1. a) ¿Panicunaca Diospaj obrata apoyangapajca imallatataj rurancuna? b) ¿Huaquin panicunaca ima problemacunatataj charincuna? (Página 1-pi tiyaj fotota ricui).

ÑUCANCHIJ congregacionpi sinchita trabajaj panicuna tiyashcamantami achcata agradicinchij. Por ejemplo, paicunaca tandanacuicunapimi participancuna. Huauqui panicunamantapishmi preocuparincuna. Tandanacuna Huasicunatapish allichishpami ayudancuna. Shinapish cai panicunaca chꞌican chꞌican problemacunatami charincuna. Huaquincunaca familiacunamantami huaquin jarcaicunata charincuna. Shujtajcunaca paicunapaj mayorlla yaya mamacunatami cuidancuna. Cutin maijancunaca paicunallami huahuacunata cuidangapaj, mantiningapajpish esforzarincuna.

2. ¿Panicunata apoyangapajca imamantataj esforzarina canchij?

² Cai mundopi causaj gentecunaca huarmicunataca mana respetancunachu. Pero Bibliapica huarmicunaman animota cuchunmi yachachin. Por ejemplo, apóstol Pabloca Roma llajtapi Diosta sirvij Febeta alli chasquichun, pai minishtirishca cosascunata cuchunmi mañarca (Romanos 16:1, 2). Apóstol Pabloca fariseo cashpaca huarmicunataca imapaj mana valijta shinami ricuj carca. Shinapish Jesusta cati callarishpaca paipaj ejemplota catishpami huarmicunataca cꞌuyaihuan, respetohuan tratarca (1 Corintios 11:1). Ñucanchijpish panicunatami apoyana canchij.

3. ¿Jesusca Diosta sirvij huarmicunataca ima shinataj tratarca?

³ Jesusca tucui huarmicunataca respetohuanmi trataj carca (Juan 4:27). Chai tiempopi judiocunata yachachijcuna shinaca mana carcachu. Bibliamanta parlaj shuj libropica: “Jesusca paipaj nishcacunahuanmi huarmicunata alli trataj cashcata ricuchirca” ninmi. Jesusca paipaj Yayapaj munaita ruraj huarmicunataca ashtahuanmi valoraj carca. Paica:‘Ñuca Yayapaj munaita rurajcunami ñuca huauqui, ñuca pani, ñuca mamami can’ nircami (Mateo 12:50).

4. ¿Cai yachaipica imatataj yachashun?

 ⁴ Jesusca Diosta sirvij huarmicunataca siempremi ayudarca. Shinallataj paicunataca achcatami valorarca, Paicunatapishmi difindirca. Ñucanchijpish Jesuspaj ejemplota ima shina catinata yachashun.

5. ¿Maijan panicunapajca imamantataj shujtajcunahuan pasanaca sinchi can?

⁵ Tucuicunami shujtajcunahuan pasanata minishtinchij. Pero huaquin panicunapajca caita ruranaca sinchimi can. ¿Imamanta? Juliaca *: “Soltera cashcamantami congregacionpica maipica ñucaca ni pipaj importante cashcata sintirini” ninmi. Kristen shuti precursoraca predicangapajmi shujtaj ladopi sirvinaman rirca. Paica: “Shujtaj congregacionman chayashpaca maipica ñucanchijllami sintiri tucunchij” ninmi. Cutin maijan panicunaca mana testigo familiahuan causashpapish paicunamanta caruyashcatami sintincuna. Chaimantachari huauqui panicunapajmanpish cꞌuchuyanaca sinchi can. Shinallataj huaquin panicunaca ungushca cashcamanta o ungushca familiacunata cuidana cashcamantami paicunapaj huasimanta mana llujshi tucuncuna. Annette shuti panica: “Ñucaca ñuca mamitata cuidana cashcamantami turi ñañacunahuan pasangapajca tiempota mana llujchi tucurcani” ninmi.

