Llaquicunata charijpica shuj alli amigoca siempremi ayudan. Pero maijancunaca “ñucanchijta ayudangapajca Diosca imata mana ruranchu” nincunami. Chaimantami Diospaj amigo cai tucushcataca mana crincuna. Chashna yuyajpipish Diosca tucuicunatami ayudashca. Shinallataj ñallami tucui llaquicunata tucuchinga. ¿Ima shinataj chaitaca ruranga?

Diosca millaicunata tucuchishpami, tucui llaquicunatapish anchuchinga. Bibliapica imamanta llaquicuna tiyashcatami yachachin. Chaimantami: “Cai pachapajta rurajcunataca, tucuicunatami Diablo mandacun” nin (1 Juan 5:19, QC, 1989). Jesuspish Diablotaca ‘cai pachapaj mandajmi’ can nircami (Juan 12:31). Millai Diablo mandacushcamantami cai Allpapica achca llaquicuna tiyan. ¿Chai llaquicunata anchuchingapajca Diosca imatashi ruranga?

Jehová Diosca paipaj churi Jesucristotami, millai Diablota tucuchichun agllashca (Hebreos 2:14; 1 Juan 3:8). Bibliapica: ‘Diabloca pai munashcata rurana punllacuna ashalla cashcata yachanmi’ ninmi (Apocalipsis 12:12). Diosca millai gentecunatapishmi tucuchinga (Salmo 37:9; Proverbios 2:22).

Millaicunata tucuchishca huashami cai Allpapica paipaj munaita Diosca pajtachinga. ¿Chaipica ima shinashi causashun?

Tranquilo, sumaj causaimi tiyanga. Salmo 37:11-pica: “Alli shungucunami, Dios cusha nishca allpataca japingacuna. Yallitaj sumaj causaipimi cushicungacuna” ninmi.

Achca micunami tiyanga. Salmo 72:16-pica: ‘Allpapica lutsai muyullatami tarpunga. Chaica tucui urcu puntacunacamami tucuita grano pꞌucunga’ ninmi.

Alaja huasicuna, alli trabajomi tiyanga. Isaías 65:21, 22-pica: “Huasicunatami shayachingacuna. Chaipimi causangacuna. Uvacunatami tarpungacuna. Chaipi pꞌucushcacunatami micungacuna. [...] Ñuca agllashcacunaca paicuna trabajashcahuanca paicunallatajmi cushicungacuna” ninmi.

¿Chashna causanata munanguichu? Ñallami cai Allpapica cashna laya causai tiyanga.

Cunan punllapica tucuicunami ungunchij, huañunchijpish. Pero ñallami chai llaquicunaca tucuringa. Jehová Diosca tucuicunamanta huañuchunmi paipaj Churi Jesucristota curca. Bibliapica: “Pipish paita crijca ama chingarishpa, ashtahuanpish huiñai causaita charichunmi cacharca” ninmi (Juan 3:16). ¿Causaica ima shinashi canga?

Ungüicunaca mana tiyangachu. Isaías 33:24-pica: “Caipi causajcunaca: ‘Ungushcami cani’ nishpa pi mana ningacunachu. Cai pueblopi causajcunaca tucuicunami juchacunata Mandaj Dios perdonashca cangacuna” ninmi.

Huañuipish mana tiyangachu. Isaías 25:8-pica: “Mandaj Jatun Diosca, huañuitapish huiñaipajmi chingachinga. Tucuicunapaj ñahuimantami huiquicunata chaquichinga” ninmi.

Gentecunaca huiñaitami causanga. Romanos 6:23-pica: “Taita Dios cꞌuyashpalla cushcaca, ñucanchij Mandaj Cristo Jesuspi huiñai causaimi” ninmi.

Huañushcacunaca causaringami. Hechos 24:15-pica: “Tucui huañushcacunatami cashcata rurajcunatapish, mana cashcata rurajcunatapish Taita Dios causachinga” ninmi. Jesús paipaj causaita cushcamantami huañushcacunaca causaringa.

 ¿Tucuita pajtachingapajca Diosca imatashi ruranga?

Yaya Diosca cai Allpata mandachunca shuj alli gobiernotami churashca. Chai gobiernopi mandachunmi Jesusta agllashca. Chashnami gentecunaca Dios munashca shina causanga (Salmo 110:1, 2). Jesús cai Allpapi cashpaca chai gobiernomanta mañachun yachachishpaca: “Jahua pachapi caj ñucanchij Yaya, [...] Can mandana punlla ña chayamuchun” nircami (Mateo 6:9, 10).

Diospaj Gobierno cai Allpata mandashpaca tucui laya llaquicunatami anchuchinga. Cai alli gobiernotami minishtinchij. Chaimantami Jesusca, Dios churashca gobiernomanta “alli huillaita huillashpa” purirca. Paita catijcunatapish chashnallataj rurachunmi mandarca (Mateo 4:23; 24:14).

Cꞌuyaimantami Jehová Diosca cai sumaj bendicioncunata cusha nishca. Caita yachashpaca, ¿manachu paita alli rijsishpa paipaj amigo canata munangui? ¿Diospaj amigo cashpaca ima bendicioncunatataj japingui?