Ali cuintarina yayaunahua churiunahuas anmi ali iyaigunaras sintirishcaunaras parijumanda chimbachingaj.

Malta churihua cuintarina mana ahualla an. Camba huahuauna ichilla ashcai tucuira cuintanuj aca, cuna maltauna asha ña mana cuintanun ichilla cuintashca cuinta paiguna sintishcara ima nishcaras. Cai anmi imasna atun anzhu yacui ashca cuinta caran partimanda ricunun. Cai tucujpi camba churiuna mas canhua cuintaringaj ministinun.

Camba churi cuintarina munajpi purunturishca ai. Rurai chi cuintarina chaupi tutagama ajpis.

“Huaquimbi rimasha nisha sintiringui: ‘¡Intiru punzha pariju pasashcanchi ¿cuna cuintarina munangui?!’. Shinajpi ¿imasnara shina rimana ushangui camba churi cunara paihua shungura pascajpi? ¿Manzhu chi anga tucui yayauna munashca?” (Lisa).

“Uctalla puñungaj gustahuanmi, shinajpi maican gustu cuintarina ñuca malta churiunahua ashcami chaupi tutara pasashcai” (Herbet).

BIBLIAMANDA IYAI: “Pihuas paihua quiquin ali tucunara ama mascachu, astaun shujpaj ali tucunara mascachu” (1 Corintios 10:24).

Alira uyai. Shu yaya nin: “Huaquimbi ñuca churiuna rimarianujpi shuj cosasgunai iyaringaj callarini. Shinajpi paiguna riparanun”.

Cambas shinallara sintirisha huañuchi televisionda, Internetma icuna aparatogunara. Alira uyai camba churi rimangaj callarijpi, shina rurasha ricuchingui camba churi ministishcara imasna ichilla cosasguna ajpis cambaj ashca valij ashcara.

“Ministishca an ñucanchi churiuna yachanuchu paiguna sintishcauna ñucanchij ashca valishcara, manajpi mana cuintanunga paiguna pasashcara, shuj partiunai yanapaira mascanunga” (Maranda).

“Ama manzharichu camba churi can mana uyana shimira rimajpi” (Anthony).

BIBLIAMANDA IYAI: “Cuiraichi imasna uyanguichi” (Lucas 8:18).

Maican timpuis puruntushca ai. Huaquimbi maican maltauna sintirinun paiguna yayaunahua cuintaringaj ña ganaslla sintirishcai.

“Ñucanchi shuj partima rishcai cuintangaj sintirinchi. Parijulla tiarina mana ñahuipura tiarisha yanapashca ali cuintanunara charingaj” (Nicole).

Cuintaringaj micuna huras ali gustu an.

“Tutai micushcai tucuiguna cuintarinchi imasna punzhai ali, manali pasashcara. Casna rurana ñucanchira llutachin, iyachin imasna sapalla mana cai llaquiunara pasangaj” (Robin).

BIBLIAMANDA IYAI: “Tucui runa puruntu achu uyangaj, randi rimangaj [...] unaiyaj achu” (Santiago 1:19).