Paulca: “Ñuca primo ñucahuan litunacui callarijpica cungamanta japishpami ñuca maquicunahuan sipi callarircani. Paitaca huañuchinatami munarcani” ninmi.

Marcoca: “Huasipi cashpaca imamantapish ratomi coleraj carcani. Mueblecuna, ñuca huahuacunapaj juguetecuna, ima cosascunapish ricurijpica chai ratomi ñutuchij carcani” ninmi.

Quizás ñucanchijca mana paicuna layachu pꞌiñarinchij. Pero huaquinpica ñucanchijllataj jarcarinaca sinchimi can. ¿Imamanta? Adanpaj huahuacuna cashcamantami juchayujcuna canchij (Romanos 5:12). Paul, Marcos shinallatajmi huaquincunapajca pꞌiñarinamanta jarcarinaca sinchi can. Maijancunapajca manchaimanta, desanimachij yuyaicunamanta jarcarinami sinchi can. Cutin shujtajcunapajca huainayanamanta, drogarinamanta, machanamanta jarcarinami sinchi can.

Huaquincunaca paicunapaj munaicunata, yuyaicunata, ruraicunata mana jarcarij tucushpaca llaquipimi urmancuna. Chashna llaquicunapi ama urmangapajca ¿imatataj rurana canchij? Ñucanchijllatajmi jarcarina canchij. “Espiritupaj granoca” jarcarij canapishmi can. Chaipajca cai quimsa tapuicunata ricushun: ¿Jarcarij canaca imataj can? ¿Jarcarinaca imamantataj importante can? ¿Jarcarij cangapajca imallatataj rurana canchij? (Gálatas 5:22, 23). Qꞌuipaca jarcarij cana sinchi ricurijpi imallata rurana cashcatapishmi yachashun.

Jarcarij gentecunaca imamantapish jarcarinatami yachancuna. Chaimantami paicunaca Dios mana munashcacunata ninamanta o ruranamanta jarcarincuna.

Jesusca paipaj ejemplohuanmi jarcarina cashcata yachachirca. Bibliapica: “Llaqui tucushca alli canman nijpipish, mana chashnallataj cutichircachu. Llaquichicujpipish, ñucapish llaquichishami nishpa mana manchachircachu. Chaipaj randica tucui imatapish cashcata ricuchij Diospaj maquipimi mingarca” ninmi (1 Pedro 2:23). Jesusca caspipi huarcushca cashpapish, paipaj enemigocuna paimanta burlarijpipish jarcarij cashcatami ricuchirca (Mateo 27:39-44, NWT ). Fariseocunaca Jesús ima mana allita nijpica juchachingapaj nishpami japisha nircacuna. Chaipipishmi Jesusca jarcarij cashcata ricuchirca (Mateo 22:15-22). Shinallataj achca judiocuna rumicunahuan shitasha nijpica Jesusca paicunamanca mana chashnallataj tigrachircachu. Ashtahuanpish ‘paca tucushpami Taita Diospaj huasimantaca llujshishpa rirca’ (Juan 8:57-59).

Mana tucuipi Jesús shina rurai tucushpapish paipaj ejemplotami cati tucunchij. Apóstol Pedroca: ‘Cristoca ñucanchij pai rurashcata catichunmi, ñucanchijmanta llaquita apashpa huañurca. Cancunapish chashnallataj paipaj ñanta catichij’ nircami (1 Pedro 2:21, QC, 1989). Juchayujcuna  cashpapish Jesuspaj ejemplota catishpami imamantapish jarcari tucunchij. Paipaj ejemplota catinaca ¿imamantataj valishca can?

Jehová Diosta cushichisha nishpaca jarcarinatami yachana canchij. Yaya Diosta achca huatacunata sirvishca cashpapish imata ninamanta o imata ruranamanta mana jarcarishpaca Diospaj amigo canatami saqui tucunchij.

Moisesmanta yachashun. Paica ‘tucui cai pachapi causajcunamantaca, paillami manso shungu carca’ (Números 12:3). Moisesca achca huatacunatami israelitacuna quejarishcata ahuantarca. Pero shuj punllami israelitacunaca yacuta mana charishcamanta cutin quejarircacuna. Chaimi Moisesca mana jarcarishpa pꞌiñarirca. Paica israelitacunataca: “¡Cꞌariyaj gentecuna caita uyaichij! Cancunamanca cai peña urcumantami yacuta llujshichishpa cugrinchij” nircami (Números 20:2-11).

Moisesca paillataj mana jarcarircachu. Jehová Dios israelitacunaman yacuta cujpica Moisesca Diostaca mana jatunyachircachu (Salmo 106:32, 33). Chaimantami Jehová Diosca pai cusha nishca Allpaman Moisés yaicuchunca mana saquirca (Números 20:12). Moisesca mana jarcarij tucushcataca huañuna horascamami arrepintirishcanga (Deuteronomio 3:23-27).

