1, 2. ¿Bibliamanta yachacujcuna bautizarichunca picunallataj ayudai tucuncuna?

FIYI llajtamanta pani Amyca: “Bibliamanta yachai callarishpaca ima yachashcacunatami munarcani. Cai yachachishcacunapish verdadtaj cashcatami intindircani. Pero ñuca causaipi cambiocunata ruranaca sinchimi carca. Shinapish turi ñañacunahuan apanacujpimi paicunaca ñucataca bautizarichun ayudarcacuna” ninmi. Cai experienciapi nishca shinaca tucuicunami congregacionpica Bibliamanta yachacujcunataca paicunapish bautizarichun ayudai tucunchij.

² Vanuatu llajtamanta Leilani shuti precursoraca: “Ñuca causan ladopica gentecunaca shuj huahuata huiñachingapajca shuj comunami minishtirin nincunami. Chashnallatajmi Bibliamanta yachacujcunataca bautizarichun tucuicuna ayudai tucunchij” ninmi. Shuj huahuata alli huiñachingapajca familiacuna, amigocuna, yachachijcunami ayudai tucun. Chashnallatajmi ñucanchijpish Bibliamanta yachacuj bautizarichunca consejashpa, animashpa, alli ejemplota cushpa ayudai tucunchij (Proverbios 15:22; Efesios 4:16).

3. ¿Pani Anamanta, huauqui Dorinmanta, pani Leilanimantaca imatataj yachanchij?

³ ¿Bibliamanta yachacujcunata charishpaca imamantataj shujtajcuna ayudachun saquina canchij? Moldavia llajtamanta Ana shuti precursoraca: “Bibliamanta yachacujcunaca achca ayudatami minishtincuna. Chaimi shujtajcuna ayudachun minishtinchij” ninmi. Shinallataj chai llajtallamantataj  Dorin shuti precursorca: “Maipica maijan huauqui panicunaca Bibliamanta yachacujcunamanca paicunapaj shunguman chayajtami yachachincuna. Ñucallaca chaitaca mana rurai tucuimanchu carcani” ninmi. Pani Leilanipish: “Turi ñañacuna yachacujcunaman cꞌuyaita ricuchijpica paicunaca Jehová Diospaj pueblopi cashcatami cuentata cuncuna” ninmi (Juan 13:35).

4. ¿Cai yachaipica imatataj yachashun?

⁴ ¿Bibliamanta yachacujcunataca ima shinataj tucuicuna ayudana canchij? Cai yachaipimi Bibliamanta yachacujcunata yachachingapaj acompañashpaca imata ruranata ricushun. Shinallataj paicuna tandanacuicunaman rijpi chaipipish ima shina ayudanata yachashun. Congregacionta pushajcunapish Bibliamanta yachacujcunata bautizarichun ima shina ayudanatami ricushun.

5. ¿Yachacujcunaman yachachingapaj acompañashpaca ima responsabilidadtataj charinchij?

⁵ Bibliamanta yachachicujca yachacujman Diospaj Shimimanta yachachina responsabilidadtami charin. Cutin ñucanchijta acompañachun mañajpica paicunata apoyana responsabilidadtami charinchij (Eclesiastés 4:9, 10). Pero ¿yachachij huauqui panicunata apoyangapajca imatataj rurana canchij?

6. Proverbios 20:18-pi nishca shinaca ¿yachachingapaj acompañashpaca imatataj rurana canchij?

⁶ Alli prepararishunchij. Chaipajca yachachijtaca yachacujcunata ima shina ayudanatami tapuna canchij (Proverbios 20:18-ta liyipai). Paitaca imallata yachachigrishcata o imata mana ninata, imata nina cashcatami tapuna canchij. Chashnami yachacujcunataca alli rijsi callarishun. Yachachijcunaca yachacujcunapaj causaimantaca mana tucuita parlangachu. Pero yachachij imallata nishcacunata pajtachingapajmi esforzarina canchij. Joy shuti misioneraca: “Yachachinaman acompañaj turi ñañacunamanca yachacujta ima shina ayudanatami parlani. Chashna parlajpica paicunaca yachacujcunamantami preocuparin. Shinallataj ima shina ayudanatami yachancuna” ninmi.

7. ¿Imamantataj yachachijta manaraj acompañashpaca alli prepararina canchij?

