1. ¿Jehová Diosta mañanaca imamantataj importante can?

 JEHOVÁ DIOSCA tucuita ruraj cashpapish paihuan parlachunmi munan. Chaimantami ñucanchijca maipi cashpapish, ima shimita parlashpapish Yayitu Diostaca shungumanta mañai tucunchijlla. Hospitalpi cashpapish, carcelpi cashpapish Jehová Dios ñucanchijta uyanataca manataj cungarinachu canchij. Jehová Dios paita mañana regalota cushcamantami, paitaca shungumanta agradicinchij.

2. ¿Davidpajca Jehová Diosta mañana valishca cashcataca ima shinataj ricuchirca?

² Rey Davidpajca Yayitu Diosta mañanaca importantemi carca. Rey David Jehová Diosta cantacushpaca: “Quiquinta ñuca mañashcaca incienso shina quiquinpaj ñaupajman chayashca cachun” nircami (Salmo 141:1, 2). David causashca tiempopica sacerdotecunaca Jehová Diosta adorangapajmi shuj inciensota alli rurajcuna carca (Éxodo 30:34, 35). Davidca chai inciensota alli rurashca shinallatajmi Yayitu Diosta mañangapajpish alli yuyanaraj cashcata yacharca. Ñucanchijpish David shinami Jehová Diosta manaraj mañashpa alli yuyanaraj canchij. Chashnami Jehová Diostaca cushichishun.

3. ¿Jehová Diostaca ima shinataj mañana canchij?

³ Jehová Diosca poderoso, jatunmi can. Chaimantami paitaca maipish cachunca mana mañana canchij. Ashtahuanpish paitaca respetohuanmi mañana canchij. Isaías, Ezequiel, Daniel y apóstol Juan muscuipi shina ima ricushcapi yuyashun. Isaiasca Jehová Diostaca “sumaj jatun tiyanapi tiyacujtami” ricurca (Isaías 6:1-3). Ezequielpish jahua pachapi shuj jatun carropi shina Jehová Dios tiyacujta, Diospaj muyundijpipish shuj achij nicuj cuichi shina tiyacujtami  ricurca (Ezequiel 1:26-28). Shinallataj Danielpish ‘uni huatacunayuj yuyajtami’ ricurca. Paipaj churanaca rasu shina yuraj nicuj cashcata, paipaj jatun tiyanapish lunyacuj nina shina cashcatami ricurca (Daniel 7:9, 10). Y apóstol Juanpish Jehová Diospaj “jatun tiyarina muyundijpica esmeralda rumiman rijchaj cuichi” tiyacushcatami ricurca (Apocalipsis 4:2-4). Jehová Dios poderoso cashcamanta, jatun cashcamantami Jehová Diostaca respetohuan mañana cashcataca yuyaipi charina canchij. Cunanca Jehová Diosta imacunallamanta mañana cashcatami yachashun.

4. ¿Jesusca imacunamanta mañanataj importante cashcata yachachirca?

⁴ Mateo 6:9, 10-ta liyipai. Jesusca paipaj discipulocunamanca Yayitu Diosta ima shina mañana cashcatami yachachirca. Jesusca ‘Yayitu Diospaj munai maijan cashcata alli ricushpami mañana canguichij’ nishpami yachachirca. Chaimantami Jesusca Diospaj shutita jatunyachinamanta, Diospaj Gobierno utca shamunamanta, contracunata rato tucuchinamanta, alli gentecunapajpish achca bendición tiyanamanta mañachun yachachirca. Ñucanchijpish chashna mañashpaca Yayitu Diospaj munai ñucanchijpaj valishca cashcatami ricuchishun.

5. ¿Jehová Diostaca ima shujtaj cosascunamantataj mañai tucunchij?

⁵ Shinallataj Jesusca ‘Jehová Diostaca micunata carachun, juchacunatapish perdonachun, tentacioncunamantapish caruyachichunmi mañana canguichij’ nishpami yachachirca (Mateo 6:11-13). Caicunamanta mañashpaca Jehová Diospi confiashcata, paita cazusha nishcatapishmi ricuchinchij.

