1, 2. ¿Cai pachapica imamantataj achca pobrecuna tiyan?

CUNAN punllapi causaica sinchimi can. Jovencunaca trabajota mana japincunachu. Achca gentecunami caru llajtaman trabajanaman rincuna. Cullqui tiyaj llajtacunapipish achca pobrecunami tiyan. Charijcunaca ashtahuanmi charijyancuna. Cutin, pobrecunaca ashtahuanmi pobre tucuncuna. Asha gentecunallami achca cullquita charincuna, paicunapaj huahua huahuacunapajpish saquingapajmi charincuna. Cutin, achca gentecunaca micunallapajpish casi mana charincunachu. Chashna causaita ricushpami Jesusca llaquirirca. Chaimantami: “Huajchacunaca mana illangachu” nirca (Marcos 14:7). ¿Imamantataj chashna causanchij?

² Cai pachapica organizacioncunapish, empresacunapish cullquita charinallapimi yuyancuna. Paicunaca mana minishtishca cosascunata randichunmi animancuna. Apocalipsis 18:3-pica, chaicunataca “allpa pachapi randishpa cꞌatushpa causajcuna” ninmi. Jesusca ima horapish chaicuna tucurinatami yacharca. Politicocunapish, panda religioncunapish  Diablopaj maquipimi can. Diosta sirvijcunaca politicapi, panda religioncunapipish mana chagrurincunachu. Pero cai pachapi charijyana munaita saquinaca sinchimi ricurin.

3. ¿Imatataj tapurina canchij?

³ Diosta sirvijcunaca charijyanallapi yuyacushcata o mana yuyacushcatami ricuna canchij. Chaimantami: “¿Diosta sirvingapaj ñuca charishcacunataca ima shinataj utilizai tucuni? ¿Charijyana munaicunata ama charingapajca imatataj rurai tucuni? ¿Diospi tucui shunguta churangapajca picunamantataj yachai tucuni?” nishpami tapurina canchij.

4, 5. a) ¿Jesús parlashca mayordomoca imataj tucurca? b) ¿Jesusca paita catijcunamanca imatataj nirca?

⁴ (Lucas 16:1-9-ta leyipai). Jesusca shuj mayordomomanta parlashpami yachachirca. Tucuicunami chaipi yuyana canchij. Jesusca: ‘Shuj charij amomi tiyarca. Paica shuj mayordomotami charirca. Chai mayordomo paipaj charishcacunata yanga tucuchicun nijtami amoca yachaj chayarca’ nircami. Mayordomoca trabajo illajmi saquirigrirca * (urapi tiyaj notata ricui). Chaimantami “yachaisapa tucushpa” shujtajcunapaj amigo tucurca. ‘Trabajo illaj saquirijpica paicunami ayudanga’ yuyashpami chashna rurarca. Jesusca paita catijcuna imalla minishtishcata charingapaj, mana allita rurachunca mana yachachircachu. Diosta mana rijsij gentecunami chashna rurancuna. Shinaca ¿Jesusca imatataj yachachisha nirca?

⁵ Trabajo illaj saquirigrishcata yachashpaca mayordomoca llaquirishcami canga. Jesusta catijcunapajpish minishtishcata mashcarinaca sinchimi cagrirca. Chaita yachashpami Jesusca: “Cai pachallata yuyashpa charijyashcacunata shujtajcunaman cushpa paicunahuan alli apanacuj tucuichij” nirca. Chashna rurajpica paicunataca Jehová Diospish Jesuspishmi ‘jahua pachapi huiñaita causanapaj’ chasquina carca. ¿Jesusta catijcunaman cushca consejomantaca imatataj yachai tucunchij?

6. ¿Trabajashpalla causachun Jehová Dios mana munashcataca ima shinataj yachanchij?

⁶ Bibliapi yachachishca shinaca trabajashpalla causachunca Jehová Diosca mana munanchu. Por ejemplo, Edén huertapica Diosca Adán Evamanpish tucui minishtishcata yallimi curca (Génesis 2:15, 16). Shinallataj Jehová Diosca primer siglopi ungidocunaman espíritu santota cujpica pi mana “caica ñucapajmi, chaica ñucapajmi nircacunachu. Tucui imalla charishcacunapish tucuipajmi carca” (Hechos 4:32). Isaiasca shamuj punllacunapi tucui minishtishcata charishpa tucuicuna cushilla causanatami nirca (Isaías 25:6-9; 65:21, 22). Chai punlla chayamungacamaca Diosta sirvijcunaca ‘alli yachaitami’ charina canchij. Causangapajca cai pachapi tiyaj cosascunatami minishtinchij. Chaimantami trabajanchij. Pero Diospaj ñaupajpi alli ricurinatami ashtahuan mashcana canchij.