6. Lucas 10:38 al 42-pi nishca shinaca ¿Jesusca ima shinataj Martata, Mariataca ayudarca?

⁶ Jesusca Diosta sirvij huarmicunahuanmi tiempota pasaj carca. Paicunapajca alli amigomi carca. Jesusca Mariahuan, Martahuanmi alli apanacuj carca. Paicunaca solteracunami carca (Lucas 10:38-42-ta liyipai). Jesús alli parlajpi, alli tratajpica cushillami sintirircacuna. Shuj punllaca Jesusca paicunatami visitanaman rirca. Chaimi Mariaca Jesuspaj yachachishcacunata ashtahuan yachasha nishpa paipaj ñaupajpi tiyarirca. * Cutin Martaca Jesushuan alli apanacuj cashcamantami paitaca ñucata ayudachun Mariata mandai nirca. Chai punllapica Jesusca paicunamanca valishca yachachishcacunatami intindichishpa ayudarca. Shinallataj paica Mariata, Martata, Lazarotaca shujtaj punllacunami visitaj carca. Chashnami paicunamanta preocuparishcata ricuchirca (Juan 12:1-3). Chaimantami Lázaro ungujpica María, Martaca Jesusta ayudachun mañarcacuna (Juan 11:3, 5).

7. ¿Ima shinataj panicunataca animana canchij?

⁷ Maijan panicunaca tandanacuicunallapi huauqui panicunahuan pasangapajmi oportunidadta charincuna. Chaimanta tandanacuicunapi alli chasquingapaj, paicunahuan parlangapaj, paicunamanta preocuparishcata ricuchingapaj esforzarishunchij. Párrafo 5-pi parlashca Juliaca: “Tandanacuicunapi ñuca comentajpi felicitachun, huillanaman llujshingapajpish ñucahuan arreglocunata rurachun, mana cashpaca shujtaj cosascunata rurashpa ayudachunmi munani” ninmi. Karen shuti panipish: “Shuj tandanacuiman mana rijpi shuj mensajepi ¿allillachu cangui? nishpa quillcanataca allimi yachani. Chashnami turi ñañacuna ñucamanta preocuparishcata cuentata cuni” ninmi. Tucuicunami panicunataca valichina canchij.

8. ¿Panicunata alli tratangapajca ima shinataj Jesuspaj ejemplota cati tucunchij?

⁸ Jesús shinallataj panicunahuan pasangapaj tiempota surcushunchij. Tal vez ñucanchijpaj huasipi micunata carangapaj, o paicunahuan tiempota pasangapajmi invitai tucunchij. Invitashpapish animaj shimicunahuan  parlashunchij (Romanos 1:11, 12). Congregacionta pushajcunapish Jesuspaj ejemplotami catina can. Jesusca allimi yacharca huaquincunapaj soltero canaca mana fácil cashcata. Pero cazarashpalla o huahuacunata charishpalla cushi causaita chari tucushcataca mana nircachu. Chaipaj randica Diosta punta lugarpi churashpa cushilla causanatami yachachirca (Mateo 19:12; Lucas 11:27, 28).

9. ¿Congregacionta pushajcunaca ima shinataj panicunamanta preocuparishcata ricuchincuna?

⁹ Congregacionta pushaj huauquicunaca Diosta sirvij panicunataca mamata shina, panita shinami ricuna can (1 Timoteo 5:1, 2). Chaimantami tandanacuicuna manaraj callarijpi, o tandanacui tucurishca qꞌuipa paicunahuan parlangapaj tiempota surcuna can. Chashnami paicunamanta preocuparishcata ricuchincuna. Pani Kristenca: “Congregacionta pushaj shuj turica huillanapi, ñuca trabajopipish yallitaj ocuparishcatami ricurca. Paica ¿ima shinataj caicunata pajtachingui? nishpami tapurca. Chashna preocuparishcamantami achcata agradicini” ninmi. * Pani Annettepish: “Ñucaca congregacionta pushajcunataca allimi rijsini. Paicunapish ñucataca allimi rijsincuna. Chaimantami problemacunata charishpaca paicunapaj ayudata mañanaca mana sinchi can” ninmi.

