paicunapaj familiapish huauqui panicunata cꞌuyashcamantami rato ayudancuna.

⁸ Ancianocunaca Tandanacuna Huasicunata shayachishpa, edificiocunata shayachishpami ayudancuna. Shinallataj paicunaca terremoto tiyashcamanta o acapana tiyashcamantami huauqui panicunata ayudancuna. Congregacionpipish huauqui panicunata apoyangapaj, animangapajmi huaquin horascunata llujchincuna. Chashna paicuna sinchita trabajashcamantami paicunatapish, paicunapaj familiacunatapish shungumanta agradicinchij. Paicunata Jehová Dios bendiciachunpishmi munanchij. Pero ancianocunaca chashna sinchita ayudashpapish paicunapaj familiacunata Yayitu Diosmanta yachachingapaj, cuidangapajca tiempotami surcuna can.

9. Filipenses 2:4, 5-pi nishca shinaca ¿Diosta sirvijcunaca imatataj rurana canchij?

⁹ (Filipenses 2:4, 5-ta liyipai). Mana tucuicuna pushaj ancianocunachu canchij.  Shinapish Jesús ima shina shujtajcunata ayudashcamantami ñucanchijpish yachai tucunchij. Bibliapica: ‘Jesusca tucuita saquishpa sirvij shinami tucurca’ ninmi (Filipenses 2:7). ¿Cai shimicunaca imatataj nisha nin? Alli sirvijca paipaj amota cushichinatami mashcan. Ñucanchijpish sirvijcunami canchij. Chaimantami Jehová Diosta sirvingapaj, huauqui panicunata ayudangapaj tucui pudishcata rurasha ninchij. Cunanca shujtajcunata ayudangapaj imacunallata ashtahuan rurana cashcata yachashun.

10. ¿Ima tapuicunapitaj yuyana canchij?

¹⁰Ayudana munaita charishcata o mana charishcata alli ricushunchij. Chaipajca cashna nishpa tapurishunchij: “¿Ñuca munashcata huashaman saquishpachu shujtajcunata ayudangapaj listo cani? ¿Shuj mayorlla huauquita visitachun mañajpi o mayorlla panita tandanacuiman apachun mañajpica ayudangapaj listochu cani? ¿Jatun Tandanacuna Huasita pꞌichachun mañajpi o Tandanacuna Huasita allichichun mañajpica ayudangapajca listochu cani?”. Jehová Diosman mingarishpaca, “tucui causaipimi ñucanchij tiempohuan, ima tiyashca cosascunahuan sirvisha” nircanchijmi. Chashna Diosta sirvijpi, shujtajcunata ayudajpica paica cushillami sintirin. Pero ¿shujtajcunata ayudangapaj imapi mejoranata yachashpaca imatataj rurana canchij?

11. ¿Ayudana munaita charingapajca imamantataj Jehová Diosta mañana canchij?

¹¹Jehová Diosta shungumanta mañashunchij. Ayudana munaita mana charishpaca ima shina sintirishcata Diosman tucuita huillashunchij. Shinallataj ayudana munaita cuchun, chaita pajtachingapaj fuerzasta cuchun mañashunchij (Filipenses 2:13).

12. ¿Jovenlla huauquicunaca Diospaj pueblopica ima shinataj ayudai tucuncuna?

¹² Can joven huauqui cashpaca congregacionpi ashtahuan sirvingapajmi Jehová Diosta ayudachun mañai tucungui. Huaquin lugarcunapica ashalla siervo ministerialcunami tiyan. Maijan siervo ministerialcunaca mana jovenlla cancunachu. Diospaj pueblo ashtahuan miracushcamantami jovenlla huauquicunaca ancianocunata ayudana, huauqui panicunata cuidana minishtirin. Chashna ayudanata agllashpaca cushillami sintiringui. Jehová Diospish cushillami sintiringa. Huauqui panicunapish can ayudangapaj listo cashcatami yachangacuna.

13, 14. ¿Huauqui panicunata ayudangapajca imatataj rurana canchij? (Página 1-pi tiyaj fotota ricui).