7. ¿Lucas 16:10 al 13-pica imatataj yachachin?

⁷ (Lucas 16:10-13-ta leyipai). Jesús parlashca mayordomoca paita ayudachunllami shujtajcunapaj amigo tucurca. Pero Jesusca Diosta sirvijcunataca ‘ama cancunallapi yuyashpa jahua pachapi cajcunahuan alli apanacuichij’ nircami. Shinallataj Jesusca ñucanchij charishcacunata alli utilizashpaca Diospaj ñaupajpi paipaj ñaupajpipish alli ricurinatami yachachisha nirca. ¿Ñucanchij charishcacunata alli utilizacushcataca ima shinataj ricuchinchij?

8, 9. ¿Huauqui panicunaca ima shinataj paicunapaj charishcacunahuan ayudacuncuna?

⁸ Achca gentecuna Diosmanta yachachunmi ñucanchij charishcacunahuan apoyai tucunchij. Chaita rurashpami Jehová Diosta cꞌuyashcata ricuchinchij (Mateo 24:14). Por ejemplo, India llajtapica shuj huahuaca juguetecunata randinata saquishpami uchilla cajitapi cullquita tandarca. Cajitapi jundachishca qꞌuipaca Bibliamanta yachachishpa catichunmi chai cullquita curca. Shinallataj chai llajtallapitajmi shuj huauquica coco yuracunata tarpushcata charin. Shuj punllaca Traducina Huasipi trabajajcunamanmi achca cococunata regalarca. Chai Traducina Huasipica malayálam shimimanmi traducincuna. Chai huauquica: “Cullquipi cunapaj randica cococunata minishtijpimi cococunata cuni” nircami. Grecia llajtamanta testigocunapish aceiteta, quesota, shujtaj micunacunatapishmi Betelpi trabajajcunaman regalancuna.

⁹ Shuj huauquica Sri Lanka llajtapimi allpata, huasita charin. Chaimantami huauqui panicuna chaipi tandanacuchun saquin. Huaquincunamanca pozadatapishmi cun. Chaita rurangapaj cullquita gastana cajpipish paica ashallata charij huauqui panicunatami ayudan. Shujtaj llajtacunapica Diosmanta yachachichun mana saquincunachu. Chaimantami huaquincunaca paicunapaj huasipi huauqui panicuna tandanacuchun saquincuna. Paicuna chashna ayudashcamantami pobrella huauqui panicunapish shuj localta mana arrendashpa gratis tandanacun.

10. ¿Shujtajcunata ayudashpaca ima shinataj sintirinchij?

¹⁰ Cai huauqui panicuna chashna ayudashpami “ashallahuanpish” allita ruraj cashcata ricuchin (Lucas 16:10). Paicuna charishca cosascunata shujtajcunaman cushpami ‘tucuimanta yalli alli cashcata’ ruracuncuna. Chashna rurashpami cushilla sintirincuna (Lucas 16:11). Shuj panica Diosmanta huillashpa catingapajmi siempre cullquita cun. Paica: ‘Chashna rurashcamantaca shujtajcuna pꞌiñachijpipish perdonanaca jahuallami can. Mana utca  pꞌiñarinichu, ñuca munashca shina imapish mana pajtarijpica tranquilami sintirini. Shujtajcunapaj consejocunatapishmi alli chasquini’ ninmi. Achcacuna cushicuihuan ayudashpaca Diospajmanmi ashtahuan cꞌuchuyashcacuna (Salmo 112:5; Proverbios 22:9).

11. a) ¿Ima shinataj ‘alli yachaj’ cashcata ricuchinchij? b) ¿Achca huauqui panicunaca ima shinataj ayudacuncuna? (Página 3-pi tiyaj dibujota ricui).

