1-3. a) ¿Zacariaspaj tiempopica israelitacunaca ima shinataj causacurcacuna? b) ¿Imamantataj Jehová Diosca israelitacunataca ñucapajman cutirichij nirca?

PROFETA Zacariasca pillushca cara shina huairapi callpacujta, shuj huarmi canasta ucupi tiyacujta, cigüeñapaj alasta laya charij ishqui huarmicuna volacujtami shuj muscuipi shina ricurca. Cai mancharina muscuicunataca Zacarías libropimi leyi tucunchij (Zacarías 5:1, 7-9). ¿Jehová Diosca imamantataj Zacariasmanca chaicunata ricuchirca? ¿Chai tiempopica israelitacunaca ima shinataj causacurcacuna? ¿Zacarías ricushca muscuicunamantaca imatataj yachai tucunchij?

² Israelitacunaca 70 huatacunatami prezu shina Babiloniapi causacurcacuna. Pero Jesús manaraj huacharijpi 537 huatapica Babiloniamantami llujshircacuna. Jerusalenpi templota shayachishpa Diosta cutin adorangapaj  tigrashcamantami cushilla carcacuna. Shuj huata qꞌuipaca Diospaj huasipaj callari rumicunatami churarcacuna. Chaimantami paicunaca yallitaj cushicushpa caparircacuna. Caparishca bullaca carucamami uyarirca (Esdras 3:10-13). Shinapish Diosta mana sirvijcunaca templota ama shayachichunmi jarcaicunata churashpa catircacuna. Chaimantami israelitacunaca desanimarishpa templota shayachinata saquircacuna. Ashtahuanpish paicunapaj huasicunata shayachinapi, chagracunata tarpunallapimi yuyacurcacuna. 16 huatacuna qꞌuipacarin templota shayachinataca ña mana yuyarircacunachu. Chaimi Jehová Diosca, ‘cancunapaj ruraicunata saquishpa ñucapajman cutirichij, cushilla ñucata adoraichij’ nirca.

³ 520 huatapimi Jehová Diosca Babiloniamanta israelitacunata ima shina llujshichishcata yuyachichun Zacariasta cacharca. Zacarías shutica “Jehovami yuyarishca” nisha ninmi. Israelitacuna Jehová Diosta cungarishca cajpipish paica mana cungarircachu (Zacarías 1:3, 4-ta leyipai). Diosca cꞌuyaihuanmi paita cutin adorachun ayudasha nirca. Shinapish tucui shunguhuan adorajllapimi chasquisha nirca. Cunanca Zacarías muscuipi shina imalla ricushcacunamanta yachashun.

4. a) ¿Zacarías capítulo 5:1, 2-pi nishca shinaca Zacariasca imatataj ricurca? b) ¿Zacarías ricushca carapica imamantataj ishquindij ladoman quillcashca carca? (Página 15-pi tiyaj dibujo 1-ta ricui).

⁴ Zacarías capítulo 5-pica profeta Zacarías imalla ricushcatami parlan (Zacarías 5:1, 2-ta leyipai). Zacariasca pillushca cara shina huairapi callpacujtami ricurca. Chai caraca largomanca 9 metrotami medirca. Cutin, anchomanca chuscu metro chaupitami medirca. Shinallataj cai caraca leyingapaj ña pascashcami carca. Caracunapica shuj ladollamanmi quillcajcuna carca. Pero Zacarías muscuipi ricushca carapica ishquindij ladomanmi quillcashca carca (Zacarías 5:3). ¿Imamantataj shina carca? Jehová Dios llaquichisha nishca shimicunami quillcashca carca.

5, 6. ¿Jehová Diosca shuhuanamantaca imatataj nin?

⁵ (Zacarías 5:3, 4-ta leyipai). Tucuicunami Diospaj ñaupajpica imalla rurashcata ricuchina canchij. Testigo de Jehovacuna cashcamantacarin Diosca tucui imalla rurashcacunata ricuchichunmi mañanga. Shuhuashpaca Diospaj shutitaca pingaipimi churashun (Proverbios 30:8, 9). Maijancunaca, “minishtishcamanta ashallata shuhuanaca mana juchachu can” nincunami. Pero shuhuashpaca ñucanchijpaj cosascunata charina ashtahuan importante cashcatami ricuchishun. Shinallataj Diospaj shutitapish paipaj mandashcacunatapish mana valichishcatami ricuchishun.

⁶ Zacarías 5:3, 4-pica, ‘jatun llaquica shuhuacunapaj huasimanpish yaicungami’  ninmi. ¿Caica imatataj nisha nin? Paita sirvijcuna ima juchata pacalla rurajpipish Jehová Diosca ricucunmi. Chaimantami ima horapish chai juchacunata ricuchishpa juzganga. Policiacunata, jefecunata, ancianocunata, yaya mamacunata umashpachari juchacunata pacai tucushun. Pero Diosmantaca mana pacai tucushunchu. Ima horapish yachaj chayaringami (Hebreos 4:13). Testigo de Jehovacunaca tucuipi honrados cangapajmi esforzarinchij. Chaimantami huauqui panicunahuan Diosta tandalla cushicushpa sirvinchij (Tito 2:10).

