1, 2. a) ¿Perdonanaca ima horastaj ñucanchijpajca sinchi canga? b) ¿Deniseca shungumanta perdonashcataca ima shinataj ricuchirca?

 ÑUCANCHIJTA achcata llaquichijcunata perdonanaca maipica sinchimi can. Pero achcata llaquichishca cajpipish paicunatami perdonai tucunchij. Caita alli intindingapajca pani Denisepaj ejemplomanta yachashun. Paica shungumanta perdonanatami yacharca. a Huata 2017-pica pani Deniseca paipaj familiandijmi central mundialta visitanaman rirca. Shinapish carropi huasiman tigracujpica shujtaj carromi paicunataca chocarca. Chaimi pani Deniseca desmayarca. Ña yuyaita japishpaca paipaj huahuacuna achcata chugririshca cashcata, paipaj cusapish chai accidentepi huañushcatami yachaj chayarca. Chaimi pani Deniseca dimastij llaquilla, shungu pꞌaquirishca saquirirca. Qꞌuipaca paicunahuan chocaj runa mana elevarishca cashcamanta, machashca cashcamanta o drogarishca cashcamanta paicunahuan chocashcatami yachaj chayarca. Deniseca mana chai runapaj culpa cashcata cuentata cushpaca Yayitu Diostami ‘chai runata ama pꞌiñangapaj, tranquila sintiringapajpish ayudahuai’ nishpa mañarca.

² Carrota manejajtaca Denisepaj cusata mana munashpa huañuchishcamantami juicioman aparcacuna. Juezcuna culpable cashcata decidijpica paica carcelmanmi rina carca. Pani Deniseca chai juiciopimi declarana carca. Shuj policiaca: “Can nishcacunata uyashpami juezcunaca chai runata carcelpi churanata o mana churanata decidingacuna” nircami. Deniseca juezcunapaj ñaupajpi accidentepi tucui ima tucushcata parlana cashcata yachaj chayashpaca chugrichishcapi cachita churashca shinami dimastij llaquilla sintirirca. Huaquin semanacuna huashallami Deniseca juiciopi declaranaman rirca. Chai runa paipaj familiata achcata llaquichishca cajpipish ¿Deniseca imatataj rurarca? Paica jueztaca  chai runata llaquishpa ayudachunmi mañarca. b Denise declarashcata uyashpami juezca huacai callarirca. Paica: “25 huatacunatami juez cashcani. Shinapish llaquichijta cashna perdonachun, ayudachun mañajtaca nunca mana ricushcanichu. Cai huarmica yallitaj cꞌuyaj cashcamantami perdonarca” nircami.

 3. ¿Deniseca imamantataj paita llaquichijta perdonarca?

³ ¿Deniseca imamantataj paita llaquichijta perdonarca? Paica Jehová Dios ima shina perdonaj cashcatami yuyarirca (Miqueas 7:18). Ñucanchijpish Jehová Dios ñucanchijta perdonashcamanta agradicishpaca shujtajcunata perdonanatami munashun.

 4. ¿Diosca imata rurachuntaj munan? (Efesios 4:32).

⁴ Jehová Diosca ñucanchijtaca shungumantami perdonan (Efesios 4:​32-ta liyipai). Paica ñucanchijcunapish shujtajcunata shungumanta perdonachunmi munan (Salmo 86:5; Lucas 17:4). Shujtajcunata ima shina perdonana cashcata yachangapajca cai yachaipica quimsa yuyaicunatami ricushun.

¿IMATATAJ MANA RURANA CANCHIJ?

 5. ¿Proverbios 12:​18-pica imatataj intindichin?

⁵ Paipaj rimashcacunahuan o rurashcacunahuan pi ñucanchijta llaquichijpica achcatami llaquirinchij. Familiacuna, amigocuna chashna llaquichijpicarin ashtahuanmi llaquirinchij (Salmo 55:​12-14). Maipica espadahuan chugrichishca shinami sintirinchij (Proverbios 12:​18-ta liyipai). Chashna llaquichijpica tal vez ima mana tucushca shinami ñaupajman catinata munashun. Pero chaita rurashpaca llaquilla sintirinataca mana saquishunchu. Ashtahuanpish cuchillohuan ñucanchijta tujsishca qꞌuipa cuchillota chugrimanta mana anchuchishca shinami canman.

