Pactachina iyai mana shu iyarishcalla, puñusha iyarishca cuintalla. Shu iyaira pactachingahua iyarina, intindina, shinzhi tarbana ministinchi.

Metaguna an ansalla timpu chaupi timpu ashca timpu, cai metaguna pactachingahua unayachina ushan ansalla punzha, quillauna, huatauna. Ashca timpu metagunara pactachingaj ansalla metagunara ministin.

Cai metaguna pactachingaj yanapangami canllaira confiangaj mas amigogunara charingaj shina cushi causangaj.

Canllaira mas confianguimi. Ansalla metaguna apisha pactachisha, ashca timpu metaguna apina ushangui. Shina rasha caran punzha problemagunara ahuantana ushangui, imasna maicambi escuelai turbachinujpi.

Mas amigoguna charingui. Ashca runauna gustanun cai tunu metagunara charijcunahua pasangaj shina rasha pactachingaj. Shinallara mas amigo tucungaj ali an pariju tarbasha shu metara pactachingaj.

Mas cushimi angui. Cai metagunara charisha pactachisha, alira rurashcara sintiringui.

“Metaguna churasha cushi sintirini, yanapanmi mana yanga timpura pasangaj ursarisha pactachingaj. Shu metara pactachina alimi ashca, huashama ricusha: ‘¡Ña pactachishcani!’ nisha” (Christopher).

BIBLIAMANDA IYAI: “Huairara ricuj runa mana tarpungachu shinallara puyura ricuj runa mana pallangachu” (Eclesiastés 11:​4).

Shu meta churasha pactachingahua cai rimashcaunara pactachisha cati.

Metagunara ajllai. Quillcai can munashca metagunara, huasha ajllai ima metagunara ñaupa pundai, huashai pactachingaraungui.

Shu programara rurai. Caran metagunahua casna rurai:

• Ima fechara pactachingaraungui ajllai.

• Quillcai imasnara pactachingaraungui.

• Iyari ima tunu turmindusguna charisha pactachingaraungui.

Pactachi. Mana ministingui tucui puruntushca achu caita rurangaj. Ñaupa pundai iyari imasna rasha cai meta pactachingaraungui, rurai. Ricui can imasna ñaupajma catiushcara camba metara pactachingaj.

BIBLIAMANDA IYAI. “Shu ali tarbaj runa iyarishca sirtu pacha alimi llucshinga” (Proverbios 21:​5).