YACHACHINA 06
¿Imaina cáusay ckallarera?
«Ckamuan cáusay ckallarera» (Salmo 36:9). ¿Creenqui ckam chayta? Huaquin persunas creencu cáusay ckallarera chaynalla, y mana tían suj ʼrúaj. Si caype tiaycu can por casualidar, chayvachá causayniycu ni imapas siruin. Pero, si Jehová cáusay ckallarera, cay suj propósitu apinan tían, ¿maa chayna can? a Estúdiay Biblia nisckanta imaina cáusay ckallarera, y ckáay si chayna can.
1. ¿Imaina universu ckallarera?
Biblia nin: «Ckallarinpi Tata Yaya ʼruara cielusta y ashpata» (Génesis 1:1). Yacka túcuy científicus admitincu universu suj ckalláriy apisckanta. ¿Imaina universút Tata Yaya ʼruara? Pay valecora «atiyninmanta»—espíritu santumanta—ʼruáypaj túcuy casckanta universu: galasias, ckollurcunas, planetas… (Génesis 1:2).
2. ¿Imápaj Tata Yaya ashpát ʼruara?
Jehová «mana ʼruara ruanaas, manapé ʼruara poblascka canánpaj» (Isaías 45:18). Pay ashpát ʼruara suj lugar ancha súmaj canánpaj, maypi persunas atinancúpaj causayta únay unáypaj (léey Isaías 40:28 y 42:5). Yachajcuna nincu ashpa ancha especial can. Chayraycu, mana ʼrejsicun ni suj planeta maypi persunas atiycuman causayta.
3. ¿Imapi mana quiquin cancu persunas uyuasmanta?
Jehova ashpát ʼruas chaymanta, ckallarera causayuan ima chaypi tían. Huámaj, ashpát poblara tackosuan y uyuasuan. Y chaymantá «Tata Yaya ʼruara ckarít quiquin pay ina» (léey Génesis 1:27). ¿Imapi mana quiquin uyuas ina caycu? Imaina Tata Yaya quiquin pay ina ʼruaaráysh, atiycu yachapiayta paypa cualidaresnin múnay ina y justicia. Paypas ʼruaaraycu capaces canáyshpaj aprendeyta ckallus, ckaáypaj túcuy sumítaj casckanta y cusicuyta musicaan. Y nockáysh Tata Yayát adorayta atíysh, pero uyuas mana.
ASTAAN ESTUDIANÁYSH TÍAN YACHÁYPAJ
Acúysh ckáaj huaquin pruebas ima Tata Yaya túcuy layas cáusay ʼruara y ímaj Biblia nisckan túcuy Jehová ʼruasckanmanta ciertu can. Y aprendenáysh tían ima yachachiáysh Tata Yayamanta chá cualidares persunaspi ckaasckayshta.
4. Túcuy ima cáusay apisckanta suj ʼrúaj apin
Persunasta alabancu túcuy ʼruasckancuraycu yachapias naturalesamanta. Pero, ¿pít alabanza ckopuncu tucuyraycu na ʼruascka tiasckanta ashpapi? Ckaaychis VIDIU y ʼrimaychis cá tapunasmanta:
-
¿Ima imastis naturalesamanta persunas yachapiarancu?
Túcuy huasis pillapasraycu ʼruasckas carancu. Pero, ¿pít ʼruara túcuy imastista naturalesapi tiasckancút? Leeychis Hebreos 3:4 y ʼrimaychis cá tapunasmanta:
-
¿Ima imastis naturalesamanta astaan gustasun?
-
¿Creeyta atíysh ima universu y túcuy chaypi tiasckanta ʼruascka cara? ¿Imajchus?
¿Yacharanquichu?
Sitiuyshpi jw.org tárej ʼrinqui revistas y vidius ima chaymanta ʼrimancu. Máscay maypi nin «¿Pillapas ʼruara?» y «Nisckancuta causaypa ckallariyninmanta».
«Ari, túcuy huasi ʼruascka can pipasraycu, pero pi túcuy imastis ʼruara Tata Yaya can».
5. Biblia nisckanta ashpa saamanta ciertu can
Huámaj capítulo Genesismanta, Biblia ʼriman imaina ashpa ʼruascka cara y túcuy cáusay ima paypi tían. ¿Ciertu can chá niscka o suj leyendallát can? Ckaaychis VIDIU y ʼrimaychis cá tapunasmanta:
-
¿Biblia yachachin ashpa y cáusay ima paypi tían ʼruasckas carancu 6 puchausllapi 24 horasmanta?
-
¿Creenqui ima Biblia nisckanta ashpa saamanta ciertu can y sentidu apin? ¿Imajchus?
Leeychis Génesis 1:1 y ʼrimaychis cá tapunasmanta:
-
Yacka túcuy científicus nincu ashpa suj ckalláriy apera. ¿Paycuna nisckancu quiquin can leesckayquita cháyraj Bibliamanta?
Huaquin persunas tapunacuncu si Tata Yaya ʼruara suj laya cáusay chaynalla y chaymanta sapallitas layamanta cambiarancu. Leeychis Génesis 1:21, 25, 27 y ʼrimaychis cá tapunasmanta:
-
¿Biblia yachachin ima Tata Yaya ʼruara suj laya cáusay chaynalla y chaymanta sapallitas cambiarancu y ʼruacorancu challuas, uyuas y persunas? ¿O paylla ʼruara túcuy layas causaymanta?
6. Persunas mana caycu quiquin túcuy sujcuna imastista ima Tata Yaya ʼruara
Nockaycuna mana caycu quiquin uyuas ina. Leeychis Génesis 1:26 y ʼrimaychis cá tapunasmanta:
-
Persunas atiycu ckaachiyta múnay y cúyay imajraycu ʼruasckas caycu Tata Yaya ina. ¿Chay imát nisun imaina Jehová can?
HUAQUINCUNA NINCU: «Biblia cuentasckanta túcuy Tata Yaya ʼruasckanmanta suj leyenda can».
-
Ckam, ¿imát pensanqui? ¿Ímaj?
BIBLÍAP YACHACHINASNIN
Jehová ashpát ʼruara y túcuy cáusay ima chaypi tían.
Yuyáypaj
-
¿Imát Biblia yachachiáysh imaina universu ckallarera?
-
¿Biblia yachachin ima Tata Yaya sackera suj laya cáusay sapallitan cambiachun y ʼruacuchun sujcuna layas causaymanta o paylla ʼruara tucuyta?
-
¿Ímaj persunas especiales caycu?
ASTAAN YÁCHAY
Ckáay huaquin ejemplus naturalesamanta ima ckaachin pillapas tucuyta ʼruasckanta.
«¿Imátaj naturalesát yachachiáysh?» (¡Despertad!, septiembremanta 2006 huatamanta)
Ckáay imaina suj tata huahuitanta yachachin ima Tata Yaya tucuyta ʼruara.
Ckáay si evolucioncka de acuerdo tían Biblia yachachisckanuan.
«¿Tata Yaya ʼruara túcuy laya causaymanta evolucionta utilisas?» (Artículo sitiuycumanta jw.org)
Ckáay tarisckancu ashca yachajcuna y huaquin cientificuspas ʼruasckancu: ¿niyta atíysh cáusay maa ni imatapmanta amora, o pipas cáusay ʼruara?
Imaina cáusay ckallarera. Pishcka imastis ima yachanayqui tían (Folletu)
a Yachachina 25 ʼriman propositumanta ima Tata Yaya apin humanidárpaj.