¿Caimantaca imatataj yachanchij? Achca huatacunata Diosta sirvicushpapish pi ñucanchijta colerachijpi, mana allita rurajpica respetohuanmi parlana canchij (Efesios 4:32; Colosenses 3:12). Huaquincunaca mayoryashpaca pacienciata mana chari tucuncunachu. Pero Moisesta yuyarishunchij. Jehová Diosta achca huatacunata sirvicushpapish imapi mana jarcarishpaca Diospaj ñaupajpi alli ricurinatami saqui tucunchij. Pero jarcarij cangapajca ¿imatataj rurana canchij?

Jehová Diosta paipaj espíritu santota cuchun mañashunchij. Espiritupaj granoca jarcarinapishmi can. Espíritu santota Jehová Diosman mañajpica pimanpish paica cungallami (Lucas 11:13). Jehová Diosca paipaj espíritu santohuanmi ñucanchij jarcarij cachunca fuerzata cushpa ayudanga (Filipenses 4:13, NWT ). Ashtahuancarin Diospaj espíritu santoca cꞌuyaita charichunpishmi ayudan. Shinallataj jarcarij cachunpishmi ayudanga (1 Corintios 13:5).

Jarcarij canata imapish jarcachunca ama saquishunchij. Internetpi, musicapi, peliculacunapimi huaquincunaca mana allicunata rurachun  animan. Chaicunamantami jarcarina canchij (Efesios 5:3, 4). Huaquinpica mana alli cosascunaca mana allita rurachunmi pandachi tucun. Chaicunamantami caruyana canchij (Proverbios 22:3; 1 Corintios 6:12). Huaquincunapajca huainayana trampamanta jarcarinami sinchi can. Chaimantami enamorarinamanta parlaj librocunata, peliculacunataca mana ricuna can.

Cai consejocunata pajtachinaca huaquinpica sinchichari ricurin. Pero jarcarij cangapaj esforzarijpica Jehová Diosllatajmi fuerzata cunga (2 Pedro 1:5-8). Ñucanchij yuyaicunamanta, rimaicunamanta, ruraicunamanta jarcarichunpishmi ayudanga. Callari parrafocunapi parlashca Paul, Marcoca rato pꞌiñarijcuna cashpapish jarcarinatami yacharcacuna. Shuj huauquimanta parlashun. Carrota manejacushpaca achcatami pꞌiñarij carca. Shujtaj manejajcunahuanpish pꞌiñarishpa rimanacujmi carca. ¿Cambiangapajca imatataj rurarca? Paica cada punllami Yayitu Diostaca shungumanta mañaj carcani. Shinallataj jarcarinamanta parlaj publicacioncunatami estudiaj carcani. Ashtahuancarin jarcarichun ayudaj versocunatami de memoria yacharcani. Achca huatacunatami jarcaringapajca tucuita rurashcani. Pero tranquilo cangapajca cada punllami esforzarishpa catini. Maiman rina cashpaca ama apurado ringapaj, shujtajcunahuan ama pꞌiñaringapajmi utca llujshini” ninmi.

Huaquinpica manachari jarcari tucushun. Chashna cajpica Diosta mañanaca sinchichari ricuringa. Pero chai ratomi Diostaca ashtahuan mañana canchij. Jehová Diostaca ñucanchijta perdonachun, ayudachun mañashunchij. Mana allicunata cutin ama rurangapaj esforzarishunchij (Salmo 51:9-11). Ñucanchij shungumanta Yaya Diosta llaquij cachun mañajpica paica uyangami (Salmo 102:17). Apóstol Juanca: ‘Diospaj Churi Jesucristopaj yahuarmi ñucanchij tucui juchacunataca pꞌichan’ nircami (1 Juan 1:7; 2:1; Salmo 86:5). Jehová Diosca shujtajcunata cutin cutin perdonachunmi mandan. Chaimantami paipish ñucanchijta perdonanata yachanchij (Mateo 18:21, 22; Colosenses 3:13).

Moisesca shitashca pambapimi mana jarcarij cashcata ricuchirca. Moisés chaita rurachun Jehová Dios mana munashpapish paitaca perdonarcami. Chaimantami Bibliapica Moisesca sinchi feta charishcata huillan. Paipaj ejemplotami catina canchij (Deuteronomio 34:10; Hebreos 11:24-28). Jehová Diosca pai cusha nishca Allpamanca Moisestaca mana yaicuchun saquircachu. Pero paitaca paraíso Allpapi huiñai huiñaita causachunmi saquinga. Ñucanchijpish jarcarij cangapaj esforzarishpaca Moisés shinallatajmi paraíso Allpapi causai tucunchij (1 Corintios 9:25).