⁷ Yachacujman manaraj yachachingapaj acompañanaman rishpaca ñucanchijrajmi alli prepararina canchij (Esdras 7:10). Párrafo 3-pi parlashca huauqui Dorinca: “Ñuca compañero alli prepararishpa rishpaca yachacujtaca achcatami ayudan” ninmi. Yachachijpish yachachijta acompañajpish alli prepararishpaca yachacujmanmi alli ejemplota cuncuna. Pero maipica yachachijta acompañashpaca tal vez imata yachachigrishcataca manachari tucuita alli prepararinchij.  Shinapish ima yachaimanta valishca yuyaicunata intindingapajmi prepararina canchij.

8. ¿Diosta mañachun nijpica imatataj rurana canchij?

⁸ Bibliamanta yachachishpa callaringapajca Yaya Diosta mañanami importante can. Chaimanta yachachij Yayitu Diosta mañachun nijpica imata nigrishcatami alli yuyanaraj canchij (Salmo 141:2). Japón llajtamanta pani Hanaeca: “Ñucata yachachingapaj acompañaj ñaña Yayitu Diosta mañajpica Yaya Dioshuan pai alli apanacushcatami cuentata curcani. Ashtahuancarin ñucamanta Diosta mañajpica ñucata cꞌuyashcatami cuentata curcani” ninmi.

9. Santiago 1:19-pi nishca shinaca ¿yachachijta ayudangapajca imatataj rurana canchij?

⁹ Yachachijta apoyashunchij. Nigeria llajtamanta shuj precursoraca: “Acompañajcunaca yachachijlla yachacujcunaman yachachina responsabilidadta charishcataca allimi intindincuna. Paicunaca ima yachachicushcatapish atencionhuanmi uyancuna. Alaja comentariocunata cushpa ayudashpapish paicunaca mana yallitaj parlarincunachu” ninmi. Shinaca ima hora parlanata, imata ninatami alli yachana canchij (Proverbios 25:11). Chaipajca yachachijtapish, yachacujtapish allimi uyana canchij (Santiago 1:19-ta liyipai). Chashna rurashpallami paicunataca alli ayudai tucunchij. Pero ama yallitaj parlangapaj, shujtaj temamantapish ama parlangapajmi cuidarina canchij. Ashtahuanpish yachachij yachachishpa catichunmi saquina canchij. Ashalla shimicunahuanmi yachacujtaca ayudai tucunchij. Shuj tapuita rurashpa o shuj ejemplomanta parlajpimi yachacujca imata yachacushcata alli intindinga. Maipica yachacujtaca mana ayudai tucushachu nishpami yuyanchij. Pero yachacujmanta preocuparijpi, paita felicitajpica paicunaca Bibliamantami ashtahuan yachashpa catingacuna.

10. ¿Yachacujcunata ayudangapajca imamantataj ñucanchij experienciacunata parlana canchij?

¹⁰ Ñucanchij experienciacunata parlashunchij. Por ejemplo, yachacujcunamanca Bibliata ima shina yachai callarishcata, pruebacunahuanpish chꞌimbapurachun Jehová Dios ima shina ayudashcatami parlana canchij (Salmo 78:4, 7). Chashna parlajpica yachacujcunapaj femi sinchiyanga. Paicunapish bautizarichun, problemacunahuan chꞌimbapurachunmi ayudanga (1 Pedro 5:9). Brasilmanta Gabriel shuti precursorca: “Ñuca Bibliamanta yachai callarijpica huauqui panicunaca paicunata Jehová Dios ima shina ayudashcatami parlarca. Chaimi ñucanchij problemacunahuan cajpi Jehová Dios intindij cashcata cuentata curcani. Chaimantami Jehová Diosca ñucatapish ayudangami nishpa yuyarcani” ninmi.

11, 12. ¿Yachacujcunataca tandanacuipica imamantataj cꞌuyaihuan chasquina canchij?

¹¹ Bibliamanta yachacujcuna tandanacuiman rishpaca chaipi ashtahuan yachashpami bautizaringacuna (Hebreos 10:24, 25). Yachachijcuna yachacujcunata invitajpimi paicunaca punta cutin tandanacuicunaman ringacuna. Chaimi yachacujcunataca tandanacuicunaman rishpa catichun animai tucunchij. ¿Ima shinataj caitaca rurana canchij?