6. ¿Ima preocupacionta charishpaca imatataj Jehová Diosta mañai tucunchij?

⁶ Jesusca paipaj discipulocunaman Jehová Diosta ima shina mañanata yachachicushpaca, pai nishcacunallatataj ripitichunllaca mana munarcachu. Ashtahuanpish Diosta shungumanta mañachunmi munan. Chaimantami Jesusca ima preocupacioncunata charishpaca, chaicunamanta Yayitu Dios ayudachun mañarca (Mateo 26:39, 42; Juan 17:1-26). Ñucanchijpish ima preocupacioncunata  charishpaca, chaicunamantami Yayitu Diosta mañana canchij. Por ejemplo, ima importante decisionta agllana cashpa o ima sinchi mingashcata pajtachina cashpaca Jehová Dios yachaita cuchun, ayudachunmi mañana canchij (Salmo 119:33, 34; Proverbios 2:6). Yaya mamacunapish paicunapaj huahuacunamantami mañana can. Huahuacunapish paicunapaj yaya mamacunamantami mañana can. Ñucanchijpish Bibliamanta yachacujcuna, gentecuna Diospajman cꞌuchuyachunmi mañana canchij. Pero Jehová Dios chashna ayudachun mañashpallaca mana saquirinachu canchij.

7. ¿Mañacushpaca imamantataj Jehová Diosta jatunyachina canchij?

⁷ Jehová Diosta mañacushpaca paita jatunyachinataca manataj cungarinachu canchij. Shuj Salmota quillcaj runaca Jehová Diostaca: “Jatun Dios quiquinca allimari cangui, perdonajmari cangui. Ashtahuanpish quiquin Jatun Diosca llaquij, cashcata ruraj, mana utca pꞌiñarij, yallitaj llaquij, mana llullaj Taita Diosmari cangui” nircami (Salmo 86:5, 15). Jehová Dios cꞌuyaj, perdonaj cashcamanta, ñucanchijta cuidacushcamantami paita mañacushpaca jatunyachina canchij.

8. ¿Yayitu Diosta mañacushpaca imacunamantataj agradicina canchij?

⁸ Shinallataj Jehová Dios tucuita cushcamantami agradicina canchij. Por ejemplo, paica tucui laya alaja sisacunata, mishqui micunacunata, alli amigocunatapishmi cushca. Tucui caicunataca ñucanchijcuna cushilla, alaja causachunmi cushca (Salmo 104:12-15, 24-ta liyipai). Ashtahuancarin ñucanchijman achca yachaicunata, Paraíso Allpapi causana esperanzatapish cushcamantami shungumanta agradicinchij.

9. ¿Jehová Diosta pagui ninata ama cungaringapajca imatataj rurana canchij?

⁹ Huaquinpica Jehová Dios ñucanchijman imalla cushcamantaca ratomi cungarinchijlla. Pero chaita ama cungaringapajca Jehová Diosta imata mañashcataca shuj listapimi anotai tucunchij. Qꞌuipaca chai listapi ricushpa, Jehová Dios ñucanchijta ima shina cutichishcatami cuentata cuna canchij. Jehová Dios ñucanchijta cutichishcata ricushpaca shungumantami agradicina canchij (1 Tesalonicenses  5:17, 18-ta liyipai). Maijan imata cushcamanta ñucanchijta agradicijpica cushillami sintirinchij. Chashnallatajmi Jehová Diospish paita agradicijpica cushilla sintiringa (Colosenses 3:15). Chaimantami Diosta agradicinataca manataj cungarina canchij. Cunanca tucuimanta yalli imamanta Diosta agradicina cashcata ricupashun.

10. ¿Jehová Dios Jesusta cachashcamantaca imamantataj agradicina canchij?

