Jehová a Yaya huámaj ckarít huámaj huarmian casarachicora. Biblia nin ima pay huámaj huarmít ’ruara y «[...]ckarípaj pusamora». Adán ancha cusiscka churacora y nera: «Cá al fin tullu tulluymanta y aicha aichaymanta can» (Génesis 2:22, 23). Jehová munan casarasckas cusisckas canancuta.

Áicap suj ckari y suj huarmi casaracuncu, pensayta atincu ima túcuy ancha súmaj caj ’risckanta. Pero mana cierto can imaraycu ckaris y huarmis ima ancha munacuncu, mana alli imastis usuncu (1 Corintios 7:28). Cá folletopi principius Bibliamanta tárej ’rinqui, cayta casucuspá matrimoniuyquipi y familiayquipi cusiscka caj ’rinqui (Salmos 19:8-11).

BIBLIA NISCKANTA: Ckosa can pi huasinpi cachan (Efesios 5:23).

Si ckam ckosan canqui, Jehová suyan huarmiyquita munayuan tratanayquita (1 Pedro 3:7). Pay huarmít ckamta yanapasunánpaj ’ruara y munan ima munayuan tratanayquita y valoranayquita (Génesis 2:18). Huarmiyquita ashcata munanayqui tían, paypa intersesnin ckampa interesesniyquimanta astaan importante canan tían (Efesios 5:25-29).

Si ckam huarmin canqui, Jehová suyan ckosayquita ashcata respetanayquita, yanapanayquita Jehová cachasckanta ʼruanánpaj (1 Corintios 11:3; Efesios 5:33). Decisionesninta casúcuy y alli ganasuan yanápay (Colosenses 3:18). Si chayna ’ruanqui, ckosáyquip ñahuisnínpaj y Jehovápaj ancha súmaj caj ’rinqui (1 Pedro 3:1-6).

IMÁT ’RUAYTA ATINQUI:

• Conyugeyquita tápuy imát ’ruayta atinqui suj alli ckosa cáypaj o alli huarmi cáypaj. Allít uyáriy pay nisckanta y esforsácuy chayta ’ruáypaj

• Sosegascka canayqui tían. Tiempót apan yacháypaj imaina sujuan sujuan cusichicuyta atinquísh

BIBLIA NISCKANTA: Alli can conyugéyquip interesesninta allít ckaanayquita (Filipenses 2:3, 4). Conyugeyquita allít trátay, yúyay ima Jehová suyan siervusnin munácoj canancuta (2 Timoteo 2:24). Pénsay imaina ’rímaj ’rinqui, Biblia nin: «Mana respetuan ’rimas suj espada ina nanachiyta atin, sábiop ’rimaynin suj ampina can» (Proverbios 12:18, La Biblia Latinoamérica, 2011). Jehóvap espiritun yanapasoncka, munayuan y bondaruan ’rimanayquípaj (Gálatas 5:22, 23; Colosenses 4:6).

IMÁT ’RUAYTA ATINQUI:

• Yayát máñay yanapasunánpaj sosegascka tianayquípaj y allít uyarinayquíypaj, manáraj conyugeyquian súmaj imastismanta ’rimas

• Allít pensanayqui tían imát nej ’rinqui, imaina nej ’rinqui

BIBLIA NISCKANTA: Conyuges casaracuptincu «sujlla aicha» cancu (Mateo 19:5). Pero íshcay personas cas seguincu ima huaquin cutis mana quiquin pensancu. Chayraycu alli can aprendenayquishta tucuypi cusca tiayta (Filipenses 2:2). Cuscas tianayquísh tían áicap ímaj cachun ’ruayta munanquísh. ¿Imaina ’ruacuyta atin? Biblia nin: «Planescka alli consejosuan [...] firme ’ruacuncu» (Proverbios 20:18). Sáckey principius Bibliamanta yanapasunánpaj áicap ímaj cachun ’ruayta munanquísh (Proverbios 8:32, 33).

IMÁT ʼRUAYTA ATINQUI:

• Manalla túcuy laya imastismanta conyugeyquian ’rimanayqui tián; sentimientusniyquimantapas ’rimápuy

• Imaj cachun ’ruanaspá, huamajta conyugeyquian ’rímay