¹³Shujtajcuna imapi ayudachun minishtishcata alli ricushunchij. Apóstol Pabloca Judeapi causaj huauqui panicunamanca: “Shinallataj allita ruranatapish, caishuj chaishujman ayudanatapish amataj cungaringuichijchu. Chashna sacrificiocunatami Diosca munan” nircami (Hebreos 13:16). Cai consejoca valishcami carca. Judeapi causaj huauqui panicunaca cai shimicunata chasquishca qꞌuipallami huasicunata, negociocunata, Diosta mana sirvij familiacunata saquishpa, urcucunaman miticushpa rina carcacuna (Mateo 24:16). Pero paicunaca miticuna tiempo manaraj chayajpica, caishujmanta chaishujmantami ayudanacushpa catina carcacuna. Chashnami shujtaj lugarcunapi causanaman rishpaca minishtirishcacunallahuan causanata yachashcangacuna.

¹⁴ Maipica huauqui panicunaca imapi ayudachun minishtishcataca mana huillancunachu. Caipi yuyashun. Shuj huauquichari viudo saquirin. Paica micunitahuan o carropi maiman apashpa o huasipi ima ruraicunahuan ayudachunchari minishtin. Paica  “shujtajcunapaj mana shuj carga casha” nishpachari imata minishtishcataca mana huillan. Pero ñucanchij ayudajpica paica cushillami sintiringa. Maijan huauqui o pani ayudachun minishtijpica “shujtajcunami ayudanga, paillatajmi ima ayudataca mañanga” nishpaca mana yuyanachu canchij. Ashtahuanpish “¿ñucanchijpish pai shinallataj llaquicunata charishpaca imapi ayudachuntaj minishtinchijman?” nishpami tapurina canchij.

15. ¿Shujtajcuna ayudata mañachunca imatataj rurana canchij?

¹⁵Shujtajcunata ayudangapaj listos cashcata ricuchishunchij. Chashnami shujtajcunaca mana manchashpa ñucanchij ayudachun mañangacuna. Ñucanchij congregacioncunapica achca huauqui panicunami shujtajcunata ayudangapajca listos can. Paicunaca ayudata minishtijcunataca shuj cargata shinaca mana ricuncunachu. Ñucanchijpish paicunapaj ejemplotami catisha ninchij. 45 huatacunata charij Alan shuti pushaj ancianoca Jesuspaj ejemplota catingapajmi esforzarin. Paica: “Jesusca ocupado cashpapish shujtajcunamantami preocuparirca. Chaimi tucui laya gentecunaca paihuan pasanata munarcacuna. Shinallataj ayudachunpishmi mañarcacuna. Ñucapish Jesús shinallatajmi shujtajcunata cꞌuyaj, ayudaj casha nini” ninmi.

16. Salmo 119:59, 60-pi nishca shinaca ¿Jesuspaj ejemplota catingapajca imatataj rurana canchij?

¹⁶ Jesuspaj ejemplota mana tucuipi alli cati tucushpaca mana desanimarinachu canchij (Santiago 3:2). Caipi yuyashun. Maipica shuj yachacujca paipaj yachachij shina mana tucuita alli rurai tucunchu. Pero paica desanimarinapaj randica ashtahuan yachashpa catishpaca asha ashami mejoranga. Chashnallatajmi Biblia yachachishcacunata  estudiashpa, chaipi yachashcacunata ñucanchij causaipi pajtachishpaca Jesuspaj ejemplota cati tucushun (Salmo 119:59, 60-ta liyipai).

17, 18. ¿Jesús shina shujtajcunata ayudangapaj esforzarishpaca ima shinataj beneficiarishun?

¹⁷ Shujtajcunata ayudajpica paicunapish ayudanatami yachangacuna. Tim shuti pushaj ancianoca: “Congregacionpica jovenlla huauquicunaca shujtajcunapaj ejemplota ricushpami, shujtajcunata ayudashpa siervo ministerialpish tucushcacuna. Paicunaca huauqui panicunatapish, ancianocunatapish achcatami ayudashcacuna” ninmi.

¹⁸ Cai mundopi causaj gentecunaca paicunallapimi yuyancuna. Pero Diosta sirvijcunaca mana chashna yuyanchijchu. Jesús ima shina shujtajcunata ayudashcata yachashpaca, ñucanchijpish paipaj ejemplotami catisha ninchij. Pero maipica chaita alli pajtachinaca sinchimi can. Chashna cajpipish pajtachingapajmi esforzarina canchij (1 Pedro 2:21). Jesuspaj ejemplota catingapaj tucui pudishcata rurashpaca, Jehová Diospaj ñaupajpica allimi ricurishun.