10. ¿Panicuna cushilla sintirichunca imatataj rurana canchij?

¹⁰ Tucuicunami ñucanchij alli ruraicunata ricuchun, valorachun munanchij. Pi mana caita rurajpica ñucanchijllatajmi desanimari tucunchij. Abigaíl shuti precursoraca: “Maipica ñucataca mana pi ricucujta layami sintirini. Maijancunaca ñuca pipaj ushushi cashcata, pipaj pani cashcatami alli yachancuna. Pero paicunaca ñucataca mana alli rijsincunachu” ninmi. Cunanca Pam shuti solteramanta parlashun. Paica achca huatacunatami misionera carca. Pero paipaj yaya mamata cuidana cashcamantami paipaj huasiman tigrana carca. Pani Pamca 70 huatacunata charishpapish precursorami can. Paica: “Ñuca sinchita trabajashcamanta turi ñañacuna agradicijpica cushillami sintirini” ninmi.

11. ¿Diosta servij huarmicunata valorashcataca Jesusca ima shitaj ricuchirca?

¹¹ Diosta sirvij huaquin huarmicunaca paicuna imalla charishcacunahuanmi Jesusta ayudarcacuna (Lucas 8:1-3). Jesusca chaita valorashcamantami paicunamanca valishca yachachishcacunata intindichirca. Por ejemplo, paicunamanca ima hora huañuna cashcata, ima hora causarina cashcataca allimi intindichirca (Lucas 24:5-8). Jesusca apostolcunaman yachachishca shinallatajmi chai huarmicunamanca pai huañuna horas chayajpi chai llaquicunahuan ima shina chꞌimbapuranata yachachirca (Marcos 9:30-32; 10:32-34). Jesusta huañuchingapaj japijpica Jesuspaj apostolcunaca miticushpami rircacuna. Pero Diosta sirvij huaquin huarmicunaca Jesús maderopi sufricujpipish paitaca manataj saquircacunachu (Mateo 26:56; Marcos 15:40, 41, NWT ).

12. ¿Jesusca huaquin huarmicunamanca ima valishca ruraicunata pajtachichuntaj mingarca?

¹² Jesusca huaquin huarmicunamanca valishca ruraicunata pajtachichunmi mingarca. Por ejemplo, Diosta sirvij huaquin huarmicunaca Jesús causarishcatami puntaca yachaj chayarcacuna. Chaimi Jesusca paicunamanca ñuca causarishcata apostolcunaman huillagrichij nishpa mandarca (Mateo 28:5, 9, 10). Shinallataj huata 33-pica Jesusta catijcuna Pentecostés fiestata yuyaricujpica huaquin huarmicunapishmi Diospaj espíritu santota chasquishcangacuna. Chai punllapi Diospaj espirituta chasquij huarmicunaca espíritu rimachishca shinallatajmi Yaya Dios chai tucui allita rurashcataca shujtaj rimaicunapi rimai callarishcangacuna (Hechos 1:14; 2:2-4, 11).

13. a) ¿Cunan punllacunapica huaquin panicuna ima shinataj Diosta sirvicuncuna? b) ¿Paicunata agradicishcata ricuchingapajca imatataj rurana canchij?

¹³ Panicuna Jehová Diospaj sinchita trabajashcamantami agradicina canchij. Paicunaca tandanacuna huasicunata shayachishpa, chaicunata allichishpami ayudancuna. Shinallataj mushuj shimipi huillangapaj, Betelpi voluntaria shina trabajangapajmi sinchita esforzarincuna. Paicunaca jatun acapana tiyajpi, shuj terremoto tiyajpi, sinchita tamyajpica chaicunapi ayudanamanmi rincuna. Chashnallataj shujtaj panicunaca publicacioncunata traducishpami ayudancuna. Cutin maijancunaca precursoras, misioneracunami can. Paicunaca huauquicuna shinallatajmi escuela de precursoresman, escuela de Evangelizadores del Reinoman, escuela de Galaadman rincuna. Cazada panicunapish paicunapaj cusacuna Diospaj organizacionpi Dios mingashcacunata pajtachichunmi paicunataca ayudancuna. Paicuna chashna ayudajpimi cusacunaca mingashcataca jahualla pajtachincuna (Efesios 4:8). ¿Cai panicuna Jehová Diosta sirvingapaj achcata esforzarishcamantaca ima shinataj agradicina canchij?

