CASARASHCAUNAJ
1. Casarashcauna paiguna rimashca shimira pactachina
¿IMARA AN?
Casarashcauna paiguna rimashca shimira pactachina munajpi casarana causaira unaigama cuinta ricunun, chi yanapan ali sintiringahua. Ishquindipura yachanun ima tucujpi pariju causasha catinunga.
Maican casarashcauna parijumanda catinun paihua aillu amigoguna rimashcamandalla. Shinajpi mas ali anga paiguna pactachina shimira ricuchingaj llaquinamanda, respetashcamanda.
BIBLIAMANDA IYAI: “Cari ama ichuchu paihua huarmira” (1 Corintios 7:11).
“Casaranai rimashca shimira pactachisha mana uctalla piñaringahua yanapan, shinallara perdonangaj, perdonahuai nisha mañangaj mas ahuallami an, turmindusguna charishas ichilla arcaiguna cuinta ricungaraun ama llushpiringaj” (Micah).
¿IMARASHA VALISHCA AN?
Casarashcauna paiguna rimashca shimira mana pactachisha, turmindusguna tiajpi maicambi iyanunga ña mana pariju catina ashcara, astaumbas paiguna casaranara tucuchina munanunga.
“Ashca casarashcauna iyarinun llaquiunara charisha divorciarina ushashcara. Divorciarinai iyarisha casarasha, sirtu pacha pactachina shimira mana charishcangui” (Jean).
¿IMARA RURANA USHANGUI?
CANLLAI IYARI
¿Imara ruraungui camba carihua, huarmihua piñanushcai?
¿Aripintiringuichu casarashcamanda?
¿Iyaringuichu imasnara causanguima shujhua?
¿Rimanguichu “canda saquisha, mascangarauni shuj ñucara valichichu”?
Maicanda cai tapuigunamanda ari cutipasha, camba pactachina shimira shinzhiyachina angui.
CARI HUARMI PARIJULLA CUINTARINGAJ
¿Ñucanchi casarashcai pactachina shimira pishiyashcachu? Shina ajpi, ¿imarasha?
¿Imara rurana anchi ñucanchi pactachina iyaira shinzhiyashca tucuchu?
CASNA RURAI
Camba llaquishcara ricuchingaj ima shituhuaras quillcasha cuyangui.
Camba cari o huarmi fotora camba tarbanai charingui.
Camba carira o huarmira cayangui tucui punzhauna tarbanai, shuj partima rishcai.
BIBLIAMANDA IYAI: “Dios llutachishcara runa ama llushpichichu” (Mateo 19:6).
