1, 2. a) Efesios 6:16-pi nishca shinaca ¿imamantataj sinchi feta charina canchij? b) ¿Cai yachaipica ima tapuicunamantataj yachashun?

SOLDADOCUNACA jatun escudocunata charishcamantami contracuna llaquichisha nijpica taparijcuna carca (Efesios 6:16-ta liyipai). Ñucanchijpish sinchi feta charishpaca huainayanamanta, mana alli ruraicunamantami cuidarishun.

² Cai tucuri punllapica tucui laya llaquicunami ricurin. Sinchi feta charishpallami cai llaquicunata ahuantashun (2 Timoteo 3:1). ¿Ñucanchij fe sinchi cashcataca ima shinataj yachanchij? ¿Feta sinchiyachingapajca imatataj rurana canchij? Cai yachaipica cai tapuicunamantami yachashun.

3. a) ¿Soldadocunaca paicunapaj escudocunataca ima shinataj cuidajcuna carca? b) ¿Imamantataj chashna cuidajcuna carca?

³ Ñaupa tiempopica escudocunataca fierrohuan rurashpami cuerohuan tapajcuna carca. Soldadocunaca paicunapaj escudocuna ama dañarichunca grasatami churajcuna carca. Shinallataj shuj soldadoca paipaj escudo dañarishcata ricushpaca allichinamanmi cachaj carca. Chashnami macanacungapajca listo carca.

4. a) ¿Ñucanchij fe sinchi cachunca imapajtaj ricurana canchij? b) ¿Ñucanchij fe sinchi cashcata yachangapajca ima tapuicunapitaj yuyana canchij?

⁴ Ima shinami soldadocunaca paicunapaj escudocunata alli cachun ricurajcuna carca. Shinallatajmi ñucanchij  fe sinchi cachunca ricurana canchij. Chashnami supaicunahuan macanacungapaj, llaquicunata ahuantangapajpish listos cashun (Efesios 6:10-12). ¿Sinchi feta charingapajca imatataj rurana canchij? Puntapica, Jehová Diostami pai ayudachun mañana canchij. Qꞌuipaca, Bibliatami liyina canchij. Chashnami ñucanchijmanta Dios imata yuyashcata yachashun (Hebreos 4:12). Bibliapica: “Mandaj Diospi cambaj tucui shunguta churangui. Ama can alli yuyaiyuj cashcallapi shunguta churanguichu” ninmi (Proverbios 3:5, 6). Ñucanchij fe sinchi cashcata yachangapajca cai tapuicunapi yuyashun. ¿Cullqui illaj saquirishpaca Hebreos 13:5-pi Jehová Dios imata cusha nishcata yuyarishcanchijchu? Chai versopica Diosca: “Cantaca manataj shitashachu, manataj cungarishachu” ninmi. ¿Cai versota yuyarishpaca Jehová Dios ayudanata crishcanchijchu? Chashna cajpica ñucanchij feca sinchimi can.

5. ¿Ñucanchij feca imamantataj chiriyai tucun?

⁵ Problemacuna ricurijpi yalli sustarishca cashcamanta, apostatacunapaj llullacunata crishcamanta, mana cashpaca llaquilla cashcamantachari ñucanchij feca chiriyashca. Chaita cuentata cushpaca ¿ñucanchij feta sinchiyachingapajca imatataj rurana canchij?

6. ¿Imacunallamantataj preocuparinchij?

⁶ Imamantapish siempremi preocuparinchij. Por ejemplo, Jehová Diosta, Jesusta cushichisha nishpami preocuparinchij (1 Corintios 7:32). Shinallataj jatun juchata rurashca cashpaca Jehová Dioshuan alli tucusha nishpami preocuparinchij (Salmo 38:18). Cazarashcacunapish paicunapaj huarmita o cusata cushichingapajmi preocuparincuna. Ima shina cashpapish tucuicunami ñucanchij familiamanta, huauqui panicunamantapish preocuparinchij (1 Corintios 7:33; 2 Corintios 11:28).

7. a) ¿Micunamanta, churarinamantaca imamantataj mana yalli sustarina canchij? b) Proverbios 29:25-pi nishca shinaca ¿imamantataj runacunataca mana manchana canchij?

