1. ¿Jehová Diosca tucui gentecuna ima shina causachuntaj munan?

 JEHOVÁ DIOSCA cada uno ñucanchij causaihuan imata ruranata decidichunmi rurarca. Chaimi punllanta decisioncunata japinchij. Pero Jehová Diosman mingarina decisionta japinami ima decisiontapish yalli valishca can. Chai decisionta japishpami Jehová Diospaj familiapaj parte tucunchij. Paica tucuicuna chaita rurachunmi munan. ¿Imamanta? Yayitu Diosca ñucanchijtaca achcatami cꞌuyan. Chaimantami tucuicuna paipaj alli amigocuna tucuchun, huiñai causaita charichunpish munan (Deuteronomio 30:​19, 20; Gálatas 6:​7, 8).

2. ¿Yayitu Diosca paicunapaj juchacunamanta mana arrepintirijcuna imata rurachuntaj munan? (1 Juan 2:1).

² Jehová Diosca paita sirvichunca pitapish mana obliganchu. Ashtahuanpish cada uno chaita decidichunmi saquin. Pero ¿maijan huauqui o pani Jehová Diospaj mandashcacunata ladoman saquishpa, jatun juchapi urmashpaca paihuanca imataj tucunga? Shungumanta mana arrepintirijpica paitaca congregacionmantami llujshichina can (1 Corintios 5:13). Pero Jehová Diosca juchata ruraj paipajman tigrarichunmi munan. Chaimantami tucuicunamanta huañuchun paipaj Churita cai Allpaman cacharca. Jesús huañushcamantami ñucanchij juchacunamanta perdonashca cai tucunchij (1 Juan 2:​1-ta liyipai). Jehová Diosca juchata rurajcunataca cꞌuyaihuanmi arrepintirichun animan (Zacarías 1:3; Romanos 2:4; Santiago 4:8).

3. ¿Cai yachaipica imatataj yachashun?

³ Jehová Diosca juchatapish, juchata rurajcunatapish pai ricushca shina ricuchunmi munan. Cai yachaipimi chaimanta ashtahuan yachashun. Shinallataj cai tapuicunatami cutichishun: ¿Corinto congregacionpi shuj huauqui jatun juchata rurajpica huauqui panicunaca paitaca ima shinataj tratarcacuna? ¿Juchata  ruraj arrepintirijpica apóstol Pabloca paita ima shina tratachuntaj mandarca? ¿Maijan huauqui o pani jatun juchata rurajpica Jehová Diosca paitaca ima shinataj ricun?

¿PUNTA SIGLOPICA JUCHATA RURAJTACA IMA SHINATAJ TRATARCACUNA?

4. ¿Corinto congregacionpica imataj tucurca? (1 Corintios 5:​1, 2).

⁴ (1 Corintios 5:​1, 2-ta liyipai). Quimsa cutin misionero shina viajacushpaca Pabloca Corinto congregacionpi shuj jatun llaqui tiyashcatami yachaj chayarca. Congregacionmanta shuj huauquimi paipaj lamamahuan huainayashpa causacurca. ‘Chashna huainayajca Diosta mana sirvijcunapurapipish mana uyarishcachu’ carca. Shinapish congregacionmanta huauqui panicunaca “paica allitami ruracun” nishpami imata mana rurarcacuna. Tal vez paicunaca: “Chai huauquita imata mana nishpami Jehová Dios shina llaquijcuna, cꞌuyajcuna cashcata ricuchicunchij” nishpami yuyashcangacuna. Pero Yayitu Diosca mapa ruraicunataca manataj ricunayachinchu. Diosta mana sirvijcunapish shuj huauqui chashna causacushcata yachaj chayashpaca achcatami mancharishcangacuna. Diosmanta yachanatapish paicunaca manachari munashcangacuna. Congregacionmanta maijan huauqui panicunapish chai mapa ruraitaca allita shinami ricui callarishcangacuna. ¿Chaita yachaj chayashpaca apóstol Pabloca imatataj rurarca?

