Jehová persunasta Ashpát ckoaráysh, chaypi huasíysh canánpaj. Áicap Adanta y Evát ʼruara, huámaj matrimoniu, mana cielusta poblanancunápaj cara. Tata Yaya angelesta na ʼruasa cara chaypi causanancunápaj (Job 38:4, 7). Jehová huámaj ckarít suj súmaj jardinpi churara, jardín Edenmanta huajyascka (Génesis 2:15-17 cama). Nátaj, Adanta y huaasninta oportunidarta ckopucora, Ashpapi causanancúpaj túcuy tiempúpaj. Salmo 37:29 y 115:16 léey.

Nátaj jardín Edenmanta suj utula partella Ashpamanta abarcara. Adán Evaan huaasta apinancu tiara, túcuy Ashpapi causanancúpaj y huatasuan túcuy Ashpa jardín ina ʼruanancu tiara (Génesis 1:28). Ashpa ni aicappas tucuconcka y túcuy tiempúpaj persunaspa huasin caj ʼrin. Salmo 104:5 léey.

Ckáay vidiu ¿Por qué creó Dios la Tierra?

Adán y Eva Tata Yayát mana casucorancu y Edenmanta huijchusckas carancu. Chayvachá chá jardín chincacora y mana pipas cutis suj jardín cananta ʼruayta atera. Chayraycu, Biblia nin, ima Ashpa mana állip maquisninpi tían (Job9:24). Génesis 3:23, 24 léey.

Chayvachá, ¿Jehová propositunta mana cúmplej ʼrin? Mana, pay túcuy atiyníyoj can y propositunuan cúmplej ʼrin (Isaías 45:18). Ámoj pachapi, Tata Yaya ʼrúaj ʼrin ckárip causaynin cachun imaina pay ckallarisckanmantapacha munara. Salmo 37:11, 34 léey.

Jishu, gobérnaj ina Tata Yáyap Reinunmanta, túcuy Ashpát suj jardín ina ʼrúaj ʼrin, y cusca angelesuan túcuy Tata Yáyap enemigusninta, suj guerrapi Armagedón huajyascka, chamcka ʼrúaj ʼrin. Chayvachá, Supayta ángel mana allita  1000 huatasraycu huíshckaj ʼrin ima ʼruara Adán y Eva mana casucunancuta. Tata Yáyap siervusnin mana chamckayasckas caj ʼrincu, imaraycu Jishu encaminácoj ʼrin y arcácoj ʼrin y chaymantá suj cáusay cusiscka túcuy tiempúpaj caypi Ashpapi ápej ʼrincu. Apocalipsis 20:1-3 cama y 21:3, 4 léey.

Taya Yaya, ¿áicap mana alli casckanuan puchúcaj ʼrin? Jishu «huillara» níypaj áicap chá punchau chayanman. Mana alli imastis ima cunan ckaacun amenasancu persunaspa causaynincuta ckaachincu ima causaycu «fin cá mana alli mundumanta». Mateo 24:3, 7-14 cama, 21, 22 léey.

Chá 1.000 huataspi ima Jishu Ashpát gobérnaj ʼrin cielumantapacha, pay sórckoj ʼrin túcuy usuyta (Isaías 9:6, 7; 11:9). Manalla gobérnaj caj ʼrin, manapé Sumo Sacerdote caj ʼrin y perdonapúcoj ʼrin uchasnincút picunamanta Tata Yayát munancu. Chayraycu Tata Yaya Jishút utilísaj ʼrin, onckoycunaan, moroyayuan y huañuyuan puchucáypaj. Isaías 25:8 y 33:24 léey.

Persunas ima Tata Yayát casucuncu, Ashpapi jardín ina ʼruascka causanckancu (1 Juan 2:17). Jishu discipulusninta cachara, persunastas alli sonckomanta mascanancúpaj, yachachíypaj imaina Tata Yáyap aprobaciunninta apiyta. Cunan punchau, Jehová ancha ashca persunasta yachachishcan, caypi Ashpapi jardín ina ʼruascka causanancúpaj (Sofonías 2:3). Picunas Huasispi tantacunasmanta Jehóvap testigusninmanta tantanacuncu maypi ashca familias cuscas Tata Yayát adorancu y aprendencu cayta alli huaas, alli tatas y ckosas, alli mamas y huarmis y yachayta alli noticias ima Biblia ckon. Miqueas 4:1-4 cama léey.