YACHACHINA 3
Rahab Jehovapi creera
Pensáysh ima tiasckayshta Jericóp ciudarninpi. Cá ciudarcka Canaán ashpanpi tían, maypi gentecka mana Jehovapi creencuchu. Suj huarmi, Rahab huajyascka chaypi causan.
Ácaip Rahab suj utula sipitas cara, pay historiasta Moisesmanta uyarera imaina Moisés chaupinpi mar pucát quicharera y chayna Egiptomanta israelitasta pusara. Pay uyarerapas, imaina Jehová israelitasta yanapara, enemigusninpa contranpi, túcuy guerrastas vencenancunápaj. ¡Cunan, Rahab uyarin ima israelistascka pampapi ckaylla Jericomanta tiancu!
Rahab Jehovapi creesckanraycu, espiajcunata pacara
Suj tuta, íshcay israelitascka ciudarta ckaáypaj Jericoman ʼrerancu. Paycuna Rahab huasinman amorancu. Paycka yaicunancuta y cuticunancuta paycunata nipucora. Rey Jericomanta tutapi anoticiacora, ima espiajcuna ciudarpi tiarancu y paycuna Rahab huasinman ʼrerancu. Chayna, reycka paycunata apicúypaj sujcuna ckarista cachara. Rahab anajpi huasinmanta íshcay espiajcunata pacan y reypa ckarisninta nipucora: ‹Espiajcuna caypi tiarancu, pero paycuna na ciudarta sackerancu. ¡Si ckamcuna, cunan na ʼrínquish, paycunata apicuyta atínquish!› Ckam, ¿yachanquichu, imaraycu Rahab espiajcunata pacacusa cara?— Paycka Jehovapi creesckanraycu y yacharapas ima Jehová Canaan ashpanta israelitasta ckócoj ʼrin.
Espiajcuna manáraj Rahabpa huasinta sackes, paycuna payta prometeporancu, Jericó apiyascka captin, pay y familianpas ckeshpisckas caj ʼrincu. Ckam, ¿yachanqui imatachus payta niporancu, ima pay ʼruanan tiara?— Paycuna niporancu: ‹Cá hilu pucát ápiy y ventanayquipi chayta huátay huarcunánpaj. Si ckam chayna ʼruanqui, huasíyquip ucunpi tiajcuna, sapa suj paycunamanta ckeshpisckas caj ʼrincu.› Rahab, imaina espiajcuna ʼruananta niporancu, chayna ʼruara á. ¿Yachanquichu chaymantá, ima sucedera?—
Jehová Rahab y familianta ckeshpichera
Suj punchaus chaymantá, israelitascka upallas ciudarta muyus marcharancu. Paycuna shojta (6) punchaus ciudarta muyus marcharancu, suj cutis sapa punchau. Pero canchis (7) punchaupi, paycuna canchis (7) cutis, ciudarta muyus purincu. Chaymantá, túcuy paycunacka sinchít ckaparerancu. Jehová ciudarta ima túcuy muyuyninpi ʼrumimanta ʼruascka, urmananta ʼruan.¡Pero huasi, maypi ventanapi huarcuscka suj hilu puca taricora, sayasckalla tían! Ckam, ¿dibujitupi chayta ckaayta atinquichu?— ¡Rahab y familianpas ckeshpisckas tiarancu!
Ckam, ¿imát Rahabmanta aprendeyta atinqui?— Rahab Jehovapi creera, túcuy súmaj imasta ima pay Jehovamanta aprendera. Ckampas ashca imastis Jehovamanta yachashcanqui. Ckam, quiquin Rahab, ¿paypi creenquichu?— ¡Nockaycu yachaycumi, ima ckam creenqui!
