GENTECUNA

¿Bibliaca imatataj yachachin? Diosca “cai pachataca mana yanga tiyachun rurarcachu, runacuna causachunmi rurarca” (ISAÍAS 45:18).

CAI ALLPA

¿Bibliaca imatataj yachachin? “Shujcunaca huacharincunami, shujcunaca huañuncunami. Pero cai Allpaca manataj chingaringachu” (ECLESIASTÉS 1:4, NWT ).

¿IMATATAJ NISHA NIN? Bibliapica cai Allpaca nunca mana chingaringachu, gentecunapish siempremi caipi causanga ninmi. Entonces, ¿cai pacha o cai mundo tucuringa nishpaca imamantataj parlacun?

CAIPI YUYAI: Bibliapi cai pacha tucurinamanta parlashpaca Noepaj punllacunapi ima pasashcahuanmi chꞌimbapuran. Chai tiempopica yallitaj millai ruraicunami tiyarca (Génesis 6:13). Shinapish Noeca cashcata rurajmi carca. Chaimantami Yaya Diosca paitapish, paipaj familiatapish quishpichirca. Pero millai gentecunataca yacu juilluhuanmi tucuchirca. Bibliapica: ‘Ñaupaman tiyaj cai pachataca yacu juillumi millpushpa chingachirca’ ninmi (2 Pedro 3:6, QC, 1989). Chashnami Noé causashca punllacunapi tiyaj pacha tucurirca. ¿Pero imataj tucurirca? Mana cai Allpa tucurircachu. Sino millai gentecunami tucurirca. Chaimantami Bibliapi cai pacha tucurinamanta parlashpaca cai Allpa tucurina cashcataca mana nicun. Ashtahuanpish millai gentecuna, millai ruraicuna tucurina cashcatami nicun.

PROBLEMACUNA, MILLAI RURAICUNA

¿Bibliaca imatataj yachachin? “Millaicunaca ñallami mana tiyanga. Paicuna tiyacushcapi ricujpica ña mana ricuringachu. Alli shungucunami, Dios cusha nishca allpataca japingacuna. Yallitaj sumaj causaipimi cushicungacuna” (SALMO 37:10, 11).

¿IMATATAJ NISHA NIN? Noepaj punllacunapi tiyaj yacu juilluca mana de una vezchu tucui millai ruraicunata tucuchirca. Yacu juillu qꞌuipaca millai gentecunaca cutinllatajmi shujtajcunata llaquichi callarircacuna. Pero Yaya Diosca ñallami tucui millai ruraicunata tucuchinga. Salmota quillcaj runa nishca shinaca millaicunaca ña mana ashtahuan tiyangachu. Diosca paipaj Gobiernohuanmi tucui millai ruraicunata tucuchinga. Diospaj Gobiernoca jahua cielopimi can. Chaimantami Diosta tucui cazuj gentecunata mandanga.

CAIPI YUYAI: ¿Cai Allpapi mandajcunahuanca imataj tucunga? ¿Paicunaca Diospaj Gobiernota apoyangacunachu? Bibliapica paicunaca Diospaj Gobiernopaj contrami jataringacuna ninmi (Salmo 2:2, QC, 1989). Pero, Diospaj Gobiernoca cai Allpapi tucui mandajcunata chingachishpami paipaj mandanata churanga. Chai mandanaca “manataj tucuringachu” (Daniel 2:44). ¿Cai Allpapi mandajcunaca imamantataj paicuna mandanataca saquina can?

¿Bibliaca imatataj yachachin? “Pipish quiquin causaitaca mana mandai tucunchu” (JEREMÍAS 10:23).

¿IMATATAJ NISHA NIN? Diosca gentecuna paicunallataj mandashpa causachunca mana rurarcachu. Gentecunaca shujtajcunataca mana mandai tucuncunachu. Problemacunatapish mana allichi tucuncunachu.

CAIPI YUYAI: Shuj enciclopedia libropi nishca shinaca: “Chꞌican chꞌican llajtacunamanta gobiernocunaca jatun llaquicunataca mana tucuchi tucushcacunachu. Por ejemplo: pobreza, yaricaicuna, ungüicuna, terremoto, jatun tamya, macanacuicuna, millai ruraicunataca mana tucuchi tucushcacunachu”. Shinallataj chai enciclopediaca: “Maijancunaca tucui cai pachata mandaj shuj gobiernollami tucui cai llaquicunataca tucuchi tucunga nincunami” ninmi. Shinapish tucui cai Allpapi mandaj gobiernocuna tandanacushpapish ñajaman nishca llaquicunataca mana tucuchi tucungacunachu. Paicunapish juchayujcunami can. Tucui llaquicunata tucuchingapaj poderta mana charincunachu. Diospaj Gobiernollami chai tucui llaquicunata para siempre tucuchingapaj poderta charin.

Bibliapi ricuchishca shinaca alli gentecunaca cai pacha o millai ruraicuna tucurigrishcata yachashpaca mana mancharinachu can. Ashtahuanpish chaicuna pajtarichunmi cushilla shuyana can. Cai millai pacha, millai ruraicuna tucurijpica Dios cushca mushuj pachami tiyanga.

¿Ima horataj cai pacha o millai ruraicunaca tucuringa? Catij yachaipimi Biblia ima yachachishcata ricushun.