¿Dibujitupi ckarista ckaanquichu?​— Matu, Marcolo, Lucas, Juanchu, Pilu, Shanti, Judas y Pablu cancu. Paycuna Jíshup punchausninpi causarancu, y Jíshup causayninmanta escriberancu. Paycunamanta aprendesúysh.

Quimsa chay ckarismanta ima Jíshup causayninmanta escriberancu, suj especial grupu Jíshup yachachisckasninmanta carancu. Paycuna apostules carancu. ¿Yachanquichu, picuna cancu?​— Matu, Juanchu y Pilu. Apostules  Matu y Juanchu allít Jishút ʼrejserancu y sapa suj, suj librút Jíshup causayninmanta escriberancu. Apostol Juanchu, suj librút, Revelación sutichascka y quimsa cartasta escribera. Chá cartas, huámaj Juanmanta, íshcay Juanmanta y quimsa Juanmanta cancu. Apostul Pilu íshcay cartasta escribera, Bibliapi taricuncu. Cá cartas, huámaj Pedromanta y íshcay Pedromanta cancu. Íshcay cartanpi Pilu escribera, ima Jehová anajmanta ʼrimara y Jishumanta nera:‹Cay huáay can. Nocka payta munani, y paymanta ancha cusicuni.›

Sujcuna ckaris dibujitumanta, Jíshup causayninmanta escriberancupas. Suj Marcolo can, y chá tutapi Jishu arrestascka captin, pay aterapas chaypi tiayta y túcuy sucedesckanta ckaara. Suj, Lucas can. Pay medicu cara y Jishu huañuptin, chaymanta, pay aterapas cristianu ʼruacuyta.

Cay íshcay Bibliamanta escribejcuna, ima ckam dibujitupi ckaanqui, Jíshup utulas turasnin carancu. Ckam, ¿yachanquichu, imaina paycúnap sutisnincuna carancu?​— Paycúnap sutisnincuna, Shanti y Judas carancu. Huamajpi paycuna mana Jishupi creerancuchu y mana alli umanmanta tiasckanta creerancu. Pero, astaan ñauckepi Jishupi creerancu y cristianus ʼruacorancu.

Escribej Bibliamanta ima dibujitupi cutin, Pablu can. Manáraj cristianu cas, paypa sutin Saulu cara. Pay cristianusta chéjnej cara y paycunaan ancha mana alli cara. Ckam, ¿yachanquichu, imajraycu Pablu cristianu ʼruacuyta munara?​— Suj punchau, Pablu suj huellapi ʼrishcaptin, chayllapi uyarera, ima pipas cielumanta ʼrimapora. ¡Jishu cara! Y Pabluta tapora: ¿Imajchus ancha mana alli canqui, picunaan nockapi creencu? Chaymanta, Pablu mana alli cayta sackera y cristianu ʼruacora. Pablu chunca taáyoj (14) libritusta Bibliamanta escribera, Romanosmanta Hebreoscama.

Librusta Bibliamanta ima Jishumanta ʼrimancu, ¿leeyta ckallareranqui o na pipas ckámpaj leeshcan?​— Suj alli imasti ima ckam ʼruayta atinqui, Jishumanta aprendeyta can. ¿Chayta ʼruayta munanquimanchu?​—