SECCIÓN 8
Mana alli imastis suceptincu
«Ckamcuna ancha ashcata cusicushcanquísh, aunque cunan, suj utula tiemporaycu, ari canan tían, ashca layas pruebasraycu llaquichiscka cashcanquísh.» (1 Pedro 1:6)
Aunque túcuy atisckayquita ’ruanqui suj matrimonio y suj familia cusiscka apinaas, huaquin cutis imastis sucedésoj ’rin, ima mana suyanqui y cusicuyquita chincachisuyta atin (Eclesiastés 9:11). Pero, Yaya dificultadesta usuptiycu yanapasta ckoaycu. Si principius Bibliamanta casucunquísh, ckam y familiayqui ancha llaquisckas situacionestapas aguantayta atinquísh.
1 JEHOVAPI CÓNFIAY
BIBLIA NISCKANTA: «Túcuy inquieturesniyquishta Jehóvap maquisninpi sackeychis, imaraycu pay ckamcunaraycu interesacun» (1 Pedro 5:7). Siempre yúyay ima Yayát usuyniyquimanta mana tumpayta atinqui (Santiago 1:13). Si payman ckemicunqui, pay ashca layasmanta yanapasoncka (Isaías 41:10). «Paypa ñauckenpi sonckoyquishta quicharipuychis» (Salmos 62:8).
Si túcuy punchaus Bibliata leenqui y estudianqui consuelót chásquej ’rinqui. Si chayna ’ruanqui, ckaanqui ima cierto can ima Jehová «consuelót ckoaycu túcuy tribulacionniycupi» (2 Corintios 1:3, 4; Romanos 15:4). Pay ckosuyta prometen «Yáyap pasninta ima túcuy pensamientumanta astaan ashca can» (Filipenses 4:6, 7, 13).
IMÁT ’RUAYTA ATINQUI:
-
Jehovát máñay sosegascka tiáypaj y allít pensáypaj yanapasuchun
-
Allít ckaanayqui tían imachus astaan conveniente allít ajlláypaj
2 CKAMMANTA Y FAMILIAYQUIMANTA CÚIDAY
BIBLIA NISCKANTA: «Unanchajpa sonckon yachayta apin, yachajpa oidun imajcachun ’ruan astaan yacháypaj» (Proverbios 18:15). Sapa suj familiayquimanta, ¿imát precisan? Túcuy precisasckanta yachanayqui tían. Paycunaan ’rímay y nisckancuta uyáriy (Proverbios 20:5).
¿Y si huañun huaquin ima pít munanqui? Mana penckacuychu, huáckay. Yúyay ima Jishu «huackara» (Juan 11:35; Eclesiastés 3:4). Allít descansayta y puñuyta alli can (Eclesiastés 4:6). Chayna, situaciunesman enfrentacúypaj astaan sinchi tíaj ’rinqui.
IMÁT ’RUAYTA ATINQUI:
-
Esforsácuy túcuy punchaus familiayquian allít ’rimáypaj manáraj mana alli imastis sucedeptin. Chayna imajcachun sucedeptin, allít senticonckancu ckamuan ’rimas
-
’Rímay picunasuan quiquin imastis sucedepucora
3 MÁSCAY YANAPA IMA PRECISANQUI
BIBLIA NISCKANTA: «Suj checka yanasu túcuy tiempopi munan y suj tura huachascka ina can, tiempos usuymanta tiaptin» (Proverbios 17:17). Seguro yanasusniyqui yanapasuyta munancu pero mana yachancu imaina yanapasuyta. Nipúcuy imát ckamraycu ’ruayta atincu (Proverbios 12:25). Astaanpas máscay yanapa espiritualta picunasmanta Bibliamanta yachancu. Paycuna Bibliamanta yachachisusckancunaan ñauckeman llojsiyta átej ’rinqui (Santiago 5:14).
Si acostumbrascka tianqui ’rimayta persunasuan ima fe Yayapi ckaachincu y promesasninpi confiancu, yanapa precisasckayquita ápej ’rinqui. Si yanapanqui picunasta desanimascka tiancu, ashca consuelo ápej ’rinqui. ’Rimapúcuy feyquimanta Jehovapi y promesasninmanta. Sujcunaraycu imastis ’ruas ocupascka tíay y mana caruyacuychu picunasmanta munasuncu y ckamraycu preocupacuncu (Proverbios 18:1; 1 Corintios 15:58).
IMÁT ’RUAYTA ATINQUI:
-
Suj allí yanasuan ’rímay y sáckey yanapasunanta
-
Honesto cay y túcuy sucedesusckanta y precisasckayquita niy
