Biblia mana shuj libroguna cuintachu. Cai libroi ñucanchira Rurajmanda camachishcaunara charin (2 Timoteo 3:16). Bibliai tiaj shimi canda ashca yanapana ushan. Bibliallara nin: “Diospa shimi causajmi, ushajmi” nisha (Hebreos 4:12). Biblia cai ishqui parti canda yanapana ushan: caran punzha causangaj camachishcaunara cusha, shinallara Diosta pai rimashca shimiunaras mas ricsingahuas (1 Timoteo 4:8; Santiago 4:8).

Caran punzha causangaj camachishcaunara cun. Biblia ñucanchi rurashcaunamanda camachin shinallara shuj rimanaunamandas.

• Shujcunahua apanunai (Efesios 4:31, 32; 5:22, 25, 28, 33).

• Ñucanchi causanai sintishcaunais (Salmo 37:8; Proverbios 17:22).

• Ali rurangaj yachachishcaunas (1 Corintios 6:9, 10).

• Cullquimanda (Proverbios 10:4; 28:19; Efesios 4:28). a

Asia partimanda shu casarashca aillu ricucami Biblia camachishcauna yapa ali ashcara. Imasna ashca casarashcauna cuinta, pariju causangaj ali cuintanunungahua shinzhi aca. Shinajpis Bibliai leashcara casungaj callarinuca. ¿Imara tucuca? Vicent cari nin: “Bibliai leashca yanapaca casarashca ucui problema tiashcara llaquihua alichingaj. Camachishcaunara casuna ñucanchi cushi causangaj yanapashca”. Paihua huarmi Annalou shinallara nin: “Bibliamanda ali rurashcaunara leana ñucanchira ashca yanapaca. Cuna cushi huarmi ani shinallara pariju tarbana munaira charishcamandas”.

Diosta ricsingaj yanapan. Casaranamanda caimandas Vicent nin: “Bibliara leana yanapaimanda Jehová Diosta mas mayan sintini”. Cai ricuchin: Biblia canda yanapana ushanmi Diosta mas ali ricsingahua. Paita ricsina pai camachishcauna yanapangami shinallara paihua ali amigo tucungui. Huasha punzha ali causanamanda Biblia rimashcaras yachangaraungui, chibi sirtu pacha ali causanara charishun (1 Timoteo 6:19). Mana maicans libro casna tunu cuintashcaunara charinzhu.

Bibliara leangaj callarisha mana saquisha cambas, camba causaira alima turcachina ushanguima, Jehová Diostas mas ali ricsinguima. Huaquimbi leaushcai ashca tapuiguna llucshin. Casna tucujpi Etiopiamanda runa ali rurashcai iyari pai ishqui huaranga huata ñaupa causaca. Cai runa Diospa Shimimanda ashca tapuigunara charica. Jesusta catij Felipe tapucami leaushcara intindinguichu nisha, Etiopiamanda runa nica: “¿Ima rashara ushasha maicambas mana yachachijpi?” b nica. Huasha saquicami ali yachachij Felipe yanapachu (Hechos 8:30, 31, 34). Shinallara cambas Bibliara mas ali intindina munajpi jw.org paginai camba shutira undachingaj cumbiranchi o cai quillcaibi can causaushca mayanlla direccionda quillcai. Shinallara camba llactai causaj Jehovahuaj testigogunara cayana ushangui o shu tandarina huasima llutarina ushangui. Animanchimi cunallara shu Bibliara mascachu, Biblia canda yanapachu saqui.