CRINATA sinchiyachijpica Diabloca Diosmanta mana caruyachi tucungachu. Bibliapica: “Crij cashpami, millai Diablo cachashca nina shina millai yuyaicunataca chingachi tucunguichij” ninmi (Efesios 6:16, QC, 1989). Sinchi crij cashpaca jatun problemacunatapish chꞌimbapurai tucunchijmi. Jesusca paita catijcunamanca: “Uchilla mostaza muyu shinallatapish crinata charishpaca, cai urcutapish: ‘Caimanta chaiman ri’ nijpica, rinmanmi” nircami (Mateo 17:20). Diospajman ashtahuan cꞌuchuyangapajca paipimi tucui shunguhuan crina canchij. Chaimantami cai tapuicunapi yuyana canchij. Bibliapica crinamanta parlashpaca ¿imatataj nicun? ¿Diospi cringapajca imamantataj pai nishcacunata valichina canchij? ¿Diospi tucui shunguhuan cringapajca imatataj rurana canchij? ¿Imamantataj Diospi crina canchij? (Romanos 4:3).

Diospi crinamanta parlashpaca mana Bibliapi yachachishcacunata crinallamantachu parlacun. Demoniocunapish Dios tiyashcatami crincuna. Chaimantami manchancuna (Santiago 2:19). Shinashpaca ¿crinaca imatataj nisha nin?

Bibliapica crinamanta parlashpaca ishqui yuyaicunamantami yachachin. Puntapica: “Crinaca, imata japisha nicushcata japinataj cashca yuyailla shuyana” nisha ninmi (Hebreos 11:1a). Diospi crishpaca pai rurasha nishcacunata pajtachinataj cashcatami seguros cashun. Por ejemplo, Diosca israelitacunamanca: “Ñucaca punlla canapitaj punlla cachun, tuta canapitaj tuta cachunmi mandashpa churarcani. Chaitaca cancuna shujtajyachishpa, punllataca tuta canapi, tutataca punlla canapi churajpica, ñucapish ñucata sirvij Davidman ari nishcata pꞌaquishachari” nircami (Jeremías 33:20, 21). ¿Caya punllaca intica mana llujshingachu nishpa yuyanchijchu? Mana. Tucui punllacuna inti llujshishpa achijyachinatami crinchij. Tucuita ruraj Jehová Dios paipaj nishcacunata pajtachinatapish ¿manachu crina canchij? (Isaías 55:10, 11; Mateo 5:18).

Ishquipica: “Manapish ricushcata chai shinataj cana cashcata crina” nisha ninmi (Hebreos 11:1b). Shuj ejemplopi yuyashun. Shuj huahua, ¿canca ima shinataj yachangui huaira tiyashcata? nishpa tapujpica ¿imatataj cutichinchijman? Ñucanchijca huairataca mana nunca ricushcanchijchu. Shinapish samaita ima shina aisashcata ricuchishpa, huairapish yuracunata ima shina cuyuchijta ricuchishpami jahualla intindichi pudinchij. Caita huahuaman alli intindichijpica huairata mana ricushpapish huaira tiyashcatami cringa. Crinapish chashnallatajmi can. Por ejemplo, Diostaca mana ricui tucunchijchu. Pero pai rurashcacunata ricushpami pai tiyashcataca crinchij (Romanos 1:20).

Diospi cringapajca mana llullatami yachana canchij (1 Timoteo 2:4). Pero mana chaillatachu rurana canchij. Apóstol Pabloca shungumantami crina canchij nircami (Romanos 10:10). Chaimantami  Dios nishcacunata shungumanta valichina canchij. Chaita rurashpami Dios nishcacunata pajtachishpa causashun (Santiago 2:20). Cutin Dios nishcacunata shungumanta mana valichij runaca paipaj crishcacunataca mana cambiasha ningachu. Imatapish pai munashca shina rurashpami causasha ninga (2 Pedro 3:3, 4; Judas 18). Ñaupa tiempopish achca gentecunami milagrocunata ricurcacuna. Chashnapish Diospica mana crircacunachu (Números 14:11; Juan 12:37). Dios nishcacunata valichij gentecunami Diospaj espíritu santota chasquishpa crinata sinchiyachingacuna (Gálatas 5:22; 2 Tesalonicenses 2:10, 11).

Davidca Diospimi tucui shunguhuan crij carca (Hebreos 11:32, 33). Pero mana paipaj tucui familiachu Diospi tucui shunguhuan crij carca. Por ejemplo, Goliat runa israelitacunata cꞌamijpimi Davidca pꞌiñarirca. Chaimantami Davidpaj jatun huauqui Eliabca paita sinchita rimarca. Chashna rurashpami Eliabca Diospi mana tucui shunguhuan crishcata ricuchirca (1 Samuel 17:26-28). Ñucanchij yaya mama Diospi crijcuna cajpipish ñucanchijca mana Diospi crishpachu huacharinchij. Yuyarishunchij, Davidca Diospaj alli amigo cangapajmi esforzarirca. Chaimantami paipi tucui shunguhuan crij carca.

