Jehová a Dios punda carira huarmiras casarachica. Biblia nin Yaya Dios punda huarmira rurarca chi huasha “carima apamuca”. Adán yapa cushi sintishcamanda casna nica: “Ñuca tullumanda tulluuna ñuca aichamanda aicha” nisha (Génesis 2:​22, 23). Jehová Dios chara munanmi cari huarmi paigunapura cushi causanuchu.

Casarajcuna iyanunmi tucui huras cushi causashunmi nisha. Shina iyajpis yapa llaquinushas cari huarmiga problemagunara charinungami (1 Corintios 7:28). Cai quillcai Bibliamanda iyaigunaga tupangaraungui, pactachijpi camba huarmira o carira camba familiaras yanapangami, ali gustu causangaj (Salmo 19:​8-11).

BIBLIA NINMI: Casarashca cariga paihua huarmi umami an nisha (Efesios 5:23).

Jehová Dios munanmi cariga paihua huarmira llaquihua cuirachu (1 Pedro 3:7). Yaya Diosga yanapaj shinami huarmira rurarca chiraigu huarmira respetuhua llaquihuas cuiranami an (Génesis 2:18). Cariga paihuajlla iyana randi huarmira yapa llaquishcamanda pai munashcara valichinami an (Efesios 5:​25-29).

Jehová Dios munanmi huarmi paihua carira tucui shunguhua uyachu, cari rurana ajllashcaras yanapachu nisha (1 Corintios 11:3; Efesios 5:33). Chiraigu camba cari ima rurangaj ajllashcara tucui shunguhua yanapanami angui (Colosenses 3:18). Pactachijpimi paihua cari ñaupai Jehová Dios ñaupais yapa valishcami anga (1 Pedro 3:​1-6).

CAMANA USHANGUICHARI:

• Camba carira o huarmira tapuna ushangui shu ali cari o huarmi tucungaj imara mas rurana ushani nisha. Camba cari o huarmi rimashcara ali riparasha uyashca huasha rurangaj ursaringui

• Ama dsas piñaringuichu. Parijumanda gustu cushiyachisha causangaj huaquimbi unayanmi

BIBLIA NINMI: Casarashcauna parijumanda caran duiñu ministishcaunara mana cungarinachu anguichi (Filipenses 2:​3, 4). Jehová Dios munanmi paita sirvijcunaga paihua carira o huarmira cushiyachichu (2 Timoteo 2:24). Rimangarausha ñaupara imasna rimanara iyarinami angui, Biblia casnami riparachin: “Chi shimi caramandallara ali shimiuna manali shimiunas llucshinaun. Ñuca uquiuna, casna mana valinzhu” (Santiago 3:10). Jehová Diospa espíritu yanapangami llaquihua ali sintichij shimiunahuas rimangaj (Gálatas 5:​22, 23; Colosenses 4:6).

CAMANA USHANGUICHARI:

• Manara camba carihua o huarmihua rimashallara ñaupa punda Yaya Diosta mañana angui ahuantangaj mana dsaslla piñaringajpas

• Iyari imara rimasha imasna rimasha nisha

BIBLIA NINMI: Casarashcaunaga “shu aichalla” tucunun (Mateo 19:5). Shina ajpis shu cari shu huarmi caran shujmi anun chiraigu caran tunu iyaira charinun. Chimandami ministinun ishquindi chi samillara iyangaj sintingajpas (Filipenses 2:2). Imaras ruranara ajllangaj pariju chillara rurangaj munanami anun. ¿Caita imasnara rurashun? Biblia ninmi: “Tapusha uyajpimi ima ranas ali llucshin” nisha (Proverbios 20:18). Ishquindipura ima ranaras ajllashaga Bibliamanda iyaiguna yanapachu saquina anguichi (Juan 13:17).

CAMANA USHANGUICHARI:

• Camba carihua o huarmihua yanga rimaigunamandallas ama rimanguichu; camba sintirishcaunamanda rimangui

• Imaras rurangahua camba carihua o huarmihua rimangui