Shuj doctorca: “Gentecunapaj cuerpo shuj clavohuan, o imapi rasparishpa chugririjpica, paicunapaj cuerpollatajmi alliyarin” ninmi (Johns Hopkins Medicine). Yahuar ama llujshishpa catichunca cuerpollatajmi chai rato alliyari callarin. Jehová Diosca gentecunapaj cuerpo cashna allichirichunmi rurarca.

CAIPI YUYAI: Yayitu Diosca ñucanchij cuerpo chugririshpa sanoyachunmi rurashca. Chaimantami paica ñucanchij shunguta, yuyaita allichina cashcata crinchij. Salmista runaca Diosmi gentecunapaj shungu chugririshcacunatapish jambishpa pilluchinga nircami (Salmo 147:3). Pero canta pipish imatapish nishpa llaquichijpica ¿Diosca ayudai tucunchu? Ari. Cambaj llaquicunata ima shina Dios allichinata ricushun.

Diosca: “Ñuca canhuan cashcamanta ama manchaichu, ama shaicurichu. Ñucami canman fuerzata cuj Taita Dios cani. Cantaca ayudacushallami” ninmi (Isaías 41:10). Diosmi ñucanchij problemacunata ahuantangapajca fuerzata cun. Chashnami tranquilo sintirinchij. Caimanta parlashpapish apóstol Pabloca: “Diosca cancunamanca sumaj causaitami cunga” nircami (Filipenses 4:4-7, 9, QC, 1989). Isaías 40:28, 29-pipish Diosmari, “shaicushcacunamanca, fuerzata cun. Fuerzata mana charijcunamanpish fuerzata mirachin” ninmi.

Bibliata liyishpami Dios cusha nishcacunapi crishun. Por ejemplo, Apocalipsis 21:4, 5-pimi Yayitu Dios gentecunata ima shina ayudana cashcata ricuchin. Shinallataj chai nishcacunapi imamanta crina cashcatapishmi yachachin.

• Jehová Diosca gentecunapaj ñahuicunamantaca, “tucui huiquitami pꞌichanga”. Chashnami traquilo, imata mana manchashpa causai tucushun.

• ‘Jatun tiyarinapi tiyarishpami’ Diosca ñucanchijta mandanga. Paica tucui poderta charishcamantami gentecuna sufrichunca mana saquinga, tucui imalla minishtishcacunatapish cushpami ayudanga.

• Yayitu Diosca siempremi pai nishcacunata pajtachin. Pai “mana llulla” cashcamantami tucui pai nishcacunaca pajtaringa.

“Diosca paicunapaj ñahuicunamantaca, tucui huiquitami pꞌichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu nircami. Chai qꞌuipaca jatun tiyarinapi tiyacujmi cashna nirca: ‘Riqui, ñucaca tucui ima tiyajtami mushujta ruragrini’ nircami” (Apocalipsis 21:4, 5).

Diospaj rurashcacunata ricushpa, Bibliata estudiashpami Yayitu Diosta alli rijsi tucunchij. Bibliapica: “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8). Cutin, Hechos 17:27-pica: “Taita Diosca ñucanchijmantaca mana carupichu” ninmi.

Jehová Dios ñucanchijmanta preocuparij cashcata cringapajca paitami ashtahuan rijsina canchij (1 Pedro 5:7). ¿Yaya Diospi confiashpaca ima beneficiocunatataj charishun?

Toru shuti runaca Japonmantami can. Paitaca uchillamantami paipaj mamaca iglesiaman pushaj carca. Shinapish paica yakuza nishca bandaman yaicushpami shuhuanata, huañuchinata, drogapi trabajanata yacharca. Gentecunaca paitaca manchajmi carca. Toru runaca: “Ñuca familia, amigocuna huañujpimi ‘Diosmi ñucataca castigacun’ nishpa yuyaj carcani. Shuj famosota huañuchispami mashna poderta charishcata ricuchinata munaj carcani. Maipica jovenraj cashpami huañunata munaj carcani” ninmi.

Toru runaca, paipaj huarmihuanmi Bibliata yachashpa cambiai callarircacuna. Paipaj huarmica: “Ñuca  cusa cambiocunata rurajta ricushpami cushicurcani” ninmi. Cutin, Toru runaca: “Cunanca Yayitu Dios tiyashcata, cada unomanta preocuparij cashcatapishmi crini. Diosca gentecuna huañuchunca mana munanchu, ashtahuanpish paicunapaj juchacunamanta arrepintirichunmi munan. Yaya Diosllamanmi tucui ñuca problemacunata huillai tucuni. Paillami ñuca charishca problemacunataca intindi tucun. Diosca ñucanchijmanta preocuparijta, ñalla tucui llaquicunata tucuchinatapishmi crini” ninmi (Salmo 136:23).

Toru runa nishca shinaca Diosllami tucui llaquicunata tucuchi tucun. Chashnami shamuj punllacunapica sumaj causaita cunga. Cunan punllacunapi llaquicunahuan causacushpapish Yayitu Diospaj cꞌuyaimanta mana caruyashpaca tranquilomi causashun.