LECCIÓN 12
¿Imara yanapanga Bibliara yachasha catingaj?
Bibliara yachanaga shu partima pasiasha gustu mas yachana cuinta an. Shinajpi tucui huras mana ahuallachu an. Maicambi tapurishcanguichari Bibliara yachasha catishachu nisha. ¿Imarasha ursarisha catina anchi? ¿Imara yanapanga problemagunara charishas yachasha catingahua?
1. ¿Imarasha valishca an Bibliara yachana?
“Diospa shimi causajmi, ushajmi” (Hebreos 4:12). Biblia mas valij libro an Diospa iyaiguna charishcamanda ñucanchira llaquishcara yachachishcamanda. Shinallara mas yachangahua, ali decisiongunara apingahua, gustu chapanara charingahua yanapangami. Astaumbas Biblia yanapangami Diospa amigo tucungahua. Caran cuti Bibliara estudiasha, Diospa ushai canda yanapachu saquingui.
2. ¿Imarasha Bibliamanda sirtu shimira valichina anchi?
Bibliamanda sirtu shimiuna ashca valishca anun. Chiraigu Biblia animan: “Sirtu shimira randisha ama catuichu” (Proverbios 23:23). Bibliamanda sirtu shimiuna ashca valishca ashcara intindisha, ima arcaigunara charishas Bibliara estudiasha catingaj ursarishun (leai Proverbios 2:4, 5).
3. ¿Imasnara Jehová canda yanapanga Bibliamanda yachasha catingahua?
Jehová tucuira ushaj tucuira ruraj camba amigo ashcamanda, can mas paimanda yachachu munan. Chiraigu pai canda “shungüi munaira cun, ranaras cun” (leai Filipenses 2:13). Can mas yachana munaira, yachaushcara pactachingaj munaira ministijpi Jehová yanapana ushan. Bibliara estudiasha catingaj maican arcaiguna charijpis Jehová Dios ursara cungami ñaupajma catingaj. Shinallara caran cuti Jehová Diosta mañai canda yanapachu Bibliamanda yachasha catingahua (1 Tesalonicenses 5:17).
MAS YACHAI
Yachai imasna can lugar mana charishas, maicambi shujcuna Bibliara estudiachu arcajpis estudiasha catina ushangui. Shinallara ricui imasna Jehová canda yanapanga shina rurangahua.
4. Ama cungaringui timpura llucchisha Bibliara estudiangaj
Huaquimbi ashca cosasgunara rurana ashcamanda timpura mana charinchi Bibliara estudiangaj. ¿Imara yanapana ushan? Leaichi Filipenses 1:10, huasha catij tapuigunamanda rimaichi:
-
¿Maicanda an mas valishca ruranauna?
-
¿Imasnara timpura llucchina ushangui Bibliara estudiangaj?
-
Shu baldei ñaupa punda tsatsara churasha, huasha huaquin rumiunara undachijpi mana tucui rumiuna icungachu.
-
Shinajpis ñaupa punda rumiunara churajpi, huasha tsatsa ñaca tucui icungami. Shinallara valishca ruraigunara ñaupa punda churasha tucuira pactachina ushangui, shujta ruraigunara rurana ushanguimi.
Diosta ricsina munai charishcara pactachingahua adurangahuas Bibliara estudiana yanapan. Leaichi Mateo 4:4, huasha catij tapuimanda rimaichi:
-
¿Imasnara yanapan timpura llucchina Bibliara estudiangaj?
5. Maicanguna can Bibliara estudiachu arcajpis ñaupajma catingui
Huaquin runauna rimanunga can Bibliara estudianara saquichu. Ricui Francesco ejemplora. VIDEORA ricuichi, huasha catij tapuigunamanda rimaichi:
-
Videoibi ricushca cuinta Francesco paihua aillura amigogunaras Bibliara estudiaushcara cuintajpi paiguna ¿imara ruranuca?
-
¿Imarasha valishca aca Francesco ñaupajma catichu?
Leaichi 2 Timoteo 2:24, 25, huasha catij tapuigunamanda rimaichi:
-
Camba aillu camba amigoguna ¿imara ninun can Bibliara estudiajpi?
-
Cai texto rimashca cuinta can Bibliara estudiachu mana munanujpi ¿imasnara cutipana angui? ¿Imarasha?
6. Jehová canda yanapanara quiringui
Jehová Diosma mas llutarisha mas paita cushiyachingaj munanchi. Shinajpis maicambi Jehová munashca cuinta causangahua turcaringaj shinzhi ajpis, ama sambayaichu, Jehová canda yanapangami. VIDEORA ricuichi, huasha catij tapuigunamanda rimaichi:
-
Videoi ricushca cuinta ¿ima turcaigunara Jim rurarca Jehová ñaupai ali ricuringaj?
-
¿Imara mas gustan paihua ejemplomanda?
Leaichi Hebreos 11:6, huasha catij tapuigunamanda rimaichi:
-
Jehová ¿imara ruranga paita mascajcunamanda paita tucui shunguhua ricsingaj cushiyachingaj ursarijcunamandas?
-
Jehová ¿imasnara sintin can Bibliara estudiangaj ursarishcara ricusha?
RUNAUNA CASNA NINUJPI: “¿Imarasha Bibliara estudiangui?”.
-
¿Imara can cutipanguima?
IMARA YACHASHCANGUI
Huaquimbi Bibliara estudiana shinzhi ajpis, cushihua huiñaigama causangaj yanapangami. Jehová Diospi quirisha catijpi pai canda bendiciangami.
Iyaringaj
-
¿Imarasha Bibliamanda sirtu yachachishcaunara valichingui?
-
Maican mas valishca ruraiguna ashcara yachashca huasha ¿imara rurana angui?
-
¿Imarasha Jehová Diosta mañana angui canda Bibliara estudiasha catingaj yanapachu?
RICUNGUI
Ricui chuscu yanapaiguna maican runaunara yanapashca timpura ali utilizangaj.
“Timpura imasna ali utilizana anchi” (¡Despertad!, febrero de 2014)
Shu huarmi Diospa ñaupai ali tucungaj rurashcaunara paihua cari mana intindicachu. Ricui imasna Jehová paita yanapashcara.
Ricui imasna shu huarmi Biblia estudianara mana saquishcamanda paihua carira yanapaca.
Huaquin runauna rimanun Jehovahuaj testigoguna ailluunara chicanyachinun nisha. Shinajpi ¿chiga sirtuchu?
“¿Jehovahuaj testigoguna ailluunara chicanyachinunzhu, gunllayachinunzhu?” (jw.org partii tiaj tema)
Cai temagunaras leana munanguichari
TAPUIGUNA
Jehovahuaj testigoguna Bibliamanda yachachinchi
Jehovahuaj testigogunahua gratis Bibliamanda yachashcai can munashca Bibliara utilizana ushangui. Astaumbas munasha camba ailluunara amigogunaras cumbirana ushangui canhua yachangaj.