⁷ Pero imamantapish yallitaj sustarijpica ñucanchij feca chiriyai tucunmi (Mateo 6:31, 32). Por ejemplo, micunamanta, churarinamanta yallitaj sustarishpaca charina cosascunallapi yuyashpami cullquita cꞌuyai callarishun. Ashtahuancarin Jehová Diosmantami caruyashun (Marcos 4:19; 1 Timoteo 6:10). Shujtajcunapaj ñaupajpipish alli ricurisha nishpami yallitaj preocupari tucunchij. Chashna preocuparishpaca Diospaj ñaupajpi alli ricurinapaj randica shujtajcuna ñucanchijmanta burlarinata, llaquichinatami ashtahuan manchashun. ¿Ama yallitaj sustaringapajca imatataj rurana canchij? Jehová Diostami ñucanchij feta sinchiyachichun, manchaita anchuchichunpish mañana canchij (Proverbios 29:25-ta liyipai; Lucas 17:5).

8. ¿Jehová Diosmanta, huauqui panicunamanta llullacunata nijpica imatataj rurana canchij?

⁸ Diabloca llullapaj yayami can. Chaimantami paica mana alli gentecuna Jehová Diosmanta, huauqui panicunamantapish llullacunata nichun pandachin (Juan 8:44). Por ejemplo, apostatacunaca testigo de Jehovacunamantami Internetpi, televisionpi, radiopi, periodicopi llullacunata nincuna (Efesios 6:16). ¿Pi chai llullacunamanta parlajpica imatataj rurana canchij? Mana  uyanachu canchij. Mana uyashpaca Jehová Diospi, huauqui panicunapi confiashcatami ricuchishun. Shinallataj apostatacunahuan pꞌiñanacunataca mana mashcanachu canchij. Paicunata uyana munaillatapish mana charinachu canchij. Chashnami paicunapaj tucui ruraicunamanta caruyashun.

9. ¿Ñucanchij llaquicunapica imamantataj mana yalli yuyana canchij?

⁹ Huaquinpica dimastij llaquilla sintirishcamantami ñucanchij feca chiriyai tucun. Llaquicunata chꞌimbapurana cashpapish mana chaipi yalli yuyanachu canchij. Chaipi yalli yuyashpaca Jehová Dios cusha nishcacunatami cungarishun (Apocalipsis 21:3, 4). Yallitaj llaquilla sintirishpacarin Jehová Diosta sirvinatami saquishun (Proverbios 24:10). Pero ¿ama yallitaj llaquiringapajca imatataj rurana canchij?

10. ¿Shuj panimantaca imatataj yachanchij?

¹⁰ Estados Unidospi causaj shuj panimanta yachashun. Cai panipaj cusaca ungushcami can. Cai panica paipaj cusata cuidashpapish sinchi fetami charin. Cuerpo Gobernanteman shuj cartata escribishpaca paica: “Ñuca cusa ungushca cashcamantami maipica shaicushca, llaquilla sintirishcanchij. Pero Jehová Diosca ñucanchijman yachachishpami sinchiyachishca. Chaimantami Diablo ñucanchijta llaquichijpipish ñaupajman catircanchij” nircami. Ñucanchijpish cai pani shina llaquilla cashpapish ñaupajmanmi catina canchij. Chaipajca llaquicuna Diablomanta shamushcatami crina canchij. Shinallataj llaquicunahuan cashpaca Jehová Dios ayudanapimi confiana canchij. Ashtahuancarin Jehová yachachishcacunatami shungupi huaquichina canchij.

11. ¿Ñucanchij fe sinchi cashcata yachangapajca ima tapuicunapitaj yuyana canchij?

¹¹ Ñucanchij fe sinchi cashcata yachangapajca cai tapuicunapi yuyashun. ¿Cai quillacunapica dimastij preocuparinata saquishcanichu? ¿Apostatacunapaj llullacunamanta, paicunahuan pꞌiñanacunamanta  caruyashcanichu? ¿Yallitaj llaquilla sintirinataca saquishcanichu? Caicunata pajtachicushpaca ñucanchij fe sinchi cashcatami ricuchinchij. Cunanca Diablo ñucanchijta ima shina ashtahuan pandachisha nishcatami ricushun.

12. ¿Imamantataj charina cosascunallataca mana mashcana canchij?

¹² Charina cosascunallata mashcajpica ñucanchij femi chiriyanga. Apóstol Pabloca: “Maijanpish soldado tucushpaca, paita mandajpaj munashcata rurana yuyaillami. Paipaj munaita ruranataca mana yuyanchu” nircami (2 Timoteo 2:4). Romano soldadocunataca negociocunata churachunca mana saquijcunachu carca. ¿Shuj soldado negociota churajpica imashi tucunman carca?

13. ¿Soldadocunaca imamantataj mana negociocunata charij carca?