¹² Yachacujcuna tandanacuicunaman rijpica cꞌuyaihuanmi chasquina canchij, huauqui panicunamanpishmi rijsichina canchij (Romanos 15:7). Pailla cajta ricushpacarin paihuanmi parlana canchij. Maipica yachachijca tandanacuipichari imata rurashpa ayudacun. Mana cashpaca manachari chayan. Yachacuj imata parlajpipish paicunataca allimi uyana canchij. Chashnami paicunamanta preocuparishcata ricuchishun. ¿Yachacujcunata alli chasquijpica paicunaca ima shinataj sintiringacuna? Huauqui Dimitripi yuyashun. Paica asha huatacuna ñaupallami bautizarirca. Cunanca siervo ministerialmi can. Paica: “Ñucaca punta cutin tandanacuiman rishpaca asha manchaita charishcamantami tandanacuna huasi canllaman saquirircani. Pero shuj huauqui shamushpami ñucataca ucuman pusharca. Achca huauquicuna ñucapajman cꞌuchuyashpa saludajpicarin cushillami sintirircani. Cashna tandanacuicuna amataj tucurichun nishpapishmi yuyarcani. Chashnaca mana nunca sintirishcachu carcani” ninmi.

13. ¿Yachacujcunamanca imamantataj alli ejemplota ricuchina canchij?

¹³ Yachacujcunaman alli ejemplota ricuchishunchij. Ñucanchij alli ejemplota ricuchijpica yachacujcunaca Diosta sirvijcunataj cashcatami cuentata cungacuna (Mateo 5:16). Moldavia llajtamanta Vitali shuti precursorca: “Huauqui panicuna ima shina causajta, ima shina yuyajta, ima shina comportarijta ricushpami testigo de Jehovacuna Diosta sirvijcunataj cashcata cuentata curcani” ninmi.

14. ¿Yachacujtaca ima shinataj ñucanchij alli ejemploca ayudai tucun?

¹⁴ Yachacujcunaca bautizaringapajca imata yachacushcatami paicunapaj causaipi pajtachina can. Maipica chaita ruranaca mana facilchu can. Pero yachacujcunaca Diosta cazushpa ñucanchij ima shina beneficiarishcata ricushpaca paicunapish ñucanchij ejemplotami catisha ningacuna (1 Corintios 11:1). Párrafo 8-pi parlashca pani Hanaeca: “Ñuca yachacushcacunataca turi ñañacunaca allimi pajtachijcuna carca. Shujtajcunamantapish allimi yuyajcuna carca. Paicunapaj ejemplomi ñucatapish shujtajcunata animachun, perdonachun, cꞌuyaita ricuchichun animashca” ninmi.

15. Proverbios 27:17-pi nishca shinaca ¿yachacujcuna tandanacuiman rijpica imamantataj paicunahuan amigarina canchij?

 ¹⁵ Yachacujcunapaj amigo tucushunchij. Yachacujcuna tandanacuicunaman rijpica paicunamanta preocuparishcata ricuchishunchij (Filipenses 2:4). Paicunata ashtahuan rijsingapajca paicunapaj familiamanta, trabajomanta o Bibliamanta imata yachacushcatami tapui tucunchij. Shinallataj Diosta sirvingapaj paipaj causaipi cambiocunata rurashca cajpica felicitanami canchij. Chashna rurashpaca ñucanchijca paicunapaj amigosmi tucushun. Paicunataca Bibliamanta ashtahuan yachachunpish, bautizarichunpishmi ayudashun (Proverbios 27:17-ta liyipai). Hanae shuti precursoraca: “Turi ñañacunahuan amigarishpaca tandanacuicunaman rinatami munarcani. Chaimantami shaicushca cashpapish tandanacuicunaman rinataca manataj saquircani. Turi ñañacunahuan alli apanacushpaca Diosta mana sirvij amigocunamantami caruyarcani. Chaimantami Jehová Diosta jatunyachingapaj, turi ñañacunahuanpish tandalla casha nishpa bautizarinata decidircani” ninmi.

16. ¿Yachacujcuna congregacionpi alli sintirichunca imatataj rurana canchij?