5. a) ¿Pabloca Corintopi caj huauqui panicunamanca imata rurachuntaj mandarca? b) ¿Huauqui panicunaca juchata rurajhuan ña mana tandanacushcataca ima shinataj ricuchina carcacuna? (1 Corintios 5:13; fotomantapish parlapai).

⁵ (1 Corintios 5:​13-ta liyipai). Jehová Dios yuyachijpimi apóstol Pabloca paipaj juchacunamanta mana arrepintirijta congregacionmanta llujshichichun nishpa quillcarca. ¿Huauqui panicunaca congregacionmanta llujshichishca runataca ima shinataj tratana carcacuna? Pabloca paihuan ‘ama tandanacuchunmi’ mandarca. Shinallataj: “Paihuanca micungapajllapish ama tiyaringuichijchu” nircami (1 Corintios 5:11). Micungapaj pihuan tiyarishpaca paihuan parlanacunaca jahuallami can. Chaimantami apóstol Pabloca congregacionmanta llujshichishca runahuan micungapajllapish ama tiyarichun nishpa mandarca. Chashnami huauqui panicunaca pai shina ama yuyangapaj cuidarircacuna (1 Corintios 5:​5-7). Shinallataj huauqui panicuna paihuan ña mana tandanacujta ricushpaca juchata rurajca Diosmanta achcata caruyashcatami cuentata cushcanga. Ashtahuanpish paipaj mapa ruraicunamanta pingarishpa arrepintiringapajmi oportunidadta charirca.

6. ¿Corinto congregacionmanta huauqui panicunapish, juchata rurajpish apóstol Pablo cachashca cartataca ima shinataj chasquircacuna?

⁶ Apóstol Pabloca: ‘¿Corintomanta huauqui  panicunaca ñuca cachashca cartata allichu chasquircacuna?’ nishpami sustarishcanga. Pero huauqui panicuna paipaj cartata alli chasquishcata Tito huillajpica Pabloca achcatami cushicurca. Corintomanta huauqui panicunaca apóstol Pablo imalla mandashcatami cazushcacuna carca (2 Corintios 7:​6, 7). Ashtahuanpish Pablo paipaj cartata cachashcamanta huaquin quillacuna qꞌuipallami juchata rurajca ña arrepintirishca carca. Paica mapa ruraicunata ladoman saquishpami cutin Jehová Dios munashca shina causai callarishcarca (2 Corintios 7:​8-11). ¿Chaita yachaj chayashpaca Pabloca huauqui panicuna imata rurachuntaj mandarca?

¿ARREPINTIRIJ RUNATACA HUAUQUI PANICUNACA IMA SHINATAJ TRATANA CARCACUNA?

7. ¿Congregacionmanta llujshichishca runaca imatataj rurarca? (2 Corintios 2:​5-8).

⁷ (2 Corintios 2:​5-8-ta liyipai). Pabloca: “Juchata ruraj runataca ñami sinchita cunashcanguichij. Chaimanta paitaca chasquipaichijlla”  nircami. Congregacionmanta llujshichishca runaca paipaj juchacunamanta arrepintirina cashcatami cuentata curca. Shungumanta arrepintirijpimi huauqui panicunaca cutin paitaca alli chasquircacuna (Hebreos 12:11).

8. ¿Pabloca Corintomanta huauqui panicunataca imata rurachuntaj mandarca?

⁸ Pabloca Corinto congregacionmanta huauqui panicunataca: ‘Tucui shunguhuan perdonashpa paita cushichichij. Paita cꞌuyashcata ricuchichunmi cancunataca rogapani’ nishpami quillcarca. Pabloca chai huauquita congregacionpi cutin chasquina cashcallataca mana nicurcachu. Ashtahuanpish arrepintirishca huauquita paicunapaj rimaicunahuan, ruraicunahuan shungumanta perdonashcata, cꞌuyashcata ricuchichunmi munarca. Chaita rurashpami paicunaca congregacionpi paita cushilla chasquicushcata ricuchircacuna.

