Caitami tapushcacuna

¿Testigo de Jehovacunaca quiquin yahuarllatataj tratamientocunata ruranamantaca imatataj yuyancuna?

Diosta sirvijcunaca Bibliapi imata nishcata ricushpami alli decidina can. Paipaj propio yahuarhuan imata ruranataca mana paicuna imata munashcallamanta o shuj doctor imata nishcallamantaca decidinachu can. Chashna decidinaca Jehová Diospaj ñaupajpica importantemi can.

Jehová Diosmi ñucanchijmanca causaita cun. Chaimantami yahuarta ama micuchun nishpa mandarca (Génesis 9:​3, 4). Israelitacunaman leyta cushpaca yahuarca causaitami ricuchin nircami. Chaimantami “Aichapaj causaica yahuarpimi. Yahuartaca cancunapaj almamanta altarpi churanapajmi curcani” nirca. ¿Micungapaj shuj animalta huañuchishpaca imatataj rurana carcacuna? Diosca: ‘Yahuartaca allpapi tallishpa qꞌuipaca tapachinguichijlla’ * nishpami mandarca (Levítico 17:11, 13). Caitaca cutin cutinmi Diosca mandarca (Deuteronomio 12:16, 24; 15:23). The Soncino Chumash nishca judiocunapaj libropica: “Yahuartaca mana huaquichinachu carca. Ashtahuanpish ama micungapajmi pambapi jichana carca” ninmi. Causaica Diospaj cashcamantami ni maijan israelita yahuartaca mana huaquichina carca, ni mana micuna carca.

Mesías huañujpimi Moisesman cushca leytaca ña mana pajtachishpa catina tucurca. Shinapish yahuarca Diospajca valishcami cashpa catin. Espíritu santo yuyachijpimi apostolcunaca caishuj huauqui panicunataca ‘yahuarta ama micunguichij’ nishpa mandarca. Cai mandashcaca importantemi carca. Chaimantami huainayanamanta, rurashcalla dioscunata adoranamanta mandashcata cazuj shinallataj cai mandashcatapish cazuna carcacuna (Hechos 15:28, 29; 21:25). Siglo 20-pimi yahuarta shujtajcunaman cuna, yahuarta churarinapish ashtahuan mirari callarirca. Shinapish testigo de Jehovacunaca Diospaj Shimipi nishca shinaca caita rurana mana alli cashcatami intindircacuna. *

Maijan doctorcunaca achca semanacuna operangapaj illajpirajmi ungushcacunataca yahuarta llujshichishpa huaquichinaca allimi canga nincuna. Chashnami minishtirijpica chai huaquichishca yahuarta churana alli canga nincuna. Shinapish yahuarta surcushpa, huaquichishpa cutin churarinaca Levítico libropi, Deuteronomio libropi nishca shinaca mana allichu can. Yahuartaca mana huaquichinachu can. Ashtahuanpish Diosman tigrachicuj shinami tallina can. Cunan punllacunapi Moisesman cushca leyta mana pajtachina cashpapish testigo de Jehovacunaca yahuarta ama micungapaj, ama churaringapajmi decididos canchij. Chashnami Jehová Dios churashca mandashcacunata respetashcata ricuchinchij. Chaimantami mana shujtajcunaman ñucanchij yahuarta cunchij, qꞌuipaman ñucanchijllataj churaringapajpish mana huaquichinchij. Mana chaita rurashpaca Dios mandashcata mana pajtachinchijmanchu.

Doctorcunaca huaquin estudiocunata rurangapajmi yahuartaca utilizancuna. Chaita rurana alli o mana alli cashcataca Bibliapica mana ninchu. Por ejemplo, achca huauqui panicunaca paicunapaj yahuarta surcushpa examencunata rurachunmi saquincuna. Qꞌuipaca chai yahuartaca shitanllacunami. O huaquinpica doctorcunaca ñucanchij yahuarllahuantaj shujtaj tratamientocunata rurachunmi animancuna.

Maijan operacionpica hemodilución nishcatami utilizancuna. Chashnami shuj parte yahuarta cuerpomanta llujshichin, cutin cuerpopi saquirij yahuartaca liquidocunahuanmi chagruncuna. Qꞌuipaca circuito extracorpóreo nishcapi caj yahuartami cutinllataj cuerpopi churan. Chashnami cutin ña yahuarca normal tucun. Huaquinpica operacushpa chugrichishcamantami yahuartaca japishpa, shuj filtropi pasachishpa cutinllataj glóbulos rojos nishcata churan (chaitami recuperación de células nincuna). Huaquinpica yahuartaca shuj maquinamanmi cachan. Chai maquinaca corazón, pulmón, riñón shinami funcionan. Shinami chai maquinaman cachashca yahuartaca cuerpoman cutin tigrachin. Shinallataj ima mapacunamanta, mana allicunamanta yahuarta chuyayachingapajmi shujtaj tratamientocuna tiyan. Chashna rurashpami cuerpopaj shujtaj partecunapi churancuna. Shinallataj huaquin medicamentocunahuan chagrushpa cutinllataj churangapajmi yahuartaca surcuncuna.

Tratamientocunata, pruebacunata ruranaca huaquinpica cambiari tucunmi. Tucui caicunamanta yachanaca mana minishtirinchu. Shinapish Diosta sirvijcunaca cada unomi operacionta ruragricushpa shuj terapiata ruragricushpa o ima tratamientota rurashpapish paipaj yahuarhuan imata ruranataca alli ricuna can. Chaimantami doctortaca chai tratamientota ruracuj horas yahuarhuan imata ruragrishcataca tiempohuan tapuna can. Qꞌuipaca alli yuyashpami decidina can (recuadrota ricui).

Diosta sirvijcunaca, ‘tucui shunguhuan, tucui almahuan, tucui fuerzahuan, tucui yuyaihuan cꞌuyashami’ nishpa Diosman mingarishcataca mana cungarinachu can (Lucas 10:27). Testigo de Jehovacunaca shujtaj gentecunamantaca chꞌicanmi canchij. Ñucanchijca Dioshuan alli apanacunatami munanchij. Causaita cuj Diosca paipaj Churi Jesús jichashca yahuarpi confiachunmi munan. Bibliapica: ‘Diosca juchacunata perdonashpa, Cristopaj yahuarhuan cutin randishpami quishpichirca’ ninmi (Efesios 1:7).

[Notacuna]

[Recuadro/Ilustración]

CAI TAPUICUNAPI YUYASHUN

¿Ñuca cuerpomanta llujshichishca yahuar maquinacunata pasacushpapish ashalla tiempota huaquichishca cajpica ñuca concienciapica allichu sintirisha?

¿Shuj examenta rurangapaj o shuj terapiata rurangapaj ñuca cuerpomanta yahuarta llujshichishpa cutinllataj churajpica ñuca concienciapica ima shinashi sintirisha?