1. ¿Juchayujcuna cashcamantaca huaquinpica ima shinataj sintirinchij?

SHUJ cutinca apóstol Pabloca yallitaj llaquillami carca. Chaimantami: “¡Aij ñucalla, imachari tucusha!” nirca (Romanos 7:24, QC, 1989). Cunan punllacunapipish Diosta sirvijcunaca maipica Pablo layallatajmi sintirinchij. Diospaj ñaupajpi alli ricurisha nishpapish tucuicunami juchayuj cashcamantaca pandarinchij. Huaquincunacarin jatun juchata rurashcamantami Jehová Diosca nunca mana perdonangachu nishpa yuyancuna.

2. a) ¿Salmo 34:22-pi nishca shinaca Diosta sirvijcunaca imamantataj juchacunamanta mana dimastij llaquirina canchij? b) ¿Cai yachaipica imatataj ricushun? ( Página 10-pi tiyaj cuadrotapish ricui).

² Bibliapica: “Jehová Diosca paita sirvijcunapaj causaitaca quishpichingami. Paipi tucui miticujcunaca mana juchachishca cangacunachu” ninmi. (Salmo 34:22, NM). Cai versopi yachachishca shinaca imapi pandarishpaca Diospi miticushpami mana dimastij llaquirina canchij. ¿Jehová Diospi miticunaca imatataj nisha nin? ¿Juchata rurashca cajpi Jehová Dios llaquishpa perdonachunca  imatataj rurana canchij? Cai tapuicunata cutichingapajca ñaupa Israelpi tiyashca miticuna llajtacunamantami yachana canchij. Shinami juchacunamanta, juchata rurashpa arrepintirijcunamanta Dios imata yuyashcata intindishun. Moisesman cushca leycunapica miticuna llajtacuna tiyachunmi Jehová Diosca mandashca carca. Cai leytaca israelitacunaca huata 33 Pentecostés fiestacamami cazurcacuna. Miticuna llajtacuna imamanta tiyashcata, ima shina cashcata yachashpa callarishun.

3. ¿Ñaupa Israelpica imatataj huañuchijcunahuanca rurana carca?

³ Israelitacunapuramanta maijan shuj runata huañuchishpaca Diospaj ñaupajpica mana alli ricurircachu. Maijan chaita rurajpica familiapuramanta shuj cꞌarimi paitapish huañuchina carca (Números 35:19). Dios cusha nishca llajta ama mapayachunmi chaitaca utca rurana carca. Chashnami huañuchij runaca mana culpayujta huañuchishcamanta paipaj causaihuan pagana carca. Jehová Diosca, ‘runapaj yahuarta jichashcamanta llajtaca mapa illajca mana cai tucunchu. Cancuna causacushca llajtataca ama mapayachinguichijchu’ nircami (Números 35:33, 34).

4. ¿Shuj israelita mana munaimanta pita huañuchishpaca imatataj rurana carca?

⁴ Shuj israelita mana munaimanta shujtaj runata huañuchishca cashpapish culpayujmi carca (Génesis 9:5). Pero mana munaimanta huañuchishcamantami, Jehová Diosca paita llaquishpa juzgachun nirca. Huañushcapaj familiamanta shuj cꞌari paitapish ama huañuchichunca 6 miticuna llajtamantaca shujmanmi callpana carca. Chai llajtamantaca sumo sacerdote huañungacamami mana llujshina carca (Números 35:15, 28).

5. ¿Diosta ashtahuan rijsingapajca imamantataj miticuna llajtacunamanta yachana canchij?

⁵ Jehová Diosllatajmi miticuna llajtacuna  tiyachun mandashca carca. Chaimantami Josuemanca: “Miticuna pueblocunata agllaichij” nirca (Josué 20:1, 2, 7, 8). Tucuicunami tapurina canchij: “¿Jehová Dios llaquij cashcata intindingapajca imamantataj chai llajtacunamanta yachana canchij? ¿Cunan punllacunapipish ima shinataj Jehová Diospi miticui pudinchij?”