¹⁰ 1 Pedro 2:21-ta liyipai. Jehová Diosca Jesustami ñucanchijman yachachichun cacharca. Chaimantami Jehová Diostaca achcata agradicina canchij. Jesusmanta yachashpami Jehová Dios ima shina cashcata, pai imata munashcata yachai tucunchij. Jesús ñucanchijmanta huañushcapi feta churashpaca Jehová Dioshuanca allimi apanacushun (Romanos 5:1).

11. ¿Imamantataj Jesuspaj shutipi mañana canchij?

¹¹ Jesusca: “Churimanta Yaya jatunyachishca cachunmi cancuna ñuca shutipi imata mañajpipish ñucaca cusha” nircami. Caipi ricushca shinaca Jesusmantami Yayitu Diosta mañai tucunchij. Jesuspaj shutipi mañajpica Jehová Diosca ñucanchij mañashcacunatami cutichin. Chaimantami Yayitu Diosta achcata agradicina canchij (Juan 14:13, 14).

12. ¿Jehová Dios paipaj Churita huañuchun cushcamantaca imamantataj agradicina canchij?

¹² Jesús ñucanchijmanta huañushcamantami Jehová Diosca ñucanchij juchacunata perdonan. Bibliapica Jesusmanta parlashpaca: “Sacerdotecunata jatun mandajtami charinchij. Paica jahua pachapimi Jatun Diospaj jatun tiyarina alli ladopi tiyarishca” ninmi (Hebreos 8:1). 1 Juan 2:1-pica: “Shuj ayudajtami charinchij. Paica Yaya Diospaj cꞌuchupi caj cashcata ruraj Jesucristomi” ninmi. Jesucristoca ñucanchijta llaquishpa ayudashcamanta, ñucanchijmantapish Diosta rogashcamantami cushilla sintirinchij. Jesús ñucanchijmanta mana huañushca cajpica, juchayujcuna cashcamantami Jehová Diosta mana mañai tucunchijman (Romanos 8:34; Hebreos 4:15). Cai tucuita intindishpaca Jehová Diostami paipaj cꞌuyashca Churita cushcamanta achcata agradicinchij.

13. ¿Jesusca paipaj discipulocunata cꞌuyashcataca ima shinataj ricuchirca?

¹³ Jesús huañunapajca ashalla tiempomi faltarca. Chashna cajpipish Jesusca paipaj discipulocunamantami preocuparirca. Chaimantami Jehová Diostaca Diablo ama pandachichun, paipaj discipulocunata cuidachun mañarca (Juan 17:15). Chashnami Jesusca paipaj discipulocunata cꞌuyashcata ricuchirca.

14. ¿Ñucanchij huauqui panicunata cꞌuyashcataca ima shinataj ricuchinchij?

¹⁴ Ñucanchijpish Jesús shinallatajmi ñucanchijllapica mana yuyanchij. Ashtahuanpish muyundij Allpapi caj ñucanchij huauqui panicunamantami mañanchij. Chashnami ñucanchij huauqui panicunata shungumanta cꞌuyashcata ricuchinchij (Juan 13:34). Huauqui panicunamanta mañanaca Yayitu Diospajca valishcami can. Santiago 5:16-pica: “Cashcata ruraj runapaj mañaica poderta charinmi. Gentecunatapish ayudai tucunmi” ninmi.

15. ¿Imamantataj huauqui panicunamantaca mañana canchij?

¹⁵ Huaquin huauqui panicunaca achca llaquicunahuanmi chꞌimbapuracuncuna. Chaimantami paicunamanta mañana canchij. Maijan huauqui panicuna ungüicunahuan cajpi,  jatun llaquicunata charijpi, guerra tiyashca llajtacunapi causajpi o paicunata catirashpa llaquichijpica Jehová Diostami paicunata ayudachun mañana canchij. Labores de socorropi ayudaj huauqui panicunamantapishmi mañana canchij. Cashna llaquicunata charij huauqui panicunata rijsishpaca paicunapaj shutita nombrashpami Yayitu Diosta mañana canchij. Ñucanchij huauqui panicunamanta mañashpaca paicunata shungumanta cꞌuyashcatami ricuchinchij.