7. ¿Zacarías muscuipi shina ricushca caramantaca imatataj yachanchij?

⁷ Ashallata shuhuana o achcata shuhuanaca Diospaj ñaupajpica mana allichu. Ñucanchijca Diospaj Shimita yachashpa, pai mandashcata cazushpami cushilla causanchij. Jehová Dios mandashca shina causashpami paipaj shutita jatunyachinchij. Shinallataj mana alli gentecunata tucuchicui punllapica mana llaquita apashunchu.

8-10. a) ¿Ari ninaca imataj can? b) ¿Sedequiasca imatataj mana pajtachirca?

⁸ Huaquinpica caitami rurasha o ña mana rurashachu nishpami ari ninchij. Cutin, a vecesca “¿verdadtachu nicungui?” nishpa tapujpimi ari ninchij. Zacarías ricushca carapica Diospaj shutipi yangamanta ari nijcunapaj yuyachij shimicunami escribishca tiyacun (Zacarías 5:4).

⁹ Diospaj shutipi ari ninaca mana pugllaillachu can. Jerusalenta mandaj  Sedequiasmanta parlashun. Paica ari nishca jahua mana pajtachishcamantami llaquita aparca. Sedequiasca Diospaj shutipimi, ñucaca Babiloniata mandaj ñucata mandachun saquishallami nirca. Pero qꞌuipaca pai nishcata mana pajtachircachu. Chaimantami Diosca, “Babiloniapimi huañungui” nirca (Ezequiel 17:16).

¹⁰ Jehová Diosca Sedequías paipaj nishcata pajtachichunmi munarca (2 Crónicas 36:13). Shinapish Sedequiasca babiloniocunamanta quishpirisha nishpami Egiptota mandajcuna ayudachun mañarca. Chaita rurashpapish mana quishpirircachu (Ezequiel 17:11-15, 17, 18). Chashnami Sedequiasca pai ari nishcata mana pajtachirca.

11, 12. a) ¿Imatataj Diosmanca ari nircanchij? b) ¿Jehová Diosman ari nishcata pajtachingapajca ima shinataj causana canchij?

¹¹ Jehová Diosca ñucanchij ari nishcacunataca uyacunmi. Chaimantami imata ari nishpaca pajtachinataj canchij. Chashnami paipaj ñaupajpi alli ricurishun (Eclesiastés 5:4). Ñucanchijca tucui vidami canllata sirvisha nishpami Diosmanca mingarircanchij. Chaimantami ñucanchij causaipica imalaya jaicalaya tucushpapish pajtachinataj canchij.

¹² Cada punllami ñucanchij causaipica tucui laya tentacioncuna ricurin. Chai tentacioncunapi ama urmangapaj cuidarishpami ñucanchij ari nishcata pajtachishun (Salmo 61:8). Por ejemplo, ñucanchij colegiopi o trabajopi compañerocunaca ñucanchijta munarishpami asirincuna o pugllarincuna. Chashna cajpica, ¿Jehová mandashcacunata cazushpa mana nishunchu? (Salmo 128:1). Shinallataj tucui familiamantaca ñucanchijllachari Diosta sirvicunchij. Chashna cajpica, ¿allita rurangapaj Jehová Diosta mañanchijchu? Ashtahuanpish, “¿Jehová Dios ñucata ayudashcamanta, cꞌuyashcamanta agradicingapaj paita mañanichu? ¿Bibliata tucui punllacuna leyingapaj tiempota llujchinichu?” nishpami tapurina canchij. Diosman mingarishpaca chai tucuita rurangapajmi tiempota llujchishun nircanchij. Ñucanchij ari nishcacunata pajtachishpaca Diosta cazushcatami ricuchishun. Shinallataj Diospajta rurashpa pai mandashca shina causashpami paita cꞌuyashcata ricuchishun. Jehová Diosca cancuna ari nishcacunata pajtachijpica achcatami bendiciasha ninmi (Deuteronomio 10:12, 13).

13. ¿Zacarías muscuipi shina ricushca caramantaca imatataj yachanchij?

¹³ ¿Zacarías muscuipi shina ricushca caramantaca imatataj yachanchij? Diosta sirvijcunaca mana shuhuanachu canchij, ñucanchij ari nishcatapish pajtachinami canchij. ¿Imatataj ashtahuan yachanchij? Yuyarishun. Enemigocunaca israelitacunataca llaquichisha nircami. Jehová Diosca chaita alli intindishpami israelitacuna pandarijpipish paicunata cuidarca. Caipi ricushca shinaca Diosca pai nishcataca siempremi pajtachin. Ñucanchijpish pai shinallatajmi cana canchij. Ñucanchij ari nishcata pajtachingapaj, Diosta cazushpa catingapajpish paillatajmi ayudanga. Cunan punllacunapipish Diosca tucui llaquicunata ñallami tucuchisha nishpami ñucanchijta cushichin. ¿Zacariasca muscuipi shinaca imatataj ashtahuan ricurca?