 6. ¿Pi ñucanchijta llaquichijpica ima shinataj sintirinchij?

⁶ Bibliapi nishca shinaca pi ñucanchijta llaquichijpica maipica ratomi pꞌiñarinchij. Shinapish Bibliapica ama pꞌiñarishca saquirichunmi animan (Salmo 4:4; Efesios 4:26). ¿Imamantataj chai consejota catina canchij? Pꞌiñarishca saquirishpaca ñucanchijta llaquichijcunatami tigra llaquichinata munashun. Pero chaita ruranaca mana allichu can (Santiago 1:20). Shinashpaca pi llaquichishcamanta rato pꞌiñarishpapish pꞌiñarishca saquirinata o mana saquirinataca cada unomi agllana canchij.

 7. ¿Maijancunaca pi llaquichishcamantaca ima shinataj sintirishcacuna?

⁷ ¿Maijancunaca pi llaquichishcamantaca ima shinataj sintirishcacuna? Pani Anaca cashnami nirca: “Huahuaraj cajpica ñuca yayaca ñuca mamitata saquishpami ñucata cuidaj huarmihuan cazararca. Ñucanchijta shitashpa rishcamantami achcata llaquirircani. Chai huarmihuan huahuacunata charijpicarin ñucata ña mana cꞌuyashcatami yuyarcani” nircami. Pani Yadirapish paipaj cusa shujtaj huarmihuan puricushcata yachaj chayashpaca shungu pꞌaquirishcami saquirirca. Paica: “Ñuca cusahuanca uchillamantapachami alli apanacurcanchij. Ishquindijmi precursorcuna carcanchij” nircami. Cutin pani Naomica: “Ñuca cusa pacalla pornografiata ricuj cashcata ñucaman huillajpica shujtaj huarmihuan ñucata traicionashca shinami sintirircani. Ñucata chashna llaquichinataca nunca mana yuyarcanichu” nircami.

 8. a) ¿Shujtajcunata mana perdonashpaca ima shinataj sintirishun? b) ¿Perdonajcuna cashpaca ima shinataj beneficiarishun? (“ ¿Pi llaquichishcamanta traumado saquirishpaca imatataj rurana cangui?” nishca recuadrota ricui).

⁸ Shujtajcuna imata rurashcata, imata nishcataca mana controlai tucunchijchu. Pero ñucanchij  nishcacunata, ñucanchij rurashcacunataca controlai tucunchijmi. Por ejemplo, ¿ñucanchijta llaquichijpica imatataj rurana canchij? Paicunatami perdonana canchij. Jehová Diosta cꞌuyashcamantami chaitaca rurana canchij. Paica perdonajcuna cachunmi munan. Pero resentidos saquirishpaca mana alli yuyashpami imatapish ruranata munashun. Ñucanchij saludtapishmi llaquipi churashun (Proverbios 14:​17, 29, 30). Pani Cristinaca: “Resentida saquirishpaca ña mana tanto asinichu. Mana alli micunacunatami micuni. Dormitapish mana dorminichu. Shinallataj mana alli yuyashpami imatapish rurani o imatapish nini. Chaimi ñuca cusahuan, shujtaj turi ñañacunahuanpish apanacunaca sinchi can” nircami.

 9. ¿Imamantataj mana resintirishca saquirina canchij?

⁹ Ñucanchijta llaquichijcuna perdonta mana mañajpica ¿imatataj rurana canchij? Perdonta mana mañajpipish ama llaquilla sintiringapajmi esforzarina canchij. Párrafo 7-pi parlashca pani Yadiraca: “Ñuca ñaupa cusahuan ama yallitaj pꞌiñarishca cangapaj, ama resentirishca cangapajca tiempo pasachunmi minishtircani. Pero ña yallitaj pꞌiñarishca canata saquishpaca tranquilami sintirircani” nircami. Ama llaquilla causangapajca resentirishca canatami saquina canchij. Resentirishca canata saquishpaca tranquilo, sumaj causaitami chari tucushun (Proverbios 11:17). Pero ñucanchijta llaquichijcunata perdonangapaj manaraj listo cashcata yuyashpaca ¿imatataj rurana canchij?

