1. ¿Mayorlla tucushpaca ima metacunatataj churana canchij?

ÑA MAYORYASHPACA huaquin huauqui panicunaca ñaupa laya Jehová Diostaca ña mana tanto sirvi tucunchijchu nishpami llaquilla sintirincuna. Pero fuerzasta mana tanto charishpapish paicunapaj experienciahuan, ima yachashcacunahuanmi jovencunataca Jehová Diosta sirvichun, ashtahuan alli responsabilidadcunata charichun ayudai tucuncuna. Experienciata charij shuj huauqui ancianoca: “Ñucaca mayoryashpaca ñaupa layaca Jehová Diostaca mana sirvi tucurcanichu. Pero congregacionpi alli yachachishca jovencuna tiyashcamanta, ima trabajotapish alli pajtachij cashcata yachashpaca cushillami sintirircani” ninmi.

2. ¿Cai yachaipica imatataj ricushun?

² Pasaj yachaipica, jovenlla huauqui panicuna mayorlla huauqui panicunahuan amigos tucushpaca paicunamanta beneficiari tucushcatami yacharcanchij. Cai yachaipica mayorlla huauqui panicuna jovenlla huauqui panicunata ayudangapajca humilde cana cashcata, agradecidos cana cashcata, generosos cana cashcatami yachashun. Chaita rurajpica congregacionca achcatami beneficiaringa.

3. a) Filipenses 2:3, 4-pi nishca shinaca ¿humilde cashcataca ima shinataj ricuchina can? b) ¿Humilde cashpaca ima shinataj shujtajcunata beneficiashun?

³ Mayorlla huauqui panicunaca jovenlla huauqui panicunata ayudangapajca humildesmi cana can. Humildecunaca shujtajcuna paicunata yalli cashcatami yuyancuna (Filipenses 2:3, 4-ta liyipai). Humilde mayorlla huauqui panicunaca mana tucuitapish paicuna munashca shina rurachunchu shuyan. Ashtahuanpish paicunaca imata rurangapajpish Biblia yachachishca shina rurana cashcatami cuentata cuncuna (Eclesiastés  7:10). Mayorlla huauqui panicunaca jovencunamanca paicuna imata yachashcata parlashpami ayudai tucuncuna. Paicunaca cai tiempopi huaquin cambiocuna tiyashcamanta mushuj yuyaicunata yachana cashcatapishmi cuentata cuncuna (1 Corintios 7:31).

4. ¿Superintendente de circuito huauquicunaca levitacunamantaca imatataj yachai tucuncuna?

⁴ Humildes huauqui panicunaca ña mayoryashpa Diospaj mana tanto rurai tucushcatami yachancuna. Por ejemplo, superintendente de circuito huauquicunaca 70 huatacunata charishpaca superintendente de circuito canata saquishpami shujtaj asignacionta chasquincuna. Paicunaca cai asignacionta charishpaca huauqui panicunata ayudanataca achcatami munashcangacuna. Pero cunanca paicunaca jovenlla huauquicuna cai asignacionta pajtachi tucushcatami cuentata cuncuna. Ñaupa punllacunapica levitacunaca 50 huatacunata charishpaca Diospaj carpa huasipi sirvinatami saquina carcacuna. Chai asignacionta charishpaca cushillami pajtachircacuna. Jovencunatapishmi ayudajcuna carca (Números 8:25, 26). Cunan punllacunapish maijan mayorlla huauquicunaca ña mana superintendente de circuito cancunachu. Paicunaca cunanca achca congregacioncunata ña mana visitai tucushpapish maipimi tandanacun congregacionpimi shujtaj huauquicunata animashpa ayudancuna.

5. ¿Danpaj, Katiepaj ejemplomantaca imatataj yachanchij?