16. ¿Congregacionta pushaj huauquicunamantaca imamantataj mañana canchij?

¹⁶ Congregacionta pushaj huauquicunapish paicunamanta Diosta mañachunmi munancuna. Chashna mañajpica Jehová Diosca paicunatami ayudan. Apóstol Pablopish: “Alli huillaicunata parlai callarijpi alli shimicunahuan mana manchashpa huillangapaj Dios ayudachun ñucamantapish mañaichij” nircami (Efesios 6:19). Cunan punllacunapipish congregacionta pushaj huauquicunaca ñucanchijta cuidangapajmi achcata esforzaricuncuna. Paicunamanta Jehová Diosta mañashpaca paicunata cꞌuyashcatami ricuchishun.

17, 18. ¿Shujtajcunapaj ñaupajpi mañachun nijpica imatataj yuyarina canchij?

¹⁷ Huaquinpica shujtajcunapaj ñaupajpi Yayitu Diosta mañachunmi ñucanchijta ningacuna. Por ejemplo, tal vez shuj panica Bibliamanta yachachinaman richunmi shujtaj panita invitanga. Chaimi cai panica acompañajtaca Yayitu Diosta mañachun ninga. Pero acompañaj panica yachacujta mana alli rijsishcamantami tucuri mañaita ruranata munanga. Shinami estudiashca huashaca yachacujmanta imata mañanata yachanga.

¹⁸ Maipica shuj huauquitami predicanaman llujshingapaj mañachun o tandanacuicunapi mañachun ningacuna. Cai huauquicunaca Diosta mañagrishpaca imapaj tandanacushca cashcatami yuyarina can. Ña Diosta mañacushpapish pita mana consejanachu can, ima anunciotapish mana ninachu can. Tandanacuicunapica Diosta cantangapaj, Diosta mañangapajpish cinco minutocunallami tiyan. Chaimantami huauquicunaca Diosta mañacushpaca mana achcata demorana  can. Tandanacui callarijpicarin huauquica ashalla shimicunapimi Diosta mañana can (Mateo 6:7).

19. ¿Diospaj jatun punllapi quishpiringapajca imatataj rurana canchij?

¹⁹ Jehová Diospaj jatun punlla cꞌuchuyamucushcamantaca Jehová Diosta cutin cutin mañanami importante can. Jesusca: “Chaimanta rijcharishca caichij. Tucui imalla tucunamanta quishpiringapaj, Runapaj Churipaj ñaupajpi shayaringapajpish Diosta rogarishpa mañaraichij” nircami (Lucas 21:36). Jehová Diosta cutin cutin mañashpaca sinchi fetami charishun. Diospaj jatun punlla chayamujpicarin quishpirishunmi.

20. ¿Ñucanchij mañashcacuna alli rurashca incienso shina cachunca imatataj rurana canchij?

²⁰ ¿Cai yachaipica imatataj yachashcanchij? Jehová Diosta mañanaca ñucanchijpajca valishcami can. Pero Jehová Diosta mañacushpaca punta lugarpica paipaj shutita jatunyachichun, paipaj munai pajtarichunpishmi mañana canchij. Shinallataj paipaj cꞌuyashca Churita cushcamantami agradicina canchij. Ñucanchij huauqui panicunamantapishmi mañana canchij. Ashtahuanpish ñucanchij minishtishcacunata cuchun, espiritualmente sinchi cangapaj ayudachunmi mañana canchij. Yayitu Diosta manaraj mañashpaca alli yuyanaraj cashcatami ricushcanchij. Chaita pajtachishpaca Yayitu Diosta mañana importante cashcatami ricuchishun. Ñucanchij mañashcacunapish Yayitu Diospajca mishquijlla ashnacuj incienso shinami canga (Proverbios 15:8).