Pihuanpish alli amigo tucungapajca ima laya cashcatami yachana canchij. Diospaj amigo tucungapajpish pai ima shina cashcatami alli yachana canchij. Ima laya cashcata yachashpaca paipajmanmi ashtahuan cꞌuchuyashun. Paica tucuita rurai tucuj, alli yachaj, cashcata ruraj, cꞌuyaj Diosmi can.

‘Jehová Dioslla, canmari jahua pachatapish, cai pachatapish tucuita rurai tucuj cambaj maquihuan rurarcangui’ (JEREMÍAS 32:17).

Dios rurashcacunaca pai tucuita rurai tucuj cashcatami ricuchin. Por ejemplo, achca Inti punllapi cashpaca, ¿imatataj sintinchij? Inti paipaj calorhuan cꞌunuchijtami sintinchij. Chai calorca Diospaj podertami ricuchin. Shina cajpica, ¿Intica mashna podertataj charin? Por ejemplo, yacuca 100°C nina rupacujpimi tꞌimbui callarin. Pero Inti chaupipica tꞌimbucuj yacutapish yallimi 150.000°C cutincama calor tiyan. Shinallataj achca millón bombacunata tujyachishca shinami Intimantaca cada segundo achca energía llujshin.

Pero shujtaj estrellacunahuan comparajpica Intica uchillami can. Cientificocunaca UY Scuti shuti estrellami achca rijsishca estrellacunata, Intitapish yalli jatun can nincuna. UY Scuti estrellata Intipaj randi churajpica Mercurio, Venus, Tierra, Marte nishca planetacunata chingachishpami  Júpiter nishca planetacama chayanman. Caita alli yachashpami imamanta profeta Jeremías Diostaca ‘jahua pachatapish, cai pachatapish tucuita rurai tucuj cambaj maquihuanmi rurarcangui’ nishcata alli intindinchij.

¿Diosca ima shinataj paipaj poderhuan ayudan? Causangapajca Intita, cai Allpapi imalla tiyashcacunatami minishtinchij. Chaicunataca paipaj poderhuanmi Diosca rurashca. Chai poderllahuantajmi cada unota ayudan. Pero, ¿ima shinataj ayudan? Por ejemplo primer siglopica milagrocunata Jesús rurachunmi paipaj poderta Diosca curca. Bibliapica: ‘Ñahui mana ricujcuna ricushcata, cojocuna purishcata, leprahuan cajcuna alliyashcata, rinrin mana uyajcuna uyashcata, huañushcacunata causachishcatami’ huillan (Mateo 11:5). ¿Cunan punllacunapica ima shinataj ayudan? Bibliapica: “Paimari shaicushcacunamanca, fuerzata cun” ninmi. “Ashtahuanpish Mandaj Diospi shunguta churajcunaca mushuj fuerzatami charingacuna” ninmi (Isaías 40:29, 31). Diosca tucui laya llaquicunata ahuantachunmi fuerzata cushpa ayudan (2 Corintios 4:7). Ñucanchijta cꞌuyashcamanta paipaj poderhuan ayudacushcata yachashpaca, ¿manachu Diospaj cꞌuchullapi cashcata sintingui?

‘¡Jehová Dioslla, quiquin rurashcacunaca mana yupai tucuipajmari! Tucui chaicunataca quiquinpaj yachaihuanmari rurashcangui’ (SALMO 104:24).

Dios rurashcacunamanta yachashpaca paica alli yachaj cashcatami ricunchij. Biomimética nishca cienciata yachaj cientificocunaca, Dios rurashcacunata ricushpami shujtaj cosascunata rurai callarishcacuna. Por ejemplo, papelcunata pegana gomamanta callarishpaca jatun avioncunacamami rurancuna.

Pero gentecunata rurashpami Yaya Diosca tucuimanta yalli yachaj cashcata ricuchishca. Shuj huahua ima shina tiyai callarishcata yuyashun. Shuj uchilla celulallamantami callarin, pero cai celulaca pai ima shina canatami ña yachan. Chai celulami casi chashna layallataj chaupirishpa, mirarishpa catin. Qꞌuipamanca cai celulacunaca chꞌican chꞌicanmi tucuncuna. Por ejemplo células sanguíneas, células nerviosas, células óseas nishcapimi raquirincuna. Chai huashami asha asha cuerpopi tiyaj partecunaca formari callarin. Chashnami nueve quillacuna huashaca chai callari uchilla celulamantaca shuj alaja huahua huacharin. Gentecunata alli yachaihuan rurashcata ricushpami maijancunaca Salmista nishca shinallataj nishcacuna. Paica: “Quiquintami alabasha. Ñucaca yallitaj mancharinata rurashcami cashcani” nircami (Salmo 139:14).

¿Diospaj yachaica ima shinataj ayudan? Cushilla causangapaj imallata minishtishcatami Diosca alli yachan. Alli yachaita charishcamantami paipaj Shimipi alli consejocunata cushca. Por ejemplo, “caishuj chaishuj perdonanacuichij” ninmi (Colosenses 3:13). ¿Cai consejota catinaca allichu  canga? Yachaj runacunaca: “Shungumanta perdonajcunaca allimi dormincuna, mana tanto unguncunachu” nincunami. Yaya Diosca shuj llaquij amigo shinami shungumanta preocuparishpa alli consejocunata ñucanchijman cun (2 Timoteo 3:16, 17). ¿Chashna amigota charinata munanguichu?