14. Salmo 68:11-pi nishca shinaca ¿congregacionta alli pushajcunaca imatataj rurana can?

¹⁴ Congregacionta alli pushajcunaca panicuna congregacionpi alli trabajaj cashcata,  paicunapuramanta alli huillajcuna cashcatami yachancuna (Salmo 68:11-ta liyipai). Congregacionta pushajcunaca cai panicunapaj experienciamantami achcata yachai tucuncuna. Párrafo 10-pi parlashca Abigailca pai gentecunaman huillai callaricujpi paita ima ayudashcata tapuchunmi munan. Paica: “Paicuna chashna tapujpica Jehovapaj organizacionpi valishca cashcatami sintini” ninmi. Congregacionta pushaj huauquicunaca achca experienciata charij panicuna jovenlla panicunataj ayudai tucushcataca allimi yachancuna (Tito 2:3-5). Chaimantami cai tucui panicunataca cꞌuyaita ricuchina canchij, agradicinapish canchij.

15. ¿Huaquin panicunaca ima horastaj paicunata ayudachun, difindichun minishtincuna?

¹⁵ Maipica huaquin panicunaca paicunata difindichun, paicunata ayudachunmi minishtincuna (Isaías 1:17). Huaquin panicunaca viudacunami saquirishcacuna. Cutin shujtajcunaca divorciarishcacunami. Chaimantami shujtajcunapaj ayudata minishtincuna. Shuj mayorlla panica doctorcunahuan parlashpa cuchunmi pi ayudachun minishtinga. Shujtaj panica precursora cashpapish voluntaria shina Diospaj obrapi trabajashcamantami shujtaj precursorcuna shina mana predicai tucun. Chaimi tal vez shujtajcuna paimanta huashalla rimajpi paita difindichun minishtinga. Cai panicunata ima shina difindinata yachangapajca Jesuspaj ejemplomanta yachashun.

16. Marcos 14:3 al 9-pi nishca shinaca Jesusca ¿ima shinataj Mariata difindirca?

¹⁶ Jesusca Diosta sirvij huarmicunatami difindirca. Por ejemplo, Marta Mariamanta mana allita nijpimi Jesusca paitaca difindirca (Lucas 10:38-42). Shinallataj Jesuspaj chaquipi Mariaca shuj valishca aceiteta tallijpimi shujtajcunaca paita rimarca (Marcos 14:3-9-ta liyipai). María imamanta chashna rurashcataca Jesusca allimi yacharca. Chaimantami cai shimicunahuan cushichirca: “Jesusca paica ñucapajca allitamari ruran. Cai huarmica pai tucui rurai tucushcatami rurashca. Tucui cai pachapica maipipish cai alli huillaitaca huillacushpaca cai huarmi imata rurashcatapishmi huillangacuna” nircami. Jesús nishca shinaca cai yachaipimi María imallata rurashcamantapish yachacunchij. Jesuspaj nishcata uyashpaca Mariaca tranquilami sintirishcanga. Shujtajcuna paimanta huashalla rimajpi, Jesús Mariata sumaj shimicunahuan cushichijpica paica cushillami sintirishcanga.

17. ¿Ima shinataj panicunataca difindina canchij? Shuj ejemplomanta parlai.