¹¹ Shujtajcuna Diosmanta huillachunmi ñucanchij charishcacunahuan ayudai tucunchij. Chashnami ‘alli yachaj’ cashcata ricuchishun. Shujtaj llajtapi sirvinaman mana ri tucushpapish o mana achcata rurai tucushpapish shujtajcunatami ayudai tucunchij (Proverbios 19:17). Pobre llajtacunapica achcacunami Diosmanta yachasha nincuna. Shungumanta cullquita cujpica chai llajtacunapi Diosmanta yachachun, publicacioncunata chasquichunmi ayudanchij. Por ejemplo, Congo, Madagascar y Ruanda llajtacunapica Bibliata randinaca caromi can. Chaimantami shuj Bibliata charingapajca shuj semana o shuj quillata trabajana can. Huauqui panicunaca micunata randina o Bibliacunata randinatami agllana carca. Pero shujtaj huauqui panicuna cullquita cushpa ayudashcamantami paicunapish “ima illashcata” charincuna. Chashna ayudashcamantami Bibliacunata shujtaj shimicunapi rurai tucushcanchij. Shinallataj familiapi tucuicuna shuj Bibliata charichunmi cushcanchij. Bibliata yachacujcunamanpish Bibliata cushcanchijmi (2 Corintios 8:13-15-ta leyipai). Shungumanta cullquita cushpaca tucuicunami Diospajman cꞌuchuyai tucunchij.

12. ¿Abrahamca ima shinataj Diospi tucui shunguhuan crishcata ricuchirca?

¹² Diosmanta ama caruyangapajca charinallapi mana yuyanachu canchij. Shinallataj Dios munashcata rurangapajmi tiempota surcuna canchij. Abrahamta yuyarishun. Paica Diospaj alli amigomi casha nirca. Chaimantami Diosta cazushpa, Ur llajtata saquishpa carpa huasicunapi causarca (Hebreos 11:8-10). Abrahamca charinallata yuyanapaj randica Diospaj bendicioncuna ashtahuan valishca cashcatami ricurca (Génesis 14:22, 23). Achca huatacuna qꞌuipaca Jesuspishmi shuj joventaca Diospi tucui shunguhuan crichun animarca. Jesusca: ‘Diospaj ñaupajpi alli ricuringapajca, can imalla charishcacunata tucui cꞌatushpa, huajchacunaman cugri. Jahua pachapimi, achcata charingui. Chai qꞌuipa ñucata catingui tigramugri’ nircami (Mateo 19:21). Cai jovenca mana Abraham laya tucui shunguhuan Diospi crircachu. Pero shujtajcunaca Diospimi tucui shunguhuan crircacuna.

13. a) ¿Pabloca imatataj Timoteomanca nirca? b) ¿Ima shinataj Pablo nishcata pajtachi tucunchij?

¹³ Timoteoca tucui shunguhuanmi Diospi crirca. Chaimantami Pabloca: ‘Canca Jesucristopaj alli soldadomi cangui’ nirca.  Qꞌuipaca “maijanpish soldado tucushpaca, paita mandajpaj munashcata rurana yuyaillami. Paipaj munaita ruranataca mana yuyanchu” nircami (2 Timoteo 2:3, 4). Cunan punllacunapica precursorcunapish, betelitacunapish, shujtaj huauqui panicunapishmi Pablo nishcata cazuncuna. Paicunaca mana charinallata yuyancunachu. Ashtahuanpish Proverbios 22:7-pi nishcatami yuyarincuna. Chaipica: ‘Cullquita surcujcunaca cullquiyujpajta rurajmi tucun’ ninmi. Maijancunaca huasita shayachingapaj, carrota randingapaj, estudiangapaj, o bodata rurangapajmi achcata deudarishcacuna. Diabloca chaicunallapi ocuparichunmi munan. Yangamanta dibiyashpaca achca huatacunatami pagana tucunga. Alli yachajcuna cashpaca minishtishcallahuanmi causashun. Shinallataj mana dibiyangapajmi fuerzarishun. Chashnami cai pachapi charijyana munaita saquishpa Diosta ashtahuan sirvishun (1 Timoteo 6:10).

14. ¿Minishtishcallahuan causangapajca huaquin testigocunaca imatataj rurashcacuna?

¹⁴ Ñucanchijpajca Diospajta ruranami ashtahuan importante can. Chaimantami minishtirishca cosascunallahuan causana canchij. Por ejemplo, shuj cusa huarmica alli negociotami charirca. Pero paicunaca Diostami cutin ashtahuan sirvisha nircacuna. Chaimantami negociotapish, uchilla barcotapish, shujtaj cosascunatapish librita cꞌaturcacuna. Ña cꞌatushca huashaca Estados Unidospi mushuj Betelta rurashpa ayudangapajmi rircacuna. Chaipica paicunapaj ushushindij yernondijmi trabajarcacuna. Shinallataj huauquipaj yayamamahuanmi trabajarcacuna. Chashna trabajanaca paicunapajca sumaj bendicionmi carca. Cunanca shuj precursoramanta parlashun. Paica shuj bancopimi asha horascunallata trabajaj carca. Shuj punllaca paipaj jefecunaca: ‘Allimi trabajangui. Tucui punllacuna trabajajpica ashtahuan cullquitami pagashun’ nircami. Chai trabajo alli laya ricurijpipish Diosmanta huillangapaj tiempota mana charigrishcamantami mana chasquirca. Cai huauqui panicunaca Diosta sirvingapajmi chashna rurashcacuna. Ñucanchijpish Diostarajmi sirvina canchij. Chashnami mana charinallapi yuyashun. Shinallataj Diospaj ñaupajpi alli ricurina ashtahuan importante cashcatami ricuchishun.

