1, 2. ¿Bautizaringapaj can manaraj listo cashpaca imamantataj mana desanimarina cangui? (Página 1-pi tiyaj fotomanta parlapai).

 ¿BAUTIZARINGAPAJ ñachu listo cangui? Can bautizarina munaita charijpica achcatami felicitanchij. Tal vez canca bautizaringapaj ña listo cashcatami yuyangui. Ancianocunapish tal vez can ña listo cashcatami nishcacuna. Chashna cajpica rato bautizarichunmi animanchij. Bautizarishpaca tucui causaipimi Jehová Diosta cushilla sirvi tucungui.

² Shinapish ¿ancianocuna bautizaringapaj can manaraj listo cashcata huillajpica imatataj rurana cangui? ¿O canllataj bautizaringapaj manaraj listo cashcata yuyashpaca imatataj rurana cangui? Mana desanimarinachu cangui. Chaipaj randica can jovenlla o mayorlla cashpapish bautizaringapajmi esforzarishpa cati tucungui.

3. ¿Etiopía llajtamanta shuj runaca Felipetaca imatataj nirca? (Hechos 8:36, 38).

³ (Hechos 8:36, 38-ta liyipai). Etiopía llajtata mandaj huarmita sirvij shuj runaca Felipetaca: “¿Ima nishpataj mana bautizari tucuni?” nishpami tapurca. Chai runaca bautizarinatami munarca. Pero ¿paica bautizaringapajca listochu carca?

4. ¿Etiopía llajtamanta runaca Diosmanta ashtahuan yachasha nishcataca ima shinataj ricuchirca?

⁴ Etiopía llajtamanta eunuco runaca judiocunapaj religiontami catij carca. Chaimantami Diosta adorangapaj Jerusalenman rishca carca (Hechos 8:27). Shinallataj Ñaupa Testamentota alli rijsishcamantami Jehová Diosmantaca achcata yacharca. Pero chai yachashcacunallahuanca paica mana saquirisha nircachu. Chaimi chai eunuco runaca profeta Isaiaspaj quillcashcacunata liyicurca (Hechos 8:28).

5. ¿Etiopía llajtamanta runaca paipaj ruraicunahuan Diosta cazucushcataca ima shinataj ricuchirca?

 ⁵ Chai runaca achca poderta charij Etiopía llajtata mandaj Candace nishca huarmita sirvijmi carca. Shinallataj chai huarmipaj tucui imalla charishcacunata cuidajmi carca (Hechos 8:27). Paica achca trabajota charishcamantami ocupado pasaj cashcanga. Shinapish Yayitu Diosta adorangapajmi tiempota surcurca. Chai runaca Diosmanta imata yachashpallaca mana saquirircachu. Ashtahuanpish imata yachashcataca ruraicunahuanmi pajtachirca. Chaimantami Etiopía llajtamanta Jerusalenpi tiyaj templocama Diosta adorangapaj rirca. Jerusalenman chayangapajca carutami viajashcanga, achca cullquitapishmi minishtishcanga. Chai runaca Jehová Diosta adorangapajmi achcata esforzarirca.

6, 7. ¿Etiopía llajtamanta runaca imata yachashpataj Jehová Diosta ashtahuan cꞌuyai callarirca?

⁶ Felipeca Etiopía llajtamanta runamanca chai runa mana yachashca valishca yuyaicunatami yachachirca. Por ejemplo, Yayitu Dios cachasha nishca Mesías, Jesús cashcatami yachachirca (Hechos 8:34, 35). Etiopía llajtamanta runaca Jesús paimanta imata rurashcata yachashpaca achcatami cushiyarishcanga. ¿Chaita yachaj chayashpaca chai runaca imatataj decidirca? Paica judiocunapaj respetashca, rijsishcami carca. Chaimi chai religionllapitaj saquirinata decidi tucurca. Pero Jehová Diostapish, Jesustapish achcata cꞌuyashcamantami Jesusta catij tucunata, bautizarinatapish decidirca. Felipeca chai runa bautizaringapaj listo cashcata ricushpaca paitami bautizarca.