¹⁷ Panicuna difindichun minishtijpica paicunata difindishunchij. Caipi yuyashun. Shuj panica mana testigo cusahuanmi cazarashca can. Chaimantami tandanacui callarishca qꞌuipa chayan. Shinallataj tandanacui tucurincami utca rin. Huahuacunatapish casi mana nunca tandanacuicunaman apanchu. Chaimantachari huaquincunaca paipaj cusahuanmi huahuacunata tandanacuiman pushangapajca sinchi sinchita parlana can nishpa yuyancuna. Pero cai panipaj cusa familiata pushaj cashcamantami mana pailla imatapish decidi tucun. Chaimantami huahuacunata tandanacuiman apanata o mana apanataca paipaj cusa ima nishcata uyana can. Shujtajcuna cai panimanta mana allita nijpica ¿imatataj rurai tucunchij? Cai pani tucui pudishcata ruracushcamantami paitaca felicitai tucunchij. Shujtajcunamanpish cai panimantaca allicunatami parlai tucunchij. Chashnami cai panimantaca mana huashalla rimangacuna.

18. ¿Ñucanchij panicunata ayudangapajca imallatataj rurana canchij?

¹⁸ Shinallataj panicuna valishca cashcata ricuchingapajca ayudachun minishtishca horaspimi ayudana canchij (1 Juan 3:18). Pasaj parrafocunapi parlashca pani Annettca: “Maijan turi ñañacunaca ñuca mamitata ayudaman shamujpi,  ima micunitatapish apamujpica ñucaca shujtaj cosascunatami rurai tucurcani. Chashnami ñucata cꞌuyashcata, ñucamanta preocuparishcata cuentata curcani” ninmi. Pani Juliamanpish shuj huauquimi ima shina paipaj carrota cuidachun huaquin consejota curca. Paica: “Ñuca ima accidenteta ama charingapaj turicuna ñucamanta preocuparishcata yachashpami cushilla sintirini” ninmi.

19. ¿Congregacionta pushajcunaca imallata rurashpataj panicunataca ayudai tucuncuna?

¹⁹ Congregacionta pushaj huauquicunapish panicuna imallapi ayudachun minishtishcatami alli ricuna can. Jehová Diosca panicunata alli tratachunmi munan (Santiago 1:27). Chaimantami congregacionta pushajcunaca Jesús shinallataj shujtajcunata cꞌuyaihuan ayudancuna (Mateo 15:22-28). Paicuna chaita rurajpica panicunaca Jehová Dios paicunata cuidacushcatami sintincuna. Por ejemplo, pani Karenca shujtaj huasipimi causanaman rina carca. Chaita yachaj chayashpami shuj superintendente huauquica shujtaj huauquicunapish paita ayudachun mañarca. Paica: “Congregacionta pushajcuna ñucaman animota cujpi, chashna ayudajpica tranquilami sintirircani. Shinallataj congregacionpaj, paicunapaj valishca cashcata, mana ñucalla cashcatami intindircani” ninmi.

20, 21. ¿Tucui panicunata valorashcataca ima shinataj ricuchinchij?

²⁰ Congregacionpica Yaya Diosta sirvingapaj sinchita esforzarij panicunami tiyan. Paicunatami apoyana canchij. Jesuspaj ejemplomanta yachashpaca ñucanchijpish paicunahuan tiempota pasangapaj, paicunata alli rijsingapajmi esforzarina canchij. Shinallataj Diosta sirvingapaj esforzarishcamantami paicunataca agradicina canchij. Paicuna imapi difindichun minishtijpica paicunataca difindinami canchij.

²¹ Apóstol Pabloca Romanos libropica Jesusta catij nueve huarmicunapaj shutita quillcashpami saludocunata cacharca (Romanos 16:1, 3, 6, 12, 13, 15). Cai panicunaca cai saludocunata uyashpa, animaj shimicunata chasquishpaca cushillami sintirishcangacuna. Ñucanchijpish panicunata apoyashpa, valorashpa catishunchij. Chashna rurashpaca paicunata cꞌuyashcata, familiata shina tratashcatami ricuchishun.