¿Cientificocunaca cai universopish, causaipish ima shina tiyai callarishcataca yachai tucushcacunachu? Mana. Achcacunaca: “Cai universota estudiaj cientificocunami jahua pachapish, cai Allpapish, causaipish ima shina tiyai callarishcata yachai tucuncuna” nincunami. Pero Dartmouth universidadpi Astronomiata yachachij Marcelo Gleiser ima nishcata ricushun. Paica: “Cai universo ima shina tiyai callarishcamantaca mana tucuita yachachi tucushcanchijchu” ninmi.

Shinallataj Science News nishca revistapica: “Cai Allpa tiyai callari tiempomanta rumicuna o tullucuna mana tiyashcamantami causai ima shina tiyai callarishcataca mana yachai tucunchij” ninmi. Cai nishcacunami cienciaca cai universopish, causaipish ima shina tiyai callarishcata mana yachachi tucushcata ricuchin.

Tal vez canca: “¿Cai Allpataca pishi rurashcanga? ¿Tucuita Rurajca yachaisapa, cꞌuyaj cashpaca imamantataj llaquicuna tiyachun saquishca? ¿Imamantataj achca religioncunapish tiyachun saquishca? ¿Imamantataj religionpi cajcunatapish millai cosascunata rurachun saquishca?” nishpachari tapuringui.

Cienciata estudiajcunaca cai tapuicunataca mana cutichi tucushcachu. Pero alli respuestacunami tiyan. Achca gentecunaca chai respuestacunataca Bibliapimi tarishcacuna.

Huaquin cientificocunaca Biblia ima nishcatami estudiai callarishcacuna. ¿Paicuna Tucuita Ruraj Dios tiyashcata imamanta crishcata yachasha ninguichu? Chaipajca jw.org paginaman yaicushpa “Mashcai” nishca partepi “¿Causaica ima shinataj callarirca?” nishcata quillcai.