⁵ Danpaj ejemplopi yuyashun. Paica 23  huatacunatami superintendente de circuito carca. Pai 70 huatacunata charijpica paipaj huarmi Katiehuanmi precursores especiales cachun agllarcacuna. ¿Cunanca cai asignaciontaca paicunaca ima shinataj pajtachicuncuna? Danca congregacionpica achca responsabilidadcunatami charin. Paica huauquicunatami siervo ministerial cachun ayudan. Shinallataj shujtaj huauqui panicunatami carritocunahuan predicachun, carcelcunapipish predicachun ayudacun. Mayorlla huauqui panicunaca tiempo completota sirvishpapish, mana sirvishpapish shujtajcunatami ayudai tucuncuna. Chaipajca ima cambiocuna tiyajpipish pajtachishpa, shujtaj metacunata churashpa, imata rurai tucushcahuanmi ayudai tucuncuna.

6. ¿Humildecunaca ima shinataj can? Shuj ejemplohuan parlai.

⁶ Humildecunaca paicuna ima rurai tucushcahuanmi cushilla sintirincuna (Proverbios 11:2). Humildecuna ima shina cashcata yachangapajca cai ejemplopi yuyashun. Shuj carrota manejajca mana quinripi laya huichipica manejanchu. Huichipi manejangapajca asha velocidadtami bajana can. Chashnallatajmi humildecunaca ñaupaca fuerzasta charishcamantami tucui pudishcahuan Yayitu Diosta sirvi tucushcanga. Pero cunanca ña mana tanto sirvi tucushpapish paicuna pudishcahuanmi Jehová Diosta sirvishpa, shujtajcunata ayudashpa catincuna (Filipenses 4:5).

7. ¿Barzilaica humilde cashcataca ima shinataj ricuchirca?

⁷ Barzilái 80 huatacunata charijpica rey Davidca paita sirvichunmi invitarca. Pero Barzilaica humilde cashcamantami chaitaca mana chasquirca. Paica allimi yacharca ña ñaupa laya mana sirvi tucushcata. Chaimi Quimam joventa paipaj randi agllachun nirca (2 Samuel 19:35-37). Mayorlla huauquicunaca Barzilái shinallatajmi jovenlla huauquicuna paicuna charishca responsabilidadta chasquijpica cushilla sintirincuna.

8. ¿Rey Davidca ima shinataj humilde cashcata ricuchirca?

⁸ Rey Davidpish humildemi carca. Paica Diospaj templotami shungumanta ruranata yuyarca. Pero Jehová Diosca cai templotaca joven Salomonmi shayachinga nircami. Chaita yachashpaca Davidca humildadhuanmi paipaj churi Salomontaca tucuipi apoyarca (1 Crónicas 17:4; 22:5). Davidca ñucami experienciata charini. Salomonca huambrarajmi can, mana experienciata charinchu nishpaca mana yuyarcachu (1 Crónicas 29:1). Paica allimi yacharca Jehová Diospaj bendicionhuan Salomón chai templota shayachi tucushcata. Cunan punllacunapish mayorlla huauqui panicunaca mana ñaupa laya responsabilidadta charincunachu. Cushillami Yayitu Diosta sirvishpa caticuncuna. Pero Jehová Dios jovenlla huauquicunata paicuna charishca responsabilidadcunata ayudanatami yachancuna.

9. ¿Huauqui Shigeoca ima shinataj humilde cashcata ricuchirca?

⁹ Cunan punllacunapipish humilde huauquicunami tiyan. Por ejemplo, 1976 huatapimi Shigeo huauquitaca 30 huatacunata charijpi Comité de Sucursalpi sirvichun invitarca. Cutin 2004 huatapica paitaca Comité de Sucursalpi pushaj cachunmi agllarca. Achca huatacuna qꞌuipaca ña mana tanto fuerzata charishcata, paiman mingashca trabajotapish mana rato pajtachi tucushcatami cuentata curca. Chaimi pai ima shina sintirishcataca Jehová Diosman parlarca. Ashtahuanpish shuj jovenlla huauqui paipaj randi sirvichunmi yuyarca. Cunan punllacunapica paica ña mana Comité de Sucursalpi pushaj canchu. Pero Sucursalpimi  sirvishpa caticun. Barzilaipaj, rey Davidpaj, Shigeopaj ejemplomanta yachashpaca humildecunaca jovenlla huauquicuna mana imata yachanchu, ima experienciata mana charinchu nishpaca mana yuyancunachu. Ashtahuanpish jovenlla huauquicuna imatapish pajtachi tucushcata yachashpami paicunataca achcata valorancuna (Proverbios 20:29).

