1, 2. a) ¿Juchata rurashcamanta mana arrepintirijcunataca Jehová Diosca ima shinataj ricun? b) ¿Jehová Diosca juchata rurajcuna imata rurachuntaj munan?

 JEHOVÁ DIOSCA millai ruraicunataca manataj ricunachinchu (Salmo 5:​4-6). Paica ñucanchijcuna ima shina causanata yachachunmi Bibliapica mandashcacunata churashca. Yayitu Diosca chai mandashcacunata cazuchunmi munan. Pero imapipish nunca mana pandarichunca mana shuyanchu (Salmo 130:​3, 4). Shinapish ‘maijan gentecunaca Dios yallitaj llaquij cashcata yachashpapish, millai ruraicunataca mana pingashpami ruranllacuna’. Jehová Diosca paicunataca manataj ricunachinchu (Judas 4). Bibliapi nishca shinaca “millai gentecunaca” Armagedón macanacuipimi tucuchishca canga (2 Pedro 3:7; Apocalipsis 16:16).

² Jehová Diosca shujllapish ama chingarichunmi munan. Ashtahuanpish cai revistapi yachashca shinaca paica “tucuicuna arrepintirichunmi” munan (2 Pedro 3:9). Anciano huauquicunaca Jehová Diospaj ejemplota catishpami juchata rurajcuna arrepintirishpa Jehová Diospajman cutin cꞌuchuyachun pacienciahuan ayudancuna. Pero paicuna ayudasha nijpipish maijancunaca manachari arrepintirisha ningacuna (Isaías 6:9). Paicunaca ancianocuna cutin cutin ayudasha nijpipish millaita ruranataca manachari saquisha ningacuna. ¿Chashna tucujpica ancianocunaca imatataj rurana can?

“MILLAI RUNATA LLUJSHICHICHIJ”

3. a) ¿Bibliapi nishca shinaca maijan huauqui o pani paipaj juchamanta mana arrepintirijpica ancianocunaca imatataj rurana can? b) ¿Imamantataj “juchata rurajllatajmi congregacionmanta llujshichishca canata agllarca ninchij”?

³ Juchata ruraj mana arrepintirijpica ancianocunaca 1 Corintios  5:​13-pi mandashcatami pajtachina can. Chaipica: “Cancunapurapi caj millai runata llujshichichij” ninmi. Juchata rurajca mana arrepintirishpaca congregacionmanta llujshichishca cana cashcataca allimi yachan. Chaimantami congregacionmanta llujshichishca cashpaca paillataj llujshichishca canata agllashca shina can. Bibliapi nishca shinaca paica imata tarpushcallatatajmi japirca (Gálatas 6:7). ¿Imamantataj chaita ninchij? Ancianocuna cutin cutin arrepintirichun paita ayudasha nijpipish paica mana uyasha nircachu (2 Reyes 17:​12-15). Ashtahuanpish paipaj ruraicunahuanmi Jehová Diospaj mandashcacunata manataj cazusha nishcata ricuchin (Deuteronomio 30:​19, 20).

4. ¿Mana arrepintirisha nij runa congregacionmanta llujshichishca cashcataca imamantataj ancianocunaca congregacionman huillancuna?

⁴ Mana arrepintirisha nij runa congregacionmanta llujshichishca cajpica ancianocunaca tucui congregacionmanmi chai runa testigo de Jehová canata saquishcata huillancuna. a Pero ¿paita pingaipi churangapajchu chaita huillancuna? Mana. Ashtahuanpish huauqui panicuna congregacionmanta llujshichishcacunata Bibliapi mandashca shina tratana cashcata yuyarichunmi chaitaca huillancuna. Bibliapica congregacionmanta llujshichishcacunahuanca ‘ama tandanacunguichijchu. Paicunahuanca micungapajllapish ama tiyaringuichijchu’ ninmi (1 Corintios 5:​9-11). ¿Bibliapica imamantataj chaita rurachun nin? Apóstol Pabloca: “¿Ashalla levadura tucui masata pꞌunguillichij cashcataca manachu yachanguichij?” nircami (1 Corintios 5:6). Chai versopi nishca shinaca paicunapaj juchacunamanta mana arrepintirijcunaca caishuj huauqui panicunatapishmi Jehová Diosmanta caruyachi tucuncuna (Proverbios 13:20; 1 Corintios 15:33).

5. ¿Congregacionmanta llujshichishcacunataca ima shinataj ricuna canchij?