ÑAUPAJMAN CATI

10. ¿Shungumanta perdonangapajca imamantataj asha tiempo pasachun minishtinchij? (Fotocunamantapish parlapai).

¹⁰ Pi canta llaquichijpi ama llaquilla sintiringapajca ¿imatataj rurana cangui? Asha tiempo pasachunmi saquina cangui. Shuj accidenteta charij runapi yuyashun. Paica doctorpajman rishca qꞌuipaca alli tucungapajca tiempo pasachunmi saquina can. Ñucanchijpish ama llaquilla sintiringapaj, shungumanta perdonangapajca asha tiempo pasachunmi minishtinchij (Eclesiastés 3:3; 1 Pedro 1:22).

11. ¿Shungumanta perdonangapajca imamantataj Jehová Diosta mañana canchij?

¹¹ Shungumanta perdonangapajca Jehová Diostami mañana canchij. c Pani Anaca: “Yayitu Diostami ‘ñuca familia imapi fallashca cajpica  perdonapangui’ nishpa mañarcani. Chai huashaca ñuca yayata, paipaj mushuj huarmitapish perdonashcata ningapajmi shuj cartata cacharcani” nircami. Pani Anaca mana jahualla cajpipish shungumantami perdonarca. Paica chaita rurashcamanta paipaj yayapish, paipaj huarmipish Diospajman cꞌuchuyachunmi shuyan.

12. ¿Ñucanchijllapi confianapaj randica imamantataj Jehová Diospi confiana canchij? (Proverbios 3:​5, 6).

¹² Shinallataj ñucanchijllapi confianapaj randica Jehová Diospimi confiana canchij (Proverbios 3:​5, 6-ta liyipai). Paica ñucanchijta dañota ruraj cosascunata rurachunca mana mañanchu. Ashtahuanpish paica ñucanchijpaj ima alli cashcataca allimi yachan. Chaimantami shujtajcunata perdonachun nin (Salmo 40:4; Isaías 48:​17, 18; 55:​8, 9). Pero, ñucanchij ima shina sintirishcallapi yuyashpaca manachari shujtajcunata perdonai tucushun (Proverbios 14:12; Jeremías 17:9). Pani Naomica: “Ñuca cusa pornografiata ricushcamanta mana perdonashpa allita ruracushcatami yuyaj carcani. Ñucata cutin llaquichinata, ñucata llaquichishcatapish rato cungarinata yuyashpami mana perdonasha nircani. Shinallataj ‘ñuca ima shina sintirishcataca Yayitu Diosca allimi yachan’ nijmi carcani. Pero qꞌuipaca Yayitu Dios ñuca ima shina sintirishcata alli intindishpapish ñucahuan mana de acuerdo cashcatami intindircani. Paica shujtajcunata perdonana mana jahualla cashcataca allimi yachan. Pero shujtajcunata perdonachunmi munan” nircami. d

ALLI CUALIDADCUNATA RICUCHI

13. Romanos 12:​18-21-pi nishca shinaca ¿imatataj rurana canchij?

¹³ Shujtajcunata perdonashcata ricuchingapajca paicuna ñucanchijta ima shina llaquichishcata ña mana parlanatachari decidishun. Pero shujtajcunata perdonangapajca mana chaillatachu rurana canchij. Por ejemplo, maijan huauqui o pani ñucanchijta llaquichishca cajpica paihuan alli tucushpami shungumanta perdonashcata ricuchina canchij (Mateo 5:​23, 24). Paihuan alli tucungapajca pꞌiñarishca cashcata ricuchinapaj randica cꞌuyaitami ricuchina canchij. Shinallataj paihuan resintirinapaj randica shungumantami perdonana canchij (Romanos 12:​18-21-ta liyipai; 1 Pedro 3:9). Chashna perdonangapajca ¿imatataj rurai tucunchij?