10. ¿Mayorlla huauqui panicunaca congregacionpi jovencuna tiyashcamantaca ima shinataj sintirincuna?

¹⁰ Mayorlla huauqui panicunaca Jehová Dios jovenlla huauqui panicunata cushcamantami achcata agradicincuna. Paicunaca mana achca fuerzata charishcamantami jovenlla huauqui panicuna congregacionpi sirvi tucushcata yachancuna. Jovencuna fuerzasta charishcata yachashpaca cushillami sintirincuna.

11. Rut 4:13 al 16-pi nishca shinaca ¿mayorlla huauqui panicunaca shujtajcunapaj ayudata chasquishpaca ima shinataj beneficiarincuna?

¹¹ Bibliapica Noemica agradecidami carca ninmi. Paica mayoryashpaca shuj jovenpaj ayudatami chasquirca. Noemica paipaj churi huañushca qꞌuipaca paipaj nuera Ruttaca familiahuan tigrachunmi munarca. Pero Rutca Belenmanmi Noemita acompañasha nirca. Noemica agradecida cashcamantami chaita chasquirca (Rut 1:7, 8, 18). Chaita rurashcamantami ishquindij achca bendicioncunata chasquirca (Rut 4:13-16-ta liyipai). Mayorlla huauqui panicunaca humildes cashcamantami Noemipaj ejemplota catingapaj esforzarincuna.

12. ¿Apóstol Pabloca ima shinataj agradecido cashcata ricuchirca?

¹² Apóstol Pabloca gentecunaman predicangapajmi caru lugarcunata viajaj carca. Congregacioncunatapish sinchiyachishpami catij  carca. Paica humilde, agradecido cashcamantami shujtajcunapaj ayudata chasquirca. Por ejemplo, shuj cutinca Filipos llajtamantami huauqui panicunaca paita ayudangapaj minishtirishca cosascunata curca. Timoteopishmi paita ayudarca (Filipenses 4:16; 2:19-22). Achca huauqui panicunami Roma prezupi Pablo cajpi visitanaman chayarcacuna. Chaimi Pabloca Yayitu Diosta shungumanta agradicirca (Hechos 28:15).

13. ¿Mayorlla huauqui panicunaca ima shinataj jovenlla huauqui panicunata agradicishcata ricuchi tucuncuna?

¹³ Mayorlla huauqui panicunaca jovenlla huauqui panicunatami cancunapaj congregacionpi agradicishcata ricuchi tucunguichij. Jovenlla huauquicuna cancunata mai lugarman pushasha nijpi, comprasta randishpa cusha nijpi, ima minishtishcahuan ayudasha nijpica cushicushpa paicunapaj ayudata chasquichij. Jehovami cashna jovenlla huauquicunahuan cancunataca ayudan. Paicunapaj ayudata chasquishpaca jovencunahuanmi alli apanacunguichij. Shinallataj jovenlla huauqui panicunatapish Yayitu Diosta sirvichunmi ayudanguichij. Paicunataca congregacionpi sirvingapaj achcata esforzaricushcamantami pagui ni tucunguichij. Cancunapaj experienciamanta parlangapajpish tiempota surcuichij. Chaita rurashpaca jovenlla huauqui panicunata Jehová Dios congregacionman pushamushcamantami agradicishcata ricuchinguichij (Colosenses 3:15; Juan 6:44; 1 Tesalonicenses 5:18).

14. ¿Rey Davidca ima shinataj generoso cashcata ricuchirca?