⁵ ¿Congregacionmanta llujshichishcacunataca ima shinataj ricuna canchij? Paicunahuan mana tandanacuna cashpapish “paicunaca mana nunca cambiangachu” nishpaca mana yuyanachu canchij. Ashtahuanpish paicunataca chingarishca ovejitacunata shinami ricuna canchij. Chingarishca ovejitacunaca cutinmi corralman tigrai tucuncuna. Shinallataj chai huauqui o pani Jehová Diosman mingarishca cashcatami yuyarina canchij. Pero cunanca paica Jehová Diosman mingarishpa ari nishcataca mana pajtachicunchu. Ashtahuanpish Jehová Dios munashca shina mana causacushcamantami achca llaquicunata chari tucun (Ezequiel 18:31). Pero paipajman tigrachunca Jehová Diosca tiempotami cucun. Chaimanta ¿ancianocunaca congregacionmanta llujshichishcacunamanca ima shinataj pacienciata ricuchina can?

¿ANCIANOCUNACA IMA SHINATAJ AYUDANCUNA?

6. ¿Ancianocunaca congregacionmanta llujshichishcacunataca ima shinataj ayudancuna?

⁶ ¿Ancianocunaca congregacionmanta llujshichishcacunata ayudashpachu catin? Ari. Por ejemplo, congregacionmanta llujshichishca canata paiman huillashpapish ancianocunaca congregacionman cutin tigrangapaj imata rurana cashcatami paimanca huillana can. Shinallataj ancianocunaca huaquin quillacuna qꞌuipa paipaj yuyaita cambiashcata o mana cambiashcata ricungapaj paihuan cutin tandanacusha nishcatapishmi paimanca huillana can. Congregacionmanta llujshichishca runa ari nijpica ancianocunaca cutin paihuan tandanacushpami paipaj juchacunamanta arrepintirishpa Jehová Diospajman tigrachun cꞌuyaihuan paitaca animangacuna. Pero congregacionmanta llujshichishca runa manaraj arrepintirishca cashcata cuentata cushpaca ancianocunaca paita ayudangapajmi esforzarishpa catingacuna.

7. ¿Anciano huauquicunaca Jehová Diospaj ejemplota caticushcataca ima shinataj ricuchincuna? (Jeremías 3:12).

 ⁷ Ancianocunaca congregacionmanta llujshichishcacunata Jehová Dios shina cꞌuyaihuan tratangapajmi esforzarincuna. Por ejemplo, ¿israelitacuna paimanta caruyajpica Jehová Diosca imatataj rurarca? Paica israelitacunaraj arrepintirishpa paipajman tigrarichunca mana shuyarcachu. Ashtahuanpish paicuna manaraj arrepintirijpimi Jehová Diosca paicunapajman cꞌuchuyarca. Yachai 32-pi Jehová Diosmanta imata yachashcata yuyarishunchij. Oseaspaj huarmi juchata ruracujpipish Jehová Diosca paita perdonachunmi Oseastaca mandarca. Chashnami Jehová Diosca cꞌuyaj, llaquij cashcata ricuchirca (Oseas 3:1; Malaquías 3:7). Ancianocunapish paicunapaj juchacunamanta mana arrepintirijcuna Jehová Diospajman tigrachunmi munancuna. Chaimantami congregacionmanta llujshichishcacuna Diospaj puebloman cutin tigrachunca mana deganamanta jarcaicunata churancuna (Jeremías 3:​12-ta liyipai).

8. Chingarishca churimanta parlopi yachashca shinaca ¿ancianocunaca congregacionmanta llujshichishcacunataca ima shinataj tratana can? (Lucas 15:7).

⁸ Yachai 32-pica Jesús churashca parlomantami yacharcanchij. Jesusca: ‘Chingarishca churi yayapaj huasiman tigrajpica yayaca paita tupanamanmi callpashpa rirca. Ña tupashpaca cꞌuyaihuanmi paitaca ugllashpa mucharca’ nircami (Lucas 15:20). Yayaca paipaj churita chashna chasquingapajca pai perdonta mañachunca mana shuyarcachu. Ashtahuanpish cꞌuyaj yaya cashcamantami pairaj paipajman cꞌuchuyarca. Ancianocunapish congregacionmanta llujshichishcacunata chashna tratangapajmi esforzarina can. Paicunaca Jehová Diospaj ovejitacuna “paipaj puebloman tigrachunmi” munancuna (Lucas 15:​22-24, 32). Congregacionmanta llujshichishcacuna Diospaj puebloman tigrajpica jahua pachapica angelcunapish, cai Allpapi Diosta sirvijcunapishmi achcata cushicunchij (Lucas 15:​7-ta liyipai).