15. ¿Cushilla causangapajca imatataj rurana canchij?

¹⁵ “Taita Dios bendiciashcamantami achcata charini” nishpaca mana yuyanachu canchij. Jehová Diosca ‘allicunata rurashpa causajcunatami’ bendiciasha nin (1 Timoteo 6:17-19-ta leyipai). Pani Luciamanta parlashun * (urapi tiyaj notata ricui). Paica, Albania llajtapi Diosmanta huillangapaj ayudata minishticujtami yachaj chayarca. Chaimi 1993-pica trabajota mana charishpapish Jehová Dios cuidanata crishpa chai llajtaman rirca. Chai llajtaman chayashpaca albanés shimitami yacharca. Paica 60 yalli gentecunatami bautizarichun ayudarca. Ñucanchijcunaca manachari pani Lucia laya achca gentecunata Diosta rijsichun ayudai tucushun. Pero shujtajcunata ayudangapajmi tucuita rurana canchij. Gentecunata  chashna ayudashpaca cushillami sintirishun (Mateo 6:20).

16. a) ¿Charinallapi yuyajcunaca imataj tucunga? b) ¿Cai pachapi charinacuna chingarinata yachashpaca imatataj rurana canchij?

¹⁶ Lucas 16:9-pica ‘charishcacuna illaj tucungami’ nishpaca Jesusca, tucui cai pachapi charishcacuna ima horapish chingarinatami nicurca. Cunan punllapica huaquin bancocunaca huichcarishcami. Cutin maijan llajtacunapica achca pobrezami tiyai callarishca. Ñallami ashtahuan llaquicuna tiyanga. Panda religioncunapish, politicocunapish ñallami chingaringa. Charinallapi yuyajcunapish ña mana tiyangachu. Gentecunapajca cullquipish oropish achca valishcami cashca. Pero profeta Ezequielpish Sofoniaspish huillashca shinaca cullquipish oropish imapaj mana valingachu (Ezequiel 7:19; Sofonías 1:18). Shuj chꞌimbapuraita ricushun. Shuj runaca achca cullquita charingapajmi tucui vida trabajarca. Pero chai tucui cullqui falso cashcata ricushpaca llaquillami sintirirca. Chashnallatajmi Diosta cungarishpa ashtahuan charingapaj tucui vida trabajai tucunchij. Pero ña yuyajyashpa, chai charishcacuna mana vali cashcata ricushpaca llaquillami sintirishun (Proverbios 18:11). Cai pachapi charishca cosascunaca chingaringami. Chaimanta Jehová Diospaj ñaupajpi, Jesuspaj ñaupajpipish alli ricuringapaj chai cosascunata utilizashunchij. Chaita rurashpaca cushillami sintirishun.

17, 18. ¿Jehová Diosta cazujcunaca ima bendicioncunatataj chasquinga?

¹⁷ Jesús cai pachata mandajpica huasi arriendocunata mana pagashunchu. Mana dibiyashunchu. Doctorcunatapish jambicunatapish mana minishtishunchu. Tucuicunapajmi micunacunapish tiyanga. Diosta cazujcunaca cai pachapica tucui allicunatami charinga. Orotapish, cullquitapish charij tucusha nishpalla mana tandashunchu. Chaipaj randica adornocunatami rurashun. Shinallataj alhaja huasicunatami maderahuan, rumicunahuan, fierrocunahuan shayachishun. Ñucanchij amigocunami cushicushpa chaicunata rurangapaj ayudangacuna. Paicunaca mana cullquiraiculla ayudangacunachu. Cai Allpapi tucui tiyashcataca caishuj chaishujmi convidanacushun.

¹⁸ Jehová Diosta, Jesusta cazujcunaca cai bendicioncunata shujtaj sumaj bendicioncunatapishmi chasquinga. “Ñuca Yaya alli nishcacuna, cancuna mandana cashcata shamuichij japinguichij. Chashna mandanataca cai pacha callarimantami ña allichishca” Jesús nijpica Diosta sirvijcunaca yallitajmi cushicungacuna (Mateo 25:34).