‘Jehová Diosca, ima pandata mana rurajtami cꞌuyan’ (SALMO 37:28).

Diosca cashcata ruraj Diosmi can. Tucuita rurai tucuj Diosca gentecunata llaquichinataca mana munanchu (Lamentaciones 3:33) Paica cashcata rurashpami tucuicunata juzgan. Salmista nishca shinami, Diosca ‘llajtacunataca cashcata rurashpa mandanga’ (Salmo 67:4). Gentecuna shungupi imata charishcata alli yachashcamantami ñahuita ricushpalla Diosca mana juzgan (1 Samuel 16:7). Ashtahuancarin cai millai mundopi yangamanta llaquichijcunatami Diosca ricucun. Chaimantami ‘Diosta mana manchajcunaca, cai Allpamanta llujshichishpa cachashca canga’ nishca (Proverbios 2:22).

Chashna nishpapish llaquichij, millai Dios cashcataca mana ricuchinchu. Chaipaj randica shungumanta arrepintirijpica millaita rurajcunataca llaquishpa perdonanllami. Jehová Diosmantaca llaquij, mana maipish cachun llaquichij cashcatami Bibliapica yachachin. Caita yachashpaca ¿Diosmantaca imatataj yuyangui? (Salmo 103:8; Ezequiel 18:23).

¿Diospaj cashcata ruranaca ima shinataj ayudan? Apóstol Pedroca: “Taita Diospaj ñaupajpica tucuicuna chai shinallataj cashcatami cunantajca yachani. Maijan llajtapi causaj cashpapish Taita Diosta manchashpa allita rurajtami Taita Diosca alli nin” nircami (Hechos 10:34, 35). Yayitu Dios ñahuita ricushpalla mana tratashcamantami achcata agradecinchij. Ima razamanta cajpipish, estudiado o mana estudiado cajpipish, cullquiyuj o mana cullquiyuj cajpipish paita adorachunmi saquishca.

 Diosca cashcata ruranata alli intindichunmi munan. Chaita intindishpami paipajman ashtahuan cꞌuchuyashun, cushi causaitapish charishun. Chaimantami shuj concienciata cada unoman cushca. Concienciamanta parlashpami Bibliapica, mandashca shina shungupi quillcashca cashcamantami allita ruracushcata o mana allita ruracushcata ricuchin nin (Romanos 2:15). ¿Caita yachanaca ima shinataj ayudan? Ñucanchij concienciata alli yachachishpaca millai ruraicunapi mana urmashunchu. Imapi pandarishpapish arrepintirishpami mana allita ruranata saquishun.

“Diosca cꞌuyajmari” (1 JUAN 4:8).

Diosca paipaj poderta, yachaita, justiciatami ricuchin. Pero Bibliapi nishca shinaca cꞌuyaitami tucuimanta yalli ashtahuan ricuchin. ¿Imamantataj chashna ninchij? Diosca achca poderta charishpami imatapish jahualla ruran, paipaj yachaihuan, cashcata ruraj cashcahuanpish tucuicunapaj allita rurai tucun. Pero cꞌuyaimantami chashna ruran.

Jehová Diosca imata mana minishtinchu. Pero cꞌuyaimantami jahua pachapi angelcunata, Allpapi gentecunatapish paipaj cꞌuyaita charichun rurarca. Gentecuna sumajta causachunmi cai Allpatapish tucui imalla tiyashcacunatapish rurarca. Cunan punllacamami gentecunata cꞌuyashcata ricuchishca. Chaimantami paica “allicunaman, mana allicunamanpish intita cachan. Shinallataj cashcata rurajcunaman, mana cashcata rurajcunamanpish tamyata cachan” (Mateo 5:45).

Ashtahuancarin ‘Jatun Diosca yallitaj llaquij, mana pꞌiñarij Diosmi’ can (Santiago 5:11). Paica paimanta yachashpa tucui shunguhuan paipajman cꞌuchuyajpica achcatami llaquin. Alli shungu gentecunataca cada uno ima laya cashcatami paica yachan. “Diosca ñucanchijmantaca mana carupichu” (Hechos 17:27).

¿Diospaj cꞌuyaica ima shinataj ayudan? Ñucanchijta cꞌuyashcataca chꞌican ruraicunapimi Diosca ricuchin. Por ejemplo, shuj huahua alajata asijta ricushpa, familiapaj cꞌuyaita sintishpa, sumaj Intita ricushpapish Diospaj cꞌuyaitami sintinchij. Causangapaj mana importante cajpipish chaicunahuanmi contento causanchij.

Paita mañachun saquishpami ñucanchijta cꞌuyashcata Diosca ricuchin. Bibliapica: “Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Tucui imamantapish Diosta mañashpaca pagui nichij” ninmi. Tucui shunguhuan mañajpica, paipaj sumaj causaitami Diosca cunga (Filipenses 4:6, 7).

Diospaj podermanta, paipaj yachaimanta, cashcata ruraj cashcamanta, cꞌuyaj cashcamantapishmi yachashcanchij. Cunanca, pai imata rurashcata, shamuj punllacunapi imata ruranata yachachunmi animanchij.