1, 2. ¿Huaquinpica imamantataj Jehová Dios ñucanchij mañaicunata mana cutichishcata yuyashcanchij?

 BIBLIAPICA “Mandaj Diosllahuan cushicui. Cambaj shungupi yuyashcataca paimi cunga” ninmi (Salmo 37:4). Cai shimicunaca sumajmi can ¿nachu? ¿Pero chai shimicunaca Jehová Dios tucui ñucanchij mañashcacunata rato cutichij cashcatachu nisha nin? Tucuicunami chaipi yuyana canchij. ¿Imamanta? Cai ejemplocunapi yuyashun. Shuj soltera panichari “ñucaca Escuela para Evangelizadores del Reinomanmi risha nini” nishpa Jehová Diosman mañan. Pero achca huatacuna pasajpipish paitaca mana invitancunachu. Cutin shuj joven huauquica ungushcami can. Chaimi Jehová Diostaca “congregacionpi ashtahuan ayudangapaj alli saludta cuhuai” nishpa Jehová Diosta mañan. Shinapish paica mana alliyanchu. Cutin shuj yaya mamaca Jehová Diostami “ñucanchij churi Jehová Diosmanta ama caruyachun ayudahuai” nishpa mañancuna. Pero chashna mañajpipish paicunapaj churica Jehová Diosmantami caruyan.

² Jehová Diosca cambaj mañashcacunatapish manachari tucuita cutichishca. Chaita ricushpaca tal vez Jehová Dios shujtajcunapaj mañaicunallata cutichij cashcatami yuyai callarishcangui. Mana cashpaca “ñuca mana allita rurajpichari Jehová Diosca ñuca mañaicunataca mana cutichin” nishpami yuyashcangui. Pani Janiceca chashnami sintirirca. b Paipish paipaj cusapish Jehová Diostaca “Betelpimi sirvisha ninchij” nishpami mañarcacuna. Chashna mañashca qꞌuipaca pani Janiceca Jehová Dios rato paicunapaj mañaita cutichigrishcatami yuyarca. Pero quillacuna, huatacuna pasajpipish Betelmanca mana invitarcacunachu. Chaimi paica achcata llaquirirca. Shinallataj paica “ñucanchijca ima metata charishcatami Yaya Diosmanca tucuita  huillarcanchij. Ima mana allita rurashcamantachari Yaya Diosca ñucanchij mañaicunataca mana cutichirca” nishpami yuyarca.

3. ¿Cai yachaipica imatataj yachashun?

³ Huaquinpica Jehová Dios ñucanchij mañaicunata cutichij cashcataca manachari seguros cashun. Ñaupa tiempopi Diosta sirvijcunapishmi chashna sintirircacuna (Job 30:20; Salmo 22:2; Habacuc 1:2). ¿Pero Jehová Dios ñucanchij mañaicunata cutichij cashcata seguros cangapajca imatataj rurana canchij? (Salmo 65:2). Caita yachangapajca quimsa tapuicunatami cunanca cutichigrinchij. 1) ¿Diosca mañaicunataca ima shinataj cutichin? 2) ¿Diosca imata rurachuntaj munan? 3) ¿Ñucanchij mañashcacunataca imamantataj huaquinpica cambiana canchij?

4. Jeremías 29:​12-pi nishca shinaca ¿Jehová Diosca imatataj rurasha nin?

⁴ Jehová Diosca ñucanchij mañaicunata uyanatami nin (Jeremías 29:​12-ta liyipai). Paica paita sirvijcunata achcata cꞌuyaj cashcamantami siempre paicunapaj mañaicunataca uyan (Salmo 10:17; 37:28). Shinapish chaica Jehová Dios tucui ñucanchij imalla mañashcacunata cunataca mana nisha ninchu. Tal vez Jehová Dios tucui ñucanchij mañaicunata cutichichunca Paraíso shamungacamami shuyana canga.

5. ¿Jehová Diosca mañaicunata cutichingapajca imapitaj yuyan?

⁵ Jehová Diosca mañaicunata cutichingapajca cai Allpapi paipaj munai ima shina pajtarinapimi yuyan (Isaías 55:​8, 9). Paica pai churashca Gobiernota cazuj gentecunalla cai Allpapi causachunmi munan. Shinallataj paica paicuna tandalla, cushilla causachunmi munan. Shinapish Satanasca ‘gentecunallataj mandashpaca allimi causangacuna’ nircami (Génesis 3:​1-5). Jehová Diosca Diablo llullacushcata ricuchingapajca gentecunallataj mandachunmi saquirca. Chaimi cai Allpapica achca llaquicuna tiyan (Eclesiastés 8:9). Jehová Dios tucui llaquicunata cai rato mana tucuchinataca allimi yachanchij. Chaita rurajpica maijancunaca gentecuna alli mandajcuna cashcamanta llaquicunata tucuchi tucushcatami yuyangacuna.

6. ¿Jehová Dios cꞌuyaj, tucuita alli ruraj cashcataca imamantataj seguros cana canchij?

⁶ Maijancuna chaillatataj mañajpipish Jehová Diosca maipica shujtaj shujtaj layami cutichin. Por ejemplo, rey Ezequías ‘ñucata alliyachipai’ nishpa mañajpica Jehová Diosca paita alliyachircami (2 Reyes 20:​1-6). Shinapish apóstol Pablo Jehová Diosta ‘ñuca aichapi tujsicuj shina cashata anchuchipai’ nishpa mañajpica Diosca paipaj mañaitaca mana cutichircachu. Pabloca ungushca cashcamantachari Yaya Diostaca chashna mañashcanga (2 Corintios 12:​7-9). Cunanca Santiago y Pedro ima tucushcata yuyashunchij. Mandaj Herodesca paicunatami huañuchisha nirca. Chaimi huauqui panicunaca paicuna ama ima tucuchun Yaya Diosta mañarcacuna. Paicuna chashna mañajpipish Herodesca Santiagotami huañuchirca. Pero Jehová Dios shuj milagrota rurajpimi Pedrotaca mana huañuchi tucurca (Hechos 12:​1-11). Tal vez maijancunaca “¿Diosca imamantataj Pedrollata ayudarca?” nishpachari yuyashun. Biblia chaita mana nijpipish Jehová Dios siempre cashcata ruraj cashcatami seguros canchij. Ashtahuanpish Jehová Dios Pedrotapish Santiagotapish achcata cꞌuyashcatami alli yachanchij (Deuteronomio 32:4; Apocalipsis 21:14). c Caipi ricushca shinaca huaquinpica Jehová Diosca ñucanchij mañaicunataca mana chashnallatajchu cutichinga. Chashnapish pai cꞌuyaj, tucuita alli ruraj cashcatami seguros canchij (Job 33:13).

7. a) ¿Diosta mañashca qꞌuipaca imatataj mana rurana canchij? b) ¿Jehová Dios shujtaj huauqui panicunallata uyashcataca imamantataj mana yuyana canchij?

 ⁷ Jehová Diosta imapi ayudachun mañashca cajpipish ñucanchij munashca shinaca manachari cutichishcanga. Pero ¿shujtaj huauqui panicuna chaillatataj mañajpi Jehová Dios paicunata cutichijpica imatataj rurashun? Jehová Dios ñucanchij mañaicunata ima shina cutichishcata shujtajcunata ima shina cutichishcahuanca mana comparanachu canchij. Pani Annamanta parlashun. Paipaj cusa Matthew cáncer ungüihuan cashcamantami Jehová Diosta paita jambichun mañarca. Chai punllacunapica ishqui mayorlla panicunapishmi cáncer ungüihuan carcacuna. Chaimantami Annaca quimsandijmanta Jehová Diosta mañaj carca. Chai mayorlla panicunaca alliyarcami. Pero paipaj cusa Matthewca huañurcami. Chaimi Annaca Jehová Dios paicunallata ayudashcata yuyai callarirca. Jehová Dios ayudashcallamanta chai ishqui panicuna alliyashcataca mana seguroschu canchij. ¿Pero imatataj seguros canchij? Jehová Dios ñalla tucui ungüicunata anchuchinata, paipaj cꞌuyashca sirvijcunata cutin causachinatami seguros canchij (Job 14:15).

8. a) ¿Isaías 43:​2-pi nishca shinaca Jehová Diosca ñucanchijtaca ima shinataj ayudan? b) ¿Llaquicunahuan chꞌimbapuracushpaca imamantataj Jehová Diosta mañana canchij? (Diosta mañashpami llaquicunata ahuantashun nishca videota ricui.)

⁸ Jehová Diosca siempremi ayudashpa catinga. Paica ñucanchijta cꞌuyashcamantami imamantapish ama sufrichun munan (Isaías 63:9). Chashnapish paica tucui ñucanchij llaquicunataca mana anchuchinchu. Bibliapi nishca shinaca ñucanchij llaquicunaca ‘jatun yacucuna, nina shinami’ cai tucun (Isaías 43:​2-ta liyipai). Pero tucui ñucanchij llaquicunata mana anchuchishpapish Yaya Diosca paipaj espíritu santota cushpami chai llaquicunahuan chꞌimbapurachun ayudanga. Shinallataj paica huiñaipaj sufrishpa catichunca mana saquingachu (Lucas 11:13; Filipenses 4:13). Chaimantami Jehová Diosta sirvishpa catichun paillataj ayudanata seguros canchij. d

9. ¿Santiago 1:​6, 7-pi nishca shinaca Yaya Diostaca ima shinataj mañana canchij?

⁹ Jehová Diosca paipi confiachunmi munan (Hebreos 11:6). Jatun llaquicunahuan chꞌimbapuracushpaca Jehová ñucanchijta mana ayudacushcatachari yuyashun. Llaquicunahuan chꞌimbapuranaca shuj jatun pircata huichiyacuj shinami can. Pero Bibliapi nishca shinaca Jehová Diosca chai jatun pircata huichiyachunmi ayudan (Salmo 18:​29, NWT). Chaimanta paipaj nishcacunapi confiashpa catishunchij. Ashtahuanpish shungumanta Jehová Diosta mañashunchij. Paica ñucanchij mañaicunata cutichingapajca listomi canga (Santiago 1:​6, 7-ta liyipai).

10. ¿Jehová Diosta mañashca qꞌuipaca imatataj rurana canchij? Shuj ejemplomanta parlai.

¹⁰ Jehová Diosca ñucanchij mañashcacuna pajtarichun ñucanchijpish esforzarichunmi munan. Caipi yuyashun: Shuj huauquimi Jehová Diostaca “jatun tandanacuiman ringapaj ñuca jefe permisota cuchun ayudahuai” nishpa mañan. ¿Jehová Diosca cai huauquipaj mañaitaca ima shinataj cutichinga? Tal vez paipaj jefehuan parlachunmi mana manchaj cachun ayudanga. Pero cai huauquica paipaj jefehuan parlanamanmi rina can. Huaquinpicarin jefehuanca cutin cutinmi parlana canga. Tal vez asamblea punllacuna shujtaj compañero paipaj randi trabajai tucushcatami ni tucun. Pai mana trabajashca punllacunamanta paiman pagachun mana minishtishcatapishmi ni tucun.

11. ¿Jehová Diostaca imamantataj cutin cutin mañana canchij?

 ¹¹ Diosca ñucanchij llaquicunamanta cutin cutinmi paita mañachun munan (1 Tesalonicenses 5:17). Jesusca Jehová Dios huaquin mañaicunata mana utca cutichinatami nirca (Lucas 11:9). Shinaca mana shaicushpa cutin cutin rogarishpa mañashpa catishunchij (Lucas 18:​1-7). Ñucanchij imalla minishtishcamanta Jehová Diosta cutin cutin mañashpaca de verdad chaita minishtishcatami ricuchinchij. Ashtahuanpish Jehová Dios ñucanchijta ayudanata tucui shunguhuan crishcatami ricuchinchij.

12. a) ¿Jehová Dios ñucanchij mañaicunata mana cutichijpica imapitaj yuyana canchij? b) ¿Jehová Diosta respetohuan mañacushcataca ima shinataj ricuchinchij? (“ ¿Ñuca mañashcacunaca Jehová Diosta respetashcatachu ricuchin?” nishca recuadrota ricui).

¹² Jehová Dios ñucanchij mañashcata mana cutichijpica quimsa tapuicunapimi yuyana canchij. Puntapica: “¿Ñuca mañacushcaca minishtirishcachu can?”  nishpami tapurina canchij. Huaquinpica imata minishtishcata yuyashpami Jehová Diosta chaita cuchun mañanchij. Shinapish chaitaca manachari minishtishun. Shinallataj ñucanchij yuyashca shina Jehová Dios shuj problemata allichichunchari mañashcanchij. Pero ñucanchij yuyashca shina chai problemata allichinaca manachari alli canga. Shinallataj Jehová Dios munashca shina mana mañashcamantachari ñucanchij mañashcataca mana cun (1 Juan 5:14). Por ejemplo, párrafo 1-pi parlashca yaya mamaca paipaj churi Jehová Diosta sirvishpa catichunmi mañarcacuna. Chashna mañanaca alli layami ricurin. Pero Jehová Diosca paita sirvichunca pitapish mana obliganchu. Paica huahuacunallataj decidishcamanta paita sirvichunmi munan (Deuteronomio 10:​12, 13; 30:​19, 20). ¿Shinashpaca  chai yaya mamaca Yaya Diostaca ima shinataj mañana can? Paicunaca alli yachachijcuna cangapajmi Jehová Diosta mañai tucuncuna. Chashnami paicunapaj huahuaca Jehová Diosta cꞌuyanga, paipaj amigopish tucunga (Proverbios 22:6; Efesios 6:4).

13. ¿Hebreos 4:​16-pi nishca shinaca Jehová Diosca ima horastaj ñucanchijta ayudan?

¹³ Shinallataj “¿Jehová Diosca ñuca munashca horaschu ñuca mañashcacunata cutichinga?” nishpami tapurina canchij. Maipica chai rato Jehová Dios ñucanchij mañaicunata cutichichunmi shuyashun. Pero Jehová Diosca ñucanchij mañaicunata ima horas cutichinataca allimi yachan (Hebreos 4:​16-ta liyipai). Jehová Dios ñucanchij munashca horas ñucanchij mañaicunata mana cutichijpica ñucanchijta mana uyashcatachari yuyashun. Pero ñucanchij munashca horas mana cutichijpipish nunca mana cutichinataca mana yuyanachu canchij. Párrafo 1-pi parlashca joventa yuyarishunchij. Jehová Dios paita alliyachishca cajpica, Diabloca cai jovenca paita alliyachishcallamanta Jehová Diosta sirvishcatami ninman carca (Job 1:​9-11; 2:4). Jehová Diosca tucui ungüicunata ima hora tucuchinataca ñami agllashcata charin (Isaías 33:24; Apocalipsis 21:​3, 4). Chaimantami cunan punllacunapi Jehová Dios shuj milagrota rurashpa ñucanchijta alliyachichunca mana shuyanchij. ¿Shinashpaca cai jovenca Jehová Diostaca imatataj mañana can? Ungushca cashpapish paita sirvishpa catingapaj fuerzasta cuchunmi mañai tucun. Chashna mañashpami cai jovenca tranquilo sintiringa (Salmo 29:11).

14. ¿Pani Janicemantaca imatataj yachanchij?

¹⁴ Párrafo 2-pi parlashca panita yuyarishunchij. Paica Betelpi sirvingapajmi Diosta mañaj carca. Shinapish Jehová Dios paipaj mañaita ima shina cutichishcata intindingapajca pichca huatacunami pasarca. Paica: “Chai huatacunapica Jehová Diosca alli cualidadcunata charichunmi  ayudarca. Por ejemplo, paipimi ashtahuan confiana carcani. Shinallataj Bibliatami ashtahuan estudiana carcani. Ñucanchij munashcata mana charishpapish cushilla causai tucushcatapishmi intindina carcani” nircami. Tiempohuanca Janicepaj cusataca superintendente de circuito cachunmi nombrarcacuna. Chaimi Janiceca: “Jehová Diosca ñuca mañaicunataca ñuca mana yuyashca shinami cutichirca. Chaimi ñuca mañaita ima shina cutichishcata valorangapajca achca tiempo pasarca. Pero cunanca Jehová Dios paipaj cꞌuyaita ricuchishcamantami achcata agradicini” nirca.

15. ¿Caita chaita minishtinichu nishpa Jehová Diosta mañanapaj randica huaquinpica ima shinataj mañana canchij? (Fotocunamantapish parlapai).

¹⁵ Shinallataj “¿Jehová Diosta caita chaita minishtinichu nishpa mañanaca allichu canga?” nishpami tapurina canchij. Jehová Diosta tucui ñucanchij imalla minishtishcata mañanaca allimi can. Pero huaquinpica Jehová Diospaj munai maijan cashcata yachangapajca chashna mañanaca manachari alli canga. Escuela para Evangelizadores del Reinoman ringapaj Jehová Diosta mañaj soltera panipi cutin yuyashunchij. Paica maipi minishtirishcapi sirvingapajmi chai escuelaman risha nin. Chaiman ringapaj Jehová Diosta mañacushpapish, paita ashtahuan sirvingapaj imata rurai tucushcata ricuchichunmi mañai tucun (Hechos 16:​9, 10). Chashna mañashca qꞌuipaca huauqui superintendente de circuitotami maijan congregacioncunapi ashtahuan precursorescunata minishticushcata tapui tucun. Shinallataj chaita tapungapajca shuj sucursalmanmi shuj cartata cachai tucui. e

16. ¿Imatataj tucui shunguhuan crina canchij?

¹⁶ Cai yachaipi ricushca shinaca Jehová Diosca cꞌuyaj, tucuita alli ruraj cashcamantami ñucanchij mañaicunataca uyan (Salmo 4:3; Isaías 30:18). Huaquinpica ñucanchij munashca shina mana cutichijpipish paica siempremi ñucanchijta uyan. Chaitami tucui shunguhuan crina canchij. Yayitu Dios cꞌuyaj cashcamantami ñucanchijtaca manataj saquinga (Salmo 9:10). Chaimanta shungumanta rogarishpa paita mañashpa catishunchij (Salmo 62:8).