Ucha an Dios mandashcaunara cuntra rij maicans rurana, sintina, iyanas (1 Juan 3:4; 5:17). Biblia nin Dios ñaupai manalira rurana ucha an, shinallara alira mana rurana (Santiago 4:17).

 Biblia quillcashca shimiunai, “ucha” shimi nisha nin, pandasha shitana, munashcaras mana pactana. Intindingaj cai ejemplora ricui, ñaupa Israel llactamanda suldaruuna rumira cara huascahua “mana pandasha ali shitanara” yachaj anuca. Cai shimiuna shuj shimima pasajta pasachisha nisha nin: “uchara mana ruraj anuca” (Jueces 20:16, Nueva Biblia Española). Shina asha, uchara rurana an, Dios tucui mandashcaunara mana pactachina.

 Dios ñucanchira Ruraj ashcamanda, dirichura charin runaunara mandashcaunara cungaj (Apocalipsis 4:11). Dios caran runa quiquin rurashcaunamanda caudsayachinga (Romanos 14:12).

¿Shu ucha illaj runa tiana ushanzhu?

 Mana, Biblia nin: “tucui runauna ucharanaushcami, Diospa sumajmanda anzhurinaushcami” (Romanos 3:23; 1 Reyes 8:46; Eclesiastés 7:20; 1 Juan 1:8). ¿Imarasha tucuiguna uchayujcuna anchi?

 Pundallai, Adán, Eva uchara mana ruraj anuca Dios ucha illaj paigunara rurashcamanda, paiguna Dios cuinta ricuringaj rurashca anuca (Génesis 1:27). Shinajpi, uchayuj tucunuca Ruraj Diosta mana casushcai (Génesis 3:5, 6, 17-19). Huahuaunara charishcai uchara pasachinuca, shu pasachij ungüi pasachina cuinta aca (Romanos 5:12). Rey David rimashca cuinta tucunchi: “Pagarishcai pandaimanda ña culpayuj acani” (Salmo 51:5).

¿Maican uchauna mas atun anun?

 Ari, por ejemplo Biblia nin, Sodoma llactai causaj runauna “yapa uchara raj anuca”, paiguna uchauna “yapa atun” aca (Génesis 13:13; 18:20). Imarasha maican uchauna mas atun ashcara intindingaj, quinsa iyaigunara ricushun.

1.   Yapa manali. Biblia nin tacarina, yanga diosgunara adurana, shuhuana, machana, umachisha quichuna, huañuchina, sagranas atun uchauna anun (1 Corintios 6:9-11; Apocalipsis 21:8). Biblia ricuchin cai tunu uchauna mas atun anun, mana quiquin munaihua rurashca uchaunamanda, maicambi shujcunara mana munasha shimiunahua, rurashcaunahua llaquichinchi (Proverbios 12:18; Efesios 4:31, 32). Shinajpi, Biblia rimashca cuinta chi tunu uchaunaras manali cuinta ricuna anchi, atun uchaunai mana urmangaj (Mateo 5:27, 28).

2.   Imarasha uchara rurashca. Maican uchauna Dios mandashcaunara mana intindishcamanda rurashca anun (Hechos 17:30; 1 Timoteo 1:13). Shinajpi, Biblia nin tucui uchauna Diospa ñaupai manali an, shinallara ricuchin Dios mandashcaunara ali yachashallara rurajpi, Diospa ñaupai mas atun ucha an (Números 15:30, 31). Biblia yachachin, shu runa manali ashcara yachashallara quiquin munashcahua rurasha “milli shunguyuj” runa tucun (Jeremías 16:12).

3.   Masna cuti rurana. Biblia ricuchin ashca cuti shu uchara rurasha catisha Diospa ñaupai yapa manali an (1 Juan 3:4-8). Chimanda, Biblia yachachinara intindishallara uchara rurasha causangaj munajcunara Yaya Dios taripangami (Hebreos 10:26, 27).

 Maican runauna atun uchaunara rurashcamanda, Rey David cuinta yapa llaqui sintirinun, pai nica: “Ñuca pandarishcauna ñuca uma ahuai tian; llashaj aparina cuinta, ñucaj yapajta llashaj an” (Salmo 38:4). Shinajpi, Biblia cai sumaj chapanara cun: “Aripintiringuichi Yaya Dios tucui huras perdonangaj munashcamanda, pai cangunara ali shungura ricuchin, manaliuna paiguna iyaira turcachinuchu, shinallara paiguna manali rurashcaunaras saquinuchu” (Isaías 55:7, Traducción en lenguaje actual).