⁷ Etiopía llajtamanta runamantaca bautizaringapaj imallata pajtachina cashcatami yachai tucungui. Cunanca chai runapaj ejemplota catishpa Bibliamanta yachashpa catina cashcata, imata yachashcata practicapi churana cashcata, Jehová Diosta ashtahuan cꞌuyashpa catina cashcatapishmi yachangui. Caicunata pajtachishpaca Etiopía llajtamanta runa shina bautizaringapaj listo cashcatami ricuchingui.

8. Juan 17:3-pi nishca shinaca ¿imata rurashpataj catina cangui?

⁸ (Juan 17:3-ta liyipai) ¿Juan 17:3-pi Jesús ima nishcata uyashpaca Bibliamanta yachanatachu decidishcangui? Achcacunami chai versota liyishpaca chashna decidishcacuna. Shinapish cai shimicunaca imata yachashcacunallahuan ama saquirichun, ashtahuanpish yachashpa catichunmi animan. Yayitu Diosmantaca huiñaipajmi yachashpa catishun (Eclesiastés 3:11, NWT). Chashna  Diosmanta yachashpa catishpaca paipajmanmi ashtahuan cꞌuchuyashun (Salmo 73:28).

9. ¿Bibliamanta punta yachaicunata yachashca huashaca imatataj yachashpa catina canchij?

⁹ Apóstol Pablo nishca shinaca Jehová Diosmanta yachai callarishpaca punta yachaicunatami yachanchij. Chai punta yachaicunaca huahuata alimentangapaj leche shinami can (Hebreos 5:12; 6:1). Shinapish Pabloca chai punta yachashcacunallahuan ama saquirichun, ashtahuanpish Bibliapi tiyaj sinchi yachaicunatapish yachachunmi animarca. ¿Canpish punta yachaicunata yachangapajchu esforzaricungui? ¿Cambaj feta sinchiyachishpa catingapajca Jehová Diosmanta, paipaj munaimanta yachashpachu caticungui?

10. ¿Estudianaca huaquincunapajca imamantataj sinchi can?

¹⁰ Achcacunaca estudianata mana munancunachu. ¿Canpish chashnallatajchu sintiringui? ¿Escuelapica canmanca liyinata, estudianatachu yachachircacuna? ¿Chaita ruranataca munanguichu? Estudianata mana munajpipish Jehová Diosmi canta ayudanga. Paimi tucuimanta yalli alli yachachij can.

11. ¿Jehová Diosca alli yachachij cashcataca ima shinataj ricuchishca?

¹¹ Jehová Diosca tucuicunamanta yalli alli yachachijmi can (Isaías 30:20, 21). Paica paciente, cꞌuyaj, ñucanchijta alli intindij, ñucanchij alli ruraicunatapish valichijmi can (Salmo 130:3). Paica ñucanchij mana rurai tucushcata rurachunpish mana mañanchu. Jehová Diosca ñucanchijcuna Bibliata alli estudiai tucushcata yachashcamantami estudiachun nin. Paica ñucanchij cerebrota ruracushpaca ñucanchijllataj yachana munaita charichunmi rurarca (Salmo 139:14). Paica paimanta yachashpa cushilla sintirichunmi munan. Caita intindishpaca cunanmantami Bibliata yachana munaita charingapaj esforzarina canchij (1 Pedro 2:2). ¿Chai munaita charingapajca imatataj rurai tucungui? Chaipajca can imata rurai pudishcata pajtachingapajmi esforzarina cangui. Bibliata liyingapaj, estudiangapajpishmi punllanta esforzarina cangui (Josué 1:8). Caita pajtachijpica Jehová Diosllatajmi cushicuihuan Bibliata liyichun, imata liyishcapipish yuyachun ayudanga.

12. ¿Jesuspaj causaimanta estudianaca imamantataj valishca can?

¹² Cai tucuri punllacunapi causacushcamantami Jehová Diosta sirvingapajca Jesuspaj ejemplota catina canchij (1 Pedro 2:21). Chaimantami Jesusmanta yachangapaj, pai rurashcacunapipish yuyangapaj tiempota surcuna canchij. Jesusca paipaj discipulocuna ima llaquicunata charinatami ñucanchijman huillarca (Lucas 14:27, 28). Shinallataj pai shina Jehová Diosmanta mana caruyanatapishmi alli yacharca (Juan 16:33). Chaimanta Jesuspaj causaita alli estudiai, paipaj ejemplota catingapajpish punllanta esforzari.

