Jehovahuaj testigoguna cuna timpui ashca publicacionguna, videoguna Internetpi llucchiunchi. Shinajpi ashca llactaunai ñucanchi huauquiuna Internet charingahua cullquira mana charinun. Shujcuna causaushca partiunai tucui huras Internet mana charinun, maicambi yapa unayaj an. Randi shuj partiunai Internet mana tian.

 Shinajpi cuna ashca huauquiuna Internet mana charishas ñucanchi Internetpi tiaj publicaciongunara descargana ushanun. ¿Imasnara?

 JW Box nishca ichilla caja, Internet charingaj shinzhi aj lugargunai congregaciongunama cachangaj an. Cai ichilla caja shu empresai randishca rúter nishca aparatura charin, shinallara Betel Computacionmanda Oficina, jw.org paginai tiaj publicaciongunahua, videogunahua rurashca Internet programa charin. Caran cai ichilla aparato 75 dólares valin.

 Huauquiuna Reinomanda Tandarina Huasii paiguna celularguna, tabletauna wifi nishcamanda JW Box aparatura conectarisha publicaciongunara, videogunara descargananun. Ñaupa llucchishca, mana ashca cullqui valij aparatogunahua cai cajara conectarina ushanun. Shinajpi shu congregación Internet mana charijpi ¿JW Box aparatoi mushuj publicacionguna imasnara charina ushanun? Sucursal jw.org paginai mushuj llucchishca publicacionguna memoria USB nishcai churasha, caran cuti congregaciongunama cachan. Huasha JW Box cajai conectajpi descarganun. Caran memoria USB ñaca 4 dolar valin.

 JW Box ¿imasnara ñucanchi huauquiunara yanapashca? República Democrática del Congo llactai causaj Nathan Adruandra shuti huauqui nin: “Ashca timpumanda ‘Oh, Jehová, en ti confío’, Acuérdense de la esposa de Lot nishca videogunara descargana munacani shinajpi mana ushacanichu. Llaqui sintiricani. Shinajpi cuna ña ushani ñuca telefonoi videogunara descargangaj, chita yanapan ñucanchi huahuaunara alira yachachingaj”.

 Nigeria llactai JW Box churangaj yanapaj huauqui nica: “Huauquiuna JW Box nishara Jehová valishca cuyashca cuinta ricunun. Ashca cushi sintirinun publicaciongunara videogunara yachachingaj yanapaiguna partimanda descargangaj ahualla ashcaraigu”.

 África, Oceanía, Sudaméricamanda llactauna congregaciongunama 1.700 yali JW Box nishca aparatoguna cachashcanchi, shinallara shuj congregaciongunama cachangaj tarbaunchi. Cai proyectora rurangaj ¿maimanda cullquira charinchi? Intiru mundui Bibliamanda yachachingaj cuyashca cullquimanda. Ashcauna Internetpi donate.dan124.com nishcai cullquira cuyanun. Ashca pagarachu ninchi canguna cuyaj shungura ricuchishcamanda.