¹⁶ Yachacujcuna paicunapaj causaipi cambiocunata rurajpica congregacionpi alli sintirichunmi ayudai tucunchij (Hebreos 13:2). Moldavia llajtamanta Denís shuti huauquica: “Bibliamanta ñuca yachacujpica huauqui panicunaca ñucata, ñuca huarmitami paicunahuan tiempota pasachun invitajcuna carca. Paicunata Jehová Dios ima shina ayudashcata huillajpica ñucanchijca achcatami animarircanchij. Chaimi Jehová Diosta sirvinata decidircanchij y alaja sumaj causaita charinatapishmi yacharcanchij” ninmi. Bibliamanta yachacuj publicador tucujpica paicunataca ñucanchijhuan huillachunmi invitana canchij. Brasilmanta huauqui Diegoca: “Achca huauquicunami paicunahuan huillachun ñucataca invitarca. Chaimi paicunataca alli rijsircani. Paicunamantapish achcatami yacharcani. Jehová Diospajmanpish, Jesuspajmanpish ashtahuanmi cꞌuchuyarcani” ninmi.

17. ¿Congregacionta pushajcunaca yachacujcunata ayudangapajca imatataj rurana can?

¹⁷ Congregacionta pushajcuna, cancunapish Bibliamanta yachacujcuna ayudangapajmi tiempota surcuna canguichij. Cancuna cꞌuyaita ricuchijpi paicunamanta preocuparijpica yachacujcunaca bautizarinatami munangacuna. Chaipajca yachacujcunataca allimi rijsina canguichij. Paicuna comentariota  cusha nijpicarin paicunapaj shutitami yuyarina canguichij. Shinallataj huauqui panicunahuan Bibliamanta estudiota cungapajpishmi tiempota surcui tucunguichij. Chashnami yachacujcunataca ayudanguichij. Nigeriapi causaj Jackie shuti precursoraca: “Ñuca yachacujcunaman congregacionta pushaj turita pushajpica paicunaca mancharishcami saquirincuna. Shuj yachacujca ‘ñuca pastorca chaitaca mana ruranmanchu. Paica solo charijcunallatami visitanaman rin. Chaipish paiman pagajpimi rin’ nircami. Cunanca chai yachacujca tandanacuicunamanmi ricun” ninmi.

18. ¿Hechos 20:28-pi nishcataca congregacionta pushajcunaca ima shinataj pajtachina can?

¹⁸ Congregacionta pushajcunaca, publicadorcuna alli yachachijcuna cachunmi ayudana canguichij (Hechos 20:28-ta liyipai). Shuj publicadorchari congregacionta pushajhuan Bibliamanta yachachinaman rishpaca asha manchaita charin. Chaita ricushpaca yachacujman estudiota cushpami ayudana canguichij. Párrafo 17-pi parlashca Jackieca: “Bibliamanta yachacujcunamanta congregacionta pushaj turicuna ñucata tapujpica yachacujcuna imapi ayudachun minishtishcata parlajpimi paicunaca Bibliapaj consejocunahuan ayudancuna” ninmi. Congregacionta pushajcunaca yachacujcuna ama desanimarichunmi ayudana canguichij (1 Tesalonicenses 5:11). Pani Jackieca cashnapishmi nin: “Congregacionta pushajcuna ñucata animajpi, ñuca esfuerzocunamanta felicitajpica cushicunimi. Paicuna animashca shimicunaca yacunaihuan huañucujpi chirijlla yacuta cuj shinami can. Chaimantami Bibliamanta yachacujcunamanca cushilla yachachishpa caticuni” ninmi (Proverbios 25:25).

19. ¿Yachacujcunata Jehová Diosta rijsichun ayudashpaca ima shinataj sintirishun?

¹⁹ Tal vez cai ratoca Bibliamanta yachacujcunataca manachari charinchij. Shinapish Bibliamanta yachachinaman acompañashpaca mana tanto parlashpa, alli prepararishpa ayudashunchij. Yachacujcuna tandanacuicunaman rijpipish paicunapaj amigos cangapaj esforzarishunchij. Ñucanchijpish alli ejemplota paicunaman cushunchij. Congregacionta pushaj huauquicunapish Bibliamanta yachacujcunata animangapaj, yachachijcunatapish alli yachachijcuna cachun capacitangapaj, felicitangapajmi tiempota surcuna canguichij. Bibliamanta yachacujcunata Jehová Diosta cꞌuyachun, paita sirvichun ayudashpaca tucuicunami cushilla sintirishun.