6, 7. a) ¿Shuj runa mana munaimanta huañuchishca cajpica ancianocunaca imatataj rurana carca? (Página 9-pi tiyaj dibujota ricui). b) ¿Huañuchij runaca imamantataj ancianocunahuan parlana carca?

⁶ Shuj israelita mana munaimanta pita huañuchishca cashpaca shuj miticuna llajtamanmi callpana carca. Punguman chayashpaca ancianocunamanmi huillana carca. Ancianocunaca paitaca allimi chasquina carcacuna (Josué 20:4). Qꞌuipaca maipimi runata huañuchishca carca, chai llajtamanmi cachana carcacuna. Chai llajtamanta ancianocunami paita juzgana carca (Números 35:24, 25-ta leyipai). Cai ancianocunaca mana munaimanta huañuchishcata alli yachashca qꞌuipaca miticuna llajtaman cutin tigrachunmi saquina carcacuna.

⁷ Ancianocunaca Diospaj pueblopi ama mapa ruraicuna tiyachunmi ricuna carcacuna. Chaimantami shuj runa mana munaimanta pita huañuchishca cashpaca ancianocunahuan parlana carca. Shinallataj Jehová Dios paita llaquishpa perdonachunmi paicunahuan parlana carca. Bibliamanta shuj yachaj runaca: “Mana munaimanta huañuchij runa ancianocunahuan mana parlajpica paitapishmi huañuchinata pudircacuna. Dios imata rurachun nishcata mana rurashcamantami paipaj culpaca paipaj jahuallapitaj can” nircami. Huañuchij runa quishpiringapajca ancianocunapaj ayudatami mashcana carca. Paicuna imata nishcatapish pajtachinami carca. Miticuna llajtaman mana yaicushpaca huañushcapaj familiapuramanta shuj cꞌaripaj maquipimi huañui pudirca.

8, 9. ¿Jatun juchata rurashca cashpaca imamantataj ancianocunapaj ayudata mashcana canchij?

⁸ Cunan punllacunapipish jatun juchapi urmashca cashpaca ancianocunapaj ayudatami mashcana canchij. ¿Imamantataj chaita rurana canchij? Jehová Diosmi juchapi urmashcacunata ayudachun ancianocunata churashca (Santiago 5:14-16). Chashnallataj arrepintirichun, juchata ruranata saquichun, Jehová Dios perdonachunmi ancianocunaca ayudai tucuncuna (Gálatas 6:1; Hebreos 12:11). Ancianocunaca llaquilla cajcunata ayudangapajmi can. Jehová Diosca, ancianocunaca “jatun acapanamanta paca tucuna shinami can” ninmi (Isaías 32:1, 2). Jehová Diosmi ancianocunata churashpa llaquij cashcata ricuchishca.

⁹ Achca huauqui panicuna imapi pandarishpaca ancianocunahuan parlashpami alli sintirishcacuna. Por ejemplo, Daniel shuti huauquica jatun juchapimi urmashca carca. Chashnapish achca quillacunatami ancianocunahuan mana parlashca carca. Chaimantami paica: “Ña achca tiempo pasashcamanta ancianocunaca mana ayudai tucungacunachu  nishpami yuyarcani” ninmi. Danielca chai juchata pi yachaj chayanatami mancharca. Jehová Diosta mañashpapish puntapica perdonahuai nishpami mañaj carca. Chaimantami paica ancianocunahuan parlarca. Paica, “ancianocunahuan parlanataca achcatami mancharcani. Pero qꞌuipamanca shuj llashaj quipita anchuchishca shinami sintirircani. Cunanca Jehová Diostapish tucui shunguhuan mañanillami” ninmi. Ña tiempo pasajpica Danieltaca siervo ministerialtami congregacionpi nombrarcacuna. Cunanca paica tranquilomi causan.

10. ¿Mana munaimanta huañuchij runa quishpiringapajca imatataj rurana carca?

¹⁰ Mana munaimanta huañuchij runa quishpirisha nishpaca utcami cꞌuchulla miticuna llajtaman rina carca (Josué 20:4-ta leyipai). Paipaj causaita quishpichingapajca mana uniyashpami miticuna llajtaman chayana carca. Chaipimi sumo sacerdote huañungacama saquirina carca. Chaita rurashpaca paipaj huasita, trabajota, shujtaj cosascunatapishmi saquina carca (Números 35:25) * (urapi tiyaj notata ricui). Chai tucuita saquinaca sinchimi cashcanga. Huañuchij runa miticuna llajtamanta llujshishpaca caishujpaj causai mana valishca cashcatami ricuchinman carca. Shinallataj paipishmi huañui tucunman carca.

11. ¿Jehová Dios ñucanchijta perdonashcamantaca ima shinataj agradicina canchij?

¹¹ Cunan punllacunapica juchata rurashpa arrepintirishpaca Dios cushca tucui ayudatami pajtachina canchij, juchata ruranatapish saquinami canchij. Shinallataj juchapi ama cutin urmangapajmi cuidarina canchij. Apóstol Pabloca Corinto llajtamanta huauquicuna ‘Dios munashca shina llaquirishpa’ juchamanta arrepintirishcatami nirca. Chashnami paicunaca Diospaj ñaupajpi cutin alli ricurircacuna. Imata mana manchashpami Diosta tucui shunguhuan sirvi tucurcacuna. Shinallataj paicuna mana allita rurashcatapishmi allichi tucurcacuna (2 Corintios 7:10, 11, NM). Ñucanchij juchacunamanta arrepintirishcataca ruraicunahuanmi ricuchina canchij. Chashnami Jehová Dios ñucanchijta perdonashcamanta pagui nishcata ricuchishun.

12. ¿Dios ñucanchijta llaquishpa catichunca imatataj rurana canchij?

¹² ¿Dios ñucanchijta llaquishpa catichunca imatataj rurana canchij? Imata ruranata munashpapish juchapi urmachigrijpica utcami caruyana canchij (Mateo 18:8, 9). Por ejemplo, ñucanchij amigocuna mana allita rurajcuna cajpica paicunahuan apanacunatami saquina canchij. Shinallataj tragota yalli ubyanamanta jarcarinaca sinchichari ricuringa. Chaimantami maipi cashpapish pihuan cashpapish ama yalli ubyangapaj cuidarina canchij. Huainayana yuyaicunamanta jarcarinapish sinchichari ricuringa. Chaimantami Internetpi, televisionpi mapa  cosascunata mana ricuna canchij. Mana cazushpa Diosmanta caruyashpaca llaquimi causashun. Pero paipaj ñaupajpi alli ricuringapaj esforzarishpaca cushillami sintirishun. Shinami Diosca ñucanchijtaca huiñaipaj llaquishpa cꞌuyanga (Isaías 54: 7, 8).

13. ¿Huañuchij runaca imamantataj mana manchashpa miticuna llajtapi causai tucurca?

¹³ Jehová Diosca, chai llajtacunaca ‘miticunapajmi cana can’ nircami (Josué 20:2, 3). Mana munaimanta huañuchij runaca chai llajtaman chayashpami quishpirishca carca. Shinallataj paitapish huañuchisha nicuj runaca miticuna llajtamanca mana yaicui pudircachu. Diospish chai juchallamantataj ama ishqui cutin juzgachun nishpami mandarca. Mana munaimanta huañuchij runa chai llajta ucupi causacushcamanta Dios cuidacujpimi imata mana manchana carca. Mana prezupi shinachu carca. Paica trabajashpa, shujtajcunata ayudashpa, Diostapish sirvishpami casilla chai llajtapica causai pudirca.

14. ¿Jatun juchamanta arrepintirishca cashpaca imatataj yuyarina canchij?

¹⁴ Huaquincunaca jatun juchamanta arrepintirishca cashpapish llaquillami causancuna. Maijancunacarin Jehová Diosca ñuca pandarishcataca mana  cungaringachu nincunami. Canpish chashna yuyacushpaca Jehová Diosca llaquij cashcata, tucuita perdonaj cashcatami yuyarina cangui. Chashnami tranquilo causangui. Párrafo 9-pi ricushca shinaca Danielca ancianocunahuan parlashpa, paicuna ayudajpimi alli sintirirca. Paica: “Ñuca pandarishcacunamantaca ña mana yallitaj llaquirishpa causanichu. Jehová Diosca ñucanchij juchacunata apashpa carupimi churan. Chaimanta ñuca pandarishcacunataca ña mana yuyarinillapishchu” ninmi. Párrafo 13-pi nishca shinaca mana munaimanta huañuchij runaca miticuna llajtapi cashcamantami imata mana manchashpa causai tucurca. Jehová Dios perdonashcamantami ñucanchijpish mana yalli preocuparishpa causai tucunchij (Salmo 103:8-12-ta leyipai).

15, 16. ¿Jesús ñucanchijmanta huañushcata yachashpaca ima shinataj causashun?

¹⁵ Israelitacunaca Jehová Dios perdonaj cashcatami crijcuna carca. Ñucanchijpish Jehová Dios perdonaj cashcataca tucui shunguhuanmi crinchij. Callari parrafocunapica apóstol Pablo llaquilla sintirishpa Jehová Diosta mana tucuipi cazui pudishcatami ricurcanchij. Ñaupaman juchata rurashcamanta llaquilla cashpapish paica: “¡Ñucanchij Mandaj Jesucristomantaca, Taita Diostami pagui nini!” nircami (Romanos 7:25). Juchacunamanta arrepintirijpi Jesusmanta Jehová perdonashcatami Pabloca crirca. Jesús ñucanchij juchacunamanta huañushcamantami Diospaj ñaupajpica alli ricurinchij. Shinallataj contentomi causai tucunchij (Hebreos 9:13, 14). Jesusca ñucanchij sumo sacerdote cashcamantami ‘maijanpish paimanta Diosman cꞌuchuyajtaca, huiñaipaj quishpichi tucun. Paica ñucanchijmanta Diosta mañashpami huiñaita causacun’ (Hebreos 7:24, 25). Sumo sacerdoteca israelitacunapaj juchacunata Dios perdonanata crichunmi ayudaj carca. Jesuspish sumo sacerdote shina cajpimi Jehová ñucanchij juchacunata perdonanata crinchij. Shinallataj ‘ima llaquipi cajpi Jehová llaquishpa ayudanatami tucui shunguhuan crinchij’ (Hebreos 4:15, 16).

¹⁶ Jesusca canmantami huañurca. Chaimantami Jehová Diospi miticusha nishpaca Jesús huañushcapi tucui shunguhuan crina cangui (Gálatas 2:20, 21). Jesús huañushcamanta Jehová Dios cambaj juchacunata perdonai tucushcata, huiñai causaita chari tucushcatapishmi crina cangui. Canta cꞌuyashcamantami Jehová Diosca paipaj Churita curca.

17. ¿Imamantataj Jehová Diospi miticusha ningui?

¹⁷ Miticuna llajtacunamanta yachashpami Jehová Dios llaquij cashcata intindishcanchij. Shinallataj causaica Diospajca achca valishca cashcata, ancianocuna ima shina ayudana cashcatami yachashcanchij. Ashtahuanpish shungumanta arrepintirina cashcata, ima shina Jehová Dios ñucanchij juchacunata perdonashcatapishmi yachashcanchij. ¿Ñucanchijca Jehová Diospichu miticunchij? Paimi ñucanchijtaca alli huaquichinga (Salmo 91:1, 2). Shamuj temapica miticuna llajtacunamantami yachashpa catishun. Chaipimi Jehová Dios shina llaquij, cꞌuyaj canata yachashun.