¹⁴ Rey Davidca generosomi carca. Mayorlla huauqui panicunapish paipaj ejemplotami cati tucuncuna. Davidca Diospaj templota shayachingapajmi achca cullquihuan ayudarca (1 Crónicas 22:11-16; 29:3, 4). Gentecuna Salomonmi chai templota shayachirca ninata yachashpapish Davidca cushillami ayudarca. Mayorlla huauqui panicunapish tandanacuna huasicunata mana shayachishpa, allichishpa ayudai tucushpaca cullquihuanmi ayudai tucuncuna. Shinallataj jovenlla huauqui panicunamanmi cancuna ima yachashcata yachachi tucunguichij.

15. ¿Pabloca Timoteomanca imacunallatataj yachachirca?

¹⁵ Apóstol Pablopish generosomi carca. Paica congregacioncunata visitacushpaca Timoteotami huillanaman acompañachun invitarca. Timoteomanca ima shina yachachinata, ima shina predicanatami yachachirca (Hechos 16:1-3). Pablo chashna ayudashcamantami Timoteoca alli predicaj carca (1 Corintios 4:17). Timoteoca Pablo yachachishca shinami paipish shujtajcunata yachachirca.

16. ¿Huauqui Shigeoca imamantataj shujtajcunata capacitashpa ayudarca?

¹⁶ Cunan punllacunapish mayorlla huauquicunaca jovenlla huauquicuna congregacionpi ima responsabilidadcunata alli pajtachichun yachachishpa caticuncuna. Por ejemplo, párrafo 9-pi parlashca huauqui Shigeoca achca huatacunatami jovenlla huauquicunata Comité de Sucursalpi sirvichun capacitashpa ayudarca. Paica pai causan lugarpi Diospaj obrata ashtahuan apoyangapajmi chashna rurarca. Huauqui Shigeo Comité de Sucursalpi pushaj canata saquijpica shujtaj jovenlla huauquimi chai responsabilidadta pajtachi tucurca. Huauqui Shigeoca 45 yalli huatacunatami Comité de Sucursalpica sirvicun. Paica paipaj experienciamantami jovenlla huauquicunaman yachachishpa caticun. Huauqui Shigeo shina shujtaj huauquicunapish Diospaj pueblopi sirvishcamantami cushilla sintirinchij.

17. Lucas 6:38-pi nishca shinaca ¿mayorlla huauqui panicunaca ima shinataj shujtajcunata ayudai tucuncuna?

 ¹⁷ Mayorlla huauqui panicuna cancunaca tucui pudishcahuanmi Jehová Diosta sirvishcanguichij. Cancunapaj ejemplomanta yachashpami Biblia yachachishcacuna valishca cashcata intindishcanchij. Ñucanchij causaipipish pajtachina importante cashcata yachashcanchij. Cancunaca achca huatacunatami Jehová Diostaca sirvishpa caticushcanguichij. Pero cambiocuna tiyajpipish chai cambiocunata apoyana importante cashcatami yachanguichij. Cutin shujtaj mayorlla huauqui panicunaca cunanllachari Jehová Diosta rijsircanguichij. Cancunapish Yayitu Diosta ima shina rijsishcata jovencunaman parlashpami paicunata ayudai tucunguichij. Jovencunaca cancunapaj experienciamanta yachashpaca achcatami cushicungacuna. Cancunapaj experienciacunamanta siempre shujtajcunaman parlajpica Jehová Diosmi bendicianga (Lucas 6:38-ta liyipai).

18. ¿Mayorcunapish, jovencunapish ima shinataj caishujmanta chaishujmanta ayudanacui tucuncuna?

¹⁸ Mayorlla huauqui panicunaca cancunapaj experienciahuan, ima yachashcahuanmi jovenlla huauqui panicunata ayudai tucunguichij. Cutin jovenlla huauqui panicunaca cancunapaj fuerzahuanmi ayudai tucunguichij (Romanos 1:12). Joven cashpapish, mayorlla cashpapish shuj shinalla Jehová Diosta sirvishpa catishunchij. Chaita rurashpaca Jehová Diostami jatunyachishun. Congregacionpajpish shuj bendicionmi cashun.