Salmo 27-pica Diospi tucui shunguhuan cringapaj David imata rurashcatami ricuchin. Paica ñaupa punllacunapi ima shina causashcata, contracunata mishangapaj Jehová Dios imata rurashcatami yuyarij carca. Diospaj carpa huasipi canatami tucui shunguhuan munaj carca. Chaimantami shujtaj israelitacunahuan chaipi adoraj carca (Salmo 27:1-4, 6). Davidca Jehová Dios paita ayudachunmi mañaraj carca. Shinallataj Yayitu Dios paiman yachachichunmi munaj carca. Davidpajca Diospi crinami achca valishca carca. Chaimantami paica: ‘Diospi mana crishca cashpaca, musparishpa chahuata huañuimanmi carcani’ nirca (Salmo 27:7, 8, 11, 13).

Salmo 27-pi nishca shinaca crinapi sinchi cangapajca David ima rurashcatami catina canchij. Chaipajca Bibliata, publicacioncunatami estudiana canchij. Chaita rurashpami Diospi tucui shunguhuan crishun (Salmo 1:2, 3). Bibliata estudiacushpaca chaipi imata liyishcata yuyaringapajmi tiempota llujchina canchij. Chashnami Jehová Dios imata rurashcamanta agradicishun. Diosta agradicishpaca tandanacuicunapimi paita adorashun. Ñucanchij crishcacunatapish shujtajcunamanmi huillashun (Hebreos 10:23-25). Shinallataj Diospi crishcata ricuchingapajca paitami mana shaicushpa mañana canchij (Lucas 18:1-8). Chaimanta, Jehová Dios ñucanchijta cꞌuyaj cashcata yuyarishpa paita mañarashunchij (1 Tesalonicenses 5:17; 1 Pedro 5:7). Diospi crishpaca allitami rurashun. Allita rurashpaca Diospimi tucui shunguhuan crishun (Santiago 2:22).

Jesusca pai huañungapaj ashalla horascuna illajpimi paipaj discipulocunamanca: “Yaya Diostapish crichij, ñucatapish crichij” nirca (Juan 14:1). Shinaca mana Jehová Diospi crinallachu minishtirin. Jesuspipish crinami minishtirin. Jesuspi cringapajca quimsa yuyaicunata ricushun.

Punta yuyai, apóstol Pablo ima nishcatami tucui shunguhuan crina canchij. Paica: “Diospaj Churita crishpami causani. Paimi ñucata cꞌuyashpa, paillataj curishpa ñucamanta huañurca” nircami (Gálatas 2:20). Jesuspi crishpaca pai ñucanchijmanta huañushcatami seguros cashun. Shinallataj Jesusmanta Jehová Dios ñucanchij juchacunata perdonaj cashcatami crishun. Chashnallataj Yaya Dios paipaj Churita cai Allpaman cachashpa ñucanchijta achcata cꞌuyashcatami crishun. Jesusmanta huiñai causaita charina cashcatapishmi crishun (Romanos 8:32, 38, 39; Efesios 1:7). Caicunata yuyaipi charishpaca desanimachij yuyaicunataca mana charishunchu. Ashtahuanpish allimi sintirishun (2 Tesalonicenses 2:16, 17).

Ishqui yuyai, Jehová Diosta mañashpa paipajman cꞌuchuyashunchij. Jesús huañushcamantami Jehová Diostaca mana manchashpa mañai tucunchij. Diosta mañajpica paica jatunta cꞌuyaj cashcamantami ñucanchijta imapipish ayudanga (Hebreos 4:15, 16; 10:19-22). Tucui punllacuna Diosta mañashpaca juchapica mana urmashunchu (Lucas 22:40).

Quimsa yuyai, Jesusta cazushunchij. Apóstol Juanca: ‘Maijanpish Churita crijca, huiñai causaitami charin. Ashtahuanpish Churita mana cazujca, huiñai causaitaca mana charinchu. Taita Diosca paitaca pꞌiñacunllami’ nircami (Juan 3:36). Apóstol Juanca Jesuspi crishcataca paita cazushcahuanmi ricuchina canchij nircami. Jesús mandashcacunata, yachachishcacunata pajtachishpami paita cazushcata ricuchinchij (Gálatas 6:2). Shinallataj “alli cazuj alli yuyaiyuj” huauquicuna ima nishcata pajtachishpami Jesusta cazushcata ricuchinchij (Mateo 24:45, QC, 1989). Ashtahuancarin Jesús mandashcacunata cazushpaca sinchi problemacunatapish jahuallami chꞌimbapurashun (Mateo 7:24, 25).

Shuj cutinca shuj runaca Jesustaca: “Crinimi, tucui shunguhuan alli cringapaj ashtahuan crina yuyaita cuhuai” nircami (Marcos 9:24). Cai runaca Diospi crijmi carca. Pero Diospi ashtahuan crina cashcatami yuyarca. Cai runa shinami ñucanchijpish ima horaca Diospi ashtahuan crinata minishtishun. Chaimantami cunanmanta Bibliata estudiana canchij. Imata yachashcapipish cutin cutinmi yuyana canchij. Chaita rurashpami Jehová Dios ñucanchijpaj imata rurashcata yuyarishpa agradicishun. Shinallataj ñucanchij huauqui panicunahuan tandalla sirvishpa, shujtajcunaman predicashpa, Diosta mañashpaca paipimi tucui shunguhuan crishun. Caicunata rurajpimi Jehová Diosca ñucanchijta cꞌuyashpa catinga (Judas 20, 21).