Ari. Yaya Dios paihua chuyaj shunguhua sirvijcuna ungurinujpi ashcara llaquirin. Caimanda rimasha Biblia cai pactachina shimira riman: “Jehová paita yanapanga camai ungushca ashcai” (Salmo 41:3). Cai quinsa iyaigunara catina ushanchi shinzhi ungüigunara charishcai.

1.   Yaya Diosta ursara mañai ahuantasha catingaj. “Diospa tucui intindinara pasaj” cushira yanapangami mana yapa turbarishca sintiringaj shinallara ministishca ursara cungami ñaupajma catingaj (Filipenses 4:6, 7).

2.   Cushi iyaira charisha cati. Biblia nin: “Cushi shungura charisha ali ambi cuinta an, astaun llaqui shungura charisha canda sambayachin” (Proverbios 17:22). Cushi iyaira charisha mana yapa llaquiringaj, aliyangaj yanapan.

3.   Chapanara shinzhiyachi. Chapana yanapan cushiyangaj shu ungüihua pasaushcai (Romanos 12:12). Biblia riman shu punzha mana pis ningachu: “Ungushca ani” nisha (Isaías 33:24). Yaya Dios tucuchingami doctorguna mana tucuchingaj ushashca ungüigunara. Shinallara rucu ashcamanda turmindarinaunara ansa ansa tucuchingaraun, chimanda Biblia nin: “Paihua aicha malta tucusha catichu; malta punzhaunai charishca ursara cutillara charichu” (Job 33:25).

 Nota: Jehovahuaj testigoguna Yaya Dios yanapai ashca valij ashcara quirinchi shinajpi maican ungüira apishcai doctor yanapaira mascanchi (Marcos 2:17). Shina rurashas mana rimanchi cai tratamientora catingui nisha, chi randimanda caran duiñu ajllachu saquinchi.