9. ¿Juchata ruraj huauqui arrepintirishpa congregacionman tigrajpica maijancunaca ima shinataj sintirishcangacuna?

⁹ ¿Arrepintirij huauquita congregacionpi cutin chasquinaca huaquincunapajca sinchichu cashcanga? Bibliapica chaitaca mana huillanchu. Pero chai huauquipaj culpamantami congregacionpica problemacuna tiyashcanga. Huaquin huauqui panicunaca paipaj culpamantami sufrishcangacuna. Chaimantami congregacionpi cutin paita chasquinaca paicunapajca sinchi cashcanga. Shinallataj maijancunaca: “Ñucanchijca Jehová Diosta tucuipi cazungapaj, Diospaj pueblomanta ama llujshingapajpish achcatami esforzarishcanchij. ¿Maitataj jatun juchacunata rurajtaca congregacionpi cutin alli chasquishunyari?” nishpami pꞌiñarishcangacuna (Lucas 15:​28-30-tapish ricui). ¿Pero chai huauqui panicunaca chai huauquimanca imamantataj cꞌuyaita ricuchina carcacuna?

10, 11. ¿Ancianocunaca arrepintirij huauquita mana perdonasha nishca cajpica imataj tucunman carca?

¹⁰ ¿Anciano huauquicuna arrepintirij huauquita congregacionpi mana chasquishca cajpica paica ima shinataj sintirinman carca? O ¿congregacionpi cutin chasquijpipish huauqui panicuna paiman cꞌuyaita mana ricuchishca cajpica paica ima shinataj sintirinman carca? Seguramente paica yallitajmi llaquirinman carca. Ashtahuanpish Jehová Diospaj ñaupajpi cutin alli ricuringapaj esforzarishpa catinatami saquinman carca.

¹¹ Maijan huauqui panicunaca arrepintirij huauquitaca manachari perdonasha nishcangacuna. Pero paita mana perdonashca cashpaca paicunaca Jehová Diosmantami caruyanman carcacuna. ¿Imamanta? Jehová Diosca paicunapaj juchacunamanta arrepintirijcunataca cꞌuyaihuanmi perdonan. Pero Diabloca mana chashnachu can. Chaimantami huauqui panicuna arrepintirij huauquita mana perdonashca cashpaca Diablo shina millaicuna cashcata ricuchinman carca. Ashtahuanpish Diabloca chai huauqui panicunata utilizashpami arrepintirij huauquitaca desanimachinman carca (2 Corintios 2:​10, 11; Efesios 4:27).

12. ¿Corinto congregacionmanta huauqui panicunaca Jehová Dios shinaca imatataj rurana carcacuna?

¹² ¿Congregacionmanta huauqui panicunaca Diablo shina mana cashcata, ashtahuanpish Jehová Dios shina cashcata ricuchingapajca imatataj rurana carcacuna? Paicunaca arrepintirij huauquitaca Jehová Dios tratashca shinami tratana carcacuna. Rey Davidca Jehová Diosmanta parlashpaca: “Jatun Dios quiquinca allimari cangui, perdonajmari cangui” nircami (Salmo 86:5). Cutin Miqueasca: “Taita Dioslla, can shina Diosca manamari pi shujtajca tiyanchu. Canca can agllashcacunapuramanta saquirijcuna millaita rurashcatapish cungarijmi cangui. Paicunapaj juchatapish perdonajmi cangui” nircami (Miqueas 7:18). Profeta Isaiaspish: “Diosta mana rijsij cambaj ñanta saquishpa, Mandaj Diosman cutiri. Millai runa millai yuyaita saquishpa, Mandaj Diosman cutiri. Paimi  paitaca llaquinga. Ñucanchij Diospaj perdonca yallitaj jatunmi” nircami (Isaías 55:7).

13. ¿Juchamanta arrepintirij huauquita congregacionpi cutin chasquinaca imamantataj alli carca? (“ ¿Corinto congregacionmanta llujshichishca runaca mashna tiempopitaj Diospaj puebloman tigrarca?” nishca recuadrotapish ricui).

