Huañoycka contranpi causaymanta can. Suj sinchi moscko ina can (Juan 11:11-14). Huañusckascka, mana uyariyta ni ckaayta ni ʼrimayta ni imát pensayta atincuchu (Eclesiastés 9:5, 10). Llulla religioncka nin, ima huañusckas, animaspa mundunman ʼrincu, ñaupajpa aillusninhuan causáypaj. Pero Bibliacka chayta mana yachachinchu.

Huañuscka persunascka, mana ni yanapaaychta ni mana allít ’ruaaychta atincuchu. Sapa cutis gentecka, tantatapas yacutapas velastapas churaptincu, huañusckasman sacrificiusta y ritualesta ʼruapuncu, creespa ima caycunahuan huañusckasta cusichincu. Pero, chay ʼruasckas mana Diusta cusichinchu, Satanaspa llullanmanta amusckancuraycu. Ni huañuscka persunasta cusichiyta atincuchu, paycuna mana causayníoj cancu á. Mana huañusckashuan manchacunáych tian, ni paycunata adoranáych tian. Diusllata adoranáych tian (Mateo 4:10).

Huañusckascka, causayta voliaconckancu. Ámoj pachapi, Jehová, huañusckasta, Ashpapi suj paraisupi causanancunápaj llijchachencka (Juan 5:28, 29; Hechos 24:15). Diuscka huañuscka persunasta llijchachiyta atin, quiquin nockáych piman puñuspa taricun llijchachiyta atíych (Marcos 5:22, 23, 41, 42).

Chay creencia ima nockáych mana huañúych suj llulla can, y Satanás, Supaycka, chayta ashca gentét creenancunát ʼruara. Satanás y supaynincuna gentét creechincu ima anima huañusckasmanta causashcancu y onckoycunát y suj problemasta amuchincu. Satanascka persunasta chincachin, huaquin cutis mosckoyhuan o visioneshuan. Chayraycu, Jehová sentencian picunaman huañusckashuan ʼrimayta munancu (Deuteronomio 18:10-12).