13. ¿Jehová Diostaca imatataj mañashpa catina cangui?

¹³ Ñucanchijca yachashpallaca mana saquirinachu canchij. Chaipaj randica Jehová Diosta ashtahuan rijsingapaj, paita cꞌuyangapaj, paipi feta churangapajmi esforzarisha ninchij (1 Corintios 8:1-3). Jehová Diosmanta ashtahuan yachashpaca cambaj feta sinchiyachichun Diosta mañai (Lucas 17:5). Chashna mañajpica paimi canta ayudanga. Bibliata estudiacushpa, cambaj feta cutin cutin sinchiyachishpaca espiritualmentemi ñaupajman catingui (Santiago 2:26).

14. ¿Noepaj causaimantaca apóstol Pedroca imatataj yachachirca? (Fotomantapish parlapai).

¹⁴ Apóstol Pedroca Jesusta catijcunamanca imata yachashcata pajtachichunmi yachachirca. Chaita yachachingapajca Noepaj ejemplomantami parlarca. Jehová Diosca Noemanca millai gentecunata tucuchingapajmi juillu tamia tiyanata huillarca. Pero Noepish, paipaj familiapish Jehová Dios ima nishcata yachashpallaca mana saquirircacunachu. Apóstol Pedroca: “Chai punllacunapica Noé shuj arcata ruracujpimi Diosca pacienciahuan shuyacurca” nircami (1 Pedro 3:20). Caipi nishca shinaca Noepish, paipaj familiapish juillu tamia manaraj shamujpimi shuj arcata rurarcacuna. Chashnami Jehová Dios ima nishcata cazurcacuna (Hebreos 11:7). Apóstol Pedroca Noé imata rurashcataca bautismohuanmi chꞌimbapurarca. Paica: ‘Chai punllacunapi ima tucushcataca bautismohuanmi chꞌimbapurai tucunchij. Bautismoca cancunatami quishpichicun’ nircami (1 Pedro 3:21). Ima shinami Noepish, paipaj familiapish juillu tamia manaraj shamujpi shuj arcata rurashpa Jehová Diosta cazurcacuna. Chashnallatajmi canpish manaraj bautizarishpaca Jehová Diosta tucuipi cazushpa allichiringapaj esforzarina cangui. ¿Can manaraj bautizarishpaca ima shinataj allichiri tucungui?

15. ¿Shungumanta arrepintirishcata ricuchingapajca imatataj rurana cangui?

¹⁵ Ñucanchij juchacunamantami shungumanta arrepintirina canchij (Hechos 2:37, 38). Shungumanta arrepintirishcata ricuchingapajca chai juchacunallapitaj ña mana cutin tigra urmanachu canchij. Por ejemplo, Jehová Dios mana munashcacunata, huainayanata, tabacota fumanata, millai shimicunata parlanatapishmi saquina cangui (1 Corintios 6:9, 10; 2 Corintios 7:1; Efesios 4:29). Chaicunata manaraj saquishca cashpaca esforzarishpami catina cangui. Shinallataj Bibliamanta yachachijta, ancianocunatapishmi canta ayudachun mañai tucungui. Can jovenraj cashpa, cambaj yaya mamahuan causacushpaca mana allicunata  mishangapaj ayudachunmi paicunata mañai tucungui.

16. ¿Jehová Diosta punta lugarpi churangapajca imatataj rurana cangui?

¹⁶ Cunanmantami Yayitu Diosta sirvinata punta lugarpi churana cangui. Por ejemplo, tandanacuicunaman rinata, chaipi participanatapish mana saquinachu cangui (Hebreos 10:24, 25). Publicador tucushpacarin predicanatapish mana saquinachu cangui. Predicanata mana saquishpaca canllatajmi ashtahuan cushiyaringui (2 Timoteo 4:5). Cutin can jovenraj cashpa cambaj yaya mamahuan causacushpaca cashna nishpa tapuri: “¿Ñuca yaya mamaca tandanacuiman ri, huillanaman llujshi nishpachu catirashpa mañacun? ¿O chaicunataca ñuca shungumantachu pajtachini?”. Caicunata canllamantataj pajtachishpaca sinchi feta charishcata, Jehová Diosta cꞌuyashcata, paita agradicishcatapishmi ricuchingui. Caicunaca Jehová Diosman shuj regalota cucushca shinami can (2 Pedro 3:11; Hebreos 13:15). Shinapish Jehová Diosca pi ama obligachun, ashtahuanpish paita cꞌuyashcamanta caicunata pajtachichunmi munan (2 Corintios 9:7-ta ricui). Ñucanchijpish Jehová Diosta tucui shunguhuan sirvishpaca cushillami sintirishun.

