GENTECUNACA chꞌican chꞌican culturamanta, religionmanta cashpapish mañanatami yachancuna. Paicunaca iglesiacunapi, templocunapi, sinagogacunapi, mezquita nishcacunapi, santuario nishcacunapimi mañancuna. Shinallataj chꞌican chꞌican cosascunata utilizashpami mañanata yachancuna.

Ñucanchijca animalitocuna shinallatajmi chꞌican chꞌican cosascunata ruranchij. Por ejemplo, micunchij, yacuta ubyanchij, samaita aisanchij. Paicuna shinallatajmi huacharinchij, huiñanchij, huañunchij (Eclesiastés 3:19). Pero gentecunallami mañanata yachanchij. ¿Imamanta?

Gentecunaca mañanatami minishtinchij. Achca gentecunaca paicuna adorashca Dioshuan parlanata munashcamantami mañancuna. Bibliapi nishca shinaca ñucanchijca chai munaihuan rurashcami canchij (Eclesiastés 3:11). Jesuspish “Diosmanta yachana munaita yuyaipi charijcunaca cushicuncunami” nircami (Mateo 5:3).

Tucuicunami Diosta adoranata minishtinchij. Chaimantami chꞌican chꞌican religioncuna tiyan. Shinallataj adorangapaj, mañangapajmi chꞌican chꞌican lugarcuna tiyan. Chashna cajpipish achca gentecunami “Diosta adoranataca mana minishtinchijchu” nincuna. ¿Chaica ciertochu can? Gentecunaca mana tucuita rurai tucunchijchu, ashacamallami causanchij, mana tucuita intindi tucunchijchu. Chaimantami maijan achca poderta charij, yuyaisapa, huiñaita causaj ñucanchijta ayudachun minishtinchij. Pero ¿ima shina ayudachuntaj minishtinchij?

¿Tal vez canta ayudachun, yachaita cuchun, cambaj tapuicunata contestachun pita mashcashcanguichu? Por ejemplo, ¿shuj cꞌuyashca familia huañujpi pi canta animachichun minishtishcanguichu? ¿O shuj importante decisionta agllacushpa pi ayudachun minishtishcanguichu? Mana cashpaca ¿ima mana allita rurashcamanta canta perdonachun minishtishcanguichu?

Bibliapi nishca shinaca tucui chaicunamantami mañai tucunchij. Bibliapimi imacunamanta mañanata, ima shina mañanata yachachin. Shinallataj Diosta alli sirvij cꞌari huarmicuna ima shina mañashcatami Bibliapica yachai tucunchij. Paicunaca llaquilla cajpi animachichun, alli decisionta agllangapaj ayudachun, pandarishcamanta perdonachun, sinchi tapuicunapaj respuestacunata cutichichunmi Diosta mañarcacuna (Salmo 23:3; 71:21; Daniel 9:4, 5, 19; Habacuc 1:3).

Chai Diosta sirvijcunaca pita mañana cashcataca allimi yacharcacuna. Pero cunan punllacunapica achca gentecunami chaitaca cungarishcacuna.