¹³ Caipi yuyashun. Tutamanta ladoca casi tucui soldadocunami paicunapaj espadacunahuan entrenacuncuna. Chishipish chai soldadocunaca paicunapaj macanacunata, espadacunatami allichincuna. Pero shuj soldadoca entrenanapaj randica mercadopimi micunata cꞌatucun. Cayandij punlla cꞌatungapajpish chishimanmi allichishpa saquin. Shinapish cayandij punllaca contracunaca macanacungapajmi chayamuncuna. ¿Maijan soldadotaj macanacungapaj listo canga? ¿Soldadocunata mandajca pitataj chasquinga? ¿Ñucanchijpish macanacuipi cashpaca entrenaj soldadocunahuanchu casha ninchij? O ¿mercadopi cꞌatuj soldadohuanchu casha ninchij?

14. ¿Ñucanchijpajca imataj ashtahuan valishca can?

¹⁴ Entrenaj soldadocuna shina ñucanchijpish Diospaj ñaupajpi, Jesuspaj ñaupajpi alli ricurinatami munanchij. Caita ruranami charina cosascunamanta yalli valishca can. Chaimantami Diosta sirvishpa feta sinchiyachingapajca yanga cosascunapi tiempota, fuerzata mana gastana canchij.

15. a) ¿Apóstol Pabloca imatataj advertirca? b) ¿Imamantataj chashna nishpa advertirca?

 ¹⁵ Apóstol Pabloca: ‘Charijyashun nijcunaca crishcatami saquishcacuna’ nishpami advertirca (1 Timoteo 6:9, 10). Apóstol Pablo nishca shinaca charijyanata mashcajpica mana allita rurana yuyaicunami shamunga. Diosta sirvinatapishmi saquishun. Chaimantami ñucanchij fe sinchi cachunca rijcharishca cana canchij. Diabloca charina cosascunallapi yuyashpa Diosta sirvinata saquichunmi munan. Chaitaca mana cungarinachu canchij.

16. Marcos 10:17 al 22-ta liyishpaca ¿ima tapuicunapitaj yuyana canchij?

¹⁶ Imacunata randingapajchari cullquita charinchij. Pero cullquita charishpapish caipi yuyashun. Ñaupa tiempopica Jesusca shuj charij runataca Diosta ashtahuan sirvichunmi invitarca. Shinapish cai runaca achcata charishcamantami mana chasquirca (Marcos 10:17-22-ta liyipai). ¿Ñucapish achca cosascunata charishcamanta Diosta ashtahuan sirvinata saquishachu? ¿Imata randishpaca cuidangapaj tiempota, fuerzata charishachu? ¿Randishca cosascunapica yallichu ocuparisha? nishpami tapurina canchij Achca cosascunata charinapaj randica minishtirishcacunallahuanmi causana canchij. Chashnami Diosta sirvingapaj tiempota, fuerzata charishun.

17. ¿Imatataj tucui punllacuna rurana canchij?

¹⁷ Soldadocunaca macanacungapajca cada punllami allichirincuna. Ñucanchijpish Diablohuan macanacungapajmi tucui punllacuna allichirina canchij (Apocalipsis 12:17). Chaipajca cada unomi ñucanchij feta sinchiyachina canchij.

18. ¿Ñaupa tiempopica soldadocunaca imamantataj paicunapaj escudocunataca charirajcuna carca?

¹⁸ Ñaupa tiempopica mana manchashpa macanacuj soldadocunataca jatunyachijcunami carca. Pero escudo illaj tigrajcunataca pingaipimi churajcuna carca. Roma llajtamanta Tácito shuti runaca soldadocunamanta escribishpaca: “Escudota saquishpa shamunaca jatun pingaimi can” nircami. Chaimantami soldadocunaca paicunapaj escudocunataca charirajcuna carca.

19. ¿Sinchi feta charingapajca imallatataj rurana canchij?

¹⁹ Sinchi feta charingapajca tandanacuicunamanmi rina canchij. Gentecunamanpishmi Diospaj shutimanta, paipaj gobiernomanta huillana canchij (Hebreos 10:23-25). Shinallataj punllantami Bibliata liyina canchij. Pai yachachishcacunata pajtachingapajpish Dios ayudachunmi cutin cutin mañana canchij (2 Timoteo 3:16, 17). Caicunata rurajpica Diabloca mana pandachi tucungachu (Isaías 54:17). Ashtahuancarin sinchi feta charishcamantami huauqui panicunahuan tandalla Diosta sirvishun. Shamuj punllacunapicarin Diablota, millai gentecunata Jesús mishajtami ricushun (Apocalipsis 17:14; 20:10).