¹³ Corintomanta huauqui panicunaca Jehová Dios shina cashcata ricuchingapajca arrepintirij huauquitaca allimi chasquina carcacuna. Shinallataj paita cꞌuyashcatami ricuchina carcacuna. Chaita rurashpami paicunaca ‘tucuipi cazujcuna cashcata’ ricuchircacuna (2 Corintios 2:9). Chai huauquita congregacionmanta llujshichishca punllamantaca huaquin quillacunallami pasashca carca. Shinapish paica tucui shunguhuanmi arrepintirishca carca. Chaimantami paita congregacionpi cutin chasquingapajca ashtahuan tiempota shuyanaca mana minishtirirca.

JEHOVÁ DIOS SHINA CASHCATA RURAJCUNA, CꞌUYAJCUNA CASHUNCHIJ

14, 15. ¿Corinto congregacionpi imalla tucushcamantaca imatataj yachanchij? (2 Pedro 3:9; fotomantapish parlapai).

¹⁴ Corinto congregacionpi imalla tucushcacunaca ‘ñucanchijta yachachingapajmi’ quillcashca carca (Romanos 15:4). Bibliapi chaita liyishpami Yaya Dios paipaj pueblo ucupi mapa ruraicuna tiyachun manataj saquij cashcata intindinchij. Maijancunaca tal vez “juchata rurajcuna mana arrepintirijpipish paicunaman cꞌuyaita  ricuchingapajmi Diospaj pueblopi cachun saquinalla canchij” nishpachari yuyancuna. Pero Jehová Diosca chaitaca mana munanchu. Yaya Jehová Diosca perdonaj, llaquij cashpapish mapa ruraicunataca manataj ricunayachinchu. Paipaj mandashcacunatapish manataj cambianchu (Judas 4). Ashtahuanpish paicunapaj juchacunamanta mana arrepintirijcunata congregacionmanta mana llujshichijpica paicunaca tal vez shujtaj huauqui panicunatapishmi pandachingacuna (Proverbios 13:20; 1 Corintios 15:33).

¹⁵ Shinallataj Jehová Dios shujllapish mana chingarichun munashcatami yachashcanchij. Chaimantami paica tucuicunata ayudasha nin. Juchata rurajcuna paicunapaj juchacunamanta arrepintirishpa paipajman tigrajpica Jehová Diosca cutinmi paicunataca alli chasquinga (Ezequiel 33:11; 2 Pedro 3:​9-ta liyipai). Jehová Diosca Corintomanta runa salvarichunmi munarca. ¿Paipaj juchacunamanta arrepintirishpa mana allita ruranata saquijpica Jehová Diosca imatataj rurarca? Huauqui panicuna paita perdonashpa congregacionpi cutin chasquina cashcata intindichunmi apóstol Pabloman shuj cartata quillcachun mingarca.

16. ¿Jehová Dios Corintomanta huauquita ima shina tratashcata ricushpaca ima shinataj sintiringui?

¹⁶ ¿Jehová Dios Corintomanta huauquita ima shina tratashcata ricushpaca imatataj yachanchij? Jehová Dios cꞌuyaita ricuchij cashcata, imapipish cashcata ruraj cashcatami intindinchij (Salmo 33:5). ¿Chaita intindishpaca manachu tucuicuna Jehová Diosta jatunyachishun ninchij? Tucuicunami juchayujcuna canchij. Chaimantami tucuicuna Jehová Dios ñucanchijcunata perdonachun minishtinchij. Ashtahuanpish Jehová Dios paipaj Churita ñucanchijcunamanta huañuchun cachashcamantami tucuicuna agradicina canchij.

17. ¿Catij yachaicunapica imatataj yachashun?

¹⁷ ¿Maijan huauqui o pani jatun juchata rurajpica anciano huauquicunaca Jehová Diospaj ejemplota catishcataca ima shinataj ricuchincuna? Shinallataj ¿maijan huauqui o pani congregacionmanta llujshichishca cajpi o congregacionman tigrajpica imatataj rurana canchij? Chaitaca catij yachaicunapimi yachashun.