14. ¿Shujtajcunataca imamantataj Jehová Dios ricushca shina ricuna canchij?

 ¹⁴ Ñucanchijta llaquichijcunataca Jehová Dios ricushca shinami ricuna canchij. Paica cada unopaj alli cualidadcunatami ricun (2 Crónicas 16:9; Salmo 130:3). Pero paicunapaj pandarishcacunallata ricushpaca mana allicuna cashcatami yuyai callarishun. Paicunapaj alli cualidadcunata ricungapaj esforzarishpaca paicunata perdonanapish jahuallami canga. Por ejemplo, huauqui Jairoca: “Huauqui panicunapaj pandarishcacunallata ricunapaj randica paicunapaj alli cualidadcunata ricungapajmi esforzarini. Chaimantami paicuna pandarijpica jahualla perdonai tucushcani” nircami.

15. ¿“Perdonanimi” ninaca imamantataj importante can?

¹⁵ Shinallataj ñucanchijta llaquichijcunataca perdonashcatami nina canchij. ¿Chaita ruranaca imamantataj importante can? Pani Naomica: “Ñuca cusaca: ‘¿Ñachu ñucata perdonarcangui?’ nishpami tapurca. ‘Perdonanimi’ nisha nishpaca mana valircanichu. Chaipimi manaraj shungumanta perdonashcata cuentata curcani. Pero tiempohuanca paita perdonashcatami ni tucurcani. Chaita uyashpaca ñuca cusaca de contentomi  huacarca. Cutin ñucaca ‘perdonanimi’ ni tucushcamantaca tranquilami sintirircani. Chai punllamantaca paipica asha ashami confiashpa catircani. Cunanca cutinllatajmi alli amigocuna canchij” nircami.

16. ¿Caicamaca perdonanamantaca imatataj yachashcanchij?

¹⁶ Yayitu Diosca shujtajcunata shungumanta perdonachunmi munan (Colosenses 3:13). Shinapish huaquinpica shungumanta perdonanaca sinchimi cai tucun. Pero, chaipajca cai quimsa yuyaicunatami pajtachina canchij: Puntapica ima mana tucushca shinaca mana purinachu canchij. Ishquipica ñaupajmanmi catina canchij. Y quimsapica alli cualidadcunatami ricuchina canchij (“ Shungumanta perdonangapaj quimsa consejocuna” nishca recuadrota ricui).

PERDONASHPACA BENDICIONCUNATAMI CHASQUISHUN

17. ¿Imamantataj perdonajcuna cana canchij?

¹⁷ ¿Imamantataj perdonajcuna cana canchij? Perdonashpaca Jehová Dios shina cꞌuyajcuna, llaquijcuna cashcatami ricuchishun (Lucas 6:36). Shinallataj shujtajcunata perdonashpaca Jehová Dios ñucanchijta perdonashcamanta agradicishcatami ricuchishun (Mateo 6:12). Ashtahuanpish perdonajcuna cashpaca alli saludtami charishun. Shujtajcunahuanpish allimi apanacushun.

18, 19. ¿Shujtajcunata perdonashpaca ima bendicioncunatataj chasquishun?

¹⁸ Shungumanta perdonashpaca mana yuyashca bendicioncunatami chasquishun. Punta parrafocunapi parlashca pani Denisehuan ima tucushcata ricushun. Paipaj familiahuan chocaj runaca jucio tucurishca huashaca paillataj huañunatami yuyacushcarca. Pero, pani Denise shungumanta paita perdonashcata ricushpaca chai runaca mancharishcami saquirirca. Chaimantami paica testigo de Jehovacunahuan Bibliata estudiai callarirca.

¹⁹ Shujtajcunata perdonanaca yallitaj sinchichari canga. Pero, chaita ruranaca achca valishcami can (Mateo 5:7). Chaimanta Jehová Dios shina shungumanta perdonajcuna cangapaj esforzarishunchij.