17, 18. ¿Bautizaringacama ama shaicuringapajca imatataj rurana cangui? (Proverbios 3:3-6).

¹⁷ Can bautizaringacamaca achca jarcaicunatami charingui. Quizás cambaj crishcacunamantami burlaringacuna o llaquichisha ningacuna (2 Timoteo 3:12). Mana cashpaca mana allicunata saquinaca cambajca sinchimi canga. Chaimantachari “mana bautizari tucushachu” nishpa llaquilla sintiringui. Pero ¿ama saquiringapajca imatataj rurana cangui? Jehová Diosta cꞌuyashpa catingapajmi esforzarina cangui.

¹⁸ Jehová Diosta cꞌuyanaca tucuimanta yalli valishcami can (Proverbios 3:3-6-ta liyipai). Paita cꞌuyashpaca ima llaquicuna, jarcaicuna ricurijpipish chaicunatami ahuantangui. Jehová Diosca paita sirvijcunataca mana tucurij cꞌuyaitami ricuchin. Chaimantami paicunataca manataj saquin (Salmo 100:5). Canpish Diosman rijchaj rurashca cashcamantami Jehová Dios shina mana tucurij cꞌuyaita ricuchi tucungui (Génesis 1: 26). Pero ¿chashna cꞌuyaita ricuchingapajca imatataj rurana cangui?

19. ¿Jehová Diosta agradicina munaita charingapajca imatataj rurana canchij? (Gálatas 2:20).

¹⁹ Puntapica agradecidomi cana cangui (1 Tesalonicenses 5:18). Chaipajca “¿Jehová Diosca ñucata cꞌuyashcataca ima shinataj ricuchishca?” nishpami punllanta tapurina cangui. Jehová Dios canta ima shina bendiciashcata cuentata cushpaca chaicunamanta agradicingapajmi Diosta mañana cangui. Chaita rurashpaca Jehová Dios canta achcata cꞌuyashcatami apóstol Pablo shina cuentata cungui (Gálatas 2:20-ta liyipai). Qꞌuipaca cashna nishpa tapuri “¿Ñucapish Jehová Diosca cꞌuyashcatachu ricuchini?”. Jehová Diosta shungumanta cꞌuyashpaca ima tentacioncunamantami caruyangui, problemacunatapishmi ahuantangui. Diosta sirvinatapish manataj saquinguichu.

20. a) ¿Yayitu Diosman mingaringapajca imatataj rurana cangui? b) ¿Diosman mingarinaca imamantataj valishca can?

²⁰ Jehová Diosta tucui shunguhuan cꞌuyashpaca cambaj causaitami paiman mingana cangui. Diosman mingaringapajca “canllatami tucui causaipi sirvisha” nishpami Diosta mañana cangui. Diosman mingarishpaca ima llaquicuna tiyajpipish ña mana cambajllachu causana cangui. Ashtahuanpish Diospajllami causana cangui. Chashna ruranaca mana shuj pugllaillachu can. Shuj cutinllami Jehová Diosman mingarina canchij. Diosman mingarinaca tucuimanta yalli alli decisionmi can (Salmo 50:14). Diabloca Diosta cꞌuyanata saquichun, paita sirvinata saquichunmi pandachisha ninga. Pero pandachichunca manataj saquinachu cangui (Job 27:5). Ashtahuanpish Diosta tucui shunguhuan cꞌuyashpaca paitaca manataj saquinguichu.

21. ¿Bautizarishca huashaca imatataj rurashpa catina cangui?

²¹ Jehová Diosman mingarishca huashaca bautizaringapajmi ancianocunahuan parlana cangui. Can bautizarishpaca Jehová Diostami sirvi callaringui. Shinapish bautizarishca huashaca Jehová Diosta sirvinaca mana nunca tucuringachu. Chaimanta cunanmantapacha Jehová Diostapish, Jesustapish cꞌuyashpa catingapaj punllantami esforzarina cangui.