PUNTO 14
Jesusta catijcunaga ¿imarasha tandarisha Yaya Diosta aduranchi?
1. Ñaupa llacta Israelda ¿imarasha Yaya Dios ali puruntuchisha tandachica?
Diosga Abrahán miraimanda shamujcunara shuj llacta rasha leygunara cuca. Chi llacta Israelmaca. Paigunallami Diosta ali aduranuca. Shinallara Diospa Shimira alira cuirana anuca (Romanos 3:2). Paigunama mingashcara pactachishcamanda shu llactaunas bendiciai tucununmaca. Leapai Rashcauna (Hechos) 3:25.
Ñaupa Israelda Dios ajllacami paihua testigoguna tucunuchu. Israel llacta Dios mandashcaunara pactachishaga ali causana anunmaca (Deuteronomio 4:6). Israelmanda shuj llactaunas Jehová Diosta ricsina ushanunmaca. Leapai Isaías 43:10, 12.
2. Jesusta ali catijcuna ¿imarasha ali purunturishca, tandarishca ana anun?
Israelga, Dios ajllashca llacta ashas, paita mana casunucachu. Chiraigu, Jehová Diosga Jesusta ali catijcunara ajllaca paihua llacta, paihua testigoguna tucunuchu (Mateo 21:43; 23:37, 38). Cunan timpui, Israelga ña mana Diospa llactachu an. Leapai Rashcauna (Hechos) 15:14, 17.
Jesús paita catijcunara puruntuchica, intiru mundui Bibliara ricsichingaj, shuj runaunas Jesusta catinuchu yachachingaj (Mateo 10:7, 11; 24:14; 28:19, 20). Cunan punzhai, Jesusta ali catijcunaga Bibliara intiru mundui ricsichirianun. Jehová Diosllami tucui llactaunamanda ashca huaranga huaranga runaunara ali religiombi tandachiun (Ricuchina [Apocalipsis] 7:9, 10). Jesusta ali catijcuna tandarishca ashcamanda, paigunapura yanaparinun, animarinun. Astaumbas Bibliara yachangahua tandarisha, intiru mundui chi tunullara uyanun. Leapai Hebreos 10:24, 25.
3. Jehovahuaj testigoguna organizacionga ¿imasnara cunan timpui callarica?
Cai organizacionga 1870 huatai callarica. Chi huatai ansalla runauna Bibliara estudiasha alira intindinuca. Paiguna intindinucami, Jesús paita catijcunara alira puruntuchisha saquishcara Diospa Shimira ricsichingaj. Chiraigu, paigunas Bibliara intiru mundui ricsichisha callarinuca. 1931 huatai Jehovahuaj testigoguna nishca shutira apinuca. Leapai Rashcauna (Hechos) 1:8; 2:1, 4, 11; 5:42.
4. Jehovahuaj testigoguna ¿imasnara ali purunturishca, tandarishca anun?
Jesús huañushca huasha, ansapurahualla pushaj cuiraj cariunaga caran llactai tiaj Jesusta catijcunara yanapasha catinuca. Paiguna tucuigunara yanapaushas, Jesusmi tucui congregacionda mandaj ashcara yachanuca (Rashcauna [Hechos] 16:4, 5). Shinallara, cunan punzhai intiru mundui Jehovahuaj testigogunara yanapangahua Cuiraj Muntun tian. Paiguna Yaya Diosta ashca huatauna sirvishcamanda, intiru mundui tiaj sucursal oficinagunara ricusha alira yanapanun. Chi oficinagunai tarbarianun, Bibliamanda quillcaunara 600 shimiunai pasachingahua. Shinallara Bibliamanda quillcaunaras rasha ashca partiunama cachanun. Cuiraj Muntun 100.000 yali congregaciongunai tiaj huauquiunara Bibliara yachachisha animanun. Shinallara ali puruntuchishca huauquiunaga caran congregaciombi tiaj huauquiunara llaquihua cuiranun. Leapai 1 Pedro 5:2, 3.
Jehovahuaj testigoguna ali purunturishcami anun, Bibliamanda ali gustu cuintashcaunara yachachingaj. Paigunas, apostolguna cuinta, huasi huasi risha Bibliamanda cuintarianun (Rashcauna [Hechos] 20:20). Shinallara Bibliamanda ali intindingahua munaj runaunara, paiguna huasii yachachinun. Jehovahuaj testigoguna mana paiguna tandarinallai saluranunzhu. Randiga, shu aillu cuintami paigunapura cierto llaquinunun. Chiraigu, Yaya Dios paigunara bendiciaunmi (2 Tesalonicenses 1:3). Jehovahuaj testigoguna Diospa munaira pactachishcamanda, shinallara shuj runaunara yanapashcamanda, mas cushi anun. Leapai Rashcauna (Hechos) 20:35; 1 Pedro 2:9.
