Dibujitupi, ¿utula sipitasta ckaanquichu?​— Tatanpa sutin Jefté cara. Bibliacka mana paypa sutinta niáysh, pero yacháysh ima paycka tatanta y Jehovatapas cusichera. Cay huarmi huahuitamanta y tatanmanta aprendesúysh.

Jefté suj alli ckari cara y pay, huarmi huahuitanta Jehovamanta yachachis ashca tiempút crúsaj cara. Pay suj sinchi ckari y suj súmaj caudillu cara. Chayraycu israelitascka, contrariusninpa contranpi luchanancunápaj, paycúnap caudillun canánpaj mañaporancu.

Jefté, vencéypaj, oraciunpi Jehóvap yanapanta mañara. Jefté Jehovát prometepora, vencespá y huasinman voliacuptin, ckoyta huámaj persuna, ima paypa huasinmanta llojsichun. Paycka, túcuy causaynínpaj Diuspa carpa huasinpi llamcanan  tiara y ckaylla chaymanta causanan tiara. Diuspa carpa huasin, suj carpa cara, maypi ñaupapi gentecka Diusta adoráypaj ʼrej carancu. Ari á, ¡Jefté chá guerrata vencera! Pay huasinman voliacuptin, ¿yachanquichu, pichus huamajpi llojsera?​—

Ari, ¡Jéftep huarmi huaan cara! Pay sujlla huarmi huaan cara, na suj sipas captin, Jefté Diuspa carpa huasinman payta cachara. Cay Jeftét anchát llaquichera. Pero yúyay, pay suj promesát ʼruasa cara. Huarmi huaan chayllapi nera, ‹¡Tátay, ckam suj promesát Jehovát ʼruaporanqui, chayraycu chayta cumplinayqui tían!›

Jéftep huarmi huaan, llaquicorapas. Paycka, Diuspa carpa huasinpi, mana casaracuyta atinmanchu ni huaasta apiyta. Pero paycka ancha munara, tatan promesanta cumpliyta y Jehovát cusichiyta. Páypaj chay astaan importante cara, ima casaracuyta y huaasta apiyta. Chayna, paycka huasinta sackera y túcuy causynínpaj ckaylla Diuspa carpa huasinmanta causara.

¿Pensanquichu ima pay chayta ʼruas, tatanta y Jehovatapas cusichera?​— ¡Ari á, chayta ʼruara! Si ckam casúcoj canqui y Jehovát munanqui, quiquin Jéftep huarmi huaan ina, ckampas tatasniyquít y Jehovatapas ancha cusicunancuta ʼrúaj ʼrinqui.