14, 15. a) ¿Zacarías 5:5-8-pi nishca shinaca Zacariasca imatataj ricurca? (Página 15-pi tiyaj dibujo 2-ta ricui). b) ¿Efa canasta ucupi tiyaj huarmica imatataj ricuchin? c) ¿Imamantataj angelca huarmitaca canasta ucupi cutin shitarca?

¹⁴ Huairapi callpacuj carata ricushca qꞌuipaca shuj angelca Zacariastaca: “Cambaj ñahuita huichilla alzashpa, chaipi ima tiyacujta ricui” nircami. ¿Zacariasca imatataj ricurca? Shuj ‘medina efatami’ ricurca. Chai medina efaca granocunata medingapaj shuj canasta layami carca (Zacarías 5:5-8-ta leyipai). Cai efaca plomohuan rurashca tapatami charirca. Tapata anchuchijpica Zacariasca shuj huarmi chai ucupi tiyacujtami ricurca. Chai angelca: ‘Cai huarmica juchatami ricuchin’ nircami. Chai huarmi efa canastamanta llujshisha nishcata ricushpami Zacariasca achcata mancharishcanga. Chaimi angelca cutin chai huarmitaca canasta ucupi taparca. ¿Cai muscuica imatataj ricuchin?

¹⁵ Jehová Diosca paipaj pueblo ucupi ima millai ruraicuna tiyachunca mana saquingachu. Ima millaita Jehová Dios ricushpaca chai ratomi anchuchinga (1 Corintios 5:13). Chai ángel chai huarmita cutin canastapi shitashpami Jehová Dios millaita mana ricunayachishcata ricuchirca.

16. ¿Alasyuj huarmicunaca canastahuanca imatataj rurarca? (Página 15-pi tiyaj dibujo 3-ta ricui).

¹⁶ Chai huashaca Zacariasca ishqui huarmicunatami ricurca. Chai huarmicunaca cigüeñapaj alascunata layami charirca (Zacarías 5:9-11 leyipai). Paicunaca mana canastapi tiyacuj millai huarmi  layachu carca. Zacariasca alasyuj huarmicuna chai canastata Sinar llajtaman apajtami ricurca. Sinar llajtataca Babilonia nishpapishmi rijsijcuna carca ¿Imamantataj Sinar llajtaman aparca?

17, 18. a) ¿Juchata ricuchij huarmita Sinar llajtaman apanaca imamantataj alli carca? b) ¿Diospaj pueblo ucupi millai ruraicuna ama tiyachunca imatataj rurana canchij?

¹⁷ Israelitacunaca Sinar (Babilonia) llajtapimi causashcacuna carca. Paicunapajca chaipi causanaca sinchimi cashcanga. ¿Imamanta? Chai llajtapi gentecunaca yanga dioscunata adorashpa, huainayashpami causajcuna carca. Efa canastapi tiyacuj huarmica juchatami ricuchirca. Chaimantami Sinar llajtaman chai huarmita apanaca alli carca. Zacarías ricushca muscuica Jehová Dios paipaj pueblopi millai ruraicuna tiyachun mana saquishcatami ricuchin.

¹⁸ Shinallataj cai muscuipi ricushca shinaca israelitacunaca Dios millashcata ama rurangapajmi cuidarina carca. ¿Caimantaca imatataj yachanchij? Jehová Diosllatajmi paipaj puebloman cꞌuchuyachun ñucanchijta ayudashca. Diospaj pueblopi cashcamantami paipaj cꞌuyaitapish, paipaj cuidadotapish charinchij. Chaimantami Diospaj pueblopi millai ruraicuna tiyachunca mana permitina canchij. Cada unomi Dios munashca shina causangapaj esforzarina canchij.

19. ¿Zacarías muscuipi shina ricushcacunamantaca imatataj yachashcanchij?

¹⁹ Zacarías capítulo 5-pi nishca shinaca millaita rurajcunaca llaquimi tucunga. Jehová Diosca millai ruraicunataca mana ricunachinchu. Chaimantami paita sirvijcunapish mana alli ruraicunataca millanayachina canchij. Chashna rurajpica Diosca ñucanchijta mana llaquichingachu. Ashtahuanpish paica allimi cuidanga, bendiciangapishmi. Cai mundopica achca mana alli ruraicunami tiyan. Pero Jehová Diosllatajmi chai mana alli ruraicunapi ama chagrurichun ayudanga. ¿Cai pachapica Diosta adorajcunaca chingaringachu? ¿Jatun llaqui punllacunapica Diosca ñucanchijta cuidangachu? Cai tapuicunamantaca catij temapimi yachashun.