9. ¿Jehová Diosca congregacionmanta llujshichishcacunataca imata rurachuntaj animan?

⁹ Caicama yachashca shinaca Jehová Diosca paicunapaj juchacunamanta mana arrepintirijcunapaj millai ruraicunataca manataj ricunayachinchu. Shinapish Jehová Diosca paicunataca mana shitashcatachu saquin. Ashtahuanpish paipajman tigrachunmi munan. Profeta Oseasca Jehová Dios shungumanta arrepintirijcunata ima shina ricuj cashcatami quillcarca. Jehová Diosca: “Cancuna cꞌariyashcataca ñucami alliyachisha. Mana cꞌuyaipajtami cꞌuyasha. Ñuca pꞌiñarinaca, paicunamantaca anchunmi” nircami (Oseas 14:4). Shinashpaca ancianocunaca congregacionmanta llujshichishcacuna arrepintirishca cashcata cuentata cungapajmi esforzarina can. Congregacionmanta llujshichishcacunapish Jehová Diospajman tigrangapajmi esforzarina can.

10, 11. ¿Achca huatacuna huashaman congregacionmanta llujshichishcacunataca ancianocunaca ima shinataj ayudana can?

¹⁰ Maijancunaca paicunapaj juchacunamanta mana arrepintirishcamantami achca huatacuna huashaman congregacionmanta llujshichishca cashcacuna. Shinapish cunan punllacunapica paicunaca chai juchacunataca ña manachari ruracuncuna. Shinallataj ima juchata rurashcamanta congregacionmanta llujshichishca cashcatapish ña manachari yuyarincuna. Ancianocunaca paicunata mashcangapaj, paicunata visitangapajmi esforzarina can. Paicunahuan parlacushpaca paicunahuanmi Yaya Diosta mañai tucuncuna. Shinallataj congregacionman tigrachunpish cꞌuyaihuanmi animangacuna. Achca huatacuna huashaman congregacionmanta llujshichishcacunaca cutin espiritualmente sinchiyangapajca achca ayudatami minishtingacuna. Chaimantami paicuna congregacionman tigrasha nijpica ancianocunaca shuj huauquihuan o shuj panihuan Bibliata estudiachun arreglocunata rurai tucuncuna. Paicunaca congregacionman manaraj tigrashca cashpapish Bibliatami estudiai tucuncuna. Pero ancianocunallami  Bibliamanta estudiota chasquichun arreglocunata rurana can.

¹¹ Ancianocunaca Jehová Diospaj ejemplota catishpami Jehová Diosmanta caruyashcacunata mashcangapaj, Jehová Diospajman tigrachun animangapaj esforzarincuna. Congregacionmanta llujshichishcacuna shungumanta arrepintirishcata, millaita ruranata saquishcata, paipaj yuyaita cambiashcatapish ricushpaca ancianocunaca mana demorashpami paicunataca cutin Diospaj pueblopi chasquina can (2 Corintios 2:​6-8).

12. a) ¿Ancianocunaca imamantataj huaquincunata Diospaj pueblopi cutin chasquingapajca ashtahuan cuidadota charina can? b) ¿Imamantataj “Jehová Diosca huaquincunataca manataj perdonangachu” nishpaca mana yuyana canchij? (Notatapish ricui).

¹² Maijancunata Diospaj puebloman cutin  yaicuchun saquingapajca ancianocunaca huaquinpica ashtahuan cuidadotami charina can. Por ejemplo, huaquincunaca huahuacunata abusashcamanta, o apostatacuna tucushcamantami congregacionmanta llujshichishca carcacuna. Shujtajcunaca divorciaringapajlla shujtajhuan huainayashcamanta o divorciaringapajlla shujtaj mapa ruraicunata rurashcamantami congregacionmanta llujshichishca carcacuna. Chaimantami ancianocunaca paicuna de verdad shungumanta arrepintirishcata alli ricuna can (Malaquías 2:14; 2 Timoteo 3:6). Congregacionta cuidana cashcamantami paicunaca chaita rurana can. Pero millaita rurajcuna ima jatun juchata rurashca cajpipish arrepintirishpa chaita ruranata saquijpica Jehová Diosca cutinmi paicunataca paipaj pueblopi chasquinga. Chaitaca manataj cungarinachu canchij. Chaimantami ancianocuna paicunata Diospaj pueblopi cutin chasquingapaj achca cuidadota charina cashpapish “paicunataca Jehová Diosca mana nunca perdonangachu” nishpaca mana yuyana can (1 Pedro 2:10). b

¿HUAUQUI PANICUNACA IMATATAJ RURANA CAN?

13. ¿Paicunapaj juchacunamanta arrepintirijcunata y mana arrepintirijcunataca chashnallatajchu tratana canchij?

¹³ Yachai 34-pi ima yachashcata yuyarishunchij. Paicunapaj juchacunamanta shungumanta arrepintirijcunataca congregacionmantaca mana llujshichincunachu. Huaquinpica ancianocunaca chai persona sinchita cunashca cashcallatami congregacionman huillancuna. Chai huauqui o pani millaita ruranata saquishpa shungumanta arrepintirishcata yachashcamantami paihuan apanacushpa cati tucunchij (1 Timoteo 5:20). Paica Diospaj pueblo ucupi cashcamantami huauqui panicuna animachun, ayudachun minishtin (Hebreos 10:​24, 25). Pero ¿congregacionmanta llujshichishcacunahuanca apanacushpachu catina canchij? Mana. Paicunahuan tandanacunatami saquina canchij. Paicunahuanca mana micunallapishchu canchij (1 Corintios 5:11).

14. ¿Congregacionmanta llujshichishcacunata ima shina tratanata yuyacushpaca imatataj cada uno agllana canchij? (Fotomantapish parlapai).

¹⁴ ¿Pero congregacionmanta llujshichishcacunataca manachu ni tigra ricunallapish canchij? Mana. Bibliapi nishca shinaca paicunahuan tandanacunatami saquina canchij. Pero ñucanchij  familiacuna o shuj alli amigo congregacionmanta llujshichishca cajpica paicunata tandanacuiman invitanata o mana invitanataca cada unomi decidina canchij. Y ¿tandanacuiman shamujpica imatataj rurana canchij? Ñaupaca paicunataca mana saludajchu carcanchij. Pero cunanca cada unomi paicunata saludanata o mana saludanata decidina canchij. Maijancunaca tal vez paita saludanata o alli shamushca ninatami decidingacuna. Pero paicunahuan ama yalli parlanacungapaj o paicunahuan ama tiempota pasangapajmi cuidarina canchij.

15. ¿2 Juan 9 al 11-pica picunamantataj parlacun? (“ ¿Juanpish, Pablopish chai juchallamantatajchu parlacurca?” nishca recuadrotapish ricui).

¹⁵ Maijancunaca “¿segurochu congregacionmanta llujshichishcacunataca saludanalla canchij? Bibliapica: ‘Maijanpish paita saludajca paipaj mana alli ruraicunapimi chagrurin’ ninmi” nishpami yuyancuna (2 Juan 9-11-ta liyipai). Bibliapi ima nishcata alli intindingapajca ñaupa versocunapi, catij versocunapipish ima nishcatami alli intindina canchij. Segunda de Juanpica apostatacunamanta, mapa ruraicunata rurachun animajcunamantami parlacun (Apocalipsis 2:20). Chaimantami maijanpish apostatacunapaj yachachishcacunata crichisha nijpi o mapa ruraicunata rurachun animajpica ancianocunaca paicunataca mana visitana can. Tal vez paicunaca tiempohuanmi cambiangacuna. Pero paicuna cambiangacamaca mana saludanachu canchij. Tandanacuicunaman shamuchunpish mana invitanachu canchij.

JEHOVÁ DIOS SHINA CꞌUYAJCUNA, LLAQUIJCUNA CASHUNCHIJ

16, 17. a) ¿Jehová Diosca juchayujcuna imata rurachuntaj munan? (Ezequiel 18:32). b) ¿Ancianocunaca Jehová Dios shinaca imatataj rurana can?

¹⁶ ¿Cai pichca yachaicunapica imatataj yachashcanchij? Jehová Diosca shujllapish ama chingarichunmi munan (Ezequiel 18:​32-ta liyipai). Ashtahuanpish tucui juchayujcuna paihuan alli tucuchunmi munan (2 Corintios 5:20). Chaimantami paica ñaupa punllacunamantapacha gentecuna arrepintirishpa paipajman tigrachun ayudashca. Ancianocunapish Jehová Diospaj ejemplota catishpami mana arrepintirisha nijcunata arrepintirichun ayudana can (Romanos 2:4; 1 Corintios 3:9).

¹⁷ Juchayujcuna arrepintirijpica jahua pachapica achca cushicuimi tiyan. Yayitu Jehová Diosca paipaj ovejitacuna congregacionman tigrajpica achcatami cushicun. Jehová Dios yallitaj cꞌuyaj, llaquij cashcata intindishpaca paipajmanmi ashtahuan cꞌuchuyashun (Lucas 1:78).