1983 huatapimi huacharircani. Ñucaca sanomi carcani. Pero 10 huatacunapica ñuca tucui cuerpopimi achca nanaicunata charircani. Ishqui huata qꞌuipaca ñapish tutamanta lado rijcharishpaca ña mana cuyuri tucurcanichu. Chaimantami purinata ña mana valircani. Shinallataj cai ungüimantami uchilla saquirircani.

Cai ungüimantami huasillapi pasaj carcani. Shuj cutinca ishqui Testigocunami ñuca huasiman chayarca. Shujca Florence shutimi carca. Ñucaca casi siempremi gentecuna visitanaman shamujpica miticujlla carcani. Pero chai punllaca Testigocuna ñucahuan parlachunmi saquircani. Paicunaca cai Allpapi alaja paraíso tiyanamantami parlarca. Chaimanta parlacujpica ñucaca 5 huatacunata charishpa Jethro shuti misionero visitashcatami yuyarircani. Cai misioneroca Surinam llajtamantami ñuca yayata Bibliamanta yachachingapajca quillapi shuj cutin shamuj carca. Jethroca ñucataca cꞌuyaihuan allimi tratarca. Paica alli runami carca. Chai tiempopica ñuca comunapica testigo de Jehovacunami tandanacujcuna carca. Chai tandanacuicunamanmi ñuca abuelitocunaca pushajcuna carca. Florence huarmi Bibliamanta ashtahuan yachasha ninguichu nijpica ari nircanimi.

Florenceca ñucaman Bibliamanta yachachishpa catingapajca paipaj cusahuanmi tigrarca. Paipaj cusaca Justus shutimi carca. Ñucaca liyinataca mana yacharcanichu. Chaimi paicunaca liyinata yachachircacuna. Asha tiempo qꞌuipaca ñami liyi tucurcani. Shuj punllaca Florenceta paipaj cusataca Surinampi predicashpa catichunmi asignashcata huillarcacuna. Chaimantami Orealla comunapica ña mana pi Bibliamanta yachachishpa catirca. Jehová Dios ñucamanta manataj cungarishcata ricushpami cushilla sintirircani.

Asha tiempo qꞌuipaca Orealla comunamanca Floyd shuti precursormi chayarca. Huasin huasin predicacushpami ñucahuan tuparca. Paica ñucamanmi Bibliamanta yachachisha nirca. Chaimi ñucaca asirircani. Paica imamantataj asingui nishpami tapurca. Chaimi ñucaca ñami ¿Qué exige Dios de nosotros? nishca folletota estudiarcani nishpa cutichircani. Shinallataj El conocimiento que lleva a vida eterna * nishca librotapish ña yachai callarishcatami huillarcani. Imamanta Bibliamanta ña ashtahuan mana yachashpa caticushcatapishmi parlarcani. Cai precursorhuanmi cai librotaca tucui estudiarcani. Pero paitapish shujtaj ladopi Diosta sirvichunmi cacharcacuna. Chaimantami cutin sin yachachij saquirircani.

 Huata 2004-pimi ishqui precursor especialcunaca Orealla comunaman chayarcacuna. Paicunaca Granville y Joshua shuticunami carca. Paicunaca huasin huasin predicacushpami ñucahuan tuparcacuna. Bibliamanta yachasha ninguichu nijpica ñucaca asirircanimi. Ñucaca Conocimiento librotaca callarimantami estudiasha nircani. Ñaupa imatami yachachirca chashnallataj yachachishcata ricungapajmi yachasha nircani. Granvilleca cai comunapica tandanacuicunatami charinchij nircami. Casi 10 huatacunata ñuca huasimanta mana llujshishca cashpapish chai tandanacuiman risha nircanimi. Chaimi Granvilleca silla de ruedaspi tandanacuiman pusharirca.

Asha tiempo qꞌuipaca Granvilleca Escuela del Ministerio Teocrático nishcapi matricularichunmi animarca. Paica: “Canca discapacitado cashpapish parlai tucunguimi. Shuj punllaca Bibliamanta conferenciata cunguimi, chaitaca ruranguimi nircami”. Chaita uyashpaca animarishcami sintirircani.

Granvillehuanmi huillanaman llujshi callarircani. Pero ñuca comunapica ñancuna mana alli cashcamantami silla de ruedaspi rinaca sinchi carca. Chaimi ñucata shuj carretillapi pushachun paitaca mañarcani. Chaita ruranaca allimi carca. Ñucaca abril de 2005 huatapimi bautizarircani. Qꞌuipaca congregacionpi publicacioncunata cuchunmi yachachircacuna. Tandanacuicunapipish equipo de sonidohuan ayudachunmi yachachircacuna.

Ñuca yayaca 2007 huatapica barcopi viajacushpa shuj accidentepimi huañurca. Ñuca familiahuanca dimastaj llaquillami carcanchij. Granvilleca ñucanchijhuanmi Yaya Diosta mañashpa, Bibliahuan animaj carca. Ishqui huatacuna qꞌuipaca cutinmi llaqui japirca. Granvillepish barcopi viajacushpami shuj accidentepi huañurca.

Ñucanchij congregacionpica pushaj illajmi saquircanchij. Shuj siervo ministerial huauquillahuanmi saquirircanchij. Granvilleca ñuca cꞌuyashca amigomi carca. Paica Jehovapajman cꞌuchuyachun, imalla ministishcacunapimi ayudaj carca. Chaimantami pai huañujpica dimastaj llaquilla sintirircani. Pai huañushca qꞌuipallami tandanacuipica Huillaj revistata liyicurcani. Granville ña mana chaipi cashcata ricushpami huacai callarircani. Chaimantami ishqui parrafocunallata liyinata avanzarcani. Chaimi plataformamanta uriyana tucurca.

Orealla comunapi shujtaj congregacionmanta ayudanaman shamujpimi alli sintirircani. Ashtahuancarin shuj precursor especialtami sucursalmantaca ñucanchij comunapi sirvichun cacharcacuna. Paica Kojo shutimi carca. Ñuca mamita, ñuca qꞌuipa huauqui Bibliamanta yachashpa bautizarijpica cushillami sintirircani. Marzo de 2015 huatapimi siervo ministerial cachun agllarcacuna. Asha tiempo qꞌuipallami shuj conferenciata curcani. Chai punllaca huiqui muyurishpami Granville ima nishcata yuyarircani. Paica: “Shuj punllaca Bibliamanta conferenciata cunguimi, chaitaca ruranguimi” nircami.

JW Broadcasting^® programata ricushpami ñuca laya discapacitados huauqui paicuna Diosta cushilla sirvi tucushcata ricui tucushcani. Ñucapish paicuna shinami huaquin cosascunata rurai tucushcani. Jehovata ashtahuan sirvisha nishpami precursor regular tucurcani. Mana yuyashcapimi septiembre de 2019 huatapica congregacionta pushaj cachun agllarcacuna. Cai congregacionpica casi 40 publicadorcunami tiyan.

Huauqui panicunataca Jehovamanta yachachishcamanta, paita sirvichun ayudashcamantami agradicini. Pero Jehová Dios ñucata manataj cungarishcamantami paitaca shungumanta agradicini.