JESÚS manaraj huacharijpi casi huata 670-pica asirio llajtaca shujtaj llajtacunamanta yalli jatun llajtami carca. Internetpi Museo Británico nishca tiyaj paginapica: “Asirio llajtaca Chipremanta, Irán alli lado llajtacamami tiyarca. Qꞌuipa huatacunacarin Egipto llajtacamami chayarca” ninmi. Asiriapaj capitalca Ninivemi carca. Chai ciudadca shujtaj llajtacunamanta yalli dimastij jatunmi carca. Chai llajtaca jatun monumentocunata, achca huertacunata, achij nicuj huasicunata, librocuna huaquichina jatun lugarcunatapishmi charirca. Ñaupa tiempopi Nínive llajtapi tiyaj patacunapica rey Asurbanipal shujtaj mandajcunataca “rey del mundo” nishca quillcashcatami japishcacuna. Chai tiempopica Asiria llajta, Nínive llajtaca mana nunca tucurina layami carca.

Asirio llajta shujtaj llajtamanta jatun cai horasca profeta Sofoniasca Jehová Dios imata ruranatami parlarca. Paica: ‘Mandaj Diosca Asiria llajtataca chingachingami. Shinallataj Nínive pueblotapish, shitashca pambata shinami, chaquishca llaquinayajta saquinga’ nircami. Profeta Nahumpish Jehová Dios imata ruranatami parlarca. Paica: ‘Cullquitapish, curitapish quichuichijlla. Chushajlla, huañucuj, llaquinayajmari saquirishca. Canta ricujcunaca canmanta anchuringacunami. Ashtahuanpish paicunaca Niniveca llaquinayajmari tucushca’ nircami (Sofonías 2:13; Nahúm 2:9, 10; 3:7). Cai profeciacunata uyashpaca huaquin gentecunaca: ¿Cai llajtaca tucuchishcachu canga? ¿Asiria llajta tucuimanta jatun llajta cajpipish caitaca pi tucuchingachu? nishpami tapurishcangacuna.

Jesús manaraj huacharijpi casi huata 600-pajca babiloniocuna, medopersacunaca Asiriatami tucuchishcacuna carca. Tiempo qꞌuipaca Nínive llajtaca tucuchishca, shitashca pambami carca. Museo de Arte Metropolitano de Nueva York nishca shuj publicacionpica: “Huata 1800-pajca chai llajtaca shitashca, tucui pambarishcami carca. Bibliapi Nínive llajtamanta parlashcallatami yacharcanchij” nircami. Biblical Archaeology Society Online Archive nishca publicacionpica: “Huata 1800 callaripajca Nínive llajta tiyashcataca mana pi yacharcacunachu” ninmi. Pero 1845 huatapajca Austen Henry Layard investigaj runaca, chai llajtatami investigashpa Nínive llajta tiyashcata japirca. Investigashpaca Nínive llajta yallitaj shujtaj llajtacunamanta yalli jatun cashcatami yachaj chayarca.

Nínive llajta tucurinamanta parlaj profeciacunaca tucuimi pajtarirca. Caita yachashpami ñucanchijpish Bibliapi tiyaj profeciacuna cai tiempopi jatun mandajcunapish ñalla tucurina cashcataca tucui shunguhuan crinchij (Daniel 2:44